1. PALO UDI UKANDAMENA NZAMBI Dia kumudilu

a. Tshikondo tshiakafika Mose ne Alona ku mpala kua mukelenge wa Ejipitu, bakamulomba tshinyi ne diandamuna diandi diakadi tshinyi ? Ekesode 5 : 1-3 b. M’budimuishi kayi butudi ne bua kupeta ku budisu ne butomboke bia Palo ? Galatia 6 : 7 ; Nsumuinu 11 : 2 « Badi bateka menji abo ku mutu kua disua dia Nzambi, mu bulelela badi baya kuamba bu Palo ne : ‘Yehowa nganyi bua meme kutumikila diyi diandi ?’. Dipidia dionso dia manya kudi kupapisha kua mutshima ne kubuitshitshija kua bukole bua ngelelu wa menji wa kunvua kua malu ; bidi nunku misangu mikuabo kudi bantu bua kutapulula bulelela ne tshilema ne badi balue nunku ne dikamakama mu kukandamana kuabo ku disua dia Nzambi » - The SDA Commentary, vol. 1, p. 1100« Balayi bonso ne mushinga budimuishi budi bufuma mu diulu : Bu bikala muntu udi ubala ne mushinga wandi wa kuenza malu ne m’muenenu wandi wa malu bidi amu biandi nkayandi kabiyi bia muntu umubela, udi uditeka mu bufofo mu bukokeshi bua Nsatana udi uya kumuangata mu malu kakese kakese tô ne mudi menji andi ne ngenzelu wandi wa malu biya kufuanangana bia musesuishi munene, tô ne padi menji andi onso alua masesuishibue. Nyoka katu upanga kujoja muntu muaba onso, udi umukoka (umusesuisha) tô ne padi muntu uya kupanga bukole bua kusuluka mu buteyi buandi. » - The Publishing Ministry, p. 175

---

2. PALO UDI UBANDISHILA BANTU BUJITU Dibidi 13/01

a. N’kufunda kua mushindu kayi kuakafunda mukelenge Mose ne Alona ? Ekesode 5: 4-5 N’ku ‘dikoseka’ dia mushindu kayi diakadiye ufuanyikija ? “Munkatshi mua bupika buabo, ndelanganyi ya Yakoba, bakadi bajimije mu tshitupa tshikuabo dimanya dia mikenji ya Nzambi ne bakadi bumbuka baya ku luseke ne mikenji eyi. Nsabatu wakadi mene mene muya kulekela, ne tshinyangu tshia banfumu ba midimu kuvuija kujidila kua Nsabatu bualu bukole. Ne Mose kuambila tshisamba tshiandi ne kutumikila kua mikenji ya Nzambi kuakadi bualu bua kumudilu bua kukumbaja bua dipikudibua. Kadi bena tshinyangu kupeta dimanya dia kudienzeja kuandi bua kupingajilula kujidila kua Nsabatu” – Patriarches et Prophètes, p. 234 b. Mu menji kayi akadi Nzambi musue kupatula Isalele mu Ejipitu ? Misambu 105: 43-45 Bualu ebu kutudi budi tshinyi ? “Bu muakadi Nsabatu tshimanyinu tshia Isalele, pakadibo bapatuka mu Ejipitu bua kubuela mu Kanana ka pa buloba, bia momumue dituku edi didi tshimanyinu tshia pa buatshi tshia bantu ba Nzambi mu tshikondo tshidibo badilongolola bua kubuela mu Kanana ka mu diulu. Tshidi tshileja nshinga ya malanda andi pankatshi pa Mukelenge ne bantu bandi; ku Nsabatu ke kudibo bajadika ne bantu m’banemeka mikenji yandi. Nsabatu udi utapulula bena lulamatu ba Nzambi ne bashipi ba mikenji yandi […]Nsabatu wakafidibua ku tshibangidilu bua kuvuluija muntu ne Nzambi udi Mufuki, Udi umuvuluija kabidi ne Yeye [Nzambi] ke Udi umujidila. Bukole buakafuka bintu bionso m’bobo budi bufukulula musuka mu tshinfuanyi tshiandi » - Témoignages pour l’Eglise, vol. 3, p. 16« Padi mikenji ya Nzambi miteka nunku mu tshienzedi [mu moyo], buloba budi buya kujadika nunku ne m’bukokeshi bua pa mûlu budi pamutu pa bantu bonso badi batshina Mukelenge ne bamukuatshila mudimu ». – Idem, vol. 2, p. 246 c. N’tshinyi tshiakadi tshipeta tshia muyuki muenza ne Palo ? Ekesode 5 : 6-14 « Mu bulelela, mukelenge kupeta lutatu mu menji andi, kubanda bena Isalele bu badi bakeba ditomboka ne baya kulekela kuenza kua midimu yabo. Kumona ne bualu ebu budibo bakeba, buakadi buya kukeba lulengu lua kupanga kuenza mudimu, yeye kuya kuenza monso muandi mua kuenza bua kabapetshi tshikondo tshia kukumbaja bualu buabo ebu bua tshitungu tshibi tshitambe. Kuangata musangu umue mapangadika makole a kubatshintshimika ne ku basuika bua kabapetshi menji â abudikadidi. » - Patriarches et Prophètes, p. 234

