1. KUDILONGOLOLA BUA KUMBUKA Dia kumudilu 02/02

a. N’tshinyi tshiakalomba bena Isalele bu mushinga wa mudimu wabo mukole ne lutatu luabo mu Ejipitu, ne m’bua tshinyi bena Ejipitu bakabapesha bintu ? Ekesode 12 : 33, 35-36 b. Unvuija bua bungi bua musumba wakumbuka mu Ejipitu. Ekesode 12 : 37-39 « Musumba wa bantu munene wa bena Ejipitu, bakafika bua kumanya Nzambi wa Bena Ebelu, kupitshila ku bimanyinu ne bishima biakamonabo mu Ejipitu, bua se wakadi Nzambi Umu’epele Mulelela […] kulayabo bua se kubangishila ku lelu Nzambi wa Isalele Udi ne bua kuikala Nzambi wabo. Kuangatabo dipangadika dia kumbukabo biabo mu Ejipitu ne kuya ne Bana ba Isalele bua kutendelela Nzambi wabo” – The SDA Bible Commentery, vol. 1, p. 1101“Bakiadi bantu ‘binunu nkama isambombo bantu balume, kakuyi kubala kua bana bakese. Ne kabidi musumba munene wa bantu wakaya nabo’ Musumba ewu munene, kawakadi amu ne bantu bakadi bakokibua ku ditabuja dia Nzambi wa bena Isalele, kadi muakadi kabidi musumba wa bantu ba bungi bakadi basue kunyema mputa (makenga) yakadi mibuela mu Ejipitu, ne bakadi mene bakokibue ku dijinga diabo dia kuenda ne kumona malu. Kadi bua aba bantu bakadi anu mushimi wakadi kawuyi ukama wa ditatshisha ne njiwu” – Patriarches et Prophètes, p. 253

---

2. DIVULUKA DIA MUABA W AKADIBO BASHIKAME Dibidi 03/02

a. N’tshikondo bula munyi tshiakashala Abalahama ne ndelanganyi yandi munkatshi mua bantu ba bisamba bia bende, ne m’mu tshipungu tshia bungi munyi tshia ndelanganyi muakaya kujika kusomba kuabo kua mu Ejipitu? Ekesode 12: 40-41; Genese 15: 13-16 b. M’mushindu kayi utudi bietu ne matuku a tshitupa tshipi pa buloba ebu ? Ebelu 11 : 13-16 « Bayidi bakaleja bikole mu bienzedi biabo bua se buloba ebu ke muaba wabo wa kushikama nansha ne bakadi bena kuabo kudi mu diulu ; bakadi bakeba muaba muimpe wa kuikala, musoko wa tshiendelele. Bakadi bananga malu a mu diulu, ne miyuki yabo yakadi ileja bualu ebu bimpe. Bakadi mu buloba, kadi kabakadi ba buloba ; mu nyuma ne mu tshienzedi, kabakadi badifuanyikija ni ku mikenji ne bilele bia buloba. Moyo wabo wa ku dituku ne dituku wakadi uleja patoke ne bakadi nawu bua butumbi bua Nzambi. Ne tshipatshila tshiabo tshinene, tshia Mukelenge wabo, tshiakadi anu lupandu lua misuka » - Left Him Up, p. 325 c. Bua tshinyi kusekelela Pasaka ? N’tshinyi tshiakalomba Nzambi pa bidi bitangila ban’â-bute ba bantu ne ba nyama ? Ekesode 13 : 2, 11-15 ; Nomba 3 : 13 N’dilesona kayi didi mukenji ewu utuyisha ? « M’bua kujadika ne tshikondo tshiakashipibua ban’â-bute mu Ejipitu, ban’â-bute ba bena Isalele, bakadi balamibue kudi mulambu wakafidibua, ban’â-bute ba bantu ne ban yama badi ne tshia kufidibua kudi Yehowa ne bakadi bua kupikudibua ne tshieya tshia kufuta. » - Patriarches et Prophètes, p. 274« Pakajadikibua mudimu wa tshitendelelu, Mukelenge wakasungula Bena Lewi bua kuenza mudimu mu tshitendelelu, pa muaba wa ban’â-bute ba Isalele mujima. Kadi bakatungunuka ne kubala ban’â-bute bu badi ba Mukelenge ne biakadi bikengela kubakula ku mushinga wa nfualanga. Kulua kua ne ban’â-bute kudi ne biunvuija dia pa uadi. Kuenza kua mudimu wa tshivulukidi bua kuvuluka bua mushindu kayi wakenza Nzambi wa dikema kupikula bana ba Isalele, kuvuluka eku kuakadi kuamba bua dipikudibua dinene, diakadi ne bua kukumbana mu Muana Umuepeke wa Nzambi. Nunku mashi akapueka ku biduwu anyi ku makuinji a nzubu akasungila ban’â-bute ba Isalele, mashi a Kilisto adi asungila bantu bonso » - Jésus-Christ, p. 36

