Ulua’i Aso
Mati 5
1. TA’UAMIOTONUINA
a. Pe a fa’amaoni ona fa’aali atu a tatou agasala ma tu’uina atu atoa o tatou ola iā Iesu—po’o le amataga o lo tatou molimau fa’a-Kerisiano po’o la’asaga uma o le ala—o le ā se mea tatou te maua mai i le Atua? Roma 3:24-26.
“Sa mafai e Atamu a’o le’i pa’ū, ona fausia se amio mamā ma le tonu e ala i le usiusita’i i le tulafono a le Atua. Peita’i na le’i faia e ia lenei mea, ma o lana agasala na mafua ai ona pa’ū lo tatou natura ma ua lē maua ai e i tatou le amiotonu. Talu ai o i tatou o tagata agasala, lē paia, ua lē mafai ai ona tatou usiusita’i atoatoa i le tulafono paia. Auā e lē iā te i tatou sa tatou lava amiotonu e mafai ona tali atu ai pe fa’afetaia’ia ai mana’oga o le tulafono a le Atua. Peita’i ua faia e Keriso le ala e mafai ona tatou sao mai ai. Auā na Ia soifua i lenei lalolagi i le lotolotoi o tofotofoga ma fa’aosoosoga lea e fetaia’i ma i tatou. Na soifua o Ia i se olaga e aunoa ma se agasala. O Ia lava na maliu mo i tatou, o lea ua ofoina mai ai e Ia Na te tauaveina a tatou agasala ma Ia ofoina mai ai Lana amiotonu mo i tatou. Afai e te tu’uina atu oe lava iā te Ia, ma talia o Ia e avea ma ou Fa’aola, ona lē ta’ua ai lea o lau agasala iā te oe lava, auā o Ia ua ta’uamiotonuina ai oe. O le amio a Keriso ua avea ma suitulaga i lau amio, ma taliaina ai oe e le Atua e pei lava e te le’i agasala.”—Steps to Christ, p. 62.
e. O le ā le umi o lenei e alu ai lenei faigāmalaga? Fa’ataoto 4:18; Mareko 13:13.
Aso Gafua
Mati 6
2. FA’ALELEIA O LE ALOFA TUNOA FA’A-KERISIANO
a. E ese mai i le fa’amagaloga/ta’uamiotonuina, o le a se isi mea e finagalo le Atua e foa’iina ia i tatou? 2 Korinito 7:1; Eperu 6:1; Filipi 3:12-14.
“O suiga fa’apenā o le amio e pei ona va’aia i le soifua’aga o Ioane, o se taunu’uga lea o le so’otaga ma Keriso. Atonu e iloga ni fa’alētonu i uiga o le tagata, peita’i afai ae avea o ia ma so’o moni o Keriso, o le mana o le alofa tunoa fa’alelalolagi o le a suia ma fa’apaiaina ai o ia. O lo’o va’ava’ai atu i le pupula o le Alii e pei o le fa’ata, ona liua ai lea o ia e mai le pupula i le pupula, se’ia o’o ina avea o ia e pei o Ia o lē ua ia naunau i ai.”—The Acts of the Apostles, p. 559.
“A aunoa ma le alofa tunoa o Keriso, o le tagata agasala ua leai se fa’amoemoe; ma ua leai se mea e mafai ona faia mo ia; peita’i e ala i le alofa tunoa fa’alelagi, ua foa’iina mai ai i le tagata le mana fa’alelagi, e galueāina ai le mafaufau ma le loto, atoa ma le amio. O le foa’iina o le alofa tunoa o Keriso e iloatino ai le natura inosia o le agasala, se’ia tuli’esea mai ai i le malumalu o le loto.”—Selected Messages, bk 1, p. 366.
“Ua na’o le mana fa’alelagi lava e mafai ai ona toe fa’afouina le loto o le tagata ma fa’atumulia ai agaga i le alofa o Keriso e aunoa ma se isi lava mea, lea o le a fa’aalia mai ai ia lava i le alofa mo i latou na Ia maliu ai. Auā o fua o le Agaga o le alofa, o le olioli, o le filemu, o le onosa’i, o le fa’apalepale, o le agalelei, o le fa’amaoni, o le agamalu, ma le fai fa’atatau lelei. Pe a liua le tagata i le Atua, o iinā o le a ia maua ai se tofo fou o le amio mamā, ma o le a foa’iina mai i ai le malosi fou e fa’aosofia ai, ma fa’aosofia ai o ia e fiafia i mea e mana’o i ai le Atua, auā o lona olaga ua fusia i le filifili auro o folafolaga e lē māsuia o le soifua’aga o Iesu. O le alofa, o le olioli, o le filemu, ma le agaga fa’afetai e lē mafa’amatalaina o le ā fa’atumulia ai le agaga, ma o le gagana a lē ua fa’amanuiaina o le a fa’apea mai, ‘Auā o Lou agamalū ua fa’asilisiliina ai a’u’ (Salamo 18:35).”—Ibid., p. 336.
