Ulua’i Aso
Fepuari 5
1. O LĒ NA FOAFOAINA MEA E LĒ MAFAI ONA SUIA
a. O le ā se mea e tatau ona tatou iloa e uiga i le so’otaga a Keriso ma le tulafono o le amio a le Atua a’o soifua ai o Ia i lenei lalolagi o le Atali’i o le tagata? Mataio 5:17, 18.
e. Fa’apefea ona ta’ita’ia fa’apitoa e ta’ita’i o Iutaia le tausiaina i fafo o le tulafono? Mataio 23:23; Filipi 3:4.
“[O ta’ita’i Iutaia] sa maēlegā e fa’amautūina foliga o le paia, ae latou tu’ulafoāiina le paia o le loto. A o avea i latou ma tagata e pipi’i mau i le tusi o le tulafono, sa latou solia pea lona agaga. O lo latou mana’oga tele o le suiga lava lea na fa’amalamalama atu e Keriso iā Nikotemo—le fanaufouina o le amio, o le fa’amamāina mai i agasala, ma le fa’afouina o le mālamalama’aga ma le paia.”—The Desire of Ages, p. 174.
i. O le ā e mafai ona tatou maitauina i le fa’amasinoga o Iesu e fa’aalia ai e lē o Ia o se tagata solitulafono? Mataio 26:59, 60.
“E le’i solia foi e le Fa’aola po o ē na mulimuli iā te Ia le tulafono o le Sapati. O Keriso o se sui ola o le tulafono. E leai se soligātulafono o tusitusiga paia na maua i Lona soifua’aga. I le va’ava’ai atu i molimau o se malo o ē na saili se avanoa e fa’asala ai o Ia, sa mafai ai ona Ia fetalai mai e aunoa ma se tete’e. ‘O ai ea so outou na te ta’utino mai sa’u agasala?’ Ioane 8:46, R.V.”—Ibid., p. 287.
Aso Gafua
Fepuari 6
2. O LE TULAFONO I LE FINAGALO O IESU
a. O le ā sa sauniaina mo Iesu ina ua Ia afio mai i le lalolagi? Eperu 10:5-10.
“E le o se avanoa, ae o se fuafuaga ina ia tu’u’ese e le Togiola o le lalolagi Lona paleali’i, tu’u’ese Lona ofu tautupu, ae afio mai i lo tatou lalolagi o se tagata. Na Ia fa’aofuina Lona paia i le ufiufi o le tino tagata, ina ia tula’i o Ia o le ulu o le aiga tagata, o Lona tagata soifua ua fefiloi fa’atasi ma tagata o le tupulaga ua pau’ū ona o le lē usiusita’i o Atamu.”—Southern Work, p. 85.
e. Pe a tatou faitau i le soāfuaitau lava lea e i le Feagaiga Tuai e uiga ia Keriso, o le a le mea na valoia e i ai i Lona finagalo? Salamo 40:6–8.
“O le soliga o le tulafono e i’u atu ai i le agasala, fa’anoanoa, ma le oti. Na folafola atu e Satani o le a ia fa’amaonia atu i lalolagi na foafoaina e le Atua, ma ē atamai fa’alelagi, o se mea e lē mafaia ona fai le tausiaina lea o le tulafono a le Atua. Ina ua gaua’i atu Atamu i le fa’aosoosoga a le fili, ma pa’ū ese mai lona tulaga maualuga ma paia, sa olioli Satani ma ana agelu. Peitai na fa’alogoina mai i le nofoali’i o le Atua se si’ufofoga o fetalai mai i upu e uiga ese. [Salamo 40:6-8 ia si’itiaina.] Ina ua paū le tagata, na fofogaina mai ai e Keriso Lona finagalo o le avea ma sui ma mautinoāga mo le tagata.”—The Review and Herald, September3, 1901.
i. Pe a tatou taliaina Keriso i totonu o ō tatou loto, o le ā le mea o lo’o tatou taliaina i se auala faigofie fa’atasi ma Ia? Salamo 119:70, 72, 77, 174.
