Domingo
Noviembre 17
1. REMEDIO PARA ITI SABIDONG
a. No marauttayo cadagiti naipaugiln a panasasao dagiti dakes ti panagpampanunotna a tattao, ania ti mensahe ti Dios cadatayo, uray iti baet dagitoy? Santiago 3:7, 8; Hebreo 10:38.
“[Ni Cabsat J] ket kinaasian dagiti nailangitan nga angel, ta nalicmut iti sipnget. Ti lapayagna agtultuloy a makangngngeg cadagiti sasao ti di panamati ken kinasipnget. Adda panagduadua ken panagsaludsod a kanayon a maipuruac iti sangona. Ti dila ket lubong ti kinadakes. ‘Ti dila saan a mabalin a paammoen ti uray siasino a tao: maysa a dakes a di aginana, napno iti gamut a macapatay.’ No ni Cabsat J ket ad-adda a kumpet iti Dios ket mariknana a rumbeng a pagtalinaedenna ti kinatarnawna iti sangoanan ti Dios uray mapucawna ti natural a biagna, umawat iti pigsa manipud ngato. No ipalubosna ti pammatina a maapektaran iti sipnget ken di panamati a manglikmut kencuana—dagiti panagduadua ken panagsaludsod ken adu a saritaan—iti mabiit agbalinto aminen a sipnget ken panagduadua ken di panamati, ket awanton ti lawag wenno pigsa iti kinapudno.
“Saanna a kasapulan a panunoten a babaen ti panangikagumaanna a makikompromiso cadagiti gagayyemna, a nagbalin a dakes busor iti pammatitayo, aramidennanto a nalaca para ti bagina. No agtacder nga addaan iti maymaysa a panggep nga agtulnog iti Dios uray ania ti gubuayenna maaddanto ti tulong ken pigsa. Ay-ayaten ken kaasian ti Dios ni Cabsat J. AmmoNa ti tunggal pannakariro, tunggal pannakaupay, tunggal napait a panagsao. Am-ammoNa amin dayta. No baybay-anna ti kinaawan pammatina ket agtacder iti Dios a sititibker, mapabileg ti pammatina babaen ti pannakaiwatwatna.”—Testimonies, vol. 4, pp. 236, 237.
Lunes
Noviembre 18
2. MAYSA A SERIOSO A BANAG
a. Ania ti naisurat maipapan iti makaallilaw ken makapungtot a panagsao —ken apay a masapul nga icararagtayo tapno makapagballigitayo iti daytoy nga aspeto ti biag? Salmo 5:8–10.
“Ti panagsao ket maysa cadagiti naindaclan a sagut ti Dios iti tao. Bassit a kameng ti dila, ngem dagiti sasao a sinucognna, naaramid a bokal babaen iti timec, dackel ti pannacabalina . Impacdar ti Apo, ‘Awan ti tao a makapaamo iti dila.’ Insaadna ti nacion maibusor iti nacion, ket nangpataud iti gubat ken pannakaibocboc iti dara. Dagiti sasao ti nangsindi cadagiti apuy a narigat a maiddep. Nangyegda met iti rag-o ken ragsac cadagiti adu a cararua. Ket no maisao dagiti sasao gapu ta imbaga ti Dios, ‘Isaom cadacuada dagiti sasaoc,’ masansan a mangpataudda iti ladingit ti panagbabawi.
“Ti talento ti panagsao ket awit-awitna ti dackel a responsabilidad. Kasapulan a siaannad a mabantayan dayta; ta nabileg a pannacabalin a maipaay iti dakes ken casta met iti naimbag.”—The SDA Bible Commentary, vol. 3, p. 1142.
“Idi masulisog a mangted iti nalukay a panangtengngel iti saan a paiturayan akameng, ay! laglagipem a ti parasurat nga angel isuratna ti tunggal sao. Amin naisurat iti libro, ket, malacsid no mayanud iti dara ni Cristo, masapul a sangoemto manen ida. Addaanca itan iti nabatican a record idiay langit. Ti napasnec a panagbabawi iti sangoanan ti Dios maawatto. No casta nga agsaocan a sireregget, iserram ti ngiwatmo. saanca a mangiyebcas uray maysa a sao.”—Testimonies, vol. 2, p. 82.
b. Iladawan no kasano a dagiti sasaotayo ket luppias iti no ania ti pampanunotentayo ken no siasinotayo. Jeremias 17:9; Mateo 12:33–37; 14:6–8.