e. O ā nisi o la’asaga i le fa’atuputeleina atili o le alofa tunoa fa’a–Kerisiano tatou te mana’omia i le ala i le malō o le lagi? 2 Peteru 1:5-11.
“O Keriso, o Ia lē na Ia soso’oina le lalolagi ma le lagi, o le ala fa’aapefa’i. O le fa’avae ua mausalī le totōina i luga o le ele’ele e ala i Lona soifua’aga fa’alētagata; o le fa’atumutumuga e o’o atu lea i le nofoali’i o le Atua i Lona natura paia. O le itu tagata o Keriso o lo’o fusia ai le aiga tagata pa’ū, a’o Lona itu Atua o lo’o taofimau atu i le nofoali’i o le Atua. E lavea’iina i tatou e ala i le a’e atu i la’asaga o le ala fa’aapefa’i, ma va’ava’ai atu iā Keriso, ma taofimau atu iā Keriso, o le fa’amautū o lea sitepu i lea sitepu i le maualuga o lo’o i ai Keriso, ina ia faia ai e Ia mo i tatou le poto, ma le amiotonu, ma fa’apaiaina, ma le togiola.”—Testimonies for the Church, vol. 6, p. 147.
Aso Lua
Mati 7
3. O LE MANA E ALA I LE AFIOGA A LE ATUA
a. E fa’apefea ona fa’amalamalamaina e le Atua o tatou mafaufau ina ia taula’i pea i luma le tuputupu a’e fa’a-Kerisiano? 2 Korinito 4:4-6; Salamo 119:105; Levitiko 20:7, 8.
“A ōgatūsa le loto o le tagata ma le finagalo o le Atua, e aumaia ai o ia ma avea ma pule aoao. So’o se mea e faia i Lana upu e mafai ona fa’ataunu’uina e ala i Lona mana. Auā o Ana poloa’iga uma lava e mafai ai.”—Christ’s Object Lessons, p. 333.
“O le ato’atoāga o le amio e fa’avae lea i luga i le i ai lea o Keriso iā i tatou. Afai tatou te fa’alagolago i taimi uma e ala i le galuega a lo tatou Fa’aola, ma savavali i Ona tulaga’a’ao, ona avea ai lea o i tatou fa’apei o ia, e paia ma lē ponā.
“E lē finagalo lo tatou Fa’aola ina ia lē mafai e so’o se agaga ona faia se mea. Na te lē o fa’alagolago mai i Ona so’o i se mea e lē o tusa ai ma Lona finagalo i le tu’uina atu lea iā i latou le alofa tunoa ma le malosi e faia ai. Na te lē o vala’au atu iā i latou ia atoatoa pe ana fai e lē o i ai i Lana upu le ato’atoāga uma o le alofa tunoa lea e ofoina atu iā i latou o le a Ia tu’uina i ai se avanoa sili ona maualuga ma le paia. Ua Ia aumaia iā i tatou se mautinoāga e sili atu e ala lea i Lona naunau e foa’iina mai Lona Agaga Paia iā i latou o ē ole atu iā te Ia, nai lo le tu’uina atu e matua i a latou fanau o meaālofa sili ona lelei.”—That I May Know Him, p. 130.
e. O le ā le ta’uga tatou ta’ua ai lenei fa’asologa o le tuputupu a’e fa’a-Kerisiano i le upu moni e ala i le mana o le Afioga Paia a le Atua? Ioane 1:14; 17:17.
