1. BUDIMUISHI BUA LUSE LUTAMBE Dia kumudilu 26/01

a. M’mushindu kayi wakadi bena Ejipitu babala Mose ? (Ekesode 11: 3b) b. N’kulumbulula kayi kuakadi kuamba diambedi ne mputa wa dikumi, Palo ne bantu bandi bakenza tshinyi ? Ekesode 11: 1, 4-8; 12: 12 c. N’tshinyi tshitudi ne bua kuyila pa bidi bitamgila ngikadilu wa Nzambi pa kumona madimuisha bungi nunku akatuminaye bena Ejipitu diambedi ne yeye kutuma mputa wa dikumi ? 2Petelo 3: 9 “Dinyoka diakadi Ejipitu ne bua kupeta kuntuadijilu aku, wakadipeta anu ku ntendelelu. Nzambi udi ne lutulu lua bungi ne luse lunene; udi ne ntema ya bungi kudi bantu badi benza mu tshinfuanyikiji tshiandi. Bu koko mua kuikala kujimija kua bia pa madimi ne bimuna, Ejipitu wakadi mua kukudimuka, bana bandi kabakadi mua kufua. Kadi mona! Tshisamba etshi kupapisha mutshima bua kukandamena ku diyi dituma dia Nzambi bua kudienzela, ne bualu buakenzeka bua nshikidilu buakadi ne bua kukulukila pa tshisamba etshi.” – Patriarches et Prophètes, p. 247“Mukelenge kena musue bua musuka nansha umue ufue. Malu andi mimpe adi bungi kabuyi kubala.” – Levez vos yeux en haut, p. 142

---

2. MUKENJI WA PASAKA Dibidi 27/01

a. M’banganyi bakadi banyishila bua kudia muana wa mukoko wa pasaka ? Ekesode 12 : 43, 48-49 b. Bena Isalele bakadi ne bua kuenza tshinyi ne mashi ne mukenji ewu wakadi ne tshipatshila kayi ? Ekesode 12 : 7, 13, 23 « Bua kupeta budikadidi, Bena Isalele bakadi ne bua kuleja patoke ditabuja diabo mu bupikudi bunene buakadi buenda budilongolola bua kuenzeka. Bakadi ne bua kuteka tshimanyinu tshia mashi ku biluwa bia nzubu yabo, kuditapulula ne kudi Bena Ejipitu, bobo ne meku abo, ne kusomba amu mu nzubu yabo. Bu bobo bakadi kulengulula mu katoba kakese ka mikenji mipeta, bu bobo kabakumbusha bana babo mu bena Ejipitu ; ne mu kushipa kua Muana wa Mukoko bakadi balengulula bua kumiamina mashi ku makunji a nzubu yabo, anyi bu bobo bakadi bapatuka mu nzubu yabo kabakadi kuikala bakubibue. Bakadi anu kuikala bitabuja mukenji : dituishibua diabo kadiakadi mua kubasungila, bualu bakadi badianjila kudimuishibua bua se bonso bapanga kuenza bidi Nzambi mulombe bua kuenza ne baya kumona ban’â-bute babo bashipa kudi Mushipi.N’nganu ku ditumikila diabo kuakadi bena Ebelu ne bua kuleja tshimanyinu tshia ditabuja diabo. Bidi bia momumue, bua bonso badi batekemena bua kusungidibua ku malu mimpe a mashi a Yezu kabena ne bua kuya kupua moyo bua se bobo biabo badi ne bualu budibo ne bua kuenza bua dituishibua dia lupandu luabo. Bu bikalabi bidi bilelela ne Kilisto yeye nkayandi udi mumanye mua kutumbusha ku tshibawu tshia mibi yetu, apu tuetu bietu tudi ne tshia kumbuka ku bubi ne kuya ku ditumikila. Bu bikalabi bidi bilelela bua se muntu udi musungidibue ku ditabuja ke ku bienzedi nansha, bidi bilelela kabidi bua se ditabuja didi dimueneshibua ku bienzedi. » - Patriarches et Prophètes, p. 250-251 c. N’nganyi wakadi ne bua kushipa muana wa mukoko wa Pasaka ne kuela mashi ku biluwu bia nzubu ne ku makunji ? Ekesode 12 : 21-22 Bidi biunvuija tshinyi kutudi lelu ? « Tatu wakadi ne bua kuenza mudimu wa muakuidi mu diku. Pakadiye ufua m’muan’andi muan’â-bute wa bana balume badi ne moyo ke wakadi wenza bualu ebu ulaba mashi ku biluwu bia tshibi tshia nzubu. N’tshimanyinu tshia mudimu udi ne bua kutungunuka mu diku dionso. Baledi badi ne bua kusangisha bana babo mu diku diabo ne kubaleja Kilisto bu Pasaka wabo. Bidi bualu bua njiwu bua kulekela banga bantu baya kuenza bualu ebu » - Le Foyer Chrétien, p. 311-312

