Domingo
Octobre 27
1. MAYSA A PROBLEMA TI TABAS/UGALI
a. Iladawan ti gagangay a naindagaan a pagduyosan a mabalin a pakabasoltayo, nalabit a ditay pay ketdi mapupuotan daytoy. Santiago 2:1–4.
“Dagiti napanglaw ket rumbeng a matrato a buyogen ti interes ken imatang cas cadagiti nabacnang. Ti aramid a panangpadayaw cadagiti nabacnang ken panangtagibassit ken panangbaybay-a cadagiti napanglaw ket maysa a krimen iti imatang ti Dios. Dagidiay napalicmutan iti amin a pagnam-ayan ti biag, wenno paborito ken panuynoyan ti lubong gapu ta nabaknangda, saanda a marikna ti panagkasapulanda iti simpatia ken nadungngo a considerasion a cas cadagiti tattao a ti biagda ket nabayagen a makigubgubal iti kinapanglaw.”—Testimonies, vol. 4, p. 551.
“Nupay nabaknang ni Cristo cadagiti nailangitan a korte, nagbalin a napanglaw tapno babaen iti kinapanglawNa bumaknangtayo. Pinadayawan ni Jesus dagiti napanglaw babaen ti pannakipasetNa iti nanumo a kasasaadda. Manipud iti pakasaritaan ti biagNa masapul nga adalentayo no kasano ti panangtrato cadagiti napanglaw.”—Ibid., p. 550.
b. Ania ti masapul a maamiristayo maipapan cadagidiay mabalin a napanglaw cadagiti sanckua daytoy a lubong ngem nabacnang iti pammati? Santiago 2:5.
Lunes
Octobre 28
2. PANANGBIGBIG KEN KINAPATAS
a. Ilawlawag ti balanse a pamay-an nga insuro ni Jesus maipapan iti panangtulong cadagiti napanglaw. Marcos 14:3–9.
“Sumagmamano ti mangawit iti pagrebbengan ti kinaparabur agingga iti nalabes ken talaga a masaktan dagiti agkasapulan babaen ti panangaramidda iti adu unay para cadacuada. Saan a kanayon nga ikagumaan dagiti napanglaw ti bagbagida cas iti rebbengna. Bayat a saan ida a liwayan ken baybay-an nga agsagaba, masapul a maisuroda a mangtulong cadagiti bagbagida.
“Saan coma a maliwayan ti trabaho ti Dios tapno maawat dagiti napanglaw ti umuna nga imatangtayo. Inted ni Cristo iti naminsan cadagiti adalanNa ti napateg unay a leksion maipapan iti daytoy a punto. Idi imbucboc ni Maria ti sapsapo iti ulo ni Jesus, nagpakaasi ti naagum a ni Judas maigapu cadagiti napanglaw, a nagtanabutob iti imbilangna a panangsayang ti kuarta. Ngem pinalinteg ni Jesus ti tignay, kinunaNa: ‘Apay a riribukenyo isuna? inaramidna ti nasayaat nga aramid Caniac.’ ‘Sadinoman a pakaicasabaan daytoy nga evanghelio iti intero a lubong, daytoy met nga inaramidna ket maisao kas pakalaglagipan kencuana.’ Babaen iti daytoy, nasuroantayo a maidayaw ni Cristo iti pannakaiconsagrar ti kasayaatan a substansiatayo. No ti sibubukel nga imatangtayo maiturong iti panangbang-ar cadagiti kasapulan dagiti napanglaw, mabaybay-an ti panggep ti Dios. Saanto met nga agsagaba no aramiden dagiti para-aywanNa ti pagrebbenganda, ngem ti panggep ni Cristo ti iyun-una.”—Testimonies, vol. 4, pp. 550, 551.
b. Idi nagkauna nga Israel, ania nga ugali ti nagutogut cadagidiay mangipapaay iti hustisia? Levitico 19:15; Deuteronomio 1:17; 10:17.
c. Ita, kasano coma a masursuro ti amin iti aniaman a capasidad ti panangidaulo ti iglesia nga iyaplikar daytoy met laeng a prinsipio? 1 Pedro 1:17; Colosas 3:25.
“Dagidiay mangisilpo iti panagayat ken interesda iti maysa wenno dua, ken mangpabor cadacuada a pakadacsan met iti sabsabali, saanda coma a pagtalinaeden ti saadda iti opisina iti maysa nga aldaw. Daytoy saan a napasanto a panangidumduma para cadagiti naisangsangayan a mabalin a makaay-ayo iti magarbo, iti pannakabaybay-a dagiti dadduma a managitured ken managbuteng iti Dios, ken iti imatangNa napatpategda, ket makasair iti Dios. Dayta ipatpateg ti Dios ket rumbeng nga ipategtayo. Ti arkos ti naemma ken naulimec nga espiritu ibilangNa a nangatngato ti pategna ngem ti makinruar a kinapintas, makinruar nga arkos, kinabaknang, wenno nailubongan a dayaw.”—Ibid., vol. 3, p. 24.