“Pe afai e avea le upu moni ma mataupu fa’avae autū o le olaga, ona ‘fanaufouina ai lea o le agaga, e lē o le fatu e pala a’o le fatu e lē pala lava, o le Afioga lea a le Atua, ua ola ma ua tumau e fa’avavau.’ O lenei fanaufouina o le taunu’uga lea o le taliaina o Keriso o le Upu a le Atua. A aumaia e le Agaga Paia upu moni paia i le loto, ona fafaguina ai lea o manatunatuga fou, ma fafaguina ai le malosi i ē o momoe ina ia galulue fa’atasi ma le Atua.”—The Acts of the Apostles, p. 520.
“O le olaga fa’apaiaina o le ekalesia o le fa’anaunauga sili lea o le Atua i Ana feso’ota’iga uma ma Ona tagata. Na Ia filifilia i latou talu mai le vavau, ina ia avea ma tagata paia. Na ia ofoina mai Lona Alo ina ia maliu mo i latou, ma ia fa’apaiaina i latou e ala I le gaua’i i le upu moni, ma ia tu’ueseina ai mea fa’atauva’a uma lava mai iā te oe. E mafai ona vi’ia le Atua e i latou o ē fai mai e talitonu iā te Ia, peita’i se’ivaganā ua tusa i latou ma Lona fa’atusa ma pulea e Lona Agaga. Ona avea ai lea o i latou o ni molimau mo le Fa’aola, ma latou fa’ailoa atu ai mea ua faia e le alofa tunoa fa’alelagi mo i latou.” ––Ibid., p. 559.
Aso Lulu
Mati 8
4. TULAGA O MEA SĒSĒ
a. Pe a tatou tō manatu i tagata paia o le Atua i taimi uma i le Tusi Paia, o le ā e tatau ona tatou malamalama i ai, i le mauaina o le manumalo mulimuli? 1 Ioane 1:8, 10; Roma 7:18; Kalatia 6:14.
“O le malumalu na tu’uina atu iā Tanielu na fa’aosofia ai le lotoleaga o alii sili o le malo. Na saili e peresitene ma perenise se mea e ta’uleagaina ai o ia. ‘A ua lē maua e i latou se mea e fa’alani po’o se mea leaga e tasi, auā sa fa’amaoni o ia, ua lē maua foi sona sesē e tasi, po’o se mea leaga iā te ia’ (Tanielu 6:4).”
“E ma’eu le tāua o le lesona ua aumaia iinei mo le ‘au Kerisiano uma. O mata o le fuā na taula’i atu iā Tanielu i lea aso ma lea aso; o o latou foliga na va’aia ai le ino’ino, peita’i e leai se upu po’o se gaioiga o lona olaga na o latou fa’auigasesēina. Na te le’i faia pe fa’aalia i lona olaga se lē fa’apa’iaina, auā na ia faia le mea e sili ona ta’uleleia—auā na ola o ia i se olaga fa’amaoni ma fa’apaiaina.”—The Sanctified Life, p. 42.
“O le fa’apaiaina fa’afoliga e ta’ita’i’eseina mai ai mai le Tusi Paia. Ua fa’aitiitia ai tapua’iga ua o ni talafa’agogo. Ua fua a latou tapua’iga i lagona ma o latou manatu. O lo’o latou ta’utino mai e lē o ta’u agasalaina i latou ma taupelopelo gugutu i la latou amiotonu, o lo’o latou a’oa’o mai foi le fa’apaiaina o lo’o i ai lea i tagata le sa’olotoga e solia ai le tulafono a le Atua ma o lē e usita’i i ai ua pa’ūū ese i latou mai le alofa tunoa. O ā latou fa’amatalaga o lo’o fa’aalia mai ai le tete’e ma fa’aosofia ai lo latou ita ma le ino’ino. Ua avea lenā ma mea ua fa’aalia mai ai o latou uiga ma amio, auā ‘o le loto i la le tino o le ita lea i le Atua; auā e lē usiusita’i i le tulafono a le Atua, e lē mafai foi ona usiusita’i i ai’ (Roma 8:7).”—Faith and Works, p. 53.
e. Pe o le talitonuga ea i le mauaina o le olaga fa’apaiaina o lona uiga o lo tatou mauaina lea o lo tatou fa’aolataga? Ioane 14:15; 1 Ioane 3:5, 6.