“O le amo e fusifusia ai le auauna atu, o le tulafono lea a le Atua. O le tulafono sili o le alofa na fa’aalia i Etena, na folafolaina atu i luga o Sinai, ma le feagaiga fou ua tusia i le loto, o le tulafono lea e fusia ai le tagata faigaluega i le finagalo o le Atua. Afai e tu’ua i tatou e mulimuli i o tatou lava fa’anaunauga, e ō atu i le mea tonu o le a ta’ita’i atu i ai i tatou e o tatou loto, e tatau ona tatou pau’ū atu i vaega ‘au a Satani ma avea ai ma e ē mauaina ona uiga. O le mea lea e taōfi’ofia ai i tatou e le Atua i Lona finagalo, lea e maualuga, mamalu, ma fa’aeaina. E finagalo o Ia ina ia tatou tauaveina ma le onosa’i ma le poto tiute o le auauna atu. O le amo o le auaunaga ua amoina e Keriso lava Ia i le tino tagata.”—The Desire of Ages, p. 329.
“O le amiotonu o le paia lea, e foliga i le Atua, ma ‘o le Atua o le alofa lava ia.’ 1 Ioane 4:16. E ōgatasi ma le tulafono a le Atua, ‘aua ua tonu Au poloāiga uma lava’ (Salamo 119:172), ma ‘o le alofa o le atoatoa lea o le tulafono’(Roma 13:10). O le amiotonu o le alofa lea, ma o le alofa o le malamalama ma le soifua’aga o le Atua. O le amiotonu a le Atua ua fa’aalitino mai iā Keriso. Tatou te maua le amiotonu e ala i le taliaina o Ia.”—Thoughts From the Mount of Blessing, p. 18.
Aso Lua
Fepuari 7
3. E TUSA AI MA LE TULAFONO MA ‘AU PEROFETA
a. Ina ua fa’amatala atu e Iesu i le ʻau so’o o Lona soifua’aga o se fa’amaoniga ola lea o Ia o le Mesia, o ā mau na Ia fa’aaogāina? Luka 24:27, 44.
“O Lona fa’amoemoega o le fa’amalamalamaina o lo latou malamalama ma fa’amau atu lo latou fa’atuatua i le ‘upu mautinoa o le valoaga.’ Na Ia finagalo ina ia maua’a le upumoni i o latou mafaufau, ae e lē na o le lagolagoina e ala i Lana lava molimau patino, ae ona o fa’amaoniga e lē māfesiligia ua tu’uina mai e fa’atusa ma ata o le tulafono masani, ma valoaga o le Feagaiga Tuai. Sa mana’omia e so’o o Keriso ona i ai se fa’atuatuaga poto, e le gata mo i latou lava, ae ina ia mafai ai ona latou aveina atu le malamalama o Keriso i le lalolagi, na fa’asino atu ai e Iesu le au so’o iā ‘Mose ma perofeta uma.’ O le molimau lenā na tu’uina mai e le Fa’aola toetū i le aogā ma le tāua o Tusitusiga Paia o le Feagaiga Tuai.”—The Great Controversy, p. 349.
e. Fa’apefea ona fa’amaonia e le ‘au so’o, a o latou tala’ia le fe’au o le tala lelei, o Iesu o Lē na folafolaina mai? Galuega 28:23.
“Na fa’atasi le Agaga o le Atua i upu na fetalaia mai, ma sa o’otia ai o latou loto. O le olega a le ‘au aposetolo i valoaga o le Feagaiga Tuai, ma o lana ta’utinoga ua fa’ataunu’uina nei mea uma i le galuega a Iesu le Nasareta, na aumaia ai le talitonuga i le to’atele o tagata o lo’o mo’omo’o mo le afio mai o le Mesia folafolaina. Ma o upu fa’amautinoa a le failaūga e fa’apea o le ‘tala fiafia’ o le fa’aolataga sa mo Iutaia ma Nu’u’ese, na aumaia ai le fa’amoemoe ma le olioli iā i latou o e ē le’i faitaulia fa’atasi ma fanau a Aperaamo e tusa ma la le tino.”—The Acts of the Apostles, i. 172, 173.
