Upu Tomua

E moni lava o se foafoaga matua mata’ina na fausia ma fa’atū e Lē e ona le malosi uma lava i le lalolagi, mo le silia i le 6,000 tausaga. Ma o le paleali’i o Lana foafoaga maoa’e o le tagata na faia i Lona lava fa’atusa! O le tupulaga lenei o tagata na foafoaina ia nofoia ai lenei paneta ma fa’ao’o atu iai i luga lana pule. Ona o le atamai ma le mana o le mafaufau ua tu’uina mai i luga o tagata, i lenei ituaiga—o tagata o le lalolagi—ua tu’uina atu iai lenei avanoa—ae sili atu nai lo o lenā, ua na o le pau lea o le vaega e tasi i le lalolagi ua ofoina atu i ai le avanoa e ola ai e fa’avavau i le afioaga fiafia o le Foafoa mamalu e o’o i le fa’avavau.

E pei lava o so’o se avanoa ma tiutetauave, e o mai fa’atasi ma tu’utu’uga. O le Foafoa amiotonu ma le alofa mutimutivale o le univesa, na Ia fa’ata’atia manino mai nei tu’utu’uga i o tatou luma ma vala’aulia i tatou ia filifili ma Ia ina ia mafai ona tatou malamalama i āiaiga o Lana feagaiga.

O le mea lea, mo le isi tolu masina, o le a su’esu’e ai e tamaiti aoga o le aoga Fa’a-Sapati i le lalolagi atoa le autu tāua, “Filifili ma Lo Tatou Foafoa.” O le vaega muamua lenei o se fa’asologa o le tausaga atoa ua fa’aautūina “‘Oa o le Upumoni,” ua tu’uina mai ai se malamalama’aga tāua i ma’a matagofie o le upumoni o loo i ai se aogā tele e fa’aa’uupegaina ai mo le fa’avavau. O i latou uma o le a fa’asaoina, e tatau ona iai le fa’atuatua loloto ma le fa’amaoni i le Atua, ma o se molimau a se Kerisiano manumalo, o le a tumau e o’o lava i puapuagā faigatā o le toe itula i le talafa’asolopito o le lalolagi.

“O se tapuaiga e fa’atatau i foafoaga atamamai ma le malamalama o le a maua mai ai ni fa’amaoniga talafeagai o lona moni, auā o le a i ai ni taunu’uga iloga i le loto ma amioga. O le a fa’aalia le alofa tunoa o Keriso i a latou amio i aso taitasi. E mafai ona tatou fesili tu’usa’o ia i latou o e ta’utino mai ua fa’apaiaina, Pe o i ai fua o le Agaga i lou olaga? Pe o e fa’aalia ea le agamalu ma le maualalo o Keriso, ma fa’aali atu le mea moni o oe o se tagata e a’oa’o i aso uma i le aoga a Keriso, fa’atulagaina lou olaga i le ata o Lona soifua’aga lē manatu fa’apito?

“O le fa’amaoniga sili e mafai e so’o se tasi o i tatou ona maua i lo tatou so’otaga ma le Atua o le lagi o le tatou tausiaina lea o Ana poloāiga. O le fa’amaoniga sili o le fa’atuatua iā Keriso o le fa’alagolago ma fa’atuatua lea i le Atua ae e lē o le fa’alagolago lea o le tagata iā te ia lava. Na pau lava lea o le fa’amaoniga o lo tatou fa’atuatua o le tumau iā Keriso o le a ātagia mai ai Lona fa’atusa. E o’o mai lava i le taimi nei a o tatou faia lenei mea, tatou te tu’uina atu le fa’amaoniga ua fa’apaiaina i tatou e ala i le upumoni, auā o loo fa’aalia le upumoni i o tatou olaga i aso ta’itasi.”—Ye Shall Receive Power, p. 121.

“E toatele i latou, e ui o lo’o taumafai e usita’i i poloāiga a le Atua, ae e itiiti le filemu po o le olioli latou te maua. O le leai o sa latou molimau o le taunu’uga lea o le lē fa’atinoina o le fa’atuatua. Latou te savavali e pei o se laueleele masima, o se Vaomatua mātutu. E itiiti se mea latou te maua, pe a afai latou manatu e tele ni a latou mea; auā e leai se tapula’a i folafolaga a le Atua.”—The Acts of the Apostles, p. 563.

O la matou tatalo ina ia fa’atamāoa’igaina i tatou uma i lesona fa’ale-Tusi Paia o le Aoga Sapati i lenei kuata, ma ia matuā fa’amalosia lo tatou fa’atuatua e ala i feso’ota’iga ma Lē Silisili Ese!

O le Matāgaluega a le A’oga Sapati a le Koneferenisi Aoao