---

3. KULONDA BULOMBODI BUA NZAMBI Disatu 04/02

a. N’dijinga kayi dia Yosefu, diakakumbaja bena Isalele tshikondo tshiakumbukabo mu Ejipitu ? Genese 50 : 25 ; Ekesode 13 : 19 « Mu kumbuka mu Ejipitu, bena Isalele bakaya ne tshibutshilu tshia mushinga mukole: mifuba ya Yosefu, yakadi mindile musangu mule dikumbana dia mulayi wa Nzambi ne munkatshi mua bidimu bia bungi bia bupika yakamba bua bupikudi bua Isalele. » - Patriarches et Prophètes, p. 254 b. Bua tshinyi bakenza njila mule pa mutu pa bobo kulonda njila buludi ne mu buloba bulaya? Ekesode 13 : 17-18 « Pakalekela Palo bantu bua bobo kuya, Nzambi kakalombola bena Isalele mu njila wa kupitshila mu musoko wa Bena Peleshete nansha, wakadi mene njila wa tshikoso bua kufika mu Kanana, kadi wakabalombola tô ne ku Sud batangile ku Mbuwa Mukunze […]Bu bobo bayile ku njila wa ku Bena Peleshete bakadi kuikala batatshishibue kudi bantu ba koku bakadi kubla nkila bua kabayi kupita bua kubona ne bapika bakadi banyema banfumu babo. Biabi bena Isalele kabakadi balongolola bikole bua kusambakena ne bantu aba bakadi ne bukole bua bungi, banangi ba mvita ne bayikebi. Ditabuja mu Nzambi kadiakadi kudibo dianji kukenka bikole, kabayi biamua bia mvita, kabayi bibidile kuyiluangana, ne menji mapungile ne bupika bua bidimu bia bungi, benda badiputa ne bakaji ne bana, mikoko eku ne ngombe, bakadi kupeta bowa bua bungi ne bakadi kuteketa mu mikolo : Luendu luabo ne ku Mbuwa Mukunze luakaleja patoke luse lunene lua Nzambi ne menji andi. » - Idem c. N’tshinyi tshitudi ne bua kuvuluka tshikondo tshidi Nzambi umueneka ne udi utulombola mu njila utudi katuyi tunvua, bu muakenzayi ne bana ba Isalele ? Yone 13 : 7 « Mateta etu misangu mivule atu makole mene mene, biaya kumueneka bua se katuena mua ku’atuala, ne kakuyi dikuatshisha dia kudi Nzambi, mu bulelela katuena mua kukumbana. Bituikala katuyi tutekemena mu Yehowa, netuye kuteketa bua muinshi mua majitu a makokeshi adi atuala amu kunyinganyinga ne lutatu. Kadi bituikala tudi beyemena Kilisto katua kupungila muinshi mua majitu nansha. Tshikondo tshidi malu onso aya kumueneka afika ne kakuyi mua kubiunvuija, apu bikengela amu kutekemena mu dinanga dia Nzambi. Kuambulula mu tuetu meyi akamba Kilisto ne : ‘Tshinudi kanuyi bamanye katataka, nenutshimanye pashishe’ » - Avec Dieu Chaque Jour, p. 194

