Domingo
Noviembre 3
1. PAMMATI KEN EHEMPLO
a. Apay a naan-anay a nasken ti agbiag a naan-anay a maitunos iti pammati nga ibunbunannagtayo?1 Corinto 4:9; 1 Juan 5:3; Santiago 2:14.
“Awan coma ti mangallilaw iti bagina babaen ti panamati a mabalinda ti agbalin a santo bayat a sinanakemda a mangsalungasing iti maysa cadagiti gutoguten ti Dios. Ti panangaramid ti ammon a basol paulimekenna ti agsaksi a timec ti Espiritu ken isinaNa ti cararua manipud iti Dios.”—The Great Controversy p. 472.
“Ti pammanecnec ti maysa a biag iwaragawagna iti lubong no isu ket napudno wenno saan iti pammati nga ibagbagana. Ti kababalinmo kissayanna ti linteg ti Dios iti panangpattapatta dagiti nailubongan a gagayyemmo. Kunana cadacuada: ‘Mabalin a tungpalenyo wenno saan dagiti bilin. Mamatiac a ti linteg ti Dios ket, iti maysa a wagas, mangigalut cadagiti tattao; ngem, saan unay a partikular ti Apo no maipapan iti nainget a panangtungpal cadagiti allagadenna, ket ti sagpaminsan a panaglabsing ket saan a masarungkaran iti inadangcoc iti biangNa.’
“Adu ti mangekskyus ti bagida gapu iti panangsalungasingda iti Sabbath babaen ti panangdakamatda iti ehemplom. Ikalinteganda a no ti nasayaat unay a tao, a mamati a ti maikapito nga aldaw ket Sabbath, mabalinna ti makipaset cadagiti nailubongan a panggedan iti dayta nga aldaw no kalikaguman dagiti paspasamac, sigurado a maaramidda met dayta nga awan ti pannakacondenar. Adu a cararua ti sumango kenca iti pangocoman, a mamagbalin iti impluensiam a pambar iti panagsukirda iti linteg ti Dios. Nupay daytoy saanto a mapakawan gapu iti basolda, ngem ibagananto a sibubuteng ti maibusor kenca.”—Testimonies, vol. 4, p. 250.
Lunes
Noviembre 4
2. LANGIT KEN DAGA AGBANBANTAYDA
a. Ania nga ehemplo ti inted ni Santiago a mangiladawan iti kinamanaginsisingpet ti ungaong a panagsao nga awanan iti aramid? Santiago 2:15–17.
“Ti kasalawitwitan a sermon a mabalin nga icasaba iti linteg ti Sangapulo a Bilin ket ti panangaramid cadagitoy. Tti panagtulnog maaramid a personal a pagrebbengan. Ti panagliway iti daytoy a pagrebbengan ket nabatad a basol. Ikabilnatayo ti Dios iti sidong dagiti obligasion saan laeng a tapno masiguradotayo a mismo ti langit, no di ket tapno mariknatayo a maysa a pagrebbengan ti mangipakita iti sabali ti dalan ken, babaen ti panangaywantayo ken awan interesna nga ayattayo, maiturong ken Cristo dagidiay umay iti uneg ti sakup ti impluensiatayo. Ti kinaawan ti prinsipio a pakabigbigan iti biag ti adu nga agkunkuna a Cristianoda ket makapadanag. Ti saanda a panangikankano iti linteg ti Dios upayenna dagidiay mangbigbig cadagiti sagrado a tontonenna ken agduyos a mangpabaw-ing cadagidiay manipud iti kinapudno a mabalin nga umawat iti dayta.”—Testimonies, vol. 4, p. 58. [Author’s emphasis.]
b. Ania a talaga ti kaipapanan ti pudpudno a panamati ken Cristo?Santiago 2:18; Mateo 6:24.
