1. DIFIKA DIA KU SINAYI Dia kumudilu 15/03

a. N’kunyima kua tshikondo bule munyi kuakaya bena Isalele kufika ku mukuna wa Sinayi katshia bumbuka mu Ejipitu ? Ekesode 19 : 1 – 2 M’bualu kayi buakadi Nzambi pepi ne bua kubabuluila ? « Ku nseke yonso kuakadi mikuna mile mitumbuke, bifila ne kanyungu-nyungu mu bunene buabi, biakadi biamba bua butumbi bua Tshiendelele ne lulamatu bidi kabiyi kunyungishibua bia Nzambi. Ku mpala kua Ewu Udi ‘Upima ne lukobu mikuna mu tshipiminu’, Muntu kunvua butekete buandi ne dipanga diandi. M’mu muaba ewu mutambe bunene wakadi Isalele ne bua kuakidila malu masokolola a dikema akadi Nzambi katshia kayi muanji kuâpesha bantu. M’muaba ewu nkuayaye kubamanyisha mu bualu buakenzeka budi kabuyi kupua moyo bua ngikadilu wa tshijila wa mikenji yandi mukuyamba ne diyi diandi. Buenzejibue bua bupika ne kusomba kua mutantshi mule ne bantu batendeledi ba mpingu, kushiyabi bimanyinu binene mu ngikadilu ne bilele bia bena Ebelu. Biakadi bikengela dibakulula dinene. Mu kudileja patoke kudibo, Nzambi kubabenesha kûlu ku ngikadilu wa tshipidi tshile tshitambe mu kubapesha dibuluibua patoke dia Bu-Muntu buandi » - Patriarches et Prophètes, p. 273 b. M’meyi kayi mempe akambila Nzambi – Mose ku mukuna, adi aleja dijinga diandi bua Bena Isalele bu tshisamba tshiandi tshia mu bikondo bionso ? Ekesode 19 : 3 – 6

---

2. KUDILONGOLOLA BUA KUSAMBAKENA NE NZAMBI Dibidi 16/03

a. Panyima pa Mose muambila bantu tshiakadi Nzambi mumuambile, diandamuna dia bantu diakadi tshinyi ? Ekesode 19 : 7 - 9 « Mose kupueka mu tshitudilu, kusangisha bakulu ba bena Isalele, kubambuluila diyi dia kudi Nzambi. Bantu kuandamuna ne: ‘Netuenze bionso biakuamba Yehowa’. Bena Isalele kutua tshipungidi nunku ne Nzambi tshinene bua kumumanya ne Yeye Nkayandi ke Udi Mukokeshi, ne bobo badi bantu bandi mu tshipidi tshidi tshia pa buatshi” – Patriarches et Prophètes, p. 275 - 276“N’dipangadika kayi didi bantu ba Nzambi ne bua kuangata mu matuku â a ku nshikidilu. Ditabuja diabo dia Nzambi didi kudikumbaja dia lulamatu ku meyi a tshipungidi tshienza nandi. Nzambi udi mubueja mu tshipungidi tshiandi bonso badi bamutumikila” – The SDA Commentary, vol. 1, p. 1103 b. N’ku dilongolola kayi kuakambilabo bantu diambedi ne bobo kulua ku mpala kua Nzambi walado ne bua kufila mikenji yandi ? Ekesode 19 : 10 – 15 M’babi kayi itudi ne bua kuangata diambedi ne tuetu kuimana ku mpala kua Nzambi mu Ekelezia ? « Nzambi Munene ne Wa-Bukole wakafuka Edene wa dikema ne bintu bionso biakane biakadimu, udi Nzambi wa bulongame, ne udi musue bua bulongame ne mankenda a mubidi bikale munkatshi mua bantu bandi. Kuakadi ne bua kuikala dilengulula anyi kupanga bulongame kudi badi ne bua kuimana ku mpala kua dikalanganaku dia Tshijila dia Nzambi. Bua tshinyi nunku ?M’bua kabingila kayi bua m’babi ayi ? Biakadi amu bua kukoka ntema ya buakane bua Nzambi bua kupleta dianyishibua kudiye anyi ? kabingila kakampeshabo kakadi nunku : bua kuleja tshimuenekelu tshiakane kudi bantu. Bu bikala badi beya midimu ya tshijila bapanga mua kuleja m’babi ne kanemu ku mpala kua Nzambi, mu mvuadilu wabo ne mu ngikadilu, bantu ne baya kujimija kanemu konso bua Nzambi ne bua mudimu wandi wa tshijila. Ne padi bakuidi baleja kanemu kabo kudi Nzambi mu kuikala ne ntema ne m’muenenu wa m’babi nebiya kupesha bantu menji a pa mûlu bua Nzambi. Biakadi bileja bantu ne Nzambi wakadi wakadi wa Tshijila, ne mudimu wandi kabidi, bionso biakadi mu diunvuangana ne mudimu wandi badi ne bua kuikala kabidi, batapuluke ku manyanu onso, ne bukoya bonso buakadi ne bua kuikala bumbusha kudi bonso badi basemena pa buipi ne Nzambi » - Testimonies, vol. 2, p. 611–612

