1. KUKANKAMIKA BADI BAKUATSHIKA NE BOWA Dia kumudilu 09/02

a. M’mushindu kayi wakaleja Bena Isalele bowa buabo pakamonabo Mbuwa kumpala kuabo ne tshiluilu tshia masalayi a Palo kunyima kuabo ? Ekesode 14 : 10-12 « Bena Ebelu bakadi banji kutula Panshi ku muelelu wa Mbuwa wakadi umueneka bu tshinkandi bua kusabuka, Pinapu kuinshi kua mukuna kuakadi bijibajiba biakadi bibapumbisha bua kupita. Musangu Umue bela mesu bamoNe kubule tshiluilu tshienda tshilua tshisemena ne Makalu a mvita […] Bowa bukole kukuata tshitudilu tshima tshia Bena isalele » - Patriarches et Prophètes, p. 256 b. Ne meyi kayi akajinga Mose kutalaja nawu Bena Isalele ? Ekesode 14 : 13-14 « Ne kanyinganyinga bua kumona tshisamba tshiabo tshiya kuleja patoke ditabuja dikese mu Nzambi wakabapesha bimanyinu bia bukole buandi, Mose kudiebeja bua se m’mushindu kayi wakadibo bamuambila bualu bua njiwu yakadibo baya kutangila katataka, biabi yeye wakadi anu mulonda diyi dia Nzambi dimupesha bua kuenza. Bidi bulelela ne kakuakadi mushindu wa dipikudibua nansha, anu Nzambi nkayandi muenza bualu ; kadi biakadi bilondeshile mukenji wa Nzambi, kuakadisangana Mose mutuadibue mu mulongo ewu, ne kakadi ne bowa bua bipeta bionso biakadi bilua. » - Idem, p. 284

---

2. NZAMBI UDI UPETA MUABA WA KUPATUKILA Dibidi 10/02

a. Nzambi wakambila Mose ne enza bualu kayi bilondeshile njiwu minene yakadi ku mpala kuabo ? Ekesode 14: 15-18, M’mushindu kayi wakapesha Kilisto Bayidi bandi bukokeshi (Bujitu) bua mushindu wa momumue, pakadisanganabo biabo batshintshimika kudi ntatu ? Yone 16: 33 “Kilisto kakapanga bukole nansha kuteketa mu mikolo. Bayidi bakadi ne bua kuleja ditabuja diabo ne disuminyina, ne kuenza mudimu bu muakawenzaye, kutekemena anu mu yeye bua kuikala ne bukole. Ne bubikala njila wabo wakadi mubumbakana ku malu a ku mesu a dipanga kukumbana, ku ngasa wandi bakadi ne bua kuya batangile ku mpala, kabayi bela mpata ku bualu bumue ne bikale batekemena bionso” – Conquérants Pacifiques, p. 24 b. M’mushindu kayi wakapanda Muanjelo wa Yehowa njila wa kunyemena bua ban aba Isalele munkatshi mua mbuwa ? Ekesode 14: 19-22 “Tshikondo tshiakadi tshiluilu tshia bena Ejipitu pepi ne kufika padi bena Ebelu, tshimana kumona ne tshikadi tshikuata tshiakudia tshiabo, ditutu dia butumbi kujuka kuimana mu diulu, kubuikila bantu, kuimana pankatshi pabo ne muena lukuna. Anu mu tshikondo etshi, tshibumba tshia midima kutapulula bakadibo bipata ne babipatshi. Bena Ejipitu kabakamona tshitudilu tshia Bena Ebelu, kuenzejibuabo bua kuimana. Ku luseke lukuabo bu muakadi midima yenda ivulangana ya butuku, tshibumba tshia midima bua bena Isalele kumona munya munene wakadi ukenkesha tshitudilu tshiabo, butoke bufuane mund’a-munya” – Patriarches et Prophètes, p. 257 c. N’dilesona kayi ditudi ne bua kuyila ku bualu ebu bupitshisha ? Lomo 8: 31 “Mu bikondo bionso bia kujana, ewu kuamba ne dituishibua ne: ‘Bikala Nzambi netu wikala netu lukuna nganyi?” Nansha tshitungu tshia Nsatana ne kujinga kuandi kua kuenza bibi kuikala munyi, Mukelenge neaye kutandula patoke bena lukuna bandi ne kutshingulula biakadibo balongolola bua kuenza; diandamuna dia balume ba ditabuja nedikale lelu dia momumue ne dia Nehemiya: ‘Nzambi wetu neatuluanganyine mvita’ Bualu bua Mukelenge udi wenza ne bukole butambe, ne kakuena udi mua kukandamena ku kuenza kuandi kua malu kudi kututa dikasa dimpe” – Prophètes et Rois, p. 490

