Domingo
Deciembre 1
1. SAAN A NAIMBUBUCODAN A KINAPATAS
a. Mangibaga ti dua a maudi a galad a nadakamat iti listaan ti sirib a naipasngay idiay Langit. Santiago 3:17 (maudi a paset).
“Kuna ni apostol Judas: ‘Caasianyo dagiti dadduma, nga addada iti panagduadua’ Daytoy a panagduadua ket saan a maipacat iti espiritu ti paboritismo. Awan coma ti rupa a maited iti espiritu a mangipasimudaag: ‘No paborannac, paborannaca.’ Daytoy saan a nasantificar, nailubongan a pagalagadan, a di makaay-ayo iti Dios. Daytat’ panagbayad cadagiti pabor ken panagdayaw maigapu iti gunggona. Panangipakita iti panangidumduma para iti sumagmamano, a mangnamnama a manggun-od cadagiti bentahe babaen cadacuada. Panangsapul iti naimbag a pagayatanda babaen ti panangpalugod, tapno maibilangtayo iti dacdackel a pattapatta ngem iti sabali a naan-anay a maikari a cas cadatayo.”—Testimonies, vol. 4, pp. 221, 222.
“Saan a maay-ayo ti Dios iti sinasadot a trabaho a maar-aramid cadagiti iglesia. NamnamaenNa cadagiti paraaywanNa a napudno ken namatalec iti panangted iti pannubngar ken pangkorehir. Masapul nga ikkaternda ti biddut a maisurot iti pagannurotan nga inted ti Dios iti SaoNa, saan a maitutop iti bucodda a kapanunotan ken tarigagay. Awan ti naulpit a wagas ti masapul a mausar, awan ti saan a patas, nadarasudos, nadursoc a trabaho a maaramid. Dagiti panagregget a maaramid a mangdalus iti iglesia manipud iti moral a kinarugit ket masapul a maaramid iti wagas ti Dios. Masapul nga awan ti panangidumduma, awan ti panaginsisingpet. Masapul nga awan dagiti paborito, a dagiti basolda ket maibilang abasbassit ti basolna ngem cadagiti basol dagiti dadduma. Ay, anian a kasapulantayo amin ti buniag ti Espiritu Santo. Iti casta, kanayontayo a makipagtrabaho iti panunot ni Cristo, buyogen ti kinaimbag, pannakipagricna, ken simpatia, nga ipakitatayo ti ayat iti managbasol bayat a guraentayo ti basol iti naan-anay a gura.”—The Ellen G. White 1888 Materials, p. 144.
Lunes
Deciembre 2
2. UMISO A PANANGIREPRESENTAR KEN CRISTO
a. Kasano laeng nga umiso ti pannakairepresentar ken Cristo iti panagsaotayo? Santiago 3:18.
“Posible babaen cadagiti bibigtayo nga iconfesar ni Cristo ngem cadagiti aramidtayo ilibac Isuna. Dagiti bunga ti Espiritu a maipanayag iti biag ket panangipudno Kencuana. No inlacsidtayo amin para ken Cristo, napakumbaba ti biagtayo, nailangitan ti panagsasaritatayo, awan pakababalawan ti tigtignaytayo. Ti nabileg, mangdalus nga impluensia ti kinapudno iti cararua, ken ti cababalin ni Cristo a naipaduyacyac iti biag, ket maysa a panangicpnfesar Kencuana. No dagiti balikas ti biag nga agnanayon maimula iti pusotayo, dagiti bunga ket kinalinteg ken talna. Mabalin nga ilibactayo ni Cristo iti biagtayo babaen ti panangpalugod iti panagayat iti nam-ay wenno panagayat iti bagi, babaen ti panagang-angaw ken panagpacpakatawa ken babaen ti panangsapul iti dayaw ti lubong. Mabalin nga ilibactayo Isuna iti makinruar a langatayo babaen ti pannakitunos iti lubong, babaen iti natangsit a langa wenno nangina a cawes. Babaen laeng ti kanayon a panagbantay ken kinapinget ken dandani saan nga agsarday a cararag a maipakitatayo iti biagtayo ti kababalin ni Cristo wenno ti mangsantificar nga impluensia ti kinapudno. Adu ti mangpapanaw ken Cristo manipud cadagiti pamiliada babaen iti di makaanus, napasnec nga espiritu. Ti casta adda ti maysa banag a parmeken iti daytoy a banag.” —Testimonies, vol. 1, pp. 303, 304.
b. Ania dagiti gagangay a nataoan a pagduyosan a mangbisibis iti inaldaw a panagbiag ti talaga a kasapulan a parmeken —ken apay? Santiago 4:1–3.
