Sandi
Pastara kati 27
1. KASAKKIRA SA WITIN MAIWINAN BA
a. Dawan mita prapit warkka daukia dukiara ¿Uplara nahki winisa? 1 King 12:22; 1 Kronicas 17:3 ; Luk 3:2 diaurasa difrantka prapit kum rait aihwa ba wihki wala kum yakan selp prapit puliba? Jerimaya 14:14,15; 23: 21, 32.
b. Nahki Dawan mita prapit warkkara Ilaidsa ra winan? 1 King 19:16. Ilaidsa ba dia warkka daukikan prapit warkkara winan pyuara? 1 King 19:19.
"Dawan saina ilra pauta, alwani kiasma tara wal baliwan kata Moses pyuara, sin witin sika kabu pauni yabal daukata, Jardan awala sin baikata israel luhpia nani lubia dukiara, aima walara kli param takan. skwal tara balan bara Israel waihla soldyarka nani sut pruitikan.
Sakuna Israel luhpia nani lika diara kumi daukras sapkan, aihka pali tâ iwan tatatwikan nahki Dawan aikarnika tara wal Israel waihla nani sut iki tikan ba, baku witin nutakan aisaurka Dawan padin munankan ba tanka "— Patriarcas y Profetas, pág. 641.
Mundi
Pastara kati 28
2. DAWAN WINANKA BA KASAK PALISA
a. Dawan albika baku ¿Diaura Ilaidsa witin luki kaikaia kan Dawan winan pyuara? 1 King 19:20,21; Luk 14:18.
"Ilaidsa witin Dawan winankara praiska tara bara au ar apia takaia ba aimihtara kan. Sin yawan kumi banira wan winiba ba baku wan bisniska wala nani sutba swisi balaia sa Dawan winankara.
Au, Ilaidsa daukan tnatka palikat daukras kabia sin Dawan wantba yawan wan kukanka nani sut ba swisi aiwarkkara balbia, witin mita ridiwandaukaisa, Spirit Holikira mita wapni, kiln, an holi wandauki ai warkkara wanmankaia wantsa, yawan daukaia ba lika yu banira tuktan lupia baku Dawan minara bawi kaiasa bila wali lantakaia." —Profetas y Reyes, pág.164-166.
b. ¿Las palira Ilaidsa mita Ilayas ra dia dia dukia kumi makaban? 2 King 2:9.
"Ilaidsa witin tasba dukia kumi sin makabras kan, apia tasba sinska laka sin apia, makaban Dawan Spiritka Ilayas ra ta brikan ba witinra sin aita bribia dukiara. Kan Ilaidsa pain nukan Israel luhpia nanira kli Dawan yabalkara bribalia ba warkkum isi apiakan an waikna sinska laka wal sip apia kan daukaia " —Profetas y Reyes., pág.169.
c. ¿Dia yawan sipsa lustiwaia wan warkka uba slakni pulisa kaka? Matyu 24:28,29.(Las tani) ¿Tani walara dia takbia yawan wan warkka kasak wankan ba daukisa kaka? Matyu 24:29 (Pas taura).
"Dawan mita yabal kasak ba wan marikansa Aisara waia, rayaka briaia, baha sut warkka ba Spirit Holikira mita wan ta brisa baku apia kaka yawan yakan sip wantanka bribia apia kan wan sinskana diara wahra, taski nanira lika lukisa. Sakuna Dawan Spiritka holikiraba wan ta brisuya pyuara, wan nakra ilin takisa, bar adiara taski bara misbara kaikisa, an klinlakara latwan kaikuya.— Fundamentos de la Educación Cristiana, Pág. 218.
Tiusdi
Pastara kati 29
3. ILAISA LANTAKAIA WILINKAN BA
a. ¿Yawan dia sipsa lantakaia Ilaidsa wina witin wark tatakra sirpi kum baku kaia wantkan ba wina? 2 King 3:11 (las sait).
"Ilaidsa lika bawikira kan, prapit Ilayas wina lan tatakra painkum kan, utla bila warkka sirpi nani ba srinwan apu daukikan. An witin kiama lihni bila wawalra painkum kan, dia daukaia wibia ba tuswras kira daukikan, baku witin riditakikan wark tara aimihtara briaia. Dawan albika pasin smasmalkra nani naha wina kasak aihwa lantakaia sa." — Profetas y Reyes, Pág. 166.
b. ¿Dawan albika kum ba dia marikaiasa airayakara kau wark tara kum mihtara mankras kainara? Luk 16:10-12.
"Upla kum sinsip wiras dia warkka Dawan ridi briba upla kumi bani dukia. Sakuna diara kum yawan nukaia ba lika wark sirpi nani utla bilara apia prias watlara briba sut wal ridiwandaukisa wark kau tara ba wan mihtara mankaia.” —Ídem., pág. 163.
c. ¿Nahki upla ailal naiwa lukisa sin waikna srinwras kira talent kumi brisata wal baku? Matyu 25:14,18,.24-28.
