Ulua’i Aso
Ianuari 22
1. O AI LE AGAGA PAIA?
a. O le ā le umi talu ona i ai le Agaga Paia? Kenese 1:2; Salamo 51:11; Eperu 9:14.
e. Fa’amatala ma talanoa i le uiga lautele o le natura o le Agaga o le Atua? Salamo 139:7-12; 1 Korinito 2:9-12; 2 Peteru 1:21.
“I ona po o le tamāōaiga o le malo o Iutaia, sa va’aia ai lava le a’afiaga o le Agaga o le Atua i se tulaga iloga, ae e le’i i ai i se tulaga atoatoa. Mai i le tele o tausaga na faia iai tatalo mo le fa’ataunu’uina o le folafolaga a le Atua mo le auina mai o Lona Agaga, ma e le’i i ai ma se vaega o nei tatalo ma aio’iga fa’atauanau na galo i le Atua.” —My Life Today, p. 36.
“A o le’i ulufale mai le agasala, sa matuā fa’afiafiaina lava Atamu i le la so’otaga ma Lē na faia o ia; peita’i talu ona vavae’eseina e le tagata ia lava mai le Atua e ola i le soliga o le tulafono, ua vavaeeseina ai le fanau a tagata mai lenei avanoa sili ona maualuga lea na mafai ai e tagata o le lalolagi ona maua pea le so’otaga ma le lagi. Ma ua feso’ota’i ai le Atua ma le tagata e ala i Lona Agaga, ma ua tu’uina mai ai le malamalama fa’alelagi i le lalolagi e ala i fa’aaliga mai Ana auauna filifilia.” ––God’s Amazing Grace, p. 190.
Aso Gafua
Ianuari 23
2. PE O IA EA O SE TAGATA MONI LAVA?
a. Ta’u mai nisi o uiga e fa’aalia ai uiga o le Agaga Paia?
(1) E silafia e le Agaga. Korinito 2:9-12.
(2) E mafai ona alofa. Roma 15:30.
(3) E mafai ona talanoa mai. 2 Korinito 13:14.
(4) Afai e mafai ona Ia talanoa mai, e tatau ona Ia tautala mai. 1 Timoteo 4:1.
(5) O le mea foi lea e mafai ai e Ia ona a’oa’o atu. 1 Korinito 2:13.
(6) E mafai ona avea o Ia ma molimau. Roma 8:16.
“Na tu’uina atu e Keriso se folafolaga moni lava i Ona so’o e fa’apea, a mavae Lona afio a’e i le lagi, o le ā Ia auina mai Lona Agaga iā i latou. ‘O lenei, ia outou o atu,’ o Lana fetalaiga lea, ‘e fai nu’u uma lava ma so’o, ma papatiso atu iā te i latou i le suafa o le Tamā [o le Atua moni lava], ma le Alo [o le Alii ia ma le Fa’aola moni lava], ma le Agaga Paia [o lē na auina mai le lagi e suitulaga ia Keriso]: a’oa’o atu iā te i latou ia tausi i mea uma ua Ou fai atu ai iā te outou; fa’auta foi, Ou te iā te outou i aso uma lava, e o’o lava i le gata’aga o le lalolagi.”—The Review and Herald, October 26, 1897.
“E tatau ona tatou iloa o le Agaga Paia, o Ia o le tagata e pei foi o le Atua o Ia o le tagata, o lo’o femāliua’i i luga o lenei fogāeleele.
“O le Agaga Paia o ia o le tagata, auā e molimau mai o Ia fa’atasi ma o tatou agaga o i tatou o fanau a le Atua. Pe a o’o ina tu’uina atu lenei molimau, e na te tau’avea fa’atasi ma ana lava fa’amaoniga. O taimi fa’apenā tatou te talitonu ai ma le mautinoa o i tatou lava o le fanau a le Atua. . . . .