---

3. NZAMBI UDI UTETA DITABUJA DIA ISALELE Disatu 14/01

a. Ne meyi kayi a kutandisha nawu Mose ne Alona akaluabo nawu kudi bakadi batangila bana ba Isalele mu mudimu ? Ekesode 5 : 19-21 b. Bua tshinyi Yehowa kakapikula Isalele musangu umue ? Bienzedi 14 : 22 « Bena Ebelu bakadi bindile bua kupeta budikadidi kakuyi mateta a ditabuja diabo, kakuyi makenga ne kupangila kua bintu. Kabakadi bapia [baboba] bua dipikudibua. Ditabuja diabo diakadi ditakankana kadiakadi mua kubambuluisha bua kutuala ne lutulu ntatu tô ne tshikondo tshiakadi ne bua kubuela bua kuenza. Ba bungi ba munkatshi muabo kuangata dipangadika dia kushala mu bupika pa mutu pâ kuya kututakena ne malu makole adi kâyi mua kujika mu kushintulula kua musoko. Bakuabo kabidi bakadi bamane kuangata bilele ne bienzedi bia bena Ejipitu, ke bobo kujinga bua kushala mu muaba ewu wakadibo. Bua tubingila etu, Nzambi kakadi ne bua kubapikula amu musangu wakaleja bukole buandi kumpala kua Palo. Wakadi ne bua kupesha mukelenge wa Ejipitu tshikondo tshia kuleja patoke menji andi a tshikisu, ke pakadiye [Nzambi] uya biandi kudileja patoke nkayandi kudi bantu bandi ; bua bobo baya kubandila bukole buandi, bua baya kujinga bua kumbuka mu Ejipitu ne kuditua ku mudimu wandi. Nunku mudimu wa Mose wakadi kuikala mupepele bikole bu musumba munene wa bena Isalele kawakadi ne tshiluilu tshikole ku bulongolodi bua Nzambi » - Patriarches et Prophètes, 236« Bana ba Isalele kuditua anu ku ditapuluka ditendelela dia mpingu ne bilele bibipe bitambe. Bionso ebi tshipeta tshibi tshia bupika. Kadi Yehowa wakadi mutebelela bantu bandi, ne kunyima kua bupikudi buabo, Yeye kubayisha. Kakabalekela nansha. » - The Southern Work, p. 43 c. N’tshinyi tshiakalaya Nzambi bua kuenzela bantu bandi bu muakadi Mose udiabila bua mateta mapia mapia akalua kudi Isalele ? Ekesode 5 : 22-23 ; 6 : 1-8 « Ku luse lunene kutudi, Nzambi, kena ututeka mu mushindu udi mutambe bupepele, bualu yeye muenze nunku, kuikala kuetu kua bintu bidi bua majinga etu, kudi kuya kuenza bua tuetu kupua moyo ne N’ Yehowa ngutu watukuatshisha tshikondo tshitutu tukengela bintu. Utu pa buipi bua kudileja patoke kutudi mu tshikondo tshia kuenza kua lukasa kua malu, ne udi uya kuleja mishindu ya bungi idiye uteka kutudi, nansha bikondo bikale bia mushindu kayi. Udi witabuja ne dipanga kusankishibua ku malu ne ditta bilua kutudi bua tuya kunvua butekete buetu ne tuya kumanya mua kumubikila bua alue kutukuatshisha, bu mudi muana udi ne nzala ne nyota ulomba tatu wandi wa pa buloba » - Reflecting Christ, p. 353

