Domingo
Setiembre 29
1. DAGITI DISIPULO NI CRISTO
a. Sino dagiti tallo a lallaki nainaganan "Santiago" a nakikadua ken Cristo - sino ti maysa a masansan a madmadlawtayo? Mateo 10:2, 3; 13:55.
b. Inaganan ti sumagmamano a naisangsangayan a kanito a panagcadua da Jesus ken ni Santiago a cabsat ni Juan. Lucas 8:51–55; Mateo 17:1, 2; Marcos 14:32–34.
“Ni Juan nga anac ni Zebedeo, maysa cadagiti umuna a dua a disipulo a simmurot ken Jesus. Isuna ken ni Santiago a cabsatna ti maibilang a kunaan a grupo a nangpanaw iti amin para iti servicioNa. siraragsacda a nangpanaw iti pagtaengan ken gagayyemda tapno makikaduada Kencuana; nakipagna ken nakisaoda Kencuana; nakaduada Isuna iti kinapribado ti pagtaengan ken cadagiti ummong publico. PinaulimecNa ti butengda, inispalNa ida iti peggad, pinabang-arNa ti panagsagabada ken liniwliwaNa ti ladingitda ket buyogen ti anus ken dungngo a sinuroanNa ida, agingga a ti pusoda caslan naikawar Kencuana ket iti bara ti ayatda kinalicagumanda nga isuda coma ti kaasitgan Kencuana iti pagarianNa.”—The Desire of Ages, 548.
“Iti asideg ti sumrecan nga agturong iti hardin, pinanawan ni Jesus ida amin ngem tallo cadagiti disipulos ti binilinNa nga agcararag para cadagiti bagbagida ken para Kencuana. Dagitoy tallo a disipulos ti kaasitgan a cadua ni Cristo. . . . Ita iti naindaclan a pannakigubalNa, kinalikaguman ni Cristo ti presenciada iti asidegNa. Masansan a palabsenda ti rabii a mangcadcadua Kencuana iti panagpacniNa.”—Ibid., p. 686.
Lunes
Setiembre 30
2. YIINUM ITI COPA
a. Iladawan ti orihinal a panggep ni Santiago, anac a lalaki ni Zabadeo, a cadua ti cabsatna a ni Juan. Marcos 10:35–38.
“Iti tunggal mabalin a gundaway, alaen ni Juan ti lugarna iti sibay ti Mangisalacan, ket ni Santiago kalikagumanna met ti mapadayawan cas nadecket a maicadua Kencuana.
“Ti inada pasurot met ni Cristo ket serservianna Isuna a sibubuslon iti a cabaelanna. Buyogen ti nainaan nga ayat ken ambisyon para cadagiti annacna a lallaki kinalicagumanna para cadacuada ti kadayawan a saad iti baro a pagarian. Para iti daytoy a napabilegna ida nga agaramid iti kiddaw
“Nagcucuyog ti ina ken dagiti annacna a lallaki a napan ken Jesus, kidkiddawenda a patganNa ti kiddawda a naisaad iti pusoda.
“ ‘Ania ti kayatyo nga aramidec coma cadacayo? sinaludsodNa
“Simmungbat ti ina, ’ipaaymo nga agsaadcami coma iti dayagmo, ti maysa iti macannawanmo ket ti sabali iti macatigidmo, iti pagariam.'
“Sidudungngo ni Jesus a nanganus cadacuada, saanNa a tinubngar ti kinamanagimbubucodda iti panangikagumaan a maiyun-una ngem cadagiti cacabsatda. NabasaNa ti pusoda, ammoNa ti kauneg ti ayatda Kencuana. Ti ayatda ket saan laeng a nataoan nga ayat; nupay tinulawan ti kinaindagaan ti nataoan a kalasuganna, agluplupias daytoy manipud iti ubbog ti bucodNa nga ayat a mangsubbot. Saan Isuna a mangtubngar, no di ket paunegenNa ken dalusanNa. Kinunana, 'Mabalinyo aya ti uminum iti copa nga inumac, wenno mabautizaran iti pammautizar a pacabautizarac?' Linagipda dagiti nacacascasdaaw a sasaoNa, mangitudtudo cadagiti suot ken panagsagaba, ngem simmungbatda a sitatalec, 'Mabalinmi.' Ibilangda a cangatoan a dayaw ti mapanecnecan a napudnoda babaen iti panangibingayda iti amin a mangtinnag iti Apoda.
“ ‘Iti copa nga inumac, uminumcayto ket iti pammautizar a pacabautizarac mabautizarancayto,' KinunaNa; iti sangoNa maysa a cruz imbes a trono, dua a mannibrong ti caduaNa iti makannacan ken makattigidNa.”—The Desire of Ages, 548, 549.
b. Eksacto cas impacpakauna ni Cristo, ania ti napasamac cada Santiago ken iti cabsatna a ni Juan, calpasan ti panagpangato ti Apo? Aramid 12:1, 2; Apocalipsis 1:9.