“Ti tenor ti saritaan ipalgacna ti gameng ti puso. Ti nalaca, gagangay a saritaan, dagiti sasao ti pasablog, ti minamaag a panagpakatawa, a naisao tapno mangpataud iti katawa, ket tagilako ni Satanas, ket amin a makiraman iti daytoy a panagsao ket aglaklako iti tagilakona. Maaramid dagiti impresion cadagidiay a makangngeg cadagitoy a banag nga umasping iti naaramid ken Herodes idi nagsala ti balasang ni Herodias iti sanguananna. Amin dagitoy a transaksion ket nairekord cadagiti libro ti langit; ket iti maudi a naindaclan nga aldaw agparangdanto iti pudno a lawagda iti sangoanan dagiti nakabasol. Ket, mabigbigto ti amin cadacuada ti makaallukoy, makaallilaw nga aramid ti diablo, tapno iturongna ida iti nalawa a dalan ken iti nalawa a ruangan a mailukat iti pakadadaelanda.”—Testimonies to Ministers and Gospel Workers, pp. 84, 85.
Martes
Noviembre 19
3. SIBUBUKEL A PUSO KASAPULAN
a. Apay a namnamaentayo ti agtultuloy a panagsao manipud cadagiti mamati iti agdama a kinapudno? Santiago 3:9, 10. Ania a ballaag ti maited no mapaaytayo iti daytoy a punto?
“No ipatpategmo ti nakairuaman nga impresion a makita ken mangngeg ti Dios ti amin nga aramidem ken saoem, ken pagtalinaeden ti namatalec a rekord ti amin a sasao ken tignaymo, ken masapul a sangoemto amin, ngarud iti amin nga aramidem ken ibagam icagumaam a suroten dagiti dikta ti nalawlawag ken naridam a consiensia. Ti dilam mausarto iti dayag ti Dios ken agbalinto a bendicion iti bagim ken iti sabali. Ngem no suminaka iti Dios, cas iti ar-aramidem, agannadca ta amangan a ti dilam panecnecanna ti maysa a lubong ti kinadakes ket isangbayna kenca ti nakabutbuteng a pannakacondenar; ta mapucawto dagiti cararua gapu kenca.”—Testimonies, vol. 4, p. 244.
b. Ania a cararag ti makatulong cadatayo nga agpanunot ken agsao a sititibker? Salmo 86:11.
“No ti umawat iti pannakaammo iti Biblia saan a makaaramid iti panagbalbaliw iti ugalina wenno ar-aramidna tapno maitunos iti lawag ti kinapudno, ania ngaruden? Ti espiritu ket makigubgubat iti lasag, ket ti lasag bumusor iti espiritu; ket ti maysa cadagitoy masapul a mangparmec. No ti kinapudno pasantoenna ti cararua, ti basol ket kagura ken liklikan, gapu ta ni Cristo ket inawat a cas maysa a nadayaw a sangaili. Ngem ni Cristo saan a makibingay ti nabingay a puso; ti basol ken ni Jesus saanto pulos nga agkayog.”—Testimonies to Ministers and Gospel Workers, p. 160.
“Agbantay ken agcararag a kanayon. Idedikarmo ti bagim nga awan reserbada iti Apo, ket saanto a narigat ti agservi Kencuana. Addaanca iti nabingay a puso. Daytoy ti makagapu a ti sipnget, imbes a lawag, ti nanglikmut kenca. Ti maudi a mensahe ti asi ket rumrummuar itan. Maysa dayta a pagilasinan ti nabayag a panagitured ken pannakipagrikna ti Dios. Umayca, isu ti awis maited ita. Umaykayo, ta nakasaganan ti amin a banag. Daytoy ti maudi nga awag ti asi. Sumarunonto ti panagibales ti nasair a Dios.”—Testimonies, vol. 2, p. 225.
