---

1. O LE POLOGA E FA’AFENUMIA’I AI MAFAUFAU

a. O le a le tulaga o Isaraelu mo le tele o tausaga—ma na fa’apefea e lenā tulaga ona a’afia ai lo latou malamalama i le Atua ma Ana tulafono? Esoto 20:1, 2; Teuteronome 5:15.

“O lo latou nofo pologa, sa matuā leiloa ai e tagata le malamalama o le Atua ma mataupu fa’avae o le feagaiga fa’a-Aperaamo. I le lavea’iina o i latou mai Aikupito, na saili ai le Atua e fa’ailoa atu iā i latou Lona mana ma Lona alofa mutimutivale, ina ia ta’ita’iina atu ai i latou e alolofa ma fa’atuatua iā te Ia. Na Ia aumaia i latou i lalo i le Sami Ulaula—lea na tuliloaina ai e Aikupito, na foliga mai e lē mafai ona sosola—ua latou iloa ai lo latou matuā lē mafaia lava, o lo latou mana’omia o le fesoasoani fa’alelagi; ona Ia faia lea o le lavea’iga mo i latou. O lea na fa’atumulia ai i latou i le alofa ma le agaga fa’afetai i le Atua ma le talitonu i Lona mana e fesoasoani iā i latou. Sa Ia noatia i latou iā te Ia lava e avea ma o latou lavea’i mai le nofo pologa fa’alētino.

“Ae sa i ai se upumoni sili atu e tatau ona fa’agae’etia ai o latou mafaufau. O le ola ai i le lotolotoi o le ifo i tupua ma faiga pi’opi’o, sa leai so latou manatu moni i le paia o le Atua, o le agasala tele o ō latou lava loto, o lō latou lē agava’a, iā i latou lava, e tu’uina atu ai le usiusita’i i le tulafono a le Atua, ma lo latou mana’omia o se Fa’aola. O nei mea uma e tatau ona a’oa’oina ai i latou.”—Patriarchs and Prophets, p. 371.

e. O fea na aumai ai i latou e le Atua ina ia mafai ona latou malamalama i le paia ma le ta’ua o Lana tulafono? Esoto 19:1, 5, 6.

---

2. O LE MATUĀ AGASALA TELE O LE AGASALA

a. Na fa’apefea ona tali atu tagata Isaraelu i folafolaga o fa’amanuiaga e ui ina latou malamalama i le tulafono ina ua fetalai mai le Atua? Esoto 19:8; 24:3.

“Ua lē iloa e tagata le agasala o ō latou lava loto, ma a aunoa ma Keriso e lē mafai ona latou tausia le tulafono a le Atua; ma sa latou ulu atu ma le loto malie i le feagaiga ma le Atua. Na latou lagonaina ua mafai ona latou fa’atūina la latou lava amiotonu, sa latou ta’utino mai ai, ‘O mea uma ua fetalai mai ai Ieova matou te faia lava, ma matou usiusita’i i ai.’ Esoto 24:7. Na latou molimauina le folafolaga o le tulafono i le mamalu mata’utia, ma sa latou gatete i luma o le mauga i le mata’u; ae peita’i sa na o ni nai vaiaso na mavae ona latou solia lea o la latou feagaiga ma le Atua, ma ifo toēle e tapua’i i se tupua ua ta. Sa lē mafai ona latou fa’amoemoe mo le finagalo malie o le Atua e ala i se feagaiga ua latou solia; a o lenei, i le va’aia o lo latou agasala ma lo latou mana’omia o le fa’amagaloga, sa aumaia ai iā i latou le lagona o lo latou mana’omia o le Fa’aola na fa’aalia mai i le feagaiga fa’a-Aperaamo ma o se ata lafoia mai i faiga o osigātaulaga. O lenei, o le fa‘atuatua ma le alofa na noatia ai i latou i le Atua o lo latou lavea’i mai le pologa o le agasala. A o lenei ua saunia i latou e talisapaia fa’amanuiaga o le feagaiga fou.”—Patriarchs and Prophets, pp. 371, 372.

e. O a tu’utu’uga o lenei feagaiga? Teuteronome 27:26; Esekielu 20:11; Levitiko 18:5.

i. E pei o lo tatou tulaga fa’alēnatura, o le ā se mea sa lē mafai ona latou malamalama i ai? Ieremia 17:9; Isaia 1:5, 6; 64:6.

