“Ijambo ry’Imana ni imbuto. Buri mbuto yose iba ifite ihame ryayo bwite rituma iturika ikamera. Muri yo niho ubuzima bw’ikimera buba. Uko niko mu Ijambo ry’Imana harimo ubugingo.” – Imigani ya Kristo, p.38.
1. IGISABWA CY’INGENZI Kuwa Mbere 21 Mata
a. Ni ikihe gisabwa cyangombwa Yesu yabwiye abari bamuteze amatwi kugirango bazabone agakiza? Yohana 3:5 – 7; Matayo 18:1 – 3.b. Mbese ni iki Petero yerekana nk’uburyo dushobora guhinduka (kuvuka ubwa kabiri)? 1Petero 1:23.“Uguhinduka k’umutima tukaba abana b’Imana, muri Bibiliya kwavuzwe nko kuvuka….“Iyo ukuri guhindutse ihame rituye mu bugingo, umuntu aba “abyawe ubwa kabiri, atabyawe n’imbuto ibora, ahubwo abyawe n’imbuto itabora, abiheshejwe n’ijambo ry’Imana rizima rihoraho.” (1Petero 1 :23). Uku kuvuka bundi bushya ni ingaruka yo kwakira Kristo nk’ijambo ry’Imana. Bityo noneho kubw’Umwuka Wera, ukuri mvajuru gucengezwa mu mutima; ibitekerezo bishya bigakanguka, imbaraga zisanzwe zisinziriye zikabyukirizwa gukorana n’Imana…. Kristo niwe wahishuriye ab’isi ukuri. Ni we wabibye imbuto itabora; ari ryo Jambo ry’Imana mu mitima y’abantu.“Jambo asenya kamere, imiterere yo kurangamira isi, maze akadushyiramo ubugingo bushya muri Kristo Yesu – ishusho y’Imana.” – Ukwizera Kumbeshejeho, p.19.
2. IBY’ITEKA RYOSE N’IBY’IGIHE GITO NDETSE N’IBYANGIRIKA Kuwa Kabiri 22 Mata
a. Ni ayahe magambo ya gihanuzi Petero yanditse igihe yavugaga iby’intege nke z’ubuzima bw’umuntu? 1Petero 1:24; Yesaya 40:6 – 8.b. Mbese muri Bibiliya ubugingo bw’umuntu bugereranywa n’iki, kandi ni ukubera iki? Zaburi 103:15,16; Yakobo 4:14.“Nta gihe dufite cyo gupfusha ubusa. Ntabwo tuzi uburyo igihe twahawe cy’imbabazi gishobora kurangira vuba bidatinze. Tumaze igihe kirekire nyamara dufite igihe gito cyo kubaho hano kandi ntituzi uburyo umwambi w’urupfu ushobora guhinguranya imitima yacu vuba cyane….“Mbese turiteguye? Mbese twamenye Imana, Umutware w’ijuru, Nyiramategeko, ndetse na Yesu Kristo Uwo yatumye mu isi nk’Uyihagarariye? Igihe umurimo w’ubugingo bwacu uzaba urangiye, mbese tuzaba twiteguye kuvuga nka Yesu, we Rugero rwacu, duti: “Nakubahishije mu isi, kuko narangije umurimo wampaye gukora.…. mbamenyesheje izina ryawe.”(Yohana 17:4-6) – Umurimo wo Gukiza, p.454.c. Ubigereranyije n’ubuzima bw’umuntu bumeze nk’ibyatsi n’umwuka, mbese ni iki kizabaho iteka ryose nkuko Imana ihoraho? 1Petero 1:25; Zaburi 119:89.“Yesu yaravuze ati umuntu uzakira aya magambo mbabwiye akayagira urufatiro rw’imico ye n’urw’ubugingo bwe, azamera nk’abubaka amazu ku rutare. Mu myaka amagana menshi yabanjirije icyo gihe, umuhanuzi Yesaya yari yaranditse ati: “Ijambo ry’Imana yacu rizahoraho iteka ryose.” (Yesaya 40:8); kandi Petero, nyuma y’igihe kirekire ikibwirizwa cyo ku musozi kimaze kubwirizwa, ubwo yavugaga aya magambo ya Yesaya yongeye kuvuga ati: “Kandi iri ni ryo jambo ry’ubutumwa bwiza mwabwirijwe.” (Petero 1:25). Ijambo ry’Imana ni cyo kintu kimwe gusa kitanyeganyezwa cyigeze kimenywa n’abatuye isi yacu. Ni urufatiro nyakuri. ”Ijuru n’isi bizashira, ariko amagambo yanjye ntazashira na hato.” Matayo 24:35….“Igihe twakira ijambo tuba twakira Kristo. Kandi noneho rero abakira amagambo Ye bonyine ni bo bubaka kuri We….. Kristo, Jambo, Uguhishurwa kw’Imana, ukwigaragaza kw’imico Yayo, amategeko Yayo, urukundo Rwayo, n’ubugingo Bwayo – ni we rufatiro rwonyine dushobora kubakaho imico izaramba.“Twubaka kuri Kristo twumvira ijambo Rye…. Kwera…. ni ingaruka yo kwegurira Imana byose.” – Ibitekerezo byo ku Musozi w’Umugisha, p.148,149.