“I le lauga atu ai o Paulo i tagata Tesalonia, na talosaga atu ai Paulo i valoaga o le Feagaiga Tuai e uiga i le Mesia. O Keriso i Lana galuega na tatalaina ai mafaufau o Ona so’o i nei valoaga; ‘ua amata mai iā Mose ma le ‘au perofeta uma, ona fa’amatala ai lea e Ia iā te i latou o mea ua tusia iā te Ia i Tusitusiga uma,’ Luka 24:27. I le tala’iga o Keriso e Peteru na ia aumaia ai ana fa’amaoniga mai le Feagaiga Tuai. Sa mulimuli foi Setefano i le ala lava lea e tasi. Ma o Paulo foi i lana tala’iga na talosaga atu ai i tusitusiga paia o lo’o valoia ai le fanau mai, o puapuagā, o le maliu, toetū, ma le afio a’e o Keriso i le lagi. E ala i le molimau musuia a Mose ma perofeta sa ia fa’amaonia ai ma le manino le fa’asinomaga o Iesu le Nasareta fa’atasi ma le Mesia ma fa’ailoa mai ai talu mai onapō o Atamu o le si’ufofoga lava o Keriso lea na fetalai mai e ala i pateriaka ma perofeta.”—Ibid., pp. 221, 222.
Aso Lulu
Fepuari 8
4. TULAFONO MA LE FA’ATUATUA
a. Pe o le tu’uina atu ea o lo tatou fa’atuatua iā Iesu o lo tatou Fa’aola patino ua aveesea ai le tulafono? Aiseā pe aiseā e leai ai? Roma 3:31.
e. O le a le fa’amanuiaga ua fofogaina mai i luga o e tausia poloa’iga? Fa’aaliga 22:14.
“O le solia o poloa’iga a le Atua na o’o mai ai se fetu’u i luga o Atamu ma Eva, ma sa aveesea uma mai ai iā i la’ua lo la aiā tatau i le laau o le ola. Na maliu Keriso e fa’aolaina ai le tagata, ae na ia fa’asaoina le mamalu o le tulafono a le Atua. Ua Ia fetalai mai ‘Amuia i latou o e fai Ana poloa’iga ina ia tāga iā i latou le laau o le ola, ma ia ulu atu ai i le A’ai i ona faitoto’a.’ Ua fa’ailoa mai iinei e le Alo o le Atua o le faia o poloa’iga a le Atua o le tulaga lea o le a tatou maua ai le aiā tatau i le laau o le ola. O le solia o poloa’iga a le Atua na aveesea mai ai i le tagata le aiā tatau i le laau o le ola. Na maliu Keriso, ina ia mafaia ai e ala i Lona toto, o le usiusita’i i le tulafono a le Atua e mafai ai ona agava’a le tagata mo le vi’iga fa’alelagi, ma toe tu’uina atu ai iā te ia le aiā tatau lea i le laau o le ola.”—Spiritual Gifts, vol. 3, p. 88.
“Sa si’omia i matou e agelu a o matou savavali atu i luga o le sami tioata i le faitoto’a o le a’ai. Ua si’i a‘e e Iesu Lona a’ao malosi ma le mamalu, ma tago atu i le faitotoā penina, ma toe sulu i ona so’oga feīlafi, ma fetalai mai iā i matou, ‘Ua outou ta o outou ofu i Lo’u toto, ua outou tutumau mo La’u upu moni, ulu maia i totonu. Sa matou savavali atu i totonu ma lagona ua iā i matou se aiā tatau atoatoa i totonu o le a’ai.”— Early Writings, p. 17.
i. E fa’apefea ona fa’aalia e lenei mea le Atua e lē suia lava? Eperu 13:8.