“Da Juan ken Santiago makibingayda iti Apoda iti panagsagaba, ti maysa, umuna iti agcabsat ti mapapatay iti espada; ti sabali, cabayagan iti amin nga agandor iti pammarigat ken babalaw ken pannakaidadanes.”—Ibid., 549.
Martes
Octobre 1
3. SINO TI NANGISURAT ITI SURAT?
a. Kasano nga inladawan ti Inspirasyon ni Santiago, ti anac ni Alfeo - maysa cadagiti sangapulo ket dua a disipulo (saan a ken Zebedeo a cabsat ni Juan)? Marcos 15:40.
“Adda ni Levi Mateo nga agsingsingir iti buis, naayaban manipud iti negosio, ken natulnog idiay Roma; ni panatico a Simeon, ti saan a maitulag a cabusor ti turay ti imperio; ti nadursoc, makaanay iti bagina, naayat a Pedro cadua ni Andres a cabsatna; Judas ti Judea, natacneng, nalaing; Felipe ken Tomas, namatalec ken napasnec , nupay nabuntog ti pusona a mamati; Santiago ken Judas saan unay a nalatac cadagiti cacabsat ngem lallakida a napuwersa, positibo cadagiti biddut ken singpetda; Natanael ubing iti kinasinsero ken talec; ken ti ambisioso, managayat a putot ni Zebedeo.”—Education, pp. 85, 86.
b. Apay a ti nangisurat iti surat ni Santiago (nadacamat a maysa nga apostol idinto a personal nga ammona ti Apo) cabsat ni Cristo iti ina - ken kasano a ti panangiladawanna iti bagina ipakitana a ti cababalinna ket nabaliwan babaen iti impluensia ti Apo? Santiago 1:1 umuna a gudua).
“Ni Cristo saan a naawatan dagiti cacabsatna; ta saan Isuna a cas cadacuada. Nagtrabaho Isuna a mangpabang-ar iti tunggal kaso ti panagsagaba a makitaNa; ket kanayon nga agballigi. Bassit laeng ti kuwartaNa a maipaayNa ngem masansan nga itedNa ti bukodNa a napacumbaba a taraon cadagidiay ad-adda nga agcasapulan ngem iti Bagina. Naricna dagiti cacabsatNa a ti impluenciaNa ket mangkontra cadacuada; ta idi nagsaoda a siguggubsang iti napanglaw, naibaba a cararua a nakadennada, pabang-aren ni Cristo dagitoy ket isaoNa dagiti makapapigsa cadacuada. Ket no addada iti ummong ti pamilia, awanen ti maaramidNa, agul-ulimec lattan no mabalin, ipaayNa ti copa ti nalamiis a danum cadagiti nakaay-ay-ay a parsua a padpadasenNa a tulongan ket ipaayNa ti bucodNa a taraon cadagiti imada.”—This Day With God, p. 59.
c. Kasano nga impakita ni Pablo ti respetona para ken Santiago, ti cabsat ni Jesus? Galacia 1:17–19; Aramid 21:18.
Mierkules
Octobre 2
4. PANANGLAWLAWAG ITI SUMAGMAMANO NGA ISYU
a. Ania ti mangipanayag a ni Santiago, a cabsat ni Cristo, ket lalaki nga addaan iti impluensia iti maysa nga importante a conseho iti nasapa nga iglesia? Aramid 15:5, 6, 13, 19, 20.
“Iti daytoy a pasamac napili ni Santiago nga isu ti mangipakaammo iti napagdesisyonan ti conseho. Inkeddengna a ti linteg ceremonial, kangrunaanna ti ordinansa ti panagcugit, saan nga ipilit cadagiti Gentil, wenno uray pay irecomenda cadacuada. Inkagumaan ni Santiago nga imaldit iti panunot dagiti cacabsatna ti kinapudno nga iti panagsubli iti Dios nakaaramiden dagiti Gentil iti naindaclan a panagbalbaliw iti biagda gapuna a naindaclan nga annad ti maipakat tapno saanda a maririboc iti makakumicom ken mangduadua a salsaludsod a saan met unay nga importante, di la ketdi ta mauppapayda a sumurot ken Cristo.”—The Acts of the Apostles, 195.
b. Ania ti gagangay a makunkuna —ngem biddut —a panangtonton ti nasuppiat babaen ti nalatac nga akem ni Santiago iti daytoy napateg a conseho? Mateo 16:18.
“Ni Santiago ti nangidaulo iti konseho, ket ti maudi a pangngeddengna ket, ‘Gapuna. iti panagiptoc ditay coma riribuken dagiti Gentil nga agsubi iti Dios.'