“O le Agaga Paia e i ai Lona uiga moni lava, a aunoa ma lea o lona uiga e lē mafai ona Ia molimau mai i o tatou agaga atoa ai ma o tatou lava agaga o i tatou o fanau a le Atua. E tatau lava ona avea o Ia ma tagata e paia, auā a aunoa ma lea, o lona uiga e lē mafai foi ona Ia iloa ma su’esu’eina mea lilo o lo’o nātia i le finagalo o le Atua. ‘Auā o ai ea se tagata na te iloa mea a le tagata, e na’o le agaga o le tagata o lo’o nofo i totonu iā te ia? e fa’apea foi ona lē iloa e se tasi mea a le Atua, ua na’o le Agaga o le Atua.” ––Evangelism, pp. 616, 617.
“O le i ai o Ia i le tino tagata, na le’i mafai ai e Keriso ona i ai i mea uma i le taimi e tasi; o le mea lea na matuā talafeagai ai mo Ia ina ia tu’ua i latou, ae afio a’e i Lona Tamā, ina ia auina mai ai le Agaga Paia e fai ma Ona sui tulaga i le lalolagi. O le Agaga Paia lava ia ua lē o toe tauaveina uiga fa’alētagata ma ua tuto’atasi mai ai. O le a sui tulaga le Agaga Paia mo Ia i le mafai lea ona iai i mea uma lava i le taimi e tasi (Omnipresent).”—Manuscript Releases, vol. 4, p. 23.
“E to’atolu peresona soifua o lo’o molimau i le lagi: o suafa nei o nei malosiaga po’o mana silisili fa’alelagi e to’atolu—o le Tamā, o le Alo, ma le Agaga Paia—o i latou uma o ē talia Keriso i le fa’atuatua o le a papatisoina, ma o malosiaga uma nei o le a latou galulue fa’atasi ma tagata ina ia usiusita’i atu i le lagi e ala i ā latou taumafaiga finafinau o le a latou ola i se olaga fou iā Keriso.”—Evangelism, p. 615.
Aso Lua
Ianuari 24
3. O IA EA O SE TAGATA MONI LAVA? (FA’A’AUAU)
a. O ā nisi o uiga e fa’aalia ai uiga o le Agaga Paia?
(1) Na te fautua mo i tatou pe a tatou tatalo. Roma 8:26, 27.
(2) Na te tufatufaina mai meaālofa fa’apitoa. 1 Korinito 12:7-11.
(3) Na te vala’aulia foi le tagata agasala ina ia salamō. Fa’aaliga 22:17.
(4) E lē gata i le vala’aulia o le tagata ina ia salamō; ae Na te fa’amaufa’ailogaina pe fa’amausalīina le tagata i le fa’atuatua. Efeso 1:13.
(5) Ona ua Ia fa’amaufa’ailogaina pe fa’amausalīina i tatou, o le ā se mea ua lapata’ia ai i tatou? Efeso 4:30.
(6) Ona o Ia o se tagata moni lava, o le mea lea e fa’atatau ai e Iesu lana fetalaiga i le suinauna o ‘Ia’ (He) ma ‘Ia’ (Him) i le Agaga Paia e fa’alua sefulu ma le fa taimi. O se tasi o na fa’ata’ita’iga o le Ioane 14:16, 17.
“O Keriso lo tatou Puluvaga, ma le Agaga Paia o lo’o fautua pea lava pea mo le tagata, peita’i e lē ‘ole pe ‘aioi atu le Agaga Paia mo i tatou e pei ona faia e Keriso, o Lē na foa’iina mai Lona toto na fa’amaligiina talu mai le fa’avaeina o le lalolagi; auā o le Agaga e galue i o tatou loto, e aumaia ai tatalo ma le salamō, o vi’iga ma le fa’afetai. O le agaga fa’afetai lea e pua’ina mai i o tatou laugutu, o le taunu’uga lea o le loto ua ta’ia e le Agaga i manatunatuga paia, ma fafaguina ai musika mai le loto.” —The SDA Bible Commentary [E.G. White Comments], vol. 6, pp. 1077, 1078.
“O le fiafia e aofia ai mea nini’i ae fa’apea foi i mea tetele. . . . Afai tatou te fia fa’apei o Keriso ma ia tatou mauaina Lana amio, e tatau lava la ona tatou a’oa’oina mea nini’i e a’oa’o ai le agaga i le fa’apaiaina i aso uma. E leai se taimi e tatau ona faia’ina ai. Ia e fa’atumauina le fa’amaufa’ailoga ina ia maua mai ai manatu mamā i luga o le loto, e te lē faia e ala i se gaioiga so’ona fai ma le sāuā, ae e te tu’uina ma le fa’aeteete ia fa’amaufa’ailoga ma ia mausalī ma taofia i lalo se’ia o’o ina maua e le loto lona fa’asinomaga. E fa’apenā foi ona fetaia’i Le Alii ma o tatou agaga. . . . E lē o le taimi nei po’o lea taimi ma lea taimi, a’o le fa’afouina o le olaga e lē aunoa lea e totōina e le Agaga Paia lea e foliga ai iā Keriso.”—In Heavenly Places, p. 66.
“O le Agaga Paia e fa’ailoa mai ai tatalo fa’amaoni uma. Ua ou a’oa’oina ia ou iloa e fautua mai le Agaga mo a’u ma le ‘au paia uma; auā o Ana musumusuga e tusa ia ma le finagalo o le Atua, auā e lē fete’ena’i ma Lona lava finagalo. E fesoasoani foi le Agaga i o tatou vaivai; auā o le Agaga o Ia lava o le Atua, ua silafia lava e Ia le finagalo o le Atua; o le mea lea a faia ai a tatou tatalo uma mo e mama’i, po’o nisi foi o manaoga, e ao lava ona tatou amana’iaina le finagalo o le Atua.”—The Signs of the Times, October 3, 1892.
Aso Lulu
Ianuari 25
4. O LE Ā LANA GALUEGA?
a. A’o afio atu Iesu e fautua mo i tatou i le itu taumatau o le nofoali’i o le Atua, o le a se mea ua fa’ailoa mai ai o le Agaga Paia o le sui moni lava lea o le Fa’aola? Ioane 15:26; 16:13, 14.
e. O le ā se mea e foa’iina mai e le Agaga Paia i o tatou loto ta’ito’atasi pe a leai so tatou Uo Pele? Ioane 16:7.
i. E fa’apefea ona Ia ta’ita’iina i tatou i le liuaga? Ioane 16:8 (margin); Sakaria 4:6.
“O le a foa’iina mai le Agaga o le a avea o se sui e na te toe aumaia le fa’afouga, auā a aunoa ma lea, po ua leai se aogā o le taulaga a Keriso. O le malosi o le amioleaga na matuā fa’amalosia mo le tele o seneturi, ma na matuā mata’utia lava le gaua’i atu o tagata i lenei fa’atagataotauaina fa’a-satani. Peita’i e mafai ona te’ena ma fa’ato’ilaloina le agasala e ala i le galuega mamana a le Peresona Lona Tolu o le Aiga Atua, o Lē o le a afio mai ma le malosi e lē māsuia, e tusa ma le ato’atoāga o le mana fa’alelagi. O le Agaga na te fa’ataunu’uina mea na faia e le Fa’aola o le lalolagi. O le Agaga foi e fa’amāmāina ai le loto. E avea ai foi le tagata talitonu ma lē e tofusia i le natura paia e ala i le Agaga. Ua foa’iina mai e Keriso Lona Agaga o se mana paia lea e fa’ato’ilaloina ai faufaūga uma ma tu’inanauga fa’atupula’ia o le amio leaga, ma si’itia ai Lana lava amio i luga o Lana ekalesia.”—The Desire of Ages, p. 671.
