---

1. O LE ISI TULAFONO

a. Na fa’apefea ona fa’amatalaina e le Tusi Paia le tulafono lea na tete’e mai iā i tatou, a ua fa’amauina i fao o le satauro? Kolose 2:14; Efeso 2:15. Talu ai ona o le fa’avae autū o poloa’iga e sefulu sa i ai pea lava i Etena i Lona tulaga atoatoa, e fa’apefea la ona tatou iloa o lenei fa’amatalaga e lē o fa’atatau atu lea i lenā tulafono? Kenese 1:31.

e. O ā nisi vaega maōti o lo’o i ai i lenei tulafono fa’a-sauniga? Kolose 2:16, 21. Fa’amata e feso’ota’i atu nei Sapati ma isi tulafono i le ulua’i tulafono tau i le amio lea a tu’uina mai i le foafoaga—po’o se ata o mea atalī ua uma ona tu’uina mai? Kolose 2:17.

“O Etena, na fa’atūina ai e le Atua le fa’amanatuga o Lana galuega o le Foafoaga, e ala lea i le tu’uina atu o Ana fa’amanuiaga i le aso lona fitu. O le Sapati na tu’uina atu iā Atamu, o le tamā ma le sui o le aiga tagata atoa uma lava. O lona tausiaina o lenei fa’atonuga o le a fa’ailoa atu ai le agaga fa’afetai, o se vaega lea e tatau ona faia e i latou uma lava o le a nonofo ma aumau i le lalolagi, o Ia o le Atua o lo tatou Foafoa ma lo tatou Tupu Silisili Ese; auā o i latou uma o galuega a Ona ‘Aao atoa ai ma mea uma o i ai Lana pule. Na fa’apenā ona fa’amanatuina ai pea lava, le tu’uina atu ai i le aiga tagata atoa uma lava. E leai se mea o i totonu o mea fai ata e tāua mo le tagata pe fa’atulafonoina lona fa’aaogāina.”—Patriarchs and Prophets, p. 48.

---

2. O LE TULAFONO FA’A-SAUNIGA

a. O mea ea nei o ni fa’atusa o ni mea e mulimuli ane tupu ma ta’ua ai loa o se tulafono moni lava ma afai e moni, o lē fea ituaiga o tulafono? Eperu 10:1.

“O le nu’u o le Atua, o ē ua Ia ta’ua o Lana oloa fa’apitoa, sa fa’amanuiaina i vaega autū e lua o tulafono; e aofia ai le tulafono tau i le amio ma tulafono fa’asauniga. O le tasi, o lo’o fa’asino atu aga’i i tua i le foafoaga ina ia fai ma fa’amanatuga faifai pea o le Atua soifua, o lē na faia le lalolagi, ma o Ana folafolaga e aofia ai tagata uma o augātupulaga uma, ma o le a i ai pea mo le olaga atoa ma le fa’avavau. Peita’i o le isi, na tu’uina mai ona o le soliga o le tulafono tau i le amio, e aofia ai ma le usiusita’i i taulagaofo ma osigātaulaga lea e fa’asino atu i le lumana’i i le togiola. E matuā iloa lelei le ese’esega o le tasi ma le isi.”—The SDA Bible Commentary [E.G. White Comments], vol. 6, p. 1094.

e. E ui lava o taulaga o manu fasia sa a’oa’o atu lea i tagata Eperu anamua e fa’aata atu ai le taulaga a le Tama’i Mamoe a le Atua o le a afio mai, peita’i o le ā se mea e tatau lava ona tatou malamalama i ai? Eperu 10:2-4.

“O Keriso lava ia o le amataga lea o faigātapua’iga fa’a-Iutaia, o lea, e tusa ai ma fa’atusa ma mea fai ata, na fa’asino pe na fa’aataina mai ai mea fa’alēagaga ma mea fa’alelagi. O le fa’ateleina o taulaga, o le toto o povi po’a ma ‘oti, e lē mafai ai ona aveesea le agasala.”—Ibid., vol. 7, p. 933.

i. O le ā le mea e tasi e iai le mana e fa’amamā ai mai le ta’usalaina o le agasala? 1 Ioane 1:7.