---

3. TSHIDI PASAKA UNVUIJA Disatu 28/01

a. M’mushindu kayi wakadi bena Isalele ne bua kudia muana wa mukoko ne bia kudia bikuabo bia difesto dia Pasaka ? Ekesode 12 : 8-11 N’dishintuluka kayi diakamueneka panyima pa bobo bamana kushikama mu musoko wabo ? « Mu Ejipitu, butuku bua muladilu wa bupikudi, bana ba Isalele kudiabo Pasaka bimane kulu, mikaba misuika mu bifuka biabo, dikombo dikuata ku bianza, bikale pa buipi ne kuya. Mushindu wakenzabo difesto edi wakadi bilondeshile luidi luakadibo ; bakadi nunku pa buipi ne kuipatshibua mu Ejipitu, bakadi ne bua kuenza luendu lule lua lutatu mu tshipela. Mu tshikondo tshia Kilisto malu akadi mushindu muitapuluke. Kakuakadi bualu bua kuipatshibua mu ditunga dienyi nansha ; apa bantu bakadi bashikame mu ditunga diabo. Bantu bakadi ne ditalala, ne n’dilolo diakadibo badia Pasaka. » - Jésus-Christ, p. 657 b. M’mushindu kayi wakadi dipikudibua dia dikema dia Bena Isalele mu Ejipitu, divuluija bana babo ? Ekesode 12 : 26-27 « Pasaka wakajadikibua bua kuvuluka dipikudibua dia Isalele mu bupika mu Ejipitu. Bilondeshile meyi mamba kudi Mukelenge, tshidimu tshionso muyuki wa dipikudibua edi wakadi ne bua kuambuludibua bu diandamuna ku lukonko lua bana babidi bitangila diunvuija dia kuenza kua Pasaka. Nunku divuluka dia tshiashima etshi tshia dikema diakadi ne bua kuikala dilama menji a bantu bonso. » - Idem, p. 656 c. N’dipetangana kayi didi pankatshi pa Pasaka ne Mesa a Mukelenge ? M’mudimu kayi udi mutuvuluija kudi bidia bia Mukelenge ? Matayo 26 : 17-19, 26-29 ; 1Kolinto 11 : 26 « Pakadiye mudia Pasaka ne bayidi bandi, Yezu kujadika bualu buakadi ne bua kupingana difesto edi ne kuvuluka kua mulambu wandi munene. Difesto dia tshisamba tshia Bena Yuda diakadi ne bua kuenzeka. Amu Mudimu wakajadika Kilisto wakadi ne bua kunemekibua kudi bayidi bandi mu matunga onso ne mu bikondo bionso […] Mukenji wa Mesa a Mukelenge wakafidibua bua kuvuluka bupikudi bunene buenza ku lufu lua Kilisto; badi ne bua kuvuluka bualu ebu ne kubuenza tô ne tshikondo tshidiye ulua ne bukole ne butumbi. M’mushindu ewu udi menji etu ne bua kulama tshivulukidi tshia mudimu wandi wa mushinga” – Idem, p. 656