“ ‘Tou te lē mafafai ea ona auauna iā Ieova,’ o le tala lea a Iosua: ‘auā o Ia o le Atua paia; . . . O le a ia lē fa’amagaloina a outou solitulafono po o a outou agasala.’ A o le’i i ai se toe fuata’iga tumau e tatau ona ta’ita’iina tagata ina ia lagona lo latou lē atoatoa i iā i latou lava e tu’uina atu le usiusita’i i le Atua. Na latou solia Lana tulafono, na ta’usalaina ai i latou o ni tagata solitulafono, ma leai se auala e sosola ese ai. E ui ina latou fa’alagolago i lo latou lava malosi ma le amiotonu, ae sa lē mafai ona latou maua le fa’amagaloga mo ā latou agasala; sa lē mafai ona latou ausia ia ta’utinoga po’o mana’oga o le tulafono atoatoa a le Atua, ma sa lē aoga lo latou ta’utino atu o i latou e auauna atu i le Atua. E na o le fa’atuatua lava iā Keriso e mafai ai ona latou maua le fa’amagaloga o agasala ma maua ai le malosi e usiusita’i ai i le tulafono a le Atua. E tatau ona tu’u lo latou fa’alagolago i ā latou lava taumafaiga mo le fa’aolataga, e tatau ona latou fa’alagolago atoatoa i galuega lelei ma le manuia a le Fa’aola na folafolaina, pe afai e talia i latou e le Atua.”—Ibid., p. 524.

---

3. TALIAINA O LE FEAGAIGA

a. Ina ua uma ona faitau e Mose le tulafono ma ona tu’utu’uga uma o fetu’u ma fa’amanuiaga, na fa’apefea ona tali atu pea Isaraelu? Esoto 24:7.

“O mafaufau o tagata, ua fa’atauasoina ma fa’alumaina e le nofo pologa, e le’i saunia e talisapaia atoatoa mataupu silisili o mataupu fa’avae e sefulu a le Atua. Ina ia mafai ona malamalama atoatoa ma fa’amalosia ia matāfaioi o le tulafono, na tu’uina atu ai mataupu fa’aopoopo, e fa’amatala ma fa’aaogāina ai mataupu o poloāiga e sefulu. E lē pei o le tulafono, o nei mea na tu’uina atu fa’alilolilo iā Mose, o lē o le a feso’ota’i atu i tagata.”—Fundamentals of Christian Education, p. 506.

“Na tusia e Mose, e lē o poloa’iga e sefulu, ae o fa’amasinoga e finagalo le Atua latou te tausia, ma folafolaga i se tu’utu’uga ina ia latou usiusita’i iā te Ia. Sa ia faitauina atu nei mea i tagata, ma sa latou ta’utino mai latou te usiusita’i i afioga uma na fetalai mai ai le Alii. Ona tusia lea e Mose la latou tautōga fa’amaoni i le tusi, ma avatu ai le taulaga i le Atua mo le nuu. ‘Ona tago lea o ia i le tusi o le feagaiga, ma faitau i luma o le nu‘u; ona latou fai mai lea, O mea uma ua fetalai mai ai le Alii o le a matou faia, ma usiusita’i i ai. Ona ave lea e Mose o le toto ma sausau i luga o le nuu, ma fa’apea atu: Fa’auta i le toto o le feagaiga na outou osia ma Ieova i nei upu uma.’ Na toe fai atu e le nuu la latou tautōga fa’amaoni iā Ieova o le a latou faia mea uma na Ia fetalai mai ai, ma usiusita’i i ai.”—The Spirit of Prophecy, vol. 1, p. 240.

e. O le ā le mea na vave ona faia e fa’aalia ai le mātuiā o lenā māliega? Esoto 24:6, 8.