“O se lesona na fa’aataina mai e ala i taulagaofo uma, ma fa’ailogaina i sauniga uma. . . . ua fa’ailoa mai ai le toto o Keriso ua na’o Ia lava e i ai le fa’amagaloina o agasala.”—Ibid.

“O le maliu ai o Keriso mo le togiolaina o le tagata agasala ua aveesea ai le veli ma ua ātagia mai ai le tafe ma le susulu mai o le malamalama i tua atu o le faitau selau ma selau o tausaga, i fa’atulagana atoa lava o sauniga fa’ale-lotu o faiga fa’a-Iutaia. Ma e leai ma se uiga o nei sauniga uma pe ana fai e aunoa ma le maliu o Keriso. O le te’ena ai o Keriso e tagata Iutaia, o le mea lea, o a latou fa’atulagana uma lava o a latou tapua’iga e le’i iai iā i latou se mautinoāga, ma le lē mautonu. Na sili atu iā i latou le tāua o sauniga fa’afa’atusa o mea fai ata e pei ona latou faia i le tulafono o poloa’iga e sefulu, lea e lē pei o mea fai ata, auā o se mea moni e tumau e pei o le nofoali’i o Ieova.”—Ibid., vol. 6, p. 1097.

---

3. O FA’ATULAGANA O FAIGA FA’ASAUNIGA

a. O ai le tagata na ulua’i faia taulaga i manu i lenei auala? Kenese 3:21, 24; 4:2-4; Eperu 11:4.

“Na fa’atūina ma filifilia e le Atua taulaga osia e fai ma fa’amanatuga faifai pea i tagata ma avea o se fa’ailoga o le salamō mai lana agasala a’o se fa’ailoga foi lea i le Fa’aola na folafolaina mai. Sa latou fa’anaunau e fa’ailoa atu i le fanau a tagata pa’ū le upu moni o le agasala na mafua ai ona o’o mai le oti. O se mea sili lea ona tigā iā Atamu lava ia a’o ia faia le osiga o le ulua’i taulaga. Na ia iloa e na’o le Atua lava e mafai ona foa’iina mai ai le ola lea o le a si’itia lona lima e ave’eseina ai. O le taimi muamua lea ua ia molimauina ai le oti, ma na ia iloaina lelei ana fa’apea na usiusita’i o ia i le Atua, semanū e lē fa’aumatiaina se ola o se meaola po’o ua lē o’o foi le oti i se tagata. A’o ia fasimatea le manu e lē sala, na ia lagonaina lona gatete ona na ia iloaina o lana agasala ua mafua ai ona fa’amaligiina le toto o le Tama’i Mamoe lē ponā a le Atua. O lenei va’aiga na aumaia ai iā te ia se lagona loloto ma le tele na’uā o lana solitulafono, lea e leai ma se mea e mafai ona faia i ai ua na’o le maliu lava o le Alo pele o le Atua e mafai ona togiolaina ai. Na ia matuā ofo lava i le agalelei e lē mafa’amatalaina o le Atua i le ofoina mai lea o se togiola fa’apea e lavea’iina ai lē ua agasala. O se fetū o le fa’amoemoe na fa’amalamalamaina ai le lumana’i pogisa ma le mata’utia, ma fa’apea ona aveesea mai ai nai lona fa’afanoga atoa lava.”—Patriarchs and Prophets, p. 68.

e. O le ā se fa’atulagana na ati’ina a’e pea ina ua lē malamalama tagata i le fuafuaga o le fa’aolataga i le mauga o Sinai? Esoto 25:8.

i. Aiseā na tatau ai le fa’amaligiina o le toto? Eperu 9:22. O le ā le fa’atusa o le tama’i mamoe na fai ma taulaga? 1 Korinito 5:7; 1 Peteru 1:19; Ioane 1:29.