“E faia e Iesu mea tetele mo i tatou, pe afai tatou te faia ma le fa’amaoni o tatou tiute. E tatau ona gaua’i atu o tatou loto i le finagalo o le Atua. E tatau ona tatou ava ma fa’amamaluina le Alii e ala i le usiusita’i i Ana poloa’iga uma, e o’o lava i mea tatou te ta’ua o mea laiti. O le upu moni, e pei o lona Tusitala paia, e lē māsuia i ona mana’oga, e tutusa lava ananafi, o le asō, ma le fa’avavau. E le ōgatasi ma tū ma aga a tagata, e lē ōgatūsa ma o latou manatu. Ua aumaia e le upu moni se vavae’ese i le va o tagata o le Atua ma le lalolagi. Ae afai na fa’amaonia e le Atua lo tatou tulaga i tausaga ua mavae, o se nu’u uiga ese, e fa’apefea la ona Ia silasila mai i lo tatou tulaga i le taimi nei? Pe ua tatou maua ea le fa’alēagaga talu ona tatou ō ese mai lo tatou olaga faigofie?” —The Signs of the Times, Me 25, 1882.
Aso Tofi
Fepuari 9
5. TUSIAINA I LE LOTO
a. E mafai fa’apefea ona i ai le tulafono a le Atua i o tatou olaga i le auala lava lea e tasi na iā e Iesu? Eperu 10:16; 8:10.
“Ua tu’uina mai e le Atua iā i tatou Ana poloa’iga paia, auā e alofa o Ia i tagata. Ina ia puipuia i tatou mai taunu’uga o le solitulafono, ma ua Ia fa’aalia mai ai mataupu fa’avae o le amiotonu. O le tulafono o se fa’ailoaga o le finagalo o le Atua; pe a talia Keriso, e avea ma o tatou manatu. E si’itia a’e ai i tatou i luga a’e o le malosi o mana’oga fa’alēnatura ma tu’inanauga, i luga a’e o fa’aosoosoga e ta’ita’iina atu i le agasala.”—The Desire of Ages, p. 308.
e. O le ā le mea ua fa’aali mai e le Atua iā i tatou ae tatou te le’i amataina lenei malaga fa’alelagi? 1 Ioane 4:19, 8.
“Sa pogisa le lalolagi ona o le lē malamalama i le Atua. Ina ia mafai ona ave’esea le pogisa, ina ia mafai ona toe fa’afo’i atu le lalolagi i le Atua, o le a fa’aumatia ai le malosi taufa’asesē o Satani. E lē mafai ona faia fa’amalosi lenei mea. O le fa’aaogaina o le malosiaga e fete’ena’i ma mataupu fa’avae o le malo o le Atua; E na o le auauna atu lava o le alofa e fa’anaunau i ai o Ia; ma e lē mafai ona poloa’iina le alofa; e lē mafai ona manumalo ai i le fa’amalosi po o le pule. E na o le alofa lava e fāgua ai le alofa. O le iloa o le Atua o le alofa lea ia te Ia; O Ona uiga e tatau ona fa’aalia e ese mamao mai i uiga o Satani. O lenei galuega e na o le to’atasi lava le Tagata i le atulaulau uma e mafai ona faia. E na o Ia lava na te silafia le maualuga ma le loloto o le alofa o le Atua na te mafaia ona fa’ailoa mai.”—Ibid., p. 22.
i. O le ā se mea e mafai pe a uma ona i ai lenei alofa o le Atua i o tatou loto? Ioane 14:15-17.
Aso Faraile
Fepuari 10
FESILI TOE FA’AMANATU
1. Fa’apefea ona fa’atumauina e Iesu le amio a le Atua a o soifua i le tino tagata?
2. Fa’apefea ona fa’aalia le uiga tutusa o Keriso i tagata talitonu moni?
3. Ina ia talitonu moni o Iesu o le Mesia, o ā valoaga e tatau ona tatou iloa lelei?
4. Fa’apefea ona maua e tagata agasala le aiā tatau i le laau o le ola lea na taofia ai i latou e le agasala?
5. O le ā le auala e tasi e mafai ai ona tatou maua le usiusita’i fa’amaoni?