“O lea na talia ai e tagata la latou ta’utinoga fa’amaoni i le Alii e faia mea uma na Ia fetalai mai ai, ma usiusita’i i ai.”—The Signs of the Times, May 6, 1880.

“O iinei na maua ai e tagata tu’utu’uga o le feagaiga. Sa latou osia se feagaiga paia ma le Atua, e fa’atusa i le feagaiga na osia i le va o le Atua ma tagata talitonu uma iā Iesu Keriso. Sa tu’u atu ma le manino tu’utu’uga uma ia i luma o tagata. E le’i tu’ua i latou e lē malamalama iā i latou. Ina ua talosagaina i latou e filifili pe latou te mālilie i tu’utu’uga uma na tu’uina atu, sa latou mālilie fa’atasi e usiusita’i i matāfaioi uma. Ua uma ona latou mālilie e usiusita’i i poloa’iga a le Atua. O mataupu fa’avae o le tulafono ua patino nei, ina ia latou iloa ai le tele o mea na aofia ai i le osigāfeagaiga e usita’i ai i le tulafono; ma sa latou taliaina au’iliiliga patino o le tulafono.”—Manuscript Releases, vol. 1, p. 114.

---

4. O SE TUPULAGA UA LEILOA

a. O le ā le mea na tupu i le to’atele o le nuu o Isaraelu ona sa latou le’i malamalama i lo latou lē mafai ona fa’asaoina i latou lava ma tausia atoatoa le tulafono e aunoa ma le fesoasoani fa’alelagi? Numera 26:63–65.

“O mea uma lava e mafai e i tatou lava ona faia ua fa’aleagaina e le agasala.”—Christ’s Object Lessons, p. 311.

“Sa fa’alogo Nikotemo i le tala’iga a Ioane le Papatiso e uiga i le salamō ma le papatisoga, ma fa’asino atu tagata i Lē e tatau ona papatisoina i le Agaga Paia. O ia lava na lagonaina e leai se tulaga fa’alēagaga i totonu o tagata Iutaia, ma i se tulaga maoa’e, sa pulea ai i latou e le fa’ailoga tagata ma le mana’o fa’alelalolagi. Sa ia fa’amoemoe mo se tulaga lelei o mea i le afio mai o le Mesia. Peita’i ua lē mafai e le savali saili o le loto o le Papatisoga ona galue i totonu iā te ia ona o taunu’uga o le agasala. O ia o se Faresaio fa’amaoni, ma sa fa’amaualuga o ia lava i ana galuega lelei. Sa fa’aaloalogia tele o ia ona o lona agalelei ma lona matamau i le lagolagoina o le auaunaga i le malumalu, ma sa ia lagonaina le saogalemū o le finagalo malie o le Atua. Sa fa’ate’ia o ia i le manatu o se malo e mamā tele mo ia e va’ai i ai i lona tulaga o i ai nei.”—The Desire of Ages, p. 171.

e. O se fa’afitāuli ea i le Atua po o tagata lenei feagaiga “tuai”? Eperu 8:8.

“ ‘O se Kerisiano moni!’ O lenei manatu taufa’asesē ua avea ai le to’atele e pei o se ofu o le fa’afia-amiotonu, ma ua ta’ita’iina atu ai le to’atele i se fa’amoemoe iā Keriso, o lē sa leai se malamalama masani e uiga iā te Ia, e uiga i Ona a’afiaga, o Ona tofotofoga, o Lona soifua’aga o le fa’afitia e le tagata o ia lava ma le ositaulaga o le tagata lava ia. O lo latou amiotonu ua latou fa'amoemoe tele i ai ua na o ni ‘ie palapalā. Ua fetalai mai Keriso, le A’oa’o pele: ‘Ai sē fia mulimuli mai ia te A’u, aua ne’i fa’afiti o ia iā te ia, a ia ave lona satauro, i le mulimuli mai ai iā te A’u.’ Ioe, mulimuli ia te Ia i le leaga fa’apea foi i ripoti lelei. Mulimuli iā te Ia i le fa’auo atu i ē sili ona lē tagolima ma leai ni uo.”—Testimonies for the Church, vol. 2, pp. 177, 178.