Martes
Octobre 29
3. PANANGSUCOG ITI NASAYSAYAAT NGA UGALI
a. Ania a tubngar ti inted ni Santiago maipapan iti materialistiko a panangidumduma dagiti agcuncuna a mamati —ken apay a serioso daytoy a banag? Santiago 2:6, 7.
“Binigbignaca ti Dios iti sangoanan dagiti tattao ken angel kas anacNa; icararagyo tapno saancayo a makaaramid ti mangibabain iti ‘nadayaw a nagan a pacanagannayo.’ Santiago 2:7. Ibaonnaca ti Dios ditoy lubong cas pannakabagiNa. Iti tunggal tignay ti biag masapul nga ipanayagmo ti nagan ti Dios. Daytoy a dawat ket awagannaca a mangtagicua iti cababalinNa. Dimo mabalin a mapasantoe ti naganNa, saanmo a mabalin nga irepresentar Isuna iti lubong, malacsid no iti biag ken kababalin irepresentarmo ti mismo a biag ken kababalin ti Dios. Maaramidmo laeng daytoy babaen ti panangawat iti parabur ken kinalinteg ni Cristo.”—Thoughts From the Mount of Blessing, p. 107.
b. Kasano laeng a makapagballigitayo iti umiso a panangirepresentar ken Cristo? Roma 2:11; Proverbio 23:7.
“Adalem a naimbag ti nadiosan-nataoan a kababalin, ken kanayon a saludsoden, ‘Ania ti aramiden ni Jesus no Isu ti adda iti lugarco?’ Daytoy coma ti rucod ti pagrebbengantayo. Saanyo nga isaad ti bagiyo a di kasapulan iti kagimongan dagidiay babaen cadagiti arteda pakapuyenda ti panggepyo nga agaramid iti nalinteg, wenno mangyeg iti mantsa iti consiensiayo. Dikay agaramid ti aniaman cadagiti ganggannaet, iti kalsada, cadagiti lugan, iti pagtaengan, nga addaan iti kabassitan a langa ti sairo. Agaramid iti maysa a banag iti inaldaw a mangpasayaat, mangpapintas, ken mangpatan-oc iti biag a ginatang ni Cristo babaen ti bucodNa a dara.
“Kanayon nga agtignay manipud iti prinsipio, pulos a saan a manipud iti rugso. Teppelan ti natural a kinadarasudos ti galadmo a buyogen ti kinaemma ken kinaalumamay. saan a palugodan iti parparawpaw wenno wenno kinaburburitog. Awan coma ti nababa a panagpacpakatawa a makalibas cadagiti bibigmo. Uray dagiti kapanunotam saan a mapalubosan nga agtaray iti gulo. Masapul a mapengdanda, maiyegda iti pannakacautibo iti panagtulnog ni Cristo. Maisaadda coma cadagiti nasantoan a bambanag. Ket, babaen ti parabur ni Cristo, agbalindanto a nasin-aw ken napudno.
“Kasapulantayo ti naynay a panangpanunot iti makapatan-oc a pannacabalin ti nadalus a kapanunotan. Ti laeng talged iti aniaman a cararua ti nalinteg a panagpampanunot. . . .
“Pasayaaten ti ugali nga agsao iti naimbag maipapan iti sabali. Dakamaten dagiti naimbag a galad dagidiay cacaduam, ket bassit laeng ti panangkitaem aginggat’ mabalin cadagiti biddut ken pannakapaayda.”—The Ministry of Healing, pp. 491, 492.
Mierkules
Octobre 30
4. ADDAAN ITI NAARIAN A TABAS
a. Ania ti ipaganetget ti Nasantoan a Surat a sipupudno a nasisita ti Nacristianoan a pammatitayo —ken apay? Santiago 2:8.
“Adu a mannursuro iti relihion ti mangpasingked a babaen ti ipapatay ni Cristo nawaswasen ti linteg, ket nawayaanen dagiti tattao cadagiti gutogutenNa. Adda sumagmamano a mangiprang iti dayta cas nakana a sangol, ket maisupadi iti panangadipen ti linteg iparangda ti wayawaya a matagiragsac iti sidong ti evangelio.
“Ngem saan a casta ti panangibilang dagiti propeta ken apostol iti nasantoan a linteg ti Dios. Kinuna ni David: ‘Magnaac a siwayawaya: ta binirocco dagiti alagadem.’ Salmo 119:45. Ni apostol Santiago, a nagsurat calpasan ti ipapatay ni Cristo, dinacamatna ti Sanapulo a Bilin cas ‘ti naarian a linteg’ ken ‘ti naan-anay a linteg ti wayawaya.’ Santiago 2:8; 1:25. Ket ti Rebelador, kagudua a siglo calpasan ti pannakailansa, inyebkasna ti bendicion cadacuada ‘a mangtungpal cadagiti bilbilinNa, tapno maaddaanda iti kalintegan iti kayo ti biag, ken makastrecda cadagiti ruangan nga agturong iti ciudad.’ Apocalipsis 22:14." —The Great Controversy p. 466.