3. GUKURAHO IBISITAZA Kuwa Gatatu 23 Mata
a. Vuga bimwe mu bisitaza bitubuza kwakira Ijambo ry’Imana nkuko riri muri Yesu. 1Petero 2:1,2.“Mwakire amagambo ya Kristo mu mitima yanyu mu buryo bwuzuye, kandi mube abakora iby’ijambo Rye. Ntidushobora kwakira imigisha urukundo rwa Kristo no kubana natwe Kwe bishobora kuduha, niba duha urwaho ibyiyumvo bizangiza ubumwe Kristo yasabye ko buba mu bigishwa Be.” – Urwibutso n’Integuza, kuwa 25 Nyakanga 1893.“Ni twebwe ubwacu tugomba kubanza gukora. Jya usuzuma umutima wawe witonze. Uwusesengure kugirango umenye ibikubuza kubona Umwuka w’Imana ku buntu.” – Our High Calling, p.21.“Ntabwo hagomba kubaho kuvuga amagambo akomeretsa, amagambo yo gutukana akarishye ntabwo akwiriye, kuko abamarayika b’Imana bazenguruka buri cyumba….. Ikosa rito rishobora gukorwa, ariko amagambo yo gucyaha yo akangura ibyiyumvo byo kwihorera, kandi Imana irasuzugurwa….. Ijambo iryo ariryo ryose uvuze utabitekerejeho cyangwa utabigambiriye, ryakagombye gucecekwa, ukifata nturisohore mu kanwa…. Uyu niwo murimo wacu.” – In Heavenly Places, p.182.b. Tanga ingero z’uburyo uburakari bw’umuranduranzuzi, uburyarya n’ishyari byabereye abantu inkomyi bibabuza kwakira ijambo ry’Imana. Itangiriro 4:5 – 8; Mariko 15:10; Ibyakozwe n’Intumwa 13:44,45.“Ntabwo igihe cyose ari ko duhita duhabwa igisubizo cy’amasengesho yacu ako kanya…. Igihe dusabye Imana, Ishobora kubona ko ari ngombwa kuri twe gusuzuma imitima yacu maze tukihana ibyaha. Bityo noneho ikatunyuza mu bigeragezo n’ibidusuzuma, itunyuza mu biducisha bugufi, kugirango dushobore kubona ibitubera inkomyi zo gukorerwamo n’Umwuka Wera.” – Imigani ya Kristo, p.143.“Ishyari si ifuti ry’ingeso gusa, ahubwo ni ingeso mbi yangiza ubushobozi bwose bw’umuntu…..“Umunyeshyari ahumiriza amaso ye kugira ngo atareba ingeso nziza n’imirimo y’icyubahiro by’abandi. Ahora yiteguye gushyashyariza abandi no kuvuga nabi abeza cyane. Kenshi abantu baricuza bakareka andi makosa bakoraga, ariko byiringirwa gake ko umunyeshyari yakwitandukanya n’iyo ngeso. Kuko ishyari ritera umuntu kumva ko asumba abandi, ubwibone ntibukundira umuntu kwigaya. Iyo bagerageje kwemeza umunyeshyari icyaha cye, arushaho kwanga umuhannye ibibi bye.….“Umunyeshyari akwiza uburozi aho agiye hose, atandukanya incuti kandi abyutsa urwango no kugomera Imana n’umuntu.” – Ibihamya by’Itorero, vol 5, p.56.