“Nakalkaldaang ti saan a pannakapnec iti aglawlawtayo wenno cadagiti kasasaad a nakaisaadantayo a dagiti annongentayo casla napakumbaba ken saan nga importante. Dagiti pribado ken napakumbaba nga annongen ket saan a makaay-ayo kenka; saanca a makatalna, saanca a makaidna, ken saanca a mapnec. Agtaud amin dagitoy iti kinamanagimbubucod. . . .
“Dagidiay agkunkuna a Cristiano a kanayon nga agdungdung-aw ken agrekreklamo, ken casla ipagarupda a basol ti naragsac ken naregta a rupa, awananda iti pudno nga artikulo ti relihion.”—Ibid., vol. 3, p. 334.
“Rumbeng kadi a manganac iti doble a kaadu ita ket gapu ta nasayaat ti ramanna, kasano nga agruknoyac ken agkiddaw iti Dios a tulongannac iti trabahoc a panagsurat, idinto ta diak makagun-od iti ideya gapu iti kinabuklisco? Mabalin kadi a kiddawec iti Dios nga asikasuenNa dayta di nainkalintegan nga awit iti tianco? Dayta ket panangibabain Kencuana. Panagkiddaw dayta a mangbusbos iti derrepco. Ita kankanec laeng ti pagarupec nga umiso, iti casta, mabalinco a kiddawen Kencuana nga ikkannac iti pigsa a mangaramid iti trabaho nga intedNa kaniac nga aramiden.”—Ibid., pp. 373, 374.
“No agturay ti relihion ni Cristo iti puso, anamongan ti consiensia, ket agari ti talna ken ragsac; ti pannakariro ken riribuk mabalin a manglawlaw, ngem adda lawag iti cararua.”—Ibid., vol. 4, p. 47.
Martes
Deciembre 3
3. PANANGLIBAS CADAGITI GAGANGAY A PANGSILO
a. Ania a kangrunaan a prinsipio ti napateg iti pudpudno a koneksion ken Cristo, a maisupadi iti narabaw a pammati iti nagan laeng? Santiago 4:4.
“Dagidiay mangirugi iti naCristianoan a biagda babaen ti panagbalin a gudua - gudua, iti udina masaracandanto a nailistada iti sibay ti cabusor, aniaman ti mabalin nga immuna a panggepda. Ket ti panagbalin nga apostata, maysa a traidor iti panggep ti Dios, nakarkaro ngem ipapatay; ta kaipapananna ti pannakapukaw ti biag nga agnanayon.
“Dagiti lallaki ken babbai a doble ti panagpampanunotda ket kasayaatan nga alyado ni Satanas. Aniaman ti paborable nga opinionda maipapan iti bagida, manglimlimoda. Amin a napudno iti Dios ken iti kinapudno masapul nga agtakder a sititibker iti nalinteg gapu ta umiso dayta. Ti pannakisangol cadagidiay di naiconsagrar, ket kaskasdi a napudno iti kinapudno, ket imposible. Saantayo a mabalin ti makikaykaysa cadagidiay agserservi iti bagbagida, nga agtrabtrabaho cadagiti nailubongan a plano, a saan a mapucaw ti koneksiontayo iti nailangitan a Mamalbalacad. Mabalin a makabangontayo manipud iti palab-og ti cabusor, ngem napalitem ken nasugatantayo, ket ti kapadasantayo unano."—The Review and Herald, April 19, 1898.
b. Apay a masapul a sititibker a parutentayo ti tunggal maysa a panagduyos nga umapal? Santiago 4:5, 6.