“Nagsao ti Dios, ket ipaawatNa nga agtulnog ti tao. SaanNa a saludsoden no nanam-ay a mangaramid iti dayta. Ti Apo ti biag ken dayag saanNa a kinunsulta ti nam-ay wenno ragsacNa idi pinanawanNa ti estasionna a nangato saad tapno agbalin a tao ti ladingit ken makaam-ammo iti leddaang, nga inawatNa ti pannakaibabain ken ipapatay tapno maisalacan ti tao manipud iti imbanag ti kinasukirna. Natay ni Jesus, saan a tapno isalacanNan ti tao cadagiti basbasolna, no di ket manipud cadagiti basbasolna. Masapul a panawan ti tao ti biddut dagiti dalanna, surotenna ti ehemplo ni Cristo, alaenna ti cruzna ken sumurot Kencuana, nga ilacsidna ti bagina, ken agtulnog iti Dios uray ania ti gubuayenna. . . .
“No pudno nga adipenNatayo ti Dios, awan coma ti saludsod iti panunottayo no agtulnogtayo cadagiti bilinNa wenno konsultaen dagiti bucodtayo a temporal nga interes. No dagiti mamati iti kinapudno ket saan a masuportaran babaen iti pammatida cadagitoy natalna nga aldaw, no idilig, ania ti mangtaginayon cadacuada inton dumteng ti naindacan a pannuboc ken ti bilin ket rummuar maibusor cadagiti amin a saan nga agdayaw iti ladawan ti animal ken umawat iti markana cadagiti muging wenno cadagiti imada? Saanen nga adayo daytoy solemne a panawen. Imbes nga agbalinda a nakapuy ken agpangadua, ti ili ti Dios agurnongda coman iti pigsa ken tured para iti tiempo ti riribuk.”—Ibid., pp. 250, 251. [Author’s emphasis.]
Martes
Noviembre 5
3. AGADAL MANIPUD KEN ABRAHAM
a. Ania a nakaam-amac a naespirituan a kasasaad ti sipapasnec a naiballaag cadatayo? Santiago 2:19.
“Adu ti mangaklon a ni Jesu-Cristo ti Mangisalacan iti lubong, ngem iti isu met la a tiempo, iyadayoda ti bagbagida Kencuana, ken dida agbabawi cadagiti basolda, saanda nga awaten ni Jesus cas personal a Mangisalacanda. Ti pammatida ket pananganamong laeng ti panunot ken panangocom iti kinapudno; ngem ti kinapudno saan a naisangbay iti pusoda, tapno santipikarenna ti cararua ken balbaliwanna ti cababalin.”—Selected Messages, bk. 1, pp. 389, 390.
“Mabalin a patiem ti amin a kinapudno; ngem no dagiti prinsipiona saan a natungpal iti biagyo, saannacayo a maisalacan ti panagibunannagyo. Ni Satanas mamati ken agpigerger . Agtrabaho isuna. Ammona nga ababan ti panawenna, ket bimmaba iti dackel a pannacabalin tapno aramidenna dagiti dakes nga aramidna a maitunos iti pammatina. Ngem dagiti agcuncuna nga ili ti Dios saanda a suportaran ti pammatida babaen cadagiti aramidda. Mamatida iti kinaababan ti panawen, ngem sigagagarda a manggammat cadagiti sanicua daytoy a lubong a casla agtacder ti lubong iti sangaribu pay a tawen a cas ita.”—Testimonies, vol. 2, p. 161.
b. Kasano a matignaytayo iti ehemplo ni Abraham? Roma 4:1–3; Santiago 2:20–22.
“Namati ni Abraham iti Dios. Kasanotayo nga ammo a namati? Dagiti aramidna panecnecanda ti kababalin ti pammatina, ket ti pammatina naibilang kencuana a kinalinteg.
“Kasapulantayo ti pammati ni Abraham iti al-aldawtayo, tapno manglawag ti sipnget nga agu-ummong iti aglawlawtayo, a mangiddep iti nasam-it a lawag ti init ti ayat ti Dios, ken mangpabassit iti naespirituan a panagdur-as. . . . Tunggal pagrebbengan a maaramid, tunggal sacrificio a maaramid iti nagan ni Jesus, ket mangyeg iti nalabes a nagdackel a gunggona. Iti aramid ti pagrebbengan, agsao ti Dios ken itedNa ti bendicionNa.”—The SDA Bible Commentary, vol. 7, p. 936.
“Napalinteg dagiti tattao gapu iti pammati, ngem maocom ken magunggonaanda cas maitutop cadagiti aramidda.”—The Signs of the Times, November 20, 1884.
