Ulua’i Aso
Fepuari 26
1. O LE METOTIA LAVA E TASI I LE FOU MA LE TUAI
a. Talu ai e lē suia lava le Atua (Malaki 3:6, Eperu 13:8), o le ā se mea e tatau ona tatou iloa e uiga i Lona fa’anaunauga e fa’atatau i le fa’aolataga o agaga uma na Ia foafoaina? Salamo 78:38; Esekielu 18:32; 2 Peteru 3:9.
“E lē finagalo [le Atua] ia fano se tasi, ae peita’i e naunau e vaai i tagata uma lava ua o’o i le salamō. . . . Na pa’ū ifo le pelu o le fa’amasinoga tonu i luga o [Keriso] ina ia latou sa’oloto ai. Na Ia maliu ina ia latou ola ai.”—God’s Amazing Grace, p. 326.
e. I le fa’apaiaga o le malumalu na fausia e Solomona, o le a le soāfuaitau maoa’e i le Feagaiga Tuai o lo’o ta’utino ai le naunau o le Atua e fa’amagalo? 2 Nofoaiga Tupu 7:12–14. Fa’apefea ona toe fa’aleoina lenei mea i le Feagaiga Fou?1 Ioane 1:9; 2:1.
“O le agasala a le tagata lava ia e tatau ona ta’uta’u atu iā Keriso, ua na o le pau lea o le puluvaga e tasi i le va o le Atua ma le tagata. . . . O agasala uma lava o se solitulafono i le Atua, ma e tatau ona ta’uta’u atu iā te Ia e ala iā Keriso. O agasala fai fa’aaliali uma e tatau ona ta’uta’u atu fa’aaliali. O mea sesē e faia e sou uso a tagata e tatau ona toe fa’alelei ma lē ua tigā. Afai e i ai nisi o lo’o sa’ilia le soifua maloloina ma ua ta’usalaina i le tautala leaga, afai ua latou fa’atupuina fe’ese’esea’iga i totonu o le aiga, tuāoi, po o le ekalesia, ma ua fa’aosofia ai le fa’atu’iese ma le fe’ese’esea’i, pe afai o i ai se faiga sesē ua latou ta’ita’ia atu ai nisi i le agasala, e tatau ona ta’uta’u atu nei mea i luma o le Atua ma luma o ē ua māsei ma fa’atigā i ai.”—Gospel Workers, pp. 216, 217.
Aso Gafua
Fepuari 27
2. O LE LA’ASAGA MUAMUA IA MAUAINA AI LE FA’AMAGALOGA
a. E fa’apei o le galuega a le Agaga Paia o le aumaia lea o se talitonuga maumaututū i le loto (Ioane 16:8), o le ā sa tatou tali muamua? Salamo 86:5.
“O se talitonuga maumaututū e taofi mau i le mafaufau ma le loto. E i ai i le tagata agasala se lagona o le amiotonu a Ieova ma lagona le mata’u o le fa’aali mai, i lona lava nofosala ma le lē mamā, i luma o Lē e su’esu’e i le loto. E mafai ona ia va’aia le alofa o le Atua, o le matagofie o le paia, o le olioliga o le mamā; e naunau o ia i le fa’amamāina ma ia toe fa’afo’isia i le feso’ota’iga ma le Lagi.”—Steps to Christ, p. 24.
“O lenā salamō e maua mai i le ūna’iga o le alofa tunoa paia i luga o le loto ma o le a ta’ita’ia atu ai i le ta’uta’u atu ma le lafoa’ia o le agasala. O fua fa’apenā na folafola mai e le aposetolo na va’aia i olaga o tagata talitonu i Korinito.”—The Acts of the Apostles, p. 324.
e. I le va’ava’ai atu i le fa’aa’oa’oga i le aso o le Penetekoso, o le ā le mea na tupu o se fa’ai’uga o le loto fuatiaifo i le talitonuga o le agasala? Galuega 2:36, 37.
“E ala i le ta’uta’u atu ma le lafoa’ia o le agasala, e ala i le tatalo fa’atauanau ma le tu’uina atu fa’apaiaina o i latou lava i le Atua, ina ia saunia ai ulua’i so’o mo le liligiina ifo o le Agaga Paia i le Aso Penetekoso. O le galuega lava lea e tasi, ua na o se tikeri sili atu, e tatau ona faia i le taimi nei.”—Testimonies to Ministers, p. 507.
i. E mafai fa’apefea ona tatou fa’amatalaina le taunu’uga o le talitonuga maumaututū e ta’ita’iina atu ai i se suiga i le olaga? Galuega 2:38.