“Naimpusoan, naan-anay a natudio a lallaki ken babbai ti agtacder itan. Paulit-ulit a yakayaken ni Cristo dagiti pasurotNa, agingga nga adda idi tiempo a nabati laeng ti sangapulo ket maysa ken sumagmamano a namatalec a babbai ti nangisaad iti pundasion ti iglesia Cristiano. Adda dagidiay agtacder nga agsubli inton maibaclay dagiti dadagsen; ngem no ti iglesia agsilsilnag amin, matiliwda ti kinagagar, agkanta ken agpuccawda, ket agbalinda a naragsac; ngem buyaenyo ida. Inton awanen ti kinaregta, sumagmamano laeng a matalec a Caleb ti umay iti sango ket iparangda ti di agkupas a prinsipio. Dagitoy ket asin a nangtaginayon iti raman.”—Ibid., vol. 5, p. 130.
Mierkules
Noviembre 20
4. DANUM MANIPUD ITI NASIN-AW NGA UBBOG
a. Ania a prinsipio ti mangipalgac a ti laeng puso a napabaro babaen ti parabur ti Dios ti makapataud cadagiti natibker a tignay? Santiago 3:11, 12. Mangted iti sumagmamano a praktikal nga ehemplo.
“Ti kinadalus ken kinaurnos iti panagcawcawes, ken kinadalus iti intero a pagnanaedan, rebbeng a nainget a salimetmetan dagiti Sabatista, a kitkitaenda a karkarna, ken banbantayan para cadagiti biddutda. Nasantoan coma ti impluensiada. Dagiti sagrado a kinapudno nga ibagbagatayo ket pulos a dida ibaba dagiti umawat, ken pagbalinenda ida a natangken ken nagaspang, a mangbaybay-a cadagiti personada, ken saan a naurnos dagiti balayda. No ti umawat ket addaan namayamay nga ugali, ti kinapudno ti mangitag-ay kencuana, ken mangirabaho kencuana iti naan-anay a repormasion. Malacsid no ti kinapudno addaan iti daytoy nga epekto, ti indibidual saanna a narikna ti makaispal a pannacabalinna. Ti natagubaya ken saan a naurnos a cawes ket saan a tanda ti kinapakumbaba. Ditoy a sumagmamano ti nangallilaw iti bagbagida. Ti biag, dagiti aramid, dagiti sasao, ti mangibaga no ti indibidual ket addaan iti pudno a kinapakumbaba, ket ti panagcawcawes maitunos cadagiti bunga a naiparangarang. Ti nadalus nga ubbog ket saan a makaipaay iti danum a nasam-it ken napait. Dalusan ti ubbog ket nadaluston dagiti karayan.Ti balay ti Dios ket masansan a matulawan babaen cadagiti annac dagiti agsalsalimetmet iti Sabbath. Palubosanda dagiti nagannacda nga agtaraytaray iti balay, agay-ayam, agsasarita, mangala iti atension dagiti tattao, ken mangipanayag cadagiti dakes a pungtotda cadagiti mismo a gimong a naguummonganda nga agdayaw iti Dios. Nakitac nga iti gimong dagiti sasanto, ti nasantoan a kinaulimec ti rumbeng nga agturay. Ngem ti balay a pagtitiponan ti ili ti Dios masansan a mapagbalin a perpecto a babilonia, lugar ti riro ken riribuk. Saan a makaay-ayo daytoy iti Dios. No dagiti nagannac ket awan ti gobiernoda, ken dida makontrol dagiti annacda iti gimong, naim-imbag coma a maragsacan ti Dios no agtalinaedda iti pagtaenganda a kaduada dagiti di paiturayan nga annacda. Nasaysayaat coma nga agsagabada iti pannakapukaw dagiti gimong, ngem ti adu a bilang ti makapungtot, ken madadael dagiti gimongda. No dagiti nagannac bay-anda dagiti annacda a di makontrol, saan a naparmec iti pagtaengan, dida mabalin nga aramiden ti kayatda iti gimong. Siasino coma dagiti agsagsagaba iti daytoy a kaso? Sigurado, dagiti nagannac. Saanda coma a makaricna iti pannakaparigat no saan a kayat ti dadduma ti maaddaan iti talna no agsasaracda nga agdaydayaw iti Dios.