---

4. BIMANYINU BIDI BIMUENEKA BUA BULOMBODI BUA NZAMBI Dinayi 05/02

a. M’muaba kayi wakumbukila bana ba Isalele ? M’muaba kayi wakimanabo misangu ibidi ya kumpala ? Ekesode 12: 32 ; 13: 20 b. N’tshinyi tshiakatuma Nzambi bua kulombola bantu bandi mu munya ne butuku mu luendu luabo ? Ekesode 13: 21-22; Misambu 105: 39 “Isalele wakadi wenda muinshi mua dibendele dia Mukelenge wandi wakadi kayi umueneka. Mu munya, ditutu diakadi dibalombola, diakadi bu dikumbi dinene dibabuikidije, diakadi dibapesha tshiashima mu munya mukole wa mu tshipela. Butuku, ditutu edi diakadi dikudimuka dikuinji dia kapia, diakadi ditokesha tshitudilu tshijima ne dijadika bua dikalanganaku dia Nzambi” – Patriarches et Prophètes, p. 255 c. M’mushindu kayi udi Yehowa unvuija bua dikubibua dia Nzambi kudi bantu bandi mu tshikondo tshia lutatu lua ku nshikidilu, padibo benda basemena pepi ne diku diabo dia mu diulu ? Yeshaya 4: 5-6 “Umue wa mu mifundu yandi mitambe buimpe ne ya busambi ya mu biprofete biandi, Yeshaya udi wamba bua dikunji dia ditutu ne kapia. Udi unvuija mudi Nzambi Uya kukuba bantu bandi mu tshikondo tshia mvita minene ya ndekelu ne makole a bubi: ‘Pa mukuna onso wa Siyona, pa nsangilu yonso Yehowa neabandishe mu munya ditutu didi dinyungulula ne muishi, ne mu butuku, bukenke bua kapia kadi kakenka. Bualu m’mudimu wakadi ne butumbi buandi bondo; kuakadi ne buakuikala ntenta bua kufila ditalaji mu munya, bua luya, ne tshisokomenu bua tshipepele ne mvula.” – Idem, p. 255“Mu tshikondo tshia diteta tshidi tshisemena, Nzambi neafile tshieya tshia dikubibua kudi bonso bakulama diyi dia lutulu luandi. […]Ntambue wa tshisamba tshia Yuda, neikale wa kutamba kunvuila bowa kudi ewu wa kupidia ngasa wandi, neikale Muana wa Mukoko wa Nzambi kudi badi bashala bena lulamatu kudiye. Dituku didi diamba bua tshinji ne kukuatshisha bowa kudi mushipi wa mikenji ya Nzambi, ne didi munya, luse lunene ne bupikudi kudi aba badi batumikila mikenji yandi. Diboko didi ditshibula muntu mutomboke nedikale ne bukole bua kusungila muena lulamatu. Bena lulamatu bonso badi bua kuikala batuishibue bua kuikala mu nsangilu munene: - Neatume banjelo bandi ne mpungi udi udila, bua kusangisha basungula bandi badi ku ntengu inayi, kubangishila ku nfudilu ewu wa diulu ne ku nfudilu mukuabo’ – Matayo 24: 31” – Témoignages pour l’Eglise, vol. 3, p. 9

---

5. PALO UDI UYA MULONDAKAJA ISALELE Ditanu 06/02

a. N’diyisha kayi ne budimuishi biakatumina Yehowa bena Isalele bakadi bafunyina kudi njiwu minene ? Ekesode 14: 1-4 b. Ne makole kayi akalondakaja nawu Palo bakadi baya banyema ne wakabapetela muaba kayi ? Ekesode 14: 5-9 “Mukelenge kuangata dipangadika dia kuzakeja bena Isalele ne tshiluilu tshinene tshia makanda. Bena Ejipitu bakadi batshina bua dikokela diabo dibenzeja ku bukole dia Nzambi wa bena Isalele, bakadi ne bua kubaseka kudi bisamba bikuabo, ne bakadi batekemena ne mu kupingana ne bakadi banyema munkatshi mua baluma bam vita ba bungi, kabakadi amu ne bua kubanga kubenzela mudimu kudi bakadi banyema [Bena Isalele] bapika babo, kadi bakadi bapingaja Lumu Luabo ne buneme” – Patriarches et Prophètes, p. 284 c. Mu mvita yetu bua kupikudibua ku bukelenge bua Nsatana, m’mulayi kayi udi ne tshia kutukuatshisha bua kuitabuja ne kudi amu bupikudi mu bulelela ? Yeshaya 49: 24-25 “Nyuma ya midima neiya kuluangana bua kukuata musuka mu bupika, kadi banjelo ba Nzambi nebaya kuluangana bua bualu bua musuka ne bukole budi bua pa mûlu. Mukelenge udi wamba ne: ‘Tshintu tshinyenga mu mvita tshia muntu wa makanda nganyi udi mua kutshinyenga, ne bantu bakane balama mu bupika nebapikudibue anyi ? Wa-Tshiendelele Udi wamba ne: Eyo bena lukanu ba muntu wa bukole nebamunyebo ne tshia kudia tshia muntu muena tshikisu nebamunyengatshi. Bualu bua nengikale mutshimunyi wa baluishi bebe, N’Ne N’ngapikula bana bebe” – Jésus-Christ, p. 243

Makonka a kuambulula dilesona Disambombo 07/02

1. M’mu tshinyi mudi bitusaka bietu bua kukuatshila Nzambi mua kuikala bifuanangane ne misumba ya bakadi badisanga mu dipatuka dia mu Ejipitu ? 2. M’mushindu kayi utudi mua kuleja ne tudi pa buloba ebu bua tshikondo tshipi ? 3. Bua tshinyi ku mbangilu kua luendu luabo, Bena Isalele bangata njila mule ? N’tshinyi tshitudi ne bua kuyila ku bualu buabo bupitshisha ? 4. M’mushindu kayi udi dikuinji dia kapia ne ditutu ne bua kuya kudileja tshiakabidi mu mudimu wa bantu ba Nzambi mu mvita ilualua ? 5. N’tshinyi tshiakadi Bena Ejipitu bakeba bua kupeta kabidi, pakangatabo dipangadika dia kulonda Bena Isalele ?