“Ti kinalinteg ni Cristo buklen dagiti nalinteg a tignay ken naimbag nga aramid manipud cadagiti nasin-aw, saan managimbubucod a motibo.”—Testimonies, vol. 3, p. 528.
“Ti panangtungpal cadagiti bilbilin ti Dios ket gutogutenna cadatayo dagiti naimbag nga aramid, panangilibac iti bagi, pangisacrficio iti bagi ken debosion para iti pagimbagan ti sabali, saan a dagiti naimbag nga aramidtayo laeng ti makaispal cadatayo, no di ket sigurado a saantayo a maisalacan no awan dagiti naimbag nga aramid. Kalpasan nga inaramidtayo amin a kabaelantayo nga aramiden, ibagatayo ngarud: Awan ti naaramidantayo a nasursuroc ngem ti pagrebbengantayo, ket ti kasayaatan ket saan a pakagunggonaan nga adipen, a di maikari iti kabassitan a pabor manipud iti Dios. Masapul a ni Cristo ti kinalintegtayo ken korona ti panagrag-otayo.”—Ibid., p. 526.
Mierkules
Noviembre 6
4. DAGITI SASAO A MAKAPAREGTA
a. Ilawlawag no kasano a ti pagpatulad a biag ni Abraham ket maiyanninaw iti bukodtayo a biag cas mamati ken Cristo. Genesis 26:5; Santiago 2:23, 24.
“Dagiti naimbag nga aramid ket bunga ti pammati. Bayat nga agtrabaho ti Dios iti puso, ken ti tao isucona ti pagayatanna iti Dios, ken makitinnulong iti Dios, itrabahona iti biag no ania ti aramiden ti Dios babaen ti Espiritu Santo, ket adda panagtutunos ti panggep ti puso ken ti nakasanayan iti biag. Masapul a tallicodan ti tunggal basol a cas makapagura a banag a nangilansa iti Apo ti biag ken dayag, ket masapul nga addaan ti mamati iti progresibo a kapadasan babaen iti agtultuloy a panangaramidna cadagiti aramid ni Cristo. Babaen ti agtultuloy a panangisuco iti pagayatan, babaen ti agtultuloy a panagtulnog, a mapagtalinaed ti bendicion ti pannakapalinteg.
“Dagidiay napalinteg babaen ti pammati ket masapul nga addaan iti puso a mangsalimetmet iti dalan ti Apo. Pammanecnec dayta a ti maysa a tao saan a mapalinteg gapu iti pammati no dagiti aramidna ket saan a maitunos iti ibagbagana. Kuna ni Santiago, ‘Makitamon a ti pammati mapacuyugan cadagiti ar-aramid, ket gapu cadagiti ar-aramid, ti pammati maaramid a naananay?’(Santiago 2:22).
“Ti pammati a saan a mangpataud cadagiti naimbag nga aramid saanna a mapalinteg ti cararua.”—Selected Messages, bk. 1, p. 397.
b. Apay a ti amin a mangsaksi cadagiti pagano ita ket maparegta no kasano ni Raab, ti balangkantis, ket nadacamat cas pinalinteg ti Dios? Santiago 2:25; Hebreo 11:31.
“Idiay nadangkes a Jerico ti pammanecnec ti maysa a pagano a babai ket, ‘Ti Jehova a Diosyo, Isu ti Dios idiay ngato sadi langit, ken iti baba ditoy daga.’ Josue 2:11. Ti pannakaammo ken Jehova a casta a dimteng kencuana, pinanecnecanna ti pannakaisalacanna. . . . Ket ti pannakakombertena ket saan a naiputputong a kaso ti asi ti Dios cadagiti managrucbab iti didiosen a nangbigbig iti nadiosan a turayNa.”—The Prophets and Kings, 369.
“Amin dagidiay, cas ken Raab a Canaanita, ken Ruth a Moabita, a nagsubli manipud iti panagdidiosen nga agturong iti panagdayaw iti pudno a Dios, masapul a makikaysada iti piniliNa nga iliNa.”—Christ’s Object Lessons, 290.