“Daytoy ti nagpatinggaan iti diskusion. Iti daytoy a pasamac addaantayo iti panangsuppiat iti doktrina nga iggem ti Iglesia Catolica Romana a ni Pedro ti ulo ti iglesia. Dagidiay, cas papa, nangibagbaga nga isuda ti simmaruno kencuana, awan ti pundasionna Iti Biblia para iti panagpammarangda. Awan ti aniaman iti biag ni Pedro a mangted iti pammalubos iti panangibagna nga isu ket naipangato iti ngatoen dagiti cacabsatna cas mangibagi iti Cangatoan. No dagidiay naideklara a simmucat ken ni Pedro sinurotda ti ulidanna, kanayon coma a mapnekda nga agtalinaed a maipada cadagiti cacabsatda.”—Ibid., pp. 194, 195.
“Saan nga inkumit ti Mangisalacan ti trabaho ti evanghelio ken ni Pedro cas individual. Iti naud-udi a panawen, inulitna dagiti balikas a naisao ken Pedro, direkta nga inyaplikarNa dagitoy iti iglesia. Ket isu met laeng ti anag a naisao met cadagiti sangapulo ket dua cas mangibagi ti bagi dagiti namati. No inted ni Jesus ti aniaman nga espesial a turay iti maysa cadagiti adalan a nangatngato ngem cadagiti dadduma, saantayo coma a masaracan ida a masansan nga agsusuppiat no siasino ti rumbeng a katan-ocan. Nagpasakupda coma iti tarigagay ti Apoda, ken padayawanda daydiay piniliNa.”—The Desire of Ages, 414.
Hueves
Octobre 3
5. TI ISRAEL TI DIOS
a. Para ken sino a naisurat daytoy a surat - ken kasano nga iramanna amin nga umawat ken Jesus cas Apo? Santiago 1:1 (maicadua a gudua); Galacia 3:27–29.
“Cadagiti Israel ti Dios ket mabilang ti adu a saan a caputotan ni Abraham maiyalubog ti lasag”—The Prophets and Kings, 367.
“Ti biag ni Cristo nangipasdec iti relihion nga awan ti estado, maysa a relihion a dagiti Judio ken Gentil, nawaya ken adipen, ket naisilpo iti gagangay a panagcacabsat, nga agpapada iti sangoanan ti Dios.”—Testimonies, vol. 9, p. 191.
“Ti Kristianidad mangaramid iti natibker a singgalut ti panagkaykaysa iti nagbaetan ti apo ken adipen, ari ken iturayan, ti ministro ti evanghelio ken ti nababa a managbasol a nakasarac ken Cristo iti pannakadalus manipud iti basol.”—The Acts of the Apostles, 460.
b. Iti padto, ania a nagan ti naited iti maudi a naespirituan nga Israel —ken kasano a nailadawan ti kapadasanda sacbay la unay ti panagsubli ni Cristo? Apocalipsis 7:4.
“Iti mabiit mangngegtayo ti timec ti Dios a cas iti adu a danum, a mangted cadatayo iti aldaw ken oras ti yaay ni Jesus. Dagiti sibibiag a sasanto, 144,000 ti bilangda, ammoda ken maawatanda ti timec, idinto ta ipagarup dagiti nadangkes a gurruod ken ginggined dayta. . . .
“Dagiti 144,000 nselioada amin ken naan-anayda a nagkaykaysa. Iti mugingda adda dagiti sasao a Dios, Baro a Jerusalem, ken nadayag a bituen a naglaon iti baro a nagan ni Jesus. Iti naragsac, nasantoan a kasasaadtayo makapungtot dagiti nadangkes, ket agdardarasda a siraranggas nga agpangato tapno dangrandatayo tapno ipuruacdatayo iti pagbaludan, inton iyunnattayo ti ima iti nagan ti Apo, ket matnagda nga awan ti maaramidanda iti daga. Kalpasanna, ammo ti sinagoga ni Satanas nga inayatnatayo ti Dios, a nangbuggo cadagiti saka ti maysa ken maysa, ken agsaludo cadagiti cacabsat babaen ti nasantoan nga agec, ket nagdaydayawda iti sakaanantayo.”—Testimonies, vol. 1, p. 59.
Viernes
Octobre 4
PERSONAL A PANGREPASO A SALSALUDSOD
1. Kasano a ni Santiago nga anac ni Zebedeo dimmackel nga ad-adda cas ken Cristo?
2. Kasano a ni Santiago a cabsat ni Jesus, dimmackel nga ad-adda cas ken Cristo?
3. Ania dagiti evidencia iti Biblia ti mangipakita a ni Pedro ket saan nga ulo dagiti apostol?
4. Kasano nga inlawlawag ni Pablo ti panagkaykaysa ken agpadpada a pateg ti amin a Cristiano?
5. Ania ti mangiladawan iti kaudian a balligi ti naespirituan nga Israel ti Dios?