---

3. KUMPALA KUA NZAMBI Disatu 17/03

a. Unvuija mushindu wakadi bunene bua bualu bua kupueka kua Nzambi mu diulu bua kuakula kudi bantu bandi ? Ekesode 19 : 16 – 20 ; Dutelenome 33 : 2 - 3 «Mu dinda dia dituku disatu, tshikondo tshiakadi mesu matangija ku Sinayi, bakatangila ku mutu kua mukuna kubuikidija kudi ditutu, diakadi dienda dilua dijika bikole mu mushindu wakadidi dienda dipueka, tô ne pakaya mukuna mujima kubuikidibua ne midima ne bualu buakadi bukole, kabuyi kumvuija. Pashishe diyi dia mpungi kuedibua dibikila bantu bua kulua kusambakena ne Nzambi. Mose wakadi ku mutu kua mulongo, musumba wa bantu kusemena ne tô ne kuinshi kua mukuna. Mipenya yakadi yela imuebala mu mesu, yakaluila mu midima, mikungulu kunvuika yenda idila ya kudila kua mikungulu kutambe. […]Katataka, mikungulu ne mpungi kupuwabi ; ditalala dia kupuwa diakadi dia dipingane kuenzeka, ke Diyi dia Mukelenge kunvuika, dipatukila mu midima amu. Apu ke Yeye muimane munkatshi mua banjelo, Yehowa kufila mikenji yandi » - Patriarches et Prophètes, p. 276 - 277« Mu kuamba ne diyi dikole mikenji dikumi ku matshiu a bana ba Isalele, Nzambi kujadika bua mushinga wayi. Biakadi bualu bua butumbi butambe muakaleja Nzambi bunene buandi ne bukokeshi buandi ne N’Yeye Udi mukokeshi wa buloba. Wakenza nunku bua kuleja bantu tshidi ngikadilu wa tshijila wa mikenji yandi ne mushinga ku itumikila » - Testimonies, vol. 8, p. 198 b. Tshikondo tshiakambilabo kabidi Mose bua kubanda ku mukuna, Mukelenge wakamuambila tshinyi ? Ekesode 19 : 21 - 25 « Pakamuenekaku dikalanganaku dia Nzambi pa Sinayi, butumbi bua Yehowa buakadi bu mudi kapia kadi kosha pakadi amu Isalele mujima utangila » - Patriarches et Prophètes, p. 341 - 342« Nzambi udi muena dinanga ne luse bidi kabiyi nshikidilu, kadi udi wamba Yeye Nkayandi ne udi ‘Kapia kadi kosha kashidisha, Udi Nzambi wa mukawu » - The Review and Herald, 14 Août 1900« M’muaba udi bubi buya kusangila, ‘Nzambi wetu apu udi muikala kapia kadi kosha’ kudi bonso badi bakokela ku tshienzedi tshiandi. Nyuma wandi udi osha bubi. Kadi bikala muntu udi amu mulamate ku bubi, udi uya kubileja mu bobu. Apu butumbi bua Nzambi budi bubutula bubi budi buya kubutula muenji wa bubi » - Jésus – Christ, p. 88 - 89