“Na ia aumaia ma fa’asino atu tagata na fa’alogologo iā te ia i ata fa’afa’atusa ma ata o tulafono fa’asauniga iā Keriso—i Lona fa’asatauroga, o Lana fa’afaitaulaga, ma Lana galuega i le malumalu—o nei mea na fa’asino atu lea i tua i sauniga fai ata i le taimi o Iutaia. O Ia, o se Mesia, o le fa’atusa o osigātaulaga uma. Na fa’ailoa mai e le aposetolo, e tusa ai ma valoaga ma fa’amoemoega autū o tagata Iutaia, o le a tupu mai le Mesia i le gāfa o Aperaamo ma Tavita. Ina ua ia sa’ilia Lona tupuāga mai le pateriaka o Aperaamo e o’o atu ai i le fai Salamo. Na ia fa’amaonia mai i le Tusi Paia le uiga ma galuega a le Mesia na folafolaina atoa ai ma le talisapaia ma le taliaina e le lalolagi, e pei ona molimau ai le ‘au perofeta paia. Na ia fa’ailoa mai foi, o nei valoaga na fa’ataunu’uina i le soifua’aga, auaunaga, ma le maliu o Iesu, o le mea lea e moni lava o Ia o le Fa’aola o le lalolagi.”—Sketches from the Life of Paul, pp. 103, 104.

---

4. AISEĀ NA AVEESEA AI?

a. A’o fa’aauau pea ona fai sauniga i le malumalu, o le ā le mea na talitonu i ai Isaraelu o lo latou fa’amoemoega lea mo le fa’aolataga? Isaia 1:10-15.

“O le Alo o le Atua o le totonugalemū lea o le fuafuaga sili o le fa’aolataga e mai lava i augātupulaga uma lava, o Ia o le ‘Tama’i Mamoe na fasia talu ona fa’avaeina le lalolagi.’ O Ia o le Fa’aola o atali’i ma afafine na pau’ū o Atamu mai augātupulaga uma o le olaga nofo va’ava’aia o le aiga tagata. . . . O Keriso o le ata po’o le tino lea o mea fai ata lea sa fa’asino atu i sauniga fa’afa’atusa i augātupulaga ua mavae. Ina ua maliu Keriso, o iinā na muta ai sauniga o mea fai ata fa’afa’atusa. O le maliu ai o Keriso na aveesea ai nei ituaiga o sauniga masani, auā o le soliga o le tulafono a le Atua, na mafua ai ona mana’omia sauniga o mea fai ata ma fa’atusa mo le fa’aolataga ma avea o se mea na fa’alauteleina ma fa’amamaluina. O se talalelei o se tala fiafia na fa’aolioliina ai Atamu, Noa, Aperaamo, ma Mose; auā na fa’aalia atu iā te i latou o le a afio mai le Fa’aola.”—The Signs of the Times, February 20, 1893.

“O Ierusalema o le ‘a’ai sili lea o tagata Iutaia, ma o iinā na maua ai le fa’amaualuga fa’asausili ma le manatu fa’apito fa’ailoga tagata. O Kerisiano Iutaia o ē na nonofo i totonu o le mea o i ai le malumalu, e masani lava ona fa’atagaina o latou mafaufau e toe manatunatu ai i le fa’aeaina fa’apitoa o tagata Iutaia o se malo. A’o latou va’aia le aveesea atu o le fa’a-Kerisiano mai sauniga ma uputu’u a Iutaia, ma latou iloa ai o le tulaga ese ma le paia lea sa tu’uina atu i aganu’u fa’a-Iutaia, o le a leiloa ma mou ese atu ona o le malamalama o le fa’atuatuaga fou, e to’atele na latou ita iā Paulo, o lē na ia fa’atupu lenei faiga, i se tulaga maoa’e, lea na mafua ai lenei suiga. . . . O nisi sa sili ona maēlegā i tulafono fa’asauniga.”––From the Life of Paul, p. 71.

e. E ui i taulaga uma na osia, o le ā le mea na fia silasila i ai le Atua? Isaia 1:16-18; Salamo 51:17-19.

i. O le ā le mea na aumaia e le fuafuaga o le fa’aolataga e ala i le toto o Iesu Keriso lea na lē mafaia e faiga fa’aosigātaulaga ona faia? Galuega 4:12; Eperu 7:28, 19.