“A o le’i mafai e [tagata Isaraelu] ona maua le filemu moni, e ao ona ta’ita’iina i latou e vaai ma fa’aali atu le agasala lava lea na ta’usalaina ai i latou.”—Patriarchs and Prophets, p. 614.
“O le ta’uta’u atu o agasala ma le fa’amaoni e masani lava ona i ai se uiga patino, ma fa’ailoa mai ai ni agasala fa’apitoa. Atonu o se natura e nā o le aumaia i luma o le Atua, atonu o ni mea sesē e tatau ona ta’uta’u atu i luma o tagata ta’ito’atasi o ē na mafatia i ni manu’aga ona o i latou, pe atonu foi o ni ituaiga lautele e tatau ona fa’ailoa atu i le fa’apotopotoga o tagata. Ae o le ta’uta’u atu o agasala uma lava e tatau ona manino ma tonu, i le fa’aalitino atu o agasala lava ia ua ē ta’usalaina ai.” —Testimonies for the Church, vol. 5, p. 639.
Aso Lua
Fepuari 28
3. O SE FA’ATA’ITA’IGA O LE SALAMŌ SĒSĒ
a. Pe na salamō Iuta i le fa’alataina o Keriso i le ‘au faitaulaga sili (Mataio 26:14–16, 47–49)? Aiseā pe aiseā na leai ai? Mataio 27:3, 4.
“Ua fa’apaū ifo Iuta i a’ao o Iesu, ma ta’u atu o Ia o le Alo o le Atua, ma aioi atu iā te Ia e lavea’i ia te Ia lava. E lei fa’alumaina e le Fa’aola lē na fa’alataina o Ia. Sa silafia e le Fa’aola e le’i salamō Iuta; o lona fa’aali atu na fa’amalosia mai e lona agaga fa’asalaina e ala i se lagona leaga o le ta’usala ma le sailiga mo le fa’amasinoga, ae na te le’i lagonaina le loloto, o se fa’anoanoaga loto nutimomoia ona ua ia fa’alataina le Alo e lē ponā o le Atua, ma fa’afitia le Paia e To’atasi o Isaraelu. Peita’i e le’i fetalai Iesu i se upu e ta’usalaina ai. Ona silasila atu lea o Ia ma le alofa iā Iuta, ma fa’apea atu, O le itu aso nei na Ou sau ai i le lalolagi.”—The Desire of Ages, p. 722.
“Pe a fa’aumatia e le agasala le manatu mamā, o lē e fai mea sesē na te lē iloatino ia fa’alētonu o lana amio pe iloa foi le mata’utia o le leaga na ia faia; ma se’iloga ua gaua’i o ia i le mana fa’atalitonuina o le Agaga Paia, o le a tumau ai pea o ia i se vaega tauaso o lana agasala. O ana ta’utinoga e lē tu’uina atu ma le loto atoa ma le fa’amaoni. O ta’utinoga uma lava o lona ta’usalaina, na ia fa’aopoopoina atu ai se fa’atō’esega e fai ma ‘alofaga o lona ala, ma ta’utino atu, ana lē seanoa ma tulaga fa’apitoa semanū e lē faia lenei mea po’o se mea e a’oa’ina ai o ia.”—Steps to Christ, p. 40.
“O le fa’atuatua ma le tatalo e mafai ai e tagata uma ona ausia tulaga mana’omia o le talalelei. E leai se tagata e mafai ona fa’amalosia le solitulafono. O lana lava māliega e tatau ona maua muamua; e tatau i le agaga ona fuafuaina le fa’atinoga o le agasala a o le’i mafai e le tu’inanau ona pulea le mafaufau lelei po o le amiolētonu i le loto fuatiaifo. O fa’aosoosoga, po o le a lava le malosi, e lē o se alofaga mo le agasala.” Po o le a lava le malosi o tofotofoga, e lē o se ‘alofaga lea mo le agasala.”—Testimonies for the Church, vol. 5, p. 177.
e. Fa’amatala pe o se ituaiga salamō lea e ta’ita’i atu ai i le ola e fa’avavau pe leai. Mataio 27:5; 2 Korinito 7:8–11.