4. KWIFUZA AMATA NYAKURI Y’IJAMBO Kuwa Kane 24 Mata
a. Amaze kwerekana Ijambo ry’Imana nk’imbaraga ihindura imitima yacu, mbese Petero adushishikariza kugaragaza “icyifuzo” bwoko ki? 1Petero 2:2.“Gushimira Bibiliya bigenda byongerwa no kuyiga…….“Nta cyaboneka cyatera imbaraga ubwenge bw’umuntu nko kwiga Bibiliya. Nta kindi gitabo cyera cyirabura cyaboneza gutekereza kwacu no kutwungura ubwenge, kikagura ubushobozi, kandi kirangwamo ukuri gukungahaza; nka Bibiliya. Iyaba abantu bigaga ijambo ry’Imana uko bikwiriye, baba bafite ubwenge bushyitse bw’inditwe, n’ingeso nziza ziboneye nubwo abameze batyo ari mbarwa muri iki gihe.“Nta bumenyi buhamye, budahindagurika kandi bugera kure buruta ubwo umuntu abona binyuze mu kwiga Ijambo ry’Imana.” – In Heavenly Places, p.135.b. Vuga zimwe mu mpamvu zitera abantu kwanga kwiga Ijambo ry’Imana. Yohana 3:19,20.“Wirengagije Ibyanditswe. Usuzugura ndetse ukanga ibihamya kubera ko bicyaha ibyaha byawe ukunda kandi bikakubuza kwitegaho amakiriro.” – Ibihamya by’Itorero, vol 5, p.49.c. Mbese abacurabwenge benshi muri Atenayi igihe cyabo cyose bagitakarizaga mu gukora iki, kandi ni ikihe kibazo gisa gityo kitwugarije muri iki gihe, by’umwihariko ku ikoreshwa nabi rya murandasi n’imbuga nkoranyambaga? Ibyakozwe n’Intumwa 2:21 – 23, 32; 2Abakorinto 4:3,4.“Yooo! Iyaba urubyiruko rwatekerezaga ku mpinduka inkuru zikangura irari n’amarangamutima zizana mu ntekerezo zabo! Mbese igihe mumaze gusoma izo nkuru mushobora kubumbura Ijambo ry’Imana mukarisoma mubyitayeho? Mbese ntimusanga igitabo cy’Imana kidashimishije?” – Urugo rwa Kidiventisiti, p.416.“Abantu benshi bari guca intege ubwenge bwabo binyuze mu gusoma inkuru n’ibitabo, kandi barimo gutakaza kwishimira Ijambo ry’Imana. Barimo kuba abadafite ubwenge, kandi ntibazashobora kubona mu mucyo nyakuri ibibazo bikomeye byugarije ubuzima [bwabo] n’ahazaza habo h’iteka, nibaramuka batiyambuye iyi migirire.” – Urwibutso n’Integuza, kuwa 14 Mata 1891.
5. GUKURA MU BY’UMWUKA Kuwa Gatanu 25 Mata
a. Mbese ni iki kidashoboka niba tutagumye kuba abigishwa b’Ijambo ry’Imana b’abanyamwete? 2Petero 3:18 (ahabanza).“Intumwa Petero yahuguriye abizera kwiga Ibyanditswe, bityo binyuze mu kubisobanukirwa neza, bazashobore gukora umurimo nyawo w’iteka ryose. Petero yasobanukiwe ko mu mibereho y’umuntu wese uzatsinda hazabamo ibimutera guhangayika ndetse n’ibigeragezo; ariko kandi yari azi ko gusobanukirwa Ibyanditswe bizashoboza ugeragezwa kwibuka amasezerano azahumuriza umutima kandi agakomeza kwizera Ishoborabyose.” – Ibyakozwe n’Intumwa, p.521.b. Ni akahe kaga kugarije “abasogongeye ko Uwiteka agira neza” ariko bagahinyura yuko ijambo ry’Imana rikorera mu mitima yabo? 1Petero 2:3; Abaheburayo 6:4 – 6.“Abantu benshi baradamaraye banyuzwe n’igihe kirekire bamaze bamamaza ukuri. Ubu ngubu bumva yuko bakwiriye ingororano kubera ibigeragezo banyuzemo ndetse no kumvira bagize mu gihe cyashize. Nyamara aka kamenyero gahamye mu byerekeye Imana by’igihe cyahise, gatuma imbere Yayo barushaho guhamwa n’icyaha cyo kutarinda ubunyangamugayo bwabo no kutajya mbere berekeza ku butungane. Ntabwo ubudahemuka bwo mu bihe byashize buzigera na rimwe buba inyishyu y’ibyirengagizwa gukorwa muri iki gihe. Kuba umuntu yarabaye umunyakuri ejo hashize, ntabwo bizahanagura kuba umunyabinyoma kwe kwa none.” – Ibihamya by’Itorero, vol 5, p.63.“Nimureke dushake Uwiteka buri muntu ku giti cye. Nimutyo abantu bafite ubunararibonye mu murimo w’iby’iyobokamana mu gihe cyashize, begere Imana.” – Ibid, vol 9, p.216.
IBIBAZO BYO KUZIRIKANWA Kuwa Gatandatu 19 Mata
1. Mbese ni izihe mbuto z’imibereho yahindutse by’ukuri?2. Ni gute nshobora kumenya niba niteguye gusanganira Umwami niba nari ngiye gupfa muri iri joro?3. Mbese haba hari mwene data cyangwa mushiki wanjye mu itorero ntakunda? Niba ari yego, ni ukubera iki? Mbese ibyiyumvo byanjye byashoboye kubatera ifuhe cyangwa ishyari?4. Ni gute mpora ngirwa inama yo kwiga Bibiliya ku giti cyanjye?5. Sobanura itandukaniro riri hagati yo gukurira muri Kristo no guhagarara?