“O le fa’atusa o Keriso ua tāina i totonu o le loto e ātagia mai lea i le amio, e ala i le olaga fa’atino, i lea aso ma lea aso, auā ua avea i tatou ma sui o se Fa’aola moni lava. Ua folafolaina mai le Agaga Paia mo i latou uma o ē ‘ole atu ai, auā o lo’o i ou autafa lava le Agaga Paia, o le fa’atusaina lea o Iesu Keriso.”—General Conference Bulletin, February 15, 1895.
“E leai se aogā o le tala’iga po’o le folafolaina o le upu pe a aunoa ma le fesoasoani mai ma le fa’atasi mai o le Agaga Paia; auā o lenei Agaga ua na’o le pau lea o le faia’oga aogā mo upu moni paia. E na’o le Agaga lava e mafai ona tu’ufa’atasia upu moni i le loto, lea e mafai ai ona aumaia le loto ma suia ai le olaga. Atonu e mafai ona tu’uina atu e se faifeau tusitusiga o le afioga a le Atua; atonu e mafai ona ia tu’uina atu ana fa’atonuga ma folafolaga uma; auā o lona luluina o le fatu o le talalelei o le a lē fa’amanuiaina se’ivaganā ua fa’atupuina le ola o lenei fatu i le sau mai le lagi. A aunoa ma le galulue fa’atasi ma le Agaga o le Atua, o le a leai se aogā i a’oa’oga, leai sona tulaga lelei, tusa lava po’o le a le maoa’e, e mafai ai ona avea se tasi ma ala o le malamalama.”—Gospel Workers, p. 284.
Aso Tofi
Ianuari 26
5. O LE FESO’OTA’IGA A LE AGAGA PAIA MA LE EKALESIA
a. E fa’apefea ona maua e se tagata le malamalama atoatoa o le upu moni? Ioane 16:13.
e. Talu ai ona o le galuega lenei a le Agaga Paia, o le ā la Lana matāfaioi i le fesoasoani lea iā i tatou ina ia tatou maua le ekalesia moni? 1 Timoteo 3:15.
i. Talu ai ona e tāua tele le Agaga Paia i o tatou olaga, o le ā le mea e tatau lava ona tatou faia ina ia maua ai le ato’atoāga o le mana o le Agaga Paia? Luka 11:9-13.
“O le mana o le perenise o le amio leaga e mafai ona taofia e le mana o le Atua e ala i le peresona lona tolu o le Aiga Atua, o le Agaga Paia lea.”—Evangelism, p. 617.
“Afai e fa’amalieina le ekalesia i nai mea iti, o le a lē agava’a i latou i le mauaina o mea silisili a le Atua. Ae Aiseā tatou te le fia ‘a’ai ai ma fia feinu i le meaālofa sili o le Agaga Paia, auā o le auala lea e mafai ai ona tausia le loto māmā? Ua fuafuaina e le Alii ina ia galulue fa’atasi le mana fa’alelagi ma taumafaiga fa’alētagata. E tāua tele mo le Kerisiano ona malamalama i ai i le uiga o le folafolaga a le Agaga Paia a’o le’i o’o i le afio fa’alua mai o lo tatou Alii o Iesu. Ia talanoa e uiga iā te ia, ma tatalo i ai, ia lauga e uiga iā te ia, auā e sili atu le finagalo o le Alii e tu’uina mai e ala i le Agaga Paia nai lo le tu’uina atu e matua o meaālofa sili ona lelei i a latou fanau.”—The Review and Herald, November 15, 1892.
Aso Faraile
Ianuari 27
FESILI TOE FA’AMANATU
1. E fa’apefea ona tatou iloa o le Agaga Paia o se sui sili lea ona malosi i ona po o le Feagaiga Tuai?
2. O ā ni fa’amaoniga o uiga o le Agaga Paia?
3. O le ā le ese’esega i le va o le galuega fa’afautua a Keriso ma le galuega a le Agaga Paia?
4. O ā nisi o matāfaioi sili ona tāua a le Agaga Paia i le fuafuaga o le Fa’aolataga?
5. O le ā le sao tāua a le Agaga Paia i le fesoasoani atu lea i tagata ia malamalama ai i le ekalesia moni?