“Dackel a trabaho ti maaramid cadagiti ciudadtayo, ket dagiti talon naluom aminen para iti panagani. Maawaganto ti imatangtayo iti tunggal direksion, ta dagiti agbabbabawi a cararua agpadpada cadagiti Cristiano ken pagano a daga ipangatodanto ti timecda nga agpatulong. Masapul nga awan ti maysa a partikulo ti panangitag-ay iti bagi; ti laeng talgedmo isu ti panagtalec iti Dios.”—The General Conference Bulletin, April 1, 1895.
Hueves
Noviembre 7
5. DAGITI TULBEC TI BALLIGI
a. Ilawlawag no kasano a maaddaantayo iti balligi ken Cristo? Santiago 2:26; 2 Pedro 1:3, 4.
“Nasisita ti maaddaan iti pammati ken ni Jesus, ken mamati a naisalacanca babaen Kencuana; ngem adda peggad ti panangala iti saad a talaga nga alaen ti adu iti panangibaga, ‘Naisalacannacon.’ Adu ti nagkuna: ‘Masapul nga agaramidca cadagiti naimbag nga aramid, ket agbiagcanto’; ngem no naisina ken Cristo awan ti makaaramid cadagiti naimbag nga aramid. Adu iti agdama nga aldaw ti agkuna, ‘Mamatica, mamatica laeng, ken agbiagca.’ Agkuykuyog ti pammati ken aramid, naglaoc ti panamati ken panagaramid. Saan a basbassit ti gutoguten ti Apo iti cararua ita, ngem iti ginutogutNa ken Adan idiay Paraiso sacbay a natnag—naan-anay a panagtulnog, awan pakapilawanna a kinalinteg. Ti gutoguten ti Dios iti babaen iti tulag ti parabur ket cas kalawa iti ginutogutNa idiay Paraiso—pannakaitunos iti lintegNa, a nasantoan, ken nalinteg, ken nasayaat. . . . Awan coma ti asinoman a mangala iti allilaw a makaay-ayo unay iti natural a puso, nga awaten ti Dios ti kinapasnec, aniaman ti mabalin a pammati, uray kasano ti kinaimperpecto ti biag. Gutoguten ti Dios iti anacNa ti naan-anay a panagtulnog.
“Tapno matungpal dagiti gutoguten ti linteg, ti pammatitayo masapul a petpetanna ti kinalinteg ni Cristo, nga awatentayo dayta cas kinalintegtayo. Babaen ti pannakikaysa ken Cristo, babaen ti panangawat iti kinalintegNa babaen iti pammati, mabalin a kualipikadotayo nga mangaramid cadagiti trabaho ti Dios, a makipagtrabaho ken Cristo. No situtulocca a pailuyos ti ayus ti kinadakes, ken saanca a makitinnulong cadagiti nailangitan nga ahensia iti pananglapped iti panagsalungasing iti pamiliam, ken iti iglesia, tapno maiyeg ti agnanayon a kinalinteg, awananca iti pammati. Ti pammati ket agtrabaho babaen ti ayat ken dalusanna ti cararua. Babaen iti pammati agtrabaho ti Espiritu Santo iti puso tapno mangparnuay iti kinasanto iti uneg; ngem saan a maaramid daytoy malacsid no ti nataoan nga ahencia makipagtrabaho ken Cristo. . . . Tapno maaddaantayo iti kinalinteg ni Cristo, kasapulantayo ti inaldaw a mabalbaliwan babaen ti impluensia ti Espiritu, tapno makiramantayo iti nadiosan a galad.”—Selected Messages, bk. 1, pp. 373, 374.
Viernes
Noviembre 8
PERSONAL A PANGREPASO A SALSALUDSOD
1. Iti panangtonton a salimetmetan ti linteg ti Dios, ania ti masapul a maamirisco maipapan iti impluensiac?
2. Ania ti gutoguten ti Langit cadagiti mamati a Cristiano?
3. Apay a ni Abraham masansan a madacamat cas ama dagiti namatalecl?
4. Cadagiti am-ammoc, sino ti mabalin a maconvertento cas ken Raab?
5. Kasano a maaddaannac iri naballigi a Nacristianoan a kapadasan?