“O se malamalama sili atu ona manino ma le mamalu ua susulu mai nei i luga o le au Kerisiano. O i latou o ē na ola i ia ona po a’o le’i afio mai Keriso, na latou tulimata’i i le fa’atuatua i Lona afio mai, ae peita’i, o le mea ia ‘u’umau e le fa’atuatua o se fa’amautinoāga lea iā i tatou; auā ua tatou iloa ua afio mai Keriso e pei ona valoia mai e le au perofeta. E taūa lo tatou fa’atuatua i le Togiola, o lē na afio mai i le lalolagi ma maliu mo lo tatou taulaga, e pei ona talitonu tagata anamua i le Fa’aola e afio mai, o fa’atusa o a latou osigātaulaga.”—The Signs of the Times, February 20, 1893.

---

5. TATOU TE MANA’OMIA EA TULAFONO FA’A-SAUNIGA I ASO NEI?

a. Aiseā ua fa’amauina ai i totonu o le Tusi Paia le tulafono fa’a-sauniga? 2 Timoteo 3:16.

e. O le ā le mea o lo’o faia e Iesu i le lagi i le taimi nei? Eperu 8:1-5; 3:1.

i. O le ā le mea e tatau ona tatou faia ona o le tulaga o lo’o faia ai lenei faiga fou i le lagi? Eperu 4:14-16.

“O le finagalo o Keriso ina ia faia e Ona so’o le mea tonu lava lea e tatau ona latou faia mo i latou e pei ona mana’omia—lea o le a fesoasoani e vavae’ese mai ai i latou i a latou tū ma tulafono fa’asauniga lea na latou masani ai lea na o’o mai lava i le taimi lenei o se mea tāua lea iā i latou, ma o le taliaina ai o le talalelei ua lē o toe fa’amalosia ai ia mea. O le fa’aauauina ai o nei sauniga o se mea lea e fa’alumaina ai Ieova.”––The SDA Bible Commentary [E. G. White Comments], vol. 5, pp. 1139, 1140.

“O avefeau o le satauro e tatau ona fa’aa’uupegaina i latou lava i le tatalo ma mataāla, ma aga’i pea i luma i le fa’atuatua ma le lototele, ma galulue ma le lē aunoa i le suafa o Iesu. E tatau ona latou si’itia Keriso o le puluvaga o tagata i le malumalu fa’alelagi, o Lē na fa’asino atu iai taulaga uma o le Feagaiga Tuai, auā e na’o Lana taulaga togiola lava e mafai ai e i latou o ē solia le tulafono a le Atua ona maua ai le manuia filemu ma le fa’amagaloga.”—The Acts of the Apostles, p. 230.

---

FESILI TOE FA’AMANATU

1. Fa’apefea ona tatou iloa o le Sapati aso fitu e lē o aumaia pe o aofia mai foi i totonu o tulafono fai ata po’o sauniga fa’afa’atusa o le Feagaiga Tuai?

2. O le ā le ese’esega e iloga ai tulafono e lua—tau i le amio ma fa’asauniga?

3. Talu ai ona o le tele o le fasi mateina, o a ni uiga ua tatou leiloa i le fasi matea o meaola?

4. O le ā na faigatā ai i tagata Iutaia na nonofo latalata ane i le malumalu ona latou malamalama ua uma le aogā ma le tāua o sauniga fai ata ma fa’atusa?

5. O ā ni vaega aogā ua tatou maua i aso nei mai le su’esu’eina o le auaunaga i le malumalu?