“Nagannac, masapul a dakayo ti agsagaba iti daytoy a banag, ket mabalin nga iturongnaca a mangkita ken mangtungpal iti nabaybay-an a pagrebbenganyo. No itugotyo dagiti annacyo a mapan iti balay ti Dios, nasken a maawatanda nga addada iti disso a pangsaracan Dios iti iliNa. Awan dayta nga urnos a sursuroten dagiti agsalsalimetmet iti Sabbath iti daytoy a banag nga adda cadagiti nominal nga iglesia. Nagannac, adda trabahoyo nga aramiden. Parucmaenyo dagiti annacyo iti pagtaenganyo, iti casta, mabalinyon nga iturayan ida iti balay ti Dios.”—Spiritual Gifts, vol. 2, pp. 288, 289.
Hueves
Noviembre 21
5. SIRIB KET NASAGUTAN ITI PANNACAAMMO
a. Apay a ti tunggal maysa cadatayo masapul nga amirisen ti bucodtayo nga ugali manipud iti uneg innga iti ruar - iti puso, sao ken tignay 2 Corinto 13:5.
“ ‘‘Sukimatenyo ti bagbagiyo, no addacayo iti pammati; panecnecanyo ti bucodyo a bagi’ (2 Corinto 13:5). Babalawen a naimbag ti rikna, disposision, pampanunot, sasao, pagduyosan, panggep, ken aramid. Kasano ti nainsiriban nga idadawattayo cadagiti banag a kasapulantayo malacsid no paneknekantayo babaen ti Nasantoan a Suraat ti kasasaad ti naespirituan a salun-attayo?”—Selected Messages, bk. 1, p. 89.
“Cakabsatco a lallaki ken babbai, kasano nga us-usarenyo ti sagut ti panagsao? Nasursuroyo kadin ti mangtengngel iti dila tapno agtulnog cadagiti dikta ti nalawlagan a consiensia ken nasantoan a panagayat? ti panagsasaritayo cadi ket awanan iti ang-anngaw, kinatangsit ken kinadakes, panangallilaw ken kinarugit? Awan kadi ti kinasicap iti sango ti Dios? Dagiti sasao mangipaay iti agibagbaga a pannacabalin. Ni Satanas, no mabalin, pagtalinaedenna nga aktibo ti dila iti serviciona. Cadagiti bagbagitayo saantayo makontrol ti di paiturayan a miembro. Ti nadiosan a parabur ti kakaisuna a namnamatayo.”—Testimonies, vol. 5, p. 175.
“Isuna a mangikabil iti bagina nga awan reserbana iti sidong ti panangiwanwan ti Espiritu ti Dios, masarakannanto a ti panunotna lumawa ken rumang-ay. Magun-odna ti edukasion iti panagservi iti Dios a saan a maymaysa ti dasig ken agkurang, a mangpadur-as iti maysa a dasig a kababalin, no di ket agresulta ti napintas a pannakatubay ken kinaan-ay. Dagiti pagkapuyan a naiparangarang iti agngatangata a pagayatan ken awanan bileg a kababalin, maparmec, ta ti agtultuloy a debosion ken kinadios isangbayna iti tao iti casta unay a nasinged a relasion ken Cristo. Nakikaysan ken Cristo nga addaan iti kinasalun-at ken pigsa ti prinsipio. Nalawag ti pannakaawatna, ket iparangarangna dayta sirib nga aggapu iti Dios.”—Selected Messages, bk. 1, p. 338.
Viernes
Noviembre 22
PERSONAL A PANGREPASO A SALSALUDSOD
1. Kasano a sumungbatac no maipasangoaciti makasabidong a saritaan?
2. No agsao dagiti tattao cadagiti bambanag, ania ti pudno nga ipaawatna maipapan cadacuada?
3. Ilawlawag ti gubat a rumrummuar iti nataoan a panunot, ken kasano a maipangabac.
4. Ania dagiti ugali/pagduyosac ti mabalin a mangipakpakita cadagiti narugit a danum iti uneg?
5. Kasano ken apay a ti wagas ti panagsaoc ket mabaliwan coma?