1. BANTU BADI BANUNGANA KABIDI Dia kumudilu 01/03

a. M’mushindu kayi udi bana ba Isalele banungana kabidi bua Mose pakafikabo ku Lepidime ? Bua tshinyi ? Ekesode 17 : 1-3 « Yehowa kulombola makasa abot ô ne muaba wakadi kâwuyi mayi bua kubateta, bua kumona ne kunyima kua bapeta bimanyinu bia bungi bia bukole buandi, bakayila bua kutangija mpala yabo kudiye mu makenga abo, ne bakanyingalala bua kunungana kuabo kua butomboke kumuenzela. Bakabanda Mose ne Alona bua bakadi ne menji a buiminyi akadi abasaka, bua kubapatula mu Ejipitu bua kulua kubashipa ne nzala, bobo ne bana babo, bua kuangata bintu biabo. Nunku, bena Isalele kuamba ne n’tshienzedi tshia muntu, bu muakajadikabo ne bienzedi ebi kabiakadi bifumina kudi Nzambi nansha udi ne bukole kabuyi nshikidilu. Dimueneshibua patoke dia dikema dia bukole bua Nzambi, Nzambi wakajinga bua se bantu bamanye ne malu akuenzeka akadi aluila kudiye, ne baya kupesha Dina Diandi butumbi pa buloba […].Bu bikalabo kabayi batumbisha Nzambi mu mateta ne ntatu, mu kupita kuabo mu tshipela tshia Kanana ne mu kupita kua matuku matambe buakane, Nzambi wakatungunuka ne kubapesha bimanyinu bidi kabiyi kuela mpata bia bukole buandi, bia butumbi buandi ne bia ntema yandi ya kuenza biakane, kabakamupesha butumbi, tshikondo tshiakadibo ne bua kusomba mu Kanana manyunguluka kudi mabenesha, masanka, ne kudiunda. » - Testimonies, vol. 2, p. 107

---

2. NZAMBI UDI ULONGOLOLA BINTU Dibidi 02/03

a. Tshiakenza Mose n’tshinyi pakunvuaye kudiabila kuabo ? Ekesode 17 : 4 ; Yelemiya 29 : 12 « Mukelenge udi utuambila ne : « Numbikile mu dituku dia dikenga dienu ». Udi utuambila bua tumubikile ne lukunukunu ne kumuambila dikenga dietu, kumuambila majinga etu ne kupeta dikuatshisha diandi. Tshikondo tshidi ntatu imueneka tumuleja dijinga dietu ne tshisumi. Ku mitendelelu yetu idi kayiyi ne tshikondo tshiayi, netuye kuleja ne tudi ne ditekemena dia bungi mu yeye. Menji a dikenga dietu neaye kutusaka bua kutendelela bikole, ne Tatu wetu wa mu diulu udi mulengibue ku mitendekenu yetu. » - Les Paraboles, p. 172 b. M’muaba kayi ne meyi kayi akulonda majadika wakatuma Nzambi Mose bua kukeba menji ? M’mushindu kayi wakafidibua meyi mu tshishima ? Ekesode 17 : 5-6 « Mu dikenga diandi, Mose kuela lubila kudi Yehowa ne : ‘Nengenzela bantu aba tshinyi ?’ Nzambi kumuambila bua yeye kusangisha bakulu ba Isalele ne kupita ku mpala kua bantu ne mulangala ku tshianza. Kukumbaja : ‘Ndi ngimana ku mpala kuenu, pa dibue edi dikole, pa mukuna wa Holeba ; wewe newukuma mulangala ku dibue, mayi nealupuka, ne bantu banue’ Mose kutumikila diyi : mayi a bungi kulupuka mu dibue, ne tshitudilu tshionso kunua mayi. Pa mutu pa mulangala wandi kûlu bua kubikila imue ntatu mikole bua ikuate bakebi ba dinungana edi dia kupila, Nzambi kuenza ne mulangala ewu, tshiamua tshia mudimu tshia bupikudi » - Patriarches et Prophètes, p. 269 c. M’mena kayi makuabo akapesha Mose muaba ewu ne m’bua tshinyi wakidika mena makuabo ? Ekesode 17 : 7 « Ne kalonda kakole ka nyota ya mayi, bantu ‘kuteta Yehowa, mu kuamba ne : Yehowa udi munkatshi muetu anyi kenamu ?’ kupapisha eku kua mutshima kuakadi kua bubi ; nunku Mose wakapeta bowa bua kumona kulumbulula kua Nzambi kulua kudi bantu. Bua tshivulukidi bua bubi ebu, wakabikila muaba ewu ne Masa. ‘kuteta’, ne Meliba ‘kutontolola’. » - Idem, p. 270

---

3. BIMANYINU BIA KILISTO Disatu 03/03

a. Dibue (Lubuebue) diakakumabo bua mayi kulupuka, didi dileja nganyi ? 1Kolinto 10 : 4 « Mose wakakuma ku dibue, kadi diakadi Muana wa Nzambi, wakadi mubuikidija kudi ditutu, kupatula mayi a moyo. Mose ne bakulu, ne nsangilu mene mujima bakadi bimane pa bule, batangila butumbi bua Nzambi, butuishibue ne ditutu edi diodi diumbuka bukenke bua Ewu wakadi mujingila mu ditutu buakadi mua kubashipa » - Patriarches et Prophètes, p. 270 b. M’mushindu kayi mukuabo udibo bamba ne Yezu udi bu Lubuebue (Dibue) ? Misambu 94 : 22 ; Mâko 12 : 10 « Ne lungenyi lua Nzambi ludi kaluyi nshikidilu, Nzambi kusungula dibue dia ntaku ne kujadika yeye nkayandi. N’shindamenu mulelela. Buloba bujima budi mua kuteka majitu abo ne tunyinganyinga pa yeye : Dibue edi didi dibituala. Kilisto udi muikale dibue didi disonga. Kena upanga kupesha badi batekemena mu yeye. Wakatuala matekata onso. Tshilema tshia Adama tshiakamunemenena, ne tshia ndelanganyi yandi ; wakapatuka mu diteta edi Mutambe mutshimunyi pa makole a bubi, kutuala majitu mamuambika kudi muenji wa bubi yonso udi unyingalala bua bubi buandi. Mu Kilisto mutshima udi ne dipla udi usangana kusangala. Udi ufila kutshina kudi kulelela. Bonso badi beyemena kudiye badi mu dikubibua dipuangane.Mu bobumue ne Kilisto, udi dibue didi ne moyo, bonso badi bibakibue pa dibue edi, badi balua biabo mabue adi ne moyo. Bantu ba bungi badi basue kudipeya nkayabo ne kudinona, kuditangija ku bukole buabo nkayabo ; kabena mua kulua mabue adi ne moyo, bualu kabena mu bobumue ne Kilisto. Muntu kena mua kusungidibua padiye kayi mu bobumue ebu. Bidi bualu bukole bua kukandamena tshikisu tshikole tshia mateyi bu bikala moyo wa Kilisto kawuyi munda » - Jésus-Christ, p. 593-595 c. Mayi akapatuka mu dibue adi aleja tshinyi ? Yone 4 : 10 – 14 ; 7 : 37 - 39 « Ewu wa kunua mayi a moyo udi ulua biandi mushimi wa moyo. Amu pakuangataye, yeye biandi udi ufila. Ngasa wa Kilisto mu musuka udi bu mushimi wa mayi mu tshipela, udi upatuka mayi bua kujikija nyota ya bapitshi bonso, mu kupesha bakadi ne bua kufua mu tshipela dijinga dia kunua mayi a moyo. » - Jésus-Christ, p. 177