“Maysa a dackel a depekto iti ugali ni Saul isu ti panagayatna iti pananganamong. Daytoy a kababalin ket addaan idi iti mangkonkontrol nga impluensia cadagiti tignay ken kapanunotanna; amin a banag ket namarkaan iti tarigagayna a maidaydayaw ken maitag-ay ti bagina. Ti pagalagadanna iti husto ken biddut isu ti nababa a pagalagadan ti nalatac a palacpac. Awan ti tao a natalged nga agbiag tapno maay-ayona dagiti tattao, a saanna nga umuna a sapulen ti anamong ti Dios.”—The Patriarchs and Prophets, 650.
“Apal ti namagbalin ken Saul a nakalkaldaang ken nangikabil iti napakumbaba a sakup ti tronona iti peggad. Anian a di mailadawan a kinaranggas ti inobra daytoy dakes a galad ti kababalin iti lubongtayo! Isu met laeng a panagbubusor ti adda iti puso ni Saul a nangguyugoy iti puso ni Cain maibusor iti cabsatna a ni Abel, gapu ta nalinteg dagiti aramid ni Abel, ket pinadayawan ti Dios, ken dakes dagiti bukodna nga aramid, ket saan a mabalin a bendisionan ti Apo. Ti apal ket caputotan ti kinatangsit, ket no sangailien dayta iti puso, mangiturong dayta iti gura, ket iti udina iti panagibales ken panangpapatay.”—Ibid., p. 651.
“Ti panagpasakup, ayat, ken panagyaman iti Dios pagtalinaedenna ti silnag ti init iti puso, nupay ti aldaw ket mabalin a kanayon a naulep. Ti panangilibac iti bagi ken ti cruz ni Cristo ket adda iti sangoanam. Itag-aymo kadi ti cruz?”—Testimonies, vol. 4, p. 47.
Mierkules
Deciembre 4
4. POKUS KEN ISUSUCO
a. Ania a nasisita a banag ti mangipaay cadatayo iti pudpudno, manayon a balligi ken Cristo? Santiago 4:7.
“Marikna ti dadduma ti panagkasapulanda iti pannakaabbong, ket babaen ti pannakabigbig iti daytoy a kasapulan, ken ti tarigagay para iti panagbalbaliw ti puso, mangrugin ti pannakidangadang. Ti panangtallikud iti bukodda a pagayatan, nalabit dagiti napilida a panggep a ti panangipategda wenno suroten, gutogutenna ti peksa, a gapu iti dayta adu ti agduadua ken agtukkiad ken agsubli. Ngem daytoy a dangadang masapul a labanan ti tunggal puso a sipupudno a nakomberte. Masapul a makigubattayo cadagiti sulisog iti ruar ken iti uneg. Masapul a mapagballigiantayoti bagi, ilansatayo dagiti pagaayat ken derrep; sa irugi ti pannakikaysa ti cararua ken Cristo. Cas ti namaga ken awanan biag a sanga a maisulbong iti sibibiag a kayo, agbalintayo coma a sibibiag a sanga ti Pudno nga Uvas. Ket ti bunga nga inawit ni Cristo ket awitento dagiti amin a pasurotNa. Kalpasan a mabukel daytoy a panagkaykaysa, mataginayon laeng dayta babaen ti agtultuloy, napasnec, napinget a panagregget. Ipacat ni Cristo ti pannakabalinNa a mangpreserba ken mangbantay iti daytoy sagrado a singgalut, ket ti agpannuray, awanan gaway a managbasol masapul nga aramidenna ti pasetna a buyogen ti di mabannog nga enerhia, ta no saan, ni Satanas babaen ti kinaulpitna, nasikap a pannakabalinna isina naka ken Cristo.
“Tunggal Cristiano masapul nga agtultuloy nga agbantay, a mangbanbantay iti tunggal dalan ti cararua a mabalin a pakasarakan ni Satanas iti sumrecan. Masapul nga icararagna ti nadiosan a tulong ken maigiddato iti dayta, determinado a sarangtenna ti tunggal pagnagduyos nga agbasol. Babaen iti tured, babaen iti pammati, babaen iti naibtur a panagbannog, mabalinna ti mangparmec. Ngem laglagipenna coma a tapno magun-odna ti balligi masapul nga agtalinaed ni Cristo kencuana ken isu ken Cristo.”—Testimonies, vol. 5, p. 47.
b. Kasano nga inulit ni Pablo ti panangilawlawag ni Santiago maipapan iti naespirituan a kinasiglat iti biag a Cristiano? Roma 6:6–11.