---

4. MIKENJI YA DINANGA Dinayi 18/03

a. Nganyi wakamba mikenji ku mukuna wa Sinayi ? Wakenza tshinyi pashishe ne mikenji ? Dutelenome 5: 4 – 5; 9: 10 “Muntu yonso udi mua kumvua mikenji idi mikale tshimuenekelu tshia ngikadilu wandi. Meyi mafunda ne Munu wa Nzambi pa mabue adi mikale aleja patoke bimpe mene mene disua diandi kudi bantu bandi, kakuena mushindu wa kupanga kanemu kudiyi peshi kuyipua moyo” – Messages Choisis, vol. 1, p. 263 b. M’mukenji kayi wa ntaku udi munda mua mikenji ? Matayo 22: 37 - 39 “Mikenji dikumi, ne mikandu, ne malu adi kulond, bidi bikale milayi dikumi, idi mitujadikila bituikala tudi tutumikila mikenji idi ilombola bufuki bonso. ‘ Binuikala bansue, tumikilayi mikenji yanyi.’ Apa ke padi mene mutshima ne tshidi mene mikenji ya Nzambi. Tshidi lupandu lua muana yonso mulume ne mukaji wa Adama tshidi tshileja mu mikenji eyi.Mikenji dikumi ya tshijila miamba kudi Kilisto ku mukuna wa Sinayi yakadi dibuluibua dia patoke dia ngikadilu wa Nzambi ne yakamanyibua kudi buloba bua se bukole bonso bua bulombodi pa bumpianyi bua bantu budi buandi. Mikeni eyi dikumi, ya dinanga ditambe bunene idi ne bua kulejibua kudi muntu, idi mikale diyi dia Nzambi wa mu diulu diambila misuka ya bantu milayi ne : ‘Enza mikenji eyi kuakushala muinshi mua bukokeshi bua Nsatana nansha’. Kakuena tshidi tshiapatupu mu mikenji eyi nansha ku tshimuenekelu. Idi yamba ne : Enza, ne newikala ne moyo’ » - The SDA Bible Commentary, vol. 1, p. 1105 c. M’mushindu kayi udi bena Kilisto balelela mua kuleja ne badi ne dinanga dia Nzambi mu mutshima wabo ? 1Yone 5 : 2 – 3 ; Lomo 13 : 10 « Dinanga dia Yezu mu mutshima didi diya kumbusha lukinu lonso, buiminyi ne disamina dionso dibi dia mutshima ; bualu bua mikenji ya Yehowa idi miakane idi ishintulula musuka. Kudi bukole bua mubidi mu kutumikila mikenji ya Nzambi. Majinga onso ne kunanga bia muntu udi ne ditumikila bidi bikeba amu Nzambi.Tudi ne bua kukoleshangana, ne kukuatshilangana mudimu mu kubandila Mukelenge Yezu. Dinanga dia Kilisto idi ditangalaka mu musuka wetu, ne kakuena matapuluka nansha makokangana munkatshi muetu ! » Idem« Mukenji wa dinanga udi utulomba bua tuetu kufila ku mudimu wa Nzambi, ne bua bantu netu, mubidi wetu, menji etu ne musuka wetu. Ne mudimu ewu utudi tudifila bua kuenza, udi utuvuija dibenesha bua bantu bakuabo, udi utuluadila tuetu bine dibenesha ditambe dia mabenesha ». – Education, p. 18

---

5. MIKENJI IDI KAYIYI ISHINTULUKA Ditanu 19/03

a. Kuamba kua mikenji eku kuakenza tshinyi kudi bantu ? Ekesode 20 : 18 – 20 Kudi M20 - 21 “Bena Isalele bakadi ne bowa bua bungi. Bukole bua dikema bua mikenji ya Nzambi, kutamba tshipiminu tshia kuzakala kua mitshima yabo yakadi kayiyi mua kuimana. Pakadibo amu benda bafila mikenji, bantu bakadi b enda bamona amu bimpe ngikadilu wa bubi ne kupîla kuabo ku mesu kua Nzambi Wa Tshijila. Bantu kupingana kunyima kule ne mukuna, ne bowa bua bungi.” – Patriarches et Prophètes, p. 311 b. Kudi dijinga dia kushintulula mikenji eyi anyi ? Yezu wakayishintulula anyi? Misambu 111: 7, 8;Matayo 5:17-19 “Mikenji ya Nzambi yakatekibua mu tshitendelelu tshia mu diulu idi mikenji mene mene yakafundibua pa mabue, idi Mose mulue kufundulula mu Mikanda yandi itanu. […]Dibuluibua dia disua dia Nzambi, dilejibue mene dia patoke dia ngikadilu wandi mikenji ya Nzambi, mu ngikadilu wayi idi ‘Mujadiki wa lulamatu udi muikale mu diulu’, kayena inyanguka. Nansha umue wa ku mikenji eyi wakashipibua; nansha kaleta kamue kakakakupudibua. Muimbi wa misambu udi wamba ne : ‘kashidi ne tshiendelele, Oh, Yehowa ! Diyi diebe didi dishala amuku mu diulu’ ‘Mikenji yandi yonso kayena ishintuluka. Kayena inyanga bua kashidi, tô ne tshiendelele’ (Misambu 119: 7 – 8)” – La Tragédie des Siècles, p. 370

Makonka a kuambulula dilesona Disambombo 20/03

1. Buimpe bua kumona bua mukuna wa Sinayi buakafila buenzeji kayi kudi bena Isalele ? Bua tshinyi bidi bia mushinga bua kuikala kupitshisha tshikondo misangu yonso mu bufuki ? 2. N’kudifila kayi kua ku dituku kudi Nzambi musue bua ngenze ? 3. Bua tshinyi Nzambi nkayandi wakapesha bana ba Isalele mikenji dikumi ? 4. N’tshipeta kayi tshidiku padi dinanga dia mikenji ne dinanga dia Yezu bikale mu mutshima ? 5. Unvuija bua tshinyi mikenji kayena ishintuluka ?