“O le ā le mea ua tupu ai le malaia, o le lē lavalavā o i latou o ē ua manatu ua mau’oa ma fa’ateleina i oloa?—O le mana’o lea i le amiotonu a Keriso. I lo latou lava amiotonu ua fa’atusaina ai i latou ua fa’aofuina i ie palapalā, peita’i o lenei tulaga ua latou fa’avi’ivi’i ai ia i latou lava ona ua fa’aofuina i latou i le amiotonu a Keriso. Fa’amata e lē o se taufa’asesē sili lenei? E pei ona fa’ailoa mai e le perofeta, atonu latou te alalaga, ‘O le malumalu o Ieova, o le malumalu o Ieova i matou’ (taga’i Ieremia 7:4), a o fa’atumulia o latou loto i femalaga’iga lē paia ma fefa’ataua’iga amiolētonu.”—This Day With God, p. 228.

---

5. MANA’OMIA SE ISI FEAGAIGA

a. Ona o le feagaiga tuai ua matuā leai lava se fa’amoemoe, o le ā le folafolaga e tasi e mafai ona tu’uina atu ai le fa’amoemoe iā i latou o lo’o soifua i le vaitaimi o le Feagaiga Tuai? Ieremia 31:31–33.

“E ala i le fa’atuatua iā Keriso e mafai ai ona maua le usiusita’i i mataupu fa’avae uma o le tulafono.

“O le agaga o le nofo pologa e fa’atupuina e ala i le saili e ola e tusa ai ma tapua’iga fa’aletulafono, e ala i le taumafai e fa’ataunu’u ia ta’utinoga ai le tulafono i lo tatou lava malosi. E na o le pau le taimi e i ai le fa’amoemoe mo i tatou, pe a tatou o mai i lalo o le feagaiga fa’a-Aperaamo, o le feagaiga lea o le alofa tunoa e ala i le fa’atuatua iā Keriso Iesu. O le talalelei na folafolaina atu iā Aperaamo, lea na ia fa’amoemoe i ai, o le talalelei lava lea e tasi o lo’o folafola mai iā i tatou i aso nei, lea ua tatou maua ai le fa’amoemoe. Na va’ava’ai atu Aperaamo iā Iesu, o Ia fo’i o le Tusitala ma le Fa’ai’uina o lo tatou fa’atuatua.”—The SDA Bible Commentary [E. G. White comments], vol. 6, p. 1077.

e. Ta’u mai nisi o toa i Tusitusiga Paia o ē na taliaina nei folafolaga o le fesoasoani fa’alelagi. Eperu 11:4–32.

“Mai i lea tupulaga i lea tupulaga, o toa o le fa’atuatua ua fa’ailogaina i lo latou fa’amaoni i le Atua, ma ua aumaia fa’aaliali i latou i luma o le lalolagi ina ia mafai ona susulu atu lo latou malamalama i ē o i le pouliuli. O Tanielu ma ana uo e to’atolu o ni fa’aa’oa’oga mata’ina o le loto toa fa’a-Kerisiano. . . . Mai mea na tutupu iā i latou i le lotoā o Papelonia, tatou te a’oa’oina mai ai le mea o le a faia e le Atua mo i latou o ē auauna iā te Ia ma le loto atoa.”—My Life Today, p. 68.

---

FESILI TOE FA’AMANATU

1. Fa’apefea ona tatou mulimuli i le a’afiaga lava lea e tasi o tagata Eperu i le lē mafai ona malamalama i le uiga moni o le tulafono paia tau i le amio?

2. Aiseā na latou vave ulu atu ai i folafolaga e lē mafai ona latou tausia?

3. Fa’apefea ona faigofie ona ta’ita’ina i tatou i le faia o folafolaga fa’apenā i le Atua i aso nei?

4. O le ā le mea na fa’aauau pea ona tupu i taimi totoe o le talafa’asolopito o Isaraelu?

5. O ā ni fa’aa’oa’oga o iā i tatou, e fa’aalia ai o le fa’aseseina fa’ale-malō e lē o se ‘alofaga lea mo lo tatou fa’atuatua māluelue?