“No sumuko ti maysa ken Cristo, maisangbay ti panunot iti sidong ti panangtengngel ti linteg; ngem isu ti naarian a linteg, a mangiwarwaragawag iti wayawaya iti tunggal cautibo. Babaen ti panagbalinda a maymaysa ken Cristo, mawayawayaan ti tao. Ti panagpasakup iti pagayatan ni Cristo ipaawatna ti pannakaisubli iti naan-anay a kinatao.
“Ti panagtulnog iti Dios ket wayawaya manipud iti pangadipen ti basol, pannakaispal manipud iti nataoan a regget ken rugsoy. Mabalin nga agtacder ti tao a manangparmec iti bagina, manangparmec cadagiti bucodna a pagduyosan, mangparmec cadagiti pagturayan ken pannacabalin, ken ‘dagiti agtuturay iti sipnget daytoy a lubong,’ ken iti ‘naespirituan a kinadakes cadagiti nangato a disso. Efeso 6:12.”—The Ministry of Healing, p. 131.
b. Kasano a ti kaadda ti panangkampi, panangidumduma, ken/wenno madi a panangipato di makaay-ayo a mangdadael iti saksitayo para ken Cristo? Santiago 2:9.
“Mabalin a tontonen a pasurotnatayo ni Cristo, mabalin nga ibagatayo a patientayo ti tunggal kinapudno iti sao ti Dios; ngem daytoy awan ti maitulongna iti caarrubatayo malacsid no ti pammatitayo ket maipan iti inaldaw a panagbiagtayo. Mabalin a nangato ti panagibunananagtayo a cas iti langit, ngem saanna nga isalacan ti bagitayo wenno dagiti padatayo a tattao malaksid no Cristianotayo. Ti umiso nga ulidan ad-adu a baneficio ti maaramidanna iti lubong ngem iti amin a panagibunannagtayo.”—Christ’s Object Lessons, 383.
Hueves
Octobre 31
5. NAINSIRIBAN A PANURSURO ITI KINAASI
a. Ania ti masapul a laglagipentayo iti panangitandudotayo iti linteg moral ti Dios —casta met no iranudtayo daytoy a kinapudno iti sumaganad a caputotan? Ecclesiastes 11:9; 12:13, 14; Santiago 2:10–13.
“Addaan dagiti agtutubo iti nainkasigudan a panagayat iti wayawaya; kasapulan a maawatanda a dagitoy di mabilang a bendicion ket matagiragsac laeng iti panagtulnog iti linteg ti Dios. Daytoy a linteg ti mangsalsalimetmet iti pudno a wayawaya. Itudo ken iparitna dagidiay a bambanag a mangpababa ken mangadipen, iti casta, cadagiti natulnog ipaayna ti salacnib manipud iti pannacabalin ti sairo.
"Kuna ti Salmista: 'Ket magnaacto a siwayawaya; ta binirocco dagiti alagadem.' 'Dagiti pammanecnecmo isuda met ti pagray-oac ken cabalanbalacadco.’ Psalm 119:45, 24.
“Iti panangikagumaantayo a mangator iti kinadakes, agannadtayo coma busor iti panagduyos a mangbiroc iti biddut wenno mangbabalaw. Ti agtultuloy a panangumsi ket mangriro, ngem saan a mangreporma. Iti adu a panunot, ken masansan dagidiay addaan iti kasayaatan a maakaran, ti law-ang ti saan a naasi a pammabalaw ket makapatay iti peksa. Dagiti sabong saanna nga agucrad iti sidong ti anges ti mangdadael nga angin. . . .
“Ti pudno a panggep ti pannubngar ket magun-odan laeng no ti mismo a nagaramid iti biddutol ket maiturong a mangkita iti basolna ket ti pagayatanna maaramat para iti pannakakorehir dayta. No maibanag daytoy, itudo isuna iti gubuayan ti pammacawan ken pannacabalin. Ikagumaanyo a pagtalinaeden ti panagraemna iti bagina ken ti mangparegta kencuana buyogen ti tured ken namnama.
“Daytoy a trabaho ti kasayaatan, karirigatan, a naikumit cadagiti tattao. Gutogutenna ti naannad unay a taktika, kalacaan a pannakaacar, pannakaammo iti nataoan a galad ken nayanac idiay langit a pammati ken anus, a situtuloc nga agtrabaho ken agbantay ken aguray. Maysa a trabaho nga awanen ti napatpateg pay ngem iti daytoy.”—Education, pp. 291, 292.
Viernes
Noviembre 1
PERSONAL A PANGREPASO A SALSALUDSOD
1. Kabayatan nga awanannac pay iti adu, anaia ti masapul a maamirisco maipapan iti sabali nga addaan iti basbassit pay?
2. Kasano kalalaca ti maaddaan iti bulsec a panangidumduma wenno di nainkalintegan a panangipato busor iti smagmamano a tattao?
3. Kasano nga apektaran dagiti modelo ti panagpampanunottayo ti wagas a panangtratotayo cadagita a tattao?
4. Apay a ti linteg ti Dios naawagan a linteg ti wayawaya?
5. Iladawan ti ugali a masapul nga adda iti panangisuro cadagiti tattao nga addaan itibiddut a kapanunotan.