---

4. TSHIMANYINU NE TSHIDI TSHILELELA Dinayi 29/01

a. Mukoko wa Pasaka wakadi tshimanyinu tshia nganyi ? Yone 1: 29; 1Kolinto 5: 7 “Nzambi udi musue kubaleja ne n’ku dinanga diandi kudi dipa diluila dia kubatuangaja nandi” – Jésus-Christ, p. 94« Mukoko wakufila wa mulambu wa kosha wakadi uleja ‘Muana wa Mukoko wa Nzambi’, udi ditekemena dietu dimuehele dia lupandu. Ku lufu luandi, Mupostolo Paulo udi wamba ne Kilisto wakalua ‘Pasaka wetu’. Kadi kabiakadi bikumbane bua Mukoko wa Pasaka ushipibue ; biakadi bikengela ne mashi andi alabibue ku biluwu ne mikamba bia ku tshibi tshia nzubu. Ke mudi nunku malu mimpe a Musungidi malamika misuka idi itabuja. Yezu kakafila amu moyo wandi bua bantu, kadi m’bua muntu yonso pa nkayandi, anu muntu yeye muvuije malu mimpe a mulambu wandi wa kulengeja bubi malua andi yeye » - Patriarches et Prophètes, p. 249 b. Diampa didi dileja nganyi ne m’bualu kayi bulelela budibi ne tshia kutuvuluija ? Yone 6 : 47-48, 51 « N’ku moyo wa Kilisto ke kutudi ne moyo mene wa pa buloba. Diampa ditudi tudia bakatutusumbiladi ku mushinga mutambe wa mubidi mukumibue. Mayi atudi tunua akasumbibua ku mashi andi akapueka. Kakuena muntu, nansha bikalaye wa tshijila anyi peshi muenji wa mibi, udi mua kudia bidia biandi bia buatshia buatshia kayi ne bua kudishibua ne mubidi ne mashi bia Kilisto. Katupa konso ka diampa kadi ne tshimanyinu tshia mutshi mutshiamakane wa Golgota. Mutshi mutshiamakane udi mulejibue mu mushimi onso wa mayi. Kilisto kuyisha bintu ebi bionso mu kujadika kua bimanyinu bia mulambu wandi munene. Munya udi ufuma ku disekelela dia Mesa a Mukelenge ku nzubu wa pa mutu, udi ufila ngikadilu wa tshijila ku bia kudia bia moyo wetu wa ku dituku ne dituku. Mesa a diku adi alua Mesa a Mukelenge, ne tshia kudia tshionso tshidi tshibandisha mu tshipidi tshia pa mûlu tshia tshijila.Meyi a Kilisto adi kabidi ne muaba bimpe bitambe mu moyo wa mu nyuma. Udi wamba ne : ‘Udi udia mubidi wanyi ne udi unua mashi anyi udi ne moyo wa tshiendelele »’ M’mu kuangata moyo udi mupuekesha bua bualu buetu ku mutshi mutshiamakane wa ku Golgota, kutudi bavuijibue nunku bakumbane bua kuikala ne moyo wa tshijila – Ne m’mu kuitabuja Diyi dia Kilisto, mu kuenza bidiye muambe ne m’bua kuenza, ke mutudi tuangata moyo ewu. Tudi tulua nunku Umue Nandi. [Yone 6 : 54, 56-57]. Mufundu ewu udi nangananga ukumbena Mesa a Mukelenge. Patudi tutangila, mu ditabuja, bunene bua mulambu wa Mukelenge, musuka wetu udi ulonda tshidi moyo wa mu nyuma wa Kilisto. Mu mishindu eyi, mudimu onso wa bidia bia Mesa a Mukelenge udi utupesha bukole bua mu nyuma. Kudi kujadikibua malanda nunku adi a moyo pankatshi pa muena kuitabuja ne Kilisto, ne kupitshila kudiye malanda pankatshi pa muena kuitabuja ne Tatu. Mesa a Mukelenge adi nshinga pankatshi pa bantu badi beyemena kudi Nzambi wabo. » - Jésus-Christ, p. 664-665

---

5. MPUTA WA DIKUMI – LUFU LUA BAN’A-BUTE Ditanu 30/01

a. Unvuija mputa wa ndekelu ? Ekesode 12: 29-30 b. M’mushindu kayi wakipatabo bena Isalele mu Ejipitu ? Bua tshinyi ? Ekesode 12: 31-33 “Mu diku dionso, muan’â-bute, udi muikale budisu bua baledi, kufua. Pakunvua Palo lumu elu lua bualu bua bukole, binu biandi kuteketa, kukunza ku mesu kûnzû, Yeye ne bena diandi kujukila kûlu. Mukelenge kuvuluka bua meyi â akambaye: ‘Yehowa nganyi bua meme kutumikila diyi diandi, bua kulekela Isalele bua yeye kuya? Tshiena mumanye Yehowa ne tshiena ndekela Isalele kashidi bua yeye kuya’”.Kupuekeshibuaye milongo tô ne panshi mu budisu buandi bubi, kubikila mu butuku Mose ne Alona, ne kubambila ne: ‘Jukayi ! Patukayi munkatshi mua bantu banyi, nuenu ne ban aba Isalele. Yayi nuye kukuatshila Yehowa wenu mudimu, bu munuakadi bambe ! Angatayi ne bimuna bienu, mikoko ne ngombe, bu munuakadi balombe ; Yayi ne n’sankishayi ! » Bafidi ba ngenyi ba mu bukelenge, ne bena Ejipitu kabidi, ‘kuenzeja bantu ne lukasa bua bapatuke mu musoko ; bualu bakadi bamba ne : Tudi tufua bonso ! » - Patriarches et Prophètes, p. 252

Makonka a kuambulula dilesona Disambombo 31/01

1. M’mushindu kayi wakaleja Nzambi luse luandi lunene ku madimuisha andi kumpala mputa yonso ne bua kulua, ne nangananga bua mputa wa dikumi ? 2. M’mushindu kayi udi mudimu wa kusekelela kua Pasaka uleja mushindu udi ditabuja ne bienzedi bisangi kaba kamue ? Bidi ne malanda kayi ne bualu bua meme nkayanyi bupitshisha ? 3. M’’bupikudi kayi budi mu kusekelela kua Mesa a Mukelenge buvuluija ? Bua tshinyi tudi dijinga ne kuenza misangu yonso Mesa a Mukelenge ? 4. M’mushindu kayi utudi mua kuangata mashi a mupandu a Kilisto kuluawu etu ? 5. Bu Palo m’mushindu kayi ututu misangu mikuabo tuindila tô ne padi Nzambi utupuekesha milongo bua tuetu kushisha kutumikila diyi diandi ?