---

3. DIPUMBISHA BUA BENA EJIPITU Disatu 11/02

a. M’mushindu kayi wakapumbisha Yehowa masalayi a Bena Ejipitu ? Ekesode 14: 23-25a; Misambu 77: 16-19 “Bena Ejipitu kuteta mua kubuela mu njila wa Mukelenge wakadiye mulongoluela bantu bandi, banjelo ba Nzambi kubuela mu milongo kumbusha nkata ya Makalu abo a mvita. Tshiluilu kutekeshibua, kakuakadi mushindu wa bobo kuenda ne lukala, ne dielangana menji kudiunda. Banene ba masalayi ne masalayi kuvulukabo kulumbulula kua Nzambi wa Bena Ebelu kuakalua mu Ejipitu ne kuenzeja Palo bua kulekela Isalele, ne kutshinabo bua Yehowa kayi kubafila mu bianza bia Bena Ebelu. Bena Ejipitu kûnvua ne Nzambi wakadi uluanganyina Bena Isalele, bakapeta bowa bua bungi.” – L’Histoire de la Rédemption, p. 123 b. Bena Ejipitu bakamba tshinyi pakamonabo kuipatshila kua Bena Isalele kuikala ne lutatu lua mishindu yonso ? Ekesode 14: 25b. c. Tshiakenzeka n’tshinyi tshikondo tshiakadisangana Bena Isalele mu dikubibua dia muamua dia Mbuwa ne Mose kuela kabidi mulangala pa mayi ? Ekesode 14: 26-30 M’mushindu kayi kabidi waya Nzambi kuenza bua bupikudi bua momumue bua bantu bandi ku mikalu ya Kanana ka mu diulu ? “Tshibuejakaji ne bowa kubuela mu tshitudilu tshia Bena Ejipitu. Banyungulula mu tshikutu tshia bowa, momu muakujadikabo diyi dia Nzambi wakadi ne tshinji, kujingabo bua kupingaja makasa abo panyima ne kuya ne lukasa londo dia muamua. Kadi Mose, kolola tshianza kabidi, mayi kupingana ne tshinji tshonso kubuikila Bena Ejipitu mu midima ya ndondo mule wa mayi.Pakatshiabo mu dinda, Bena Ebelu kutangilabo bishadila bia bena lukuna babo ba bukitu: Bitalu bilelema pa mayi ne bikanama mu bintu biabo bia mvita. Butuku bumue buakadi bukumbane bua kupikula Isalele ku njiwu minene” – Patriarches et Prophètes, p. 258« Banjelo ba mu diulu ba bukole butambe, badi bimana pa buipi nandi bua kuindila diyi kudiye bua kudisangisha ne bantu ; Mukelenge udi uya kuenza anu tshikondo tshidi malu aya kumueneka anu bukole bua Nzambi ke budi bumanye mua kukanda bienzedi bia bena mudimu ba Nsatana. Tshikondo tshidi bantu ba Nzambi baya kudisangana ku mpala kua njiwu mitambe bunene ne mu kumona kua buntu kakuyi mushindu wa kukandamena bukole bua Nsatana, ke padi Nzambi uya kuenza bua bualu bua bantu bandi. Padi muntu uya kushikila, ke padi Nzambi udileja » - Messages Choisis, vol. 2, p. 428