“E to’atele o lo’o fa’asesēina i latou lava, ma ulu atu i fuafuaga e leai se mea e faia i ai e le Alii. Ae na o le pau lava le ala saogalemu e tulituliloaina o le usiusita’i lea i le afioga a le Alii. Na i lo le faia o lenei mea, e to’atele ua manatu e faia ni mea ofoofogia. Latou te iloa e faigofie ona fuafua se mea sili mo le lumana’i nai lo le lafoa’ina o i latou lava, o le tu’uina atu o le loto i le Atua, o le mafaufau, ma le finagalo, ma gaua’i atu ina ia fa’atusaina e lenā mana lea e mafai ona foafoaina ma fa’aumatia ai. Ia iloilo toto’a e talavou o latou fa’anaunauga, e ala i le tatalo ma le su’esu’eina o le Tusi Paia, ma vaai pe e lē o ta’ita’ia ese ai e o latou lava loto ma fa’anaunauga mai le finagalo ma mea e mana’omia e le Atua.”—The Youth’s Instructor, March 23, 1893.
Aso Lulu
Mati 1
4. O SE FA’AA’OA’OGA O LE SALAMŌ MONI (SALAMO 51)
a. O le ā le mea e tupu pe a tatou lē fa’ailoa atu a tatou agasala i luma o le Atua ae ua lē tautala fa’atatau i ai? Salamo 32:3, 4.
e. Ina ua uma ona fa’aali sa’o e le perofeta o Natano le agasala a Tavita (2 Samuelu 12:1–12), na fa’apefea ona tali atu le tupu? 2 Samuelu 12:13.
“Na o’otia le loto o Tavita i le a’oa’iga a le perofeta; sa fa’aosofia lona loto fuatiaifo; o lona ta’usalaina na o’o i se tulaga maoa’e. Sa ifo toēle lona agaga i le salamō i luma o le Atua.”—Patriarchs and Prophets, p. 722.
“Sa fa’amaoni ma loloto le salamō o Tavita. Sa leai se taumafaiga e fa’afilemuina lana solitulafono. Sa leai se mana’o e sola ese mai fa’amasinoga ua fa’amata’uina, na musuia ai lana tatalo. Peita’i na ia va’aia le telē o lana solitulafono fa’asaga i le Atua; na ia va’aia i le fa’aleagaina o lona agaga; na ia ino’ino i lana agasala. E lē na o le fa’amagaloga na ia tatalo ai, ae mo le loto mamā. E le’i fa’avaivai Tavita i lana tauiviga. I folafolaga a le Atua i tagata agasala ua salamō na ia va’aia ai le fa’amaoniga o lana fa’amagaloga ma lona taliaina.”—Ibid., p. 725.
i. Na fa’apefea foi ona tupu lenei mea i le loto o Simona le Petania? Luka 7:40–48. O le ā le auala e tasi e mafai ona maua ai le filemu ma le fa’aleleiga? Salamo 32:5; Ieremia 3:13; 1 Ioane 1:9.
“E pei ona faia e Natano ma Tavita, sa nātia e Keriso Lona aiga i lalo o le veli o se fa’ataōto. Na Ia tu’uina atu i luga o Lana auauna le avega o le tu’uina atu o le fa’asalaga i ona lava luga. Na ta’ita’ia e Simona le fafine ua ia inosia nei i le agasala. Sa matuā lagona e lenei fafine lona sesē iā te ia. O tagata aitalafu e to’alua o le fa’ataōto, o Simona ma le fafine na fai ma sui. E le’i fa’atatauina e Iesu e a’oa’o atu fa’apea e ese’ese tikeri o matāfaioi e tatau ona lagonaina e tagata e to’alua, auā e tofu le tagata ma le aitalafu o le loto fa’afetai e le’i mafai ona toe totogiina. Ae na lagona e Simona o ia lava e sili atu le amiotonu nai lo Maria, ma sa fa’anaunau Iesu iā te ia ina ia va’ai lava o ia i le tele o lona sesē. O le ā Ia fa’ailoa atu iā te ia o lana agasala e sili atu nai lo Maria, e pei o se aitalafu e lima selau pene e sili atu i se aitalafu e limasefulu pene.