---

4. NVITA NE AMALEKA Dinayi 04/03

a. Njiwu kayi mikuabo yakadi ifunyina bena Isalele ? Ekesode 17: 8 “Amu bua dipanga kutumikila diabo ne diya kule ne Nzambi, biakitabujibua bua Isalele kudisangana ku mpala kua bualu bukole ; bena lukuna babo bakapeshibua bukokeshi bua bobo kubenza mvita, mu kubapuekesha mulongo ne bua kubasaka bua bobo kukeba Nzambi mu malu abo makole ne mu dikenga diabo. ‘Amaleka kulua kuenza Isalele mvita ku Lepidime’. Bualu ebu buakenzeka panyima pa bana ba Isalele baditue mu minunganyi ya butomboke ne kudiambila biakadi kabiyi ne muaba wabi, benzela banfumu babo minunganyi, bakadi Nzambi musungule ne mujadike bua kubalombola mu tshipela bua kuya nabo mu Kanana » - Testimonies, vol. 2, p. 106–107 b. M’mushindu kayi wakanyemesha Nzambi Bena Amaleka ? Ekesode 17: 9 - 13 “Tshikondo tshidi bena Amaleka balua kubunda bena Isalele mu tshitudilu tshiabo mu tshipela, Mose wakadi mumanye ne bantu babo kabakadi balongolola bua mvita eyi nansha. Wakatuma Yoshua ne musumba wa masalayi bua kuluangana ne muena lukuna, yeye nkayandi, ne Alona ne Hûlu, kushala bindile kûlu kua mukuna mutumbuke bua kumona mudi mvita iluangana. Kuaka, muntu wa Nzambi wakateka bualu buabo ku makasa a Ewu Udi amu Yeye Nkayandi mukumbane, bua kubapesha butshimunyi. Bianza biela mûlu, Mose kulomba Yehowa bua tshiluilu tshia Isalele tshitshimune mvita. Biakaya kumueneka bua se tshikondo tshiakadi bianza biandi mûlu, Isalele wakadi utamba muena lukuna wandi bukole; kadi pakadiye upungila upuekesha maboko andi, bena Amaleka bakadi batamba bukole. Alona ne Hûlu bakatua mpanda ku bianza bia Mose tô ne pakatshimuna Isalele ne bena lukuna kumuka mu mvita.Bualu ebu buakadi ne bua kufila diyisha kudi Isalele mujima, tô ne ku nshikidilu kua bikondo, bua se Nzambi ke Udi bukole bua bantu bandi. Tshikondo tshiakadi Isalele utshimuna, bianza bia Mose biakadi mûlu ne wakadi utendelela bua bantu; nunku, padi Isalele wa Nzambi mutshimunyi, m’bualu Wa-Bukole Bonso wakadi muangata bualu buabo mu mvita. Mose kakadi ulomba Isalele atshimuna, ne apu Isalele ushala musombe kayi wenza bualu tô, ne kupanga kuitabuja nansha. Kulongolola misumba yandi ya masalayi ne kubatuma bamana kulongolola, nunku yeye kuleja bualu ebu bua mvita kudi Nzambi mu mutendelelu” – Idem, vol. 4, p. 530 – 531

---

5. AMELEKA MUTSHIMUNA Ditanu 05/03

a. Panyima pa bena Ameleka batshimunyibue, m’meyi kayi akambibua bua bualu buabo ? Ekesode 17: 14; Dutelenome 25: 17 - 19 “Bena Ameleka, kupeta dipetu ne tuseku ku bishima bienza kudi Mose mu Ejipitu, kusekabo bisamba biakadi binyunguluka, biakadi ne kutshina bua bena Isalele. Kuelabo kayanda mu dina dia nzambi yabo bua kubutula Bena Ebelu, kushipa tô ne ku muntu wa ku nshikidilu, ne kuimanyinabo Nzambi wa Isalele bua kumukandamena. Kadi kabayi ne bualu bua kubanda nabo Isalele, Isalele kayi mubenzela bualu bubi anyi mubafunyine, kubunda kuabo kua Isalele kakuakadi ne kabingila nansha. Bua kudiela mudi bena Isalele bua kubenza mvita, bakavua batshioka, kabayi bukole bua kuluangana. Ameleka kukosela Isalele lufu. Nzambi. Nzambi kutebelela bakadi batekete ba mu bana bandi. Kuena bualu bua tshikisu bu benzela bua kapita nanku, kabuyi bumanya. Tshianza tshidi tshiolola bu ngabu wa mvita pa bonso badi bamupesha buneme ne badi bamunange. Dikosa dibi kudi badi batuta tshianza etshi: tshidi tshijula muele wa mvita wa buakane” – Patriarches et Prophètes, p. 271 b. Tudi ne bua kuvuluka tshinyi tshikondo tshitudi bakengesha lelu bu muakakenga Isalele kudi bena Ameleka ? Matayo 5: 11 – 12. M’mushindu kayi udi Nzambi ubala badi bakengesha bana babo ? “Bikala Nzambi udi unyoke tshikisu tshia tshisamba tshidi katshiyi tshimumanye, m’mushindu kayi udiye ubala aba badi, bamba n’ne m’bena mu tshisamba tshia bantu bandi, benza bana babo mvita, bana babo aba badi bapungila. Badi benza mudimu bua bualu buabo ?” – Témoignages Pour l’Eglise, vol. 2, p. 98

Makonka a kuambulula dilesona Disambombo 06/03

1. M’mushindu kayi udi mvita ne lutatu bikale diteta kutudi lelu ewu, bu muakadibi kudi Isalele ? 2. M’bualu kayi budi buleja ne tudi tutendeleka ne tshisumi, bua tudi mu tshikondo tshia lutatu ? 3. N’sapi kayi bua kulua dibue didi ne moyo ? 4. N’kabingila kayi imue misangu tudi tudisangana mu luidi lua lutatu ? 5. M’bubi kayi buakakosa tshilumbu tshia Ameleka ? M’mushindu kayi utudi bapile mu bubi bua mushindu wa momumue ?