“O le amiotonu e fa’apogai mai lona maua’a i le amio Atua. E leai se tagata e sili atu ona avea ma tagata amiotonu nai lo tagata e fa’atuatua i le Atua ma fa’atumauina lo la so’otaga mausalī ma Ia. E fa’apei o fugālā’au o le fanua e i ai ona a’a i le palapala; e pei foi ona tatau i le laau ona ia mauaina le ea, o le sau; o le timu, fa’apea foi ma le susulu mai o le la, e tatau foi ona tatou maua mai le Atua mea e auauna atu ai i le ola o le agaga. Auā e na’o le avea lava ma ē e tofusia fa’atasi ma Ia i Lona natura e mafai ai ona tatou maua le mana e usiusita’i ai e tausia Ana poloa’iga. E leai se tagata e maualuga po’o le maualalo, poto po’o le leai foi, e mafai ona fa’atumauina pea i luma o ona uso a tagata se olaga mamā ma le mausalī, se’ivaganā ua nātia lona ola fa’atasi ma Keriso i le Atua. O le tele ma le sili atu o galuega ma fa’atinoga a tagata, o le sili atu foi lea o le vavalalata o le feso’ota’iga o le loto ma le Atua.”—Testimonies for the Church, vol. 7, p. 194.
Aso Tofi
Mati 9
5. O LE A LE FA’APAIAINA?
a. O le fa’apaiaina—tuputupu a’e i le amio fa’a-Kerisiano—e mafai ona iloa e lē o lo’o tupu ai? Mareko 4:26-29. Ae fa’apefea i isi?
“O a’afiaga e le’i su’esu’eina, ma le lē iloa o se olaga paia, o le lauga sili lea e fa’atalitonuina ai, e mafai ona tu’uina atu mo le lelei o le fa’a–Kerisiano. O finauga, e masani lava ona lē taliaina, e ono fa’aosofia ai le tete’e; peita’i o le fa’aa’oa’o i le amio Atua, e i ai lona mana e lē mafai ona te’ena.”—The Acts of the Apostles, p. 511.
e. O le ā le mea e fa’aalia ai lenei tuputupu a’e o lo’o fa’aauau pea ma e lē mafai ona fa’amalieina i lo tatou aga’i pea i luma e o’o lava i mea na ausia? 1 Korinito 15:31; Mataio 10:22; Filipi 3:12-16.
“E finagalo le Alii i Ona atali’i ma afafine uma ina ia fiafia, filemu, ma usiusita’i. . . . E ala i le fa’atuatua, e mafai ona fa’aalia ai vaivaiga ma fa’alētonu uma o le amio, ma fa’amamāina ai mea leaga uma, ma fa’asa’oina ai māsei o le olaga, ma atina’e uiga lelei uma.”—The Acts of the Apostles, p. 564.
“O le olaga fa’apaiaina e lē o se galuega mo na’o sina taimi, mo se itula, po o se aso e tasi, ae mo le olaga atoa. E lē maua mai i se lagona o le fiafia, peita’i o le i’uga lea i le avea ma tagata oti i le agasala, ma ola ai mo Keriso. O mea sesē e lē mafaia ona fa’asa’oina pe faia foi se toe fuata’iga e le tagata e ala i ana lava taumafaiga vaivai ma le lē tusa. E na’o se taimi umi, o tauiviga finafinau, o le amio pulea, ma tima’iga malosi e mafai ona tatou manumalo ai. E lē mafai ona tatou iloa se taimi ae po’o le ā foi le malosi o le a o’o i ai a tatou fete’ena’iga ma isi mea o lo’o aga’i mai. O le ā lava le umi e pulea ai e Satani, e tatau ona tatou fa’ato’ilaloina i tatou lava, ma fa’aauauina ai le fa’ato’ilaloina o le agasala; po o le ā lava le umi o le olaga, o le a leai se nofoaga e taofia ai, leai se avanoa e o’o iai ma fa’apea mai, o a’u ua ou atoatoa. O le fa’apaiaina moni o le i’uga lea o le usiusita’i mo le olaga atoa.”—Ibid., pp. 560, 561.
Aso Faraile
Mati 10
FESILI TOE FA’AMANATU
1. Fa’apefea ona taulimaina i tatou e le Atua i taimi uma o le ta’uamiotonuina?
2. Fa’apefea ona fa’ailoa e le Atua Lona fa’anaunauga mo i tatou e sili atu nai lo lē na’o le fa’amagalo?
3. O le ā le mea lilo o le liuaga?
4. O le ā le mea e ta’ita’i’eseina i tatou mai le fa’apaiaina fa’afoliga?
5. Fa’apefea ona tatou iloa o le fa’apaiaina e aofia ai le tuputupu a’e faifaipea?