"Wan tilara upla manas sipsa lukaia, wiitin Dawan warkka prias watlara daukras bara gaspel sturkaba yaban pauras. Sakuna bau apia. Yapti kum witin utla bilara ailuhpia nani mainkaiki, kuk taki, kwala tuski, utla bila klin dauki diara sut painkira adarkat bri watlabilara blisin barasa. Baha watla bilara pawi tuktika nani lantakisa nahki diara sut klin, an adar kat brikaia.
Waikna kum insla warkka takiba witin saumuk satka kat mankisa, an dus mâ bri nani satka sin mankisa, utla bilara tuktan nani yaban plun wahwras, witin sin wark yamni daukisa Dawan mawanra." —Idem, pág.163,164.
Winsdi
Pastara kati 30
4. WAHMA NANIRA LANDAUKAIASA SMALKAIA
a. ¿Pasin kum rait Dawan warkara latwan kaikiba dia warkka kau tara brisa? 2 Timuti 2:1-2.
"Pasin nani ba Dawan bila pulpit wina baman lika smalkikaia apiasa, sakuna wahma nani Dawan warkkara landaukaia sa sin Ilayas mita Ilaidsa ra landaukan ba baku. Kristian wahma ailal tasba skulka dimisa sakuna spirit lainkara lika pauras, au witin nani lantakisa wark sat sat dauki lantakaia sakuna airayaka Dawan aula ba wal prawaia riditakras. Aisa an yapti nani naha patka brisa an serts tâ uplika nanisin.
Wan wahmika naniba minit kumira sin yaka bahkira kaia apia utla bilara an sert bilara wahma an tiara asla takanka nani nitsa wark ailal dauki kaia, Dawan warkkara tukbi brihwaia dukiara. Bara pasin an smasmalkra nani wal witin nani tauki kaiasa lantakaia nahki Dawan bila smalki lan takaia.
Tani walara wan wahmika nanira landaukaia nitsa klin laka, wapni an holi lakara wapaia, minit kum sin yaka sturi bahki aisi kiki daknika tilara kaia apiasa." — Patriarcas y Profetas, pág.655
b. Apastil Pal mita Timuti ra lan dauki kan pyuara ¿Dia dukiara kli kli aisikan? 2 Timuti 1:5;3: 14-17.
"Timuti watla bilara ai yaptika Eunice an aikukika Loida wal lika rait kristian kasak kan baha taka naha wahmikara yabal kasak ra brih pakan, baha mita Timuti witin Dawan warkkara winan pyuara minit kumira sin kau takaskran kan.
Naiwa wahma ailal plikisa aniwark kara kau lahla pain aimana aibapiba an sin trabil apu upla sut mita kulkanka yabiba. Sakuna ani warkkara lahla ria wentakisa kaka an trabil bara sa pyuara upla laik apia sa .
Dawan warkkara lika isi apiasa trabil ailal barasa kau pali man wapni, klin, kasak an holi lakara traikaikisma pyuara upla misbara maikisa an ninamra saura aisisa, plikisa nahki muni rayakam wal pulaia.". Comentario Biblico ASD (EGW) Tomo 7, pág. 930.
Tausdi
Pastara kati 31
5. LANTAKI SMALKI; SMALKI LANTAKI KAIASA
a. ¿Ilaidsa kasakka laka nahki prub munan Ilayas wal impakan pyuara? 2 King 2:5,6.
"Prapit Samuel rayakan pyuara prapit skulka paskataba mayara pali kahwan kan Israel luhpia nani aidulra mayuni nina blikan pyuara. Prapit Ilayas mita kli bukan wahma nanira Dawan lâ ka bila smalki landaukaia dukiara. Naha sat skulka watla ba yumhpa barakan: kum ba Gilgal ra kan, wala lika Betel ra kan an yumhpika ba lika Jerikora kan. Kau Ilayas hevenra brihwaras kainara Ilaidsa wal witin naha skulka watla nani sut wihkaikan kata.
Ilaidsa witin prapit Ilayas tnaraya prapit skulka watla nanira wihkaiki taukikan pyuara aikasakka lakara prub munankan an witin marikan rait nahki karna kan ba tanka.”—Profetas y Reyes, págs.168, 169.
b. ¿Dia yawan sipsa lantakaia naha wal Dawan albika kasakkira nani nahki witin wal asla wark takikan ba wina ? 2 Korint 3:8,9.
"Dawan ensalka nani lilia pali wantilara sa ani pyua pasin nani asla taki Dawan warka daukisa an ai pura sunisa pyuara, upla kum nina mayunra yabaia pliki lika apia. Sermon and Talks, Tomo 2 Pág. 15.
Praidi
Sikla kati 1
MAKABANKA LUAN NANI BA LAKI KAIKS
1. ¿Ilaidsa mita dia makaban Ilayas kau hevenra brih waras kainara?
2. Aisas nahki trabil tara sipsa wan purara balaia wan warkka daukras sa kaka.
3. ¿Nahki sipsa yawan wentakaia dia wan mihtara briba sakuna tanka kat daukbia sa kaka?
4. ¿Dia marikaiasa wan rayakara kau wark tara kum wankras kainara?.
5. Ilaidsa wihki Ilayas wal nahki asla warktaki kan ba wina dia yawan sipsa lantkaia.