“Ua amata nei ona va’ava’ai Simona iā te ia lava mo se malamalama fou. . . . Ua i ona luga le ma’asiasi, ma ua ia iloa ai o lo’o i ai o ia i luma o Lē e sili atu iā te ia. . . . .
“Sa o’otia Simona i le agalelei o Iesu i le lē a’oa’ia fa’aaliali o ia i luma o le ‘au vala’aulia. . . . O apoapoa’iga onosa’i na fa’atalitonuina ai o ia i lona sesē. Sa ia va’aia le telē o le aitalafu na ia nofo aitalafu ai i lona Alii. Sa fa’amaualaloina lona fa’amaualuga, sa salamō o ia, ma avea ai le Faresaio fa’amaualuga o sē e fa’atauvaa, o se so’o e fa’ataulaga’ofoina.”—The Desire of Ages, pp. 566–568.
Aso Tofi
Mati 2
5. O LE MEAĀLOFA O LE FA’AMAGALO
a. Afai tatou te matuā a’afia i le solitulafono, e mafai fa’apefea ona ta’ita’ia i tatou i le loloto, ma le fa’anoanoa moni i a tatou agasala? Galuega 5:30, 31; Isaia 55:6, 7; Eperu 4:16.
“O se salamō fa’apenei, e lē mafai ona ausia e lo tatou lava malosi; ua na’o Keriso lava e maua ai, o lē na afio a’e i lugā ma foa’iina mai meaālofa i tagata.”—Steps to Christ, p. 25.
“Afai e te va’ai atu i lau agasala, aua le toe fa’atali a ia fa’aleleia oe lava. E to’afia i latou ua manatu e lē o lava lo latou lelei e ōmai ai iā Keriso. Pe e te fa’amoemoe e fa’aleleia atili oe e ala i au lava taumafaiga? ‘E mafai ea ona liua e le Aitiope o lona pa’u, pe liua e le nameri o lona ila? a mafai loa, ona mafai foi lea ona amio lelei o outou ua masani i amio leaga.’ Ieremia 13:23. E na o le Atua lava e i ai le fesoasoani mo i tatou. E lē tatau ona tatou fa’atalitali mo se malosi e fa’atauanau atu, mo ni avanoa e sili atu ona lelei, po o ni mea e sili atu ona malolosi. E leai se mea e mafai ona tatou faia e i tatou lava. E tatau ona tatou ōmai iā Keriso e pei ona tatou i ai.”—Ibid., p. 31.
e. E fa’apefea ona tatou fa’atalitalia le faia o lenei galuega e le Atua mo i tatou ma totonu iā i tatou? Eperu 12:12; Filipi 1:6.
“O le salamō, e fa’apea foi i le fa’amagaloga, o meaālofa ia a le Atua e ala iā Keriso. E ala i le ūna’iga a le Agaga Paia tatou te ta’usalaina ai i le agasala, ma lagona ai lo tatou mana’omia o le fa’amagaloga. E leai se tasi ua na o lē ua salamō e fa’amagaloina; ae o le alofa tunoa o le Atua e salamō ai le loto. Na te silafia o tatou vaiva’iga uma ma fa’alētonu, ma o le a Ia fesoasoani mai iā i tatou.”—Selected Messages, bk. 1, p. 353.
i. O le ā le taunu’uga o lea ituaiga o le ta’uta’u atu ma le fa’amaoni? Roma 8:1.
Aso Faraile
Mati 3
FESILI TOE FA’AMANATU
1. O le ā e mafai ona tatou a’oa’oina mai i le tatalo a Solomona i le fa’apaiaga o le malumalu?
2. O ā la’asaga e mana’omia ona tatou manatu mamafa i ai pe a tatou fia auai i le fa’ai’uga o le galuega a le Atua i lalo o le mana a le Uaga Mulimuli?
3. Aiseā e mana’omia ai ona ta’uta’u atu a tatou agasala i le Atua? O le ā lo tatou tiute tau’ave moni o lo tatou faia o le agasala?
4. O le ā le fa’aeteetega e mana’omia ina ia fa’ailoa i se tasi ua nofosalaina?
5. E mafai fa’apefea e se tagata agasala ona salamō?