---

4. BUPIKUDI BUNENE Dinayi 12/02

a. M’mushindu kayi udi Muimbi wa Misambu unvuija bua kupita kua mu Mbuwa Mukunze kua Bena Isalele ? Misambu 77 : ,20-21 ; 106 : 8-11 « Bua kuleja patoke bukole buandi ne kupuekesha mu mushindu wa dikema budisu bua bakengeshi ba bantu bandi, Wakalombola Isalele pankatshi pa Mbuwa ne munkatshi mua mikuna. Wakadi kubasungila mu mushindu mukuabo mutapuluke. Kadi mushindu ewu wakapesha bantu bandi tshikondo tshia kuteta ditabuja diabo ne kuleja patoke ditekemena diabo mu Nzambi. Batshioke ne bakuatshibue ne bowa, Isalele wakabenga ne kutungunuka bua kuenda, ku diyi dia Mose, Nzambi kakadi kubakanguila njila wa lupandu nansha. « N’ku ditabuja kuakasabukabo Mbuwa Musunze, bu mu buloba bume ». Mu kuenda tô ne kuya dia muamua dia mayi bakaleja ditekemena diabo mu diyi dia Nzambi diakamba Mose. Panyima pa bobo benza tshiakadibo anu bobo ne bua kuenza, Wa-Bukole Wa Isalele kukosolola Mbuwa bua kubunzuluila njila » - Patriarches et Prophètes, p. 260-261 c. M’bualu kayi bua kenza Bena Isalele panyima pa bupikudi bua dikema buenza kudi Yehowa ? Ekesode 14 : 31 ; Misambu 106 : 12 N’dilesona kayi didi bualu ebu bupitshisha dituyisha ? « Muaba ewu kudi dikankamika bua bena kuitabuja ba mu bikondo bionso. Moyo wabo misangu mivule utu upitshila mu njiwu, ne mudimu wa kukumbaja utu uya kumueneka mukole misangu mikuabo. Menji abo atu aya kubaleja dibutuka didi kadiyi kuepuka ne kunyima kuabo bupika ne lufu. Ne, Apu diyi dia Nzambi didi ditoke didi dibambila ne : ‘Endayi !’ Apu tshietu n’kutumikila ku diyi dipeta. Nansha mesu etu wowo kâyi mua kutangila ne kujoja midima idi mitunyunguluke ne bubikala tshitelela tshikadi tshimana kulenga makasa etu. Binkandi kabiena biya kumbuka kashidi ku mpala kua menji adi kâyi ne dipangadika ne adi ne kupapisha kua mutshima. Aba badi bindila bua kulua kutumikila anu pikala mundidimbi onso wa dipapisha dia mutshima muya kujimina, ne kakuyi bualu budi mua kufikisha ku dipanga aba bantu kabâ kuya kutumikila nansha. Mpata idi inungana ne : ‘Anji kuindila binkandi bianji kumbuka, ne Uya kumona bimpe bitoke njila webe’ ne didi ‘ditabuja bionso’ didi diamba ne dikoleshibua dionso dia mu mikole ne : ‘Yaku mutangile ku mpala !’ » - Idem, p. 261

---

5. KUIMBA MUSAMBU WA BUTSHIMUNYI Ditanu 13/02

a. M’mushindu kayi wakaleja bantu disanka diabo ? Tela amue meyi a lungenyi lua musambu wa Mose ? Ekesode 15 : 1-21 « Musambu ewu, ne butshimunyi bunene biakadibo bavuluka, biakashala kudi Bena Ebelu bualu buakadi kabuyi mua kukupuka mu menji abo ku bikondo ne ku bikondo, musambu ewu bakawikmba kudi baprofete, ne kudi tungimba tua mu Isalele bua kuamba ne diyi dia dikole dia Yehowa udi bukole ne dipikudibua dia bonso badi bamueyemena » - Patriarches et Prophètes, p. 259 b. N’tshikondo kayi ne m’muaba kayi ne n’kudi mene banganyi baya kuimba kabidi musambu wa buena ewu ? Buakabuluibua 15 : 1-21 « Musambu ewu kawena anu bua Bena Yuda ‘Nkayabo nansha. Udi wamba bua butshimunyi bua ndekelu bua Isalele wa Nzambi ne dibutuka dilualua dia bena lukuna bons oba buakane » - Idem« Badi bimba musambu mupia mupia ku mpala kua nkuasa wa butumbi, musambu udi muntu kayi mua kûyila, anu bantu Binunu lukama makumi anayi ne banayi. M’musambu wa Mose ne wa Muana wa Mukoko. Musambu ewu wa butshimunyi, udi anu bantu binunu lukama makumi anayi ne banayi mua kûyila, bualu m’musambu wa moyo wabo mupitshisha, wa malu adibo anu bobo n’kayabo bapitshile ne bamone » - La Tragédie des Siècles, p. 703-704

Makonka a kuambulula dilesona Disambombo 14/02

1. Bua tshinyi Mose kakapeta bowa ku mpala kua Mbuwa Mukunze ? M’mushindu kayi undi mua kuikala bu yeye ? 2. M’mushindu kayi wakapesha Nzambi Bena Isalele muaba wa kunyemena ? M’mushindu kayi udiye misangu mikuabo ukulongoluela biebe muaba wa kupatukila ? 3. N’tshikondo kayi tshidi Nzambi uya kuenza bualu bua bantu bandi badi mpindieu ku mikalu ya Kanana ka mu diulu ? 4. Bua tshinyi wakasungula bua kuteka Bena Isalele ku mpala kua bualu ebu bukole ? Bua tshinyi tutu tudisangana misangu mikuabo mu malu makole ? 5. Bua tshinyi Musambu wa Mose ne wa Muana wa Mukoko udi amu ne bua kuimbibua kudi kasumbu ka pa buaku ka bantu ?