---

4. BANTU BATEKESHIBUE MU MIKOLO Dinayi 15/01

a. M’mushindu kayi wakapeta bana ba Isalele lubila lupeta kudi Yehowa tshikondo tshiakabambila Mose bua musangu muibidi ?Ekesode 6 : 9 N’tshinyi tshiakadi kuikala mushimi wa ditekemena dia bena Isalele bonso ? Genese 15 : 13-14 ; 50 : 24 « Bakulu ba Isalele kudienzejabo bua kutua mpanda ku ditabuja didi ditakankana dia bana babo mu kubavuluija milayi ya Nzambi, nangananga meyi mamba kudi Yosefu mu bulalu buandi bua lufu, akadianzeye kuamba bua dipikudibua diabo. Bamue bakateleja ne kuitabuja kadi tshibungi, tshifofemija mesu ne malu a dikasa dibi akamueneka, kupidiabo bua kutekemena. Bia momumue ku luabo luseka, Bena Ejipitu, bunvua biakadi biakuibua kudi bena Ebelu, kubanga kuseka ne kuela bilele bua bukole bua Nzambi wabo. Bakababala bu bapika, ne kubela kayanda ne : ‘Bu bikala Nzambi wenu udi muakane ne luse lua bungi bu bikalaye udi ne bukole butambe makola a nzambi ya mu Ejipitu, bua tshinyi kena umupesha budikadidi ? » Ne kukumbajabo bua kuamba : tutangilayi, tudi tukukuila nzambi inudi nubikila ne n’nya dishima, biabi, tudi tshisamba tshia bubanji ne tshia bukole. nzambi yetu mienze bua tudiunde, ne kuenze bua nuenu nuikale bapika betu ; m’mitupesha ne bukole bua tuetu kunutshintshimika, ne bua biobi bikengela, tubutule batendeledi ba Yehowa. » Palo ku luandi luseke, kuamba patoke ne Nzambi wa bena Ebelu kakadi mukumbane bua kupikula bantu bandi.Mu kunvua kua meyi â, bena Isalele ba bungi kuya ku luseke lua bakengeshi babo, bakamona ditabuja diabo ditakankana. Bidi bulelela ne bakadi bapika, bikale kumpala kua bionso biakadi bamfumu babo ba tshikisu bakengela bua babenzele. Bana babo bakadi benda babipata bua kubakuata ne kubashipa. Biabi m’pakadibo bamba ne tudi tukukuila Nzambi wa mu diulu. Bu yeye wakadi ku mutu kua nzambi yonso mikuabo, kakadi mua kutulekela muinshi mua mutshi wa tshikokelu wa batendeledi ba mpingu. Ku lukuabo luseke, bena lulamatu kunvua ne Nzambi wakadi muitabuje bupika buabo bualu bakadi baya kule nandi, ne kabayi batshina bua kudisanga mu dibaka ne bantu bakadi kabayi bamanye Nzambi ne kuditua mu kutendelela kua mpingu. Ne m’bobo bakadi kabidi bambila bana babo ne anu mpindieu Nzambi udi ukosa mutshi wa tshikokelu wa mukengeshi” – Patriarches et Prophètes, p. 236 b. Ne meyi kayi akajinga Mose kulomba nawu dilekelela kudi Mukelenge tshikondo tshiakamuambilaye bua aya kabidi kuakula ne Palo ?Ekesode 6: 10-12

---

5. NZAMBI UDI UTUMA BIMANYINU NE BISHIMA Ditanu 16/01

a. Pakadi Yehowa ukankamika Mose bua kupingana kabidi ku mpala kua Palo, wakamuambila tshinyi pa bidi bitangila malu akadiye ne bua kuenza mu Ejipitu ne tshikala diandamuna dia bena Ejipitu ? Ekesode 7 : 1-5 « Diambedi ne kulumbulula kua Nzambi koku kulua mu Ejipitu, Mose wakadi udianjila kunvuija mukelenge bimpe mene mene muikale dikena didi dilua ne bipita bibi biadi, upesha Palo tshikondo tshia kuepuka dikenga dionso diakadi dilua, bakadi badilonda kudi dikuabo dikole kutamba tô ne pakadi moyo wa mukelenge uya kupuekeshibua, ne uya kujadika ne Mufuki, Udi ne moyo ne mulelela […] Ne wakadi musue nunku kutumbisha dina diandi, bua kuzakeja bisamba biaya kumvua bakula bua bualu buandi ne kupikula bantu bandi ku kutendelela kua mpingu, ne kubatuala bua baya kumutendelela yeye udi mukumbanyine nunku. » - Patriarches et Prophètes, p. 237 b. M’mushindu kayi wakadi makole a Nzambi ne a Nsatana mateka mu dikokangana kumpala kua Palo ? Ekesode 7 : 8-12 M’bua tshipatshila kayi buakateta Nsatana kuidikija buenzeji bua Nzambi ? « Mu kuidikija bienzedi bia Nzambi biakadi Mose wenza, [Nsatana] wakadi utekemena se anu bua kupumbisha dipikudibua dia Isalele, kadi m’buakuikala ne buenzeji mu bikondo biakadi ne bua kulua, bua kunyanga ditabuja. Ku bishima Yezu-Kilisto. Nsatana udi udienzeja bikole bua kuidikija tshienzedi tshia Kilisto, ne kujadika bukole buandi ne majinga andi a kuenza malu. Udi usaka bantu bua kunvuija bishima bia Musungidi, bua kubiamba ne m’bia bantu, bienza ku bukole buabo. Udi upeta nunku mushindu wa kumbusha ditabuja dia bantu mu Yezu bu Muana wa Nzambi, ne kubatuala bua kubenga mapa a luse lunene lua bulongolodi bua lupandu. » - Idem, p. 264

Makonka a kuambulula dilesona Disambombo 17/01

1. M’mushindu kayi utudi misangu mikuabo tuya kuleja budisu bu Palo ? 2. M’mu tshinyi mudi Nsabatu muikale tshimanyinu tshia pa buatshi tshia bantu ba Nzambi lelu ? 3. Bua tshinyi bena Isalele ba bungi kabakadi basue kumbuka mu Ejipitu ? Bua tshinyi bantu ba bungi lelu munkatshi muetu kabena basue kulekela bilele ne menji bia buloba ? 4. Bua tshinyi Nzambi wakitabuja bua bena Isalele kuluabo bapika ? 5. Bua tshinyi Nsatana wakateta bua kuidikija bishima bia Nzambi ?