“Ti nailubongan a panagpampanunot, kinamanagimbubucod, ken kinaagum ti mangmangan iti espiritualidad ken biag ti ili ti Dios.”—Ibid., vol. 1, p. 141.
“Kasapulantayo ti natibtibker nga amang a pammati ken napasnec a debosion. Masapul a mataytayo iti bagitayo, ken iti panunot ken puso tapno ipategtayo ti managdaydayaw nga ayat iti Mangisalacantayo. No sapulentayo ti Apo iti amin a puso masaracantayo Isuna, ket agsilnagto amin dagiti pusotayo iti ayatNa. Ti bagi ket lumned iti kinaawan pateg, ket ni Jesus ket agbalinto nga amin ken iti amin iti cararua. . . .
“Masapul nga umasidegtayo iti Dios. Masapul nga agbalintayo a makipagtrabaho Kencuana, ta no saan, makitanto ti kinakapuy ken biddut iti amin nga aramidentayo.”—Ibid., vol. 6, p. 51.
Hueves
Deciembre 5
5. PANAGSARDENG PARA ITI NAPARBENG A CARARAG
a. Ania a pammatalged ken apela ti agaweng iti tunggal maysa cadatayo iti pannakigubat maibusor iti bucodtayo a dakes a pagduyosan? Colosas 3:1–3; Santiago 4:8, 9.
“Imposible para iti asinoman a bigbigen ti kinapudno bayat nga adda dagiti dungngo ti lubong. Umay ti lubong iti nagbaetanda ken ti Dios, a manglidem iti sirmata ken mangbibineg cadagiti rikna agingga nga imposible para cadacuada ti mangbigbig cadagiti sagrado a banag. Umawag ti Dios cadagiti cacasta: ‘Dalusan dagiti imimayo, dacayo a managbasol; ket guguranyo dagiti puspusoyo, dacay a nagduadua ti nakemda. Agladingitcayo, ken agsangitcayo, ti catawayo agbalin coma a sangit ket ti ragsacyo agbalin coma a liday.’ Dagidiay nangmantsa cadagiti imada iti pannakarugit ti lubong masapul a dalusanda ti bagbagida manipud cadagiti mantsana. Dagidiay mangipagarup a makaservida iti lubong ket kunada nga ay-ayatenda ti Dios ket doble ti nakemda. Ngem saanda a makapagservi iti Dios ken iti kinabacnang. Tattaoda a dua ti panunotda, nga ay-ayatenda ti lubong ken mapucawda ti amin a pannakariknada iti obligasionda iti Dios, ngem ibunananagda a pasurot ni Cristo ida. Saanda a ti maysa a banag wenno ti sabali. Mapucawdanto ti agpada a lubong malacsid no dalusanda dagiti imada ken dalusanda ti pusoda babaen ti panagtulnog cadagiti nasin-aw a prinsipio ti kinapudno.”—Testimonies, vol. 1, pp. 530, 531.
b. Ania ti mapasamac no agrucnoytayo iti sangoanan ti Dios a sipapakumbaba? Salmo 34:18; 1 Pedro 5:6, 7.
“No ipakumbabam ta bagim ita iti sangoanan ti Dios, iconfesarmo dagiti biddutmo, ken agsublica Kencuana nga addaan iti naan-anay a panggep ti puso, ti pamiliam ket mabalin pay laeng a naragsac a pamilia. No saanmo nga aramiden daytoy, no di ket piliem ti bukodmo a wagas, a ti ragsakmo agpatingga.”—Ibid., vol. 2, p. 304.
Viernes
Deciembre 6
PERSONAL A PANGREPASO A SALSALUDSOD
1. Siuuneg a sukimaten dagiti makin-uneg a motiboc, cadagiti ania a benneg ti mabalin a managinsisingpetac?
2. Mangibaga ti sumagmamano a wagas a dagiti sasaotayo ket masansan unay a di umiso ti panangirepresentar ken Cristo.
3. Iti ania a kapanunotan ti apal a serioso a panangilacsid iti pammati —ken pananginsulto iti Dios?
4. Apay a kasapulac ti matay iti bagic tapno sibibiagac ken Cristo?
5. Kasano a dagdagupec dagiti i sumagmamano a pudno nga isyu a kasapulac a parmeken?