Domingo
Octobre 13
1. GAPU ITI NAESPIRITUAN NGA IDADACKEL
a. Iladawan ti palimed no kasano a ti Santiago 1:2 mabalin a matungpal cadatayo. Nehemias 8:10.
“Amin a pannuboc a maawat cas manursuro ket mangpataud iti rag-o. Ti intero a narelihionan a biag ket mangitag-ay, mangipangato, mangitan-oc, napabanglo cadagiti nasayaat a sasao ken aramid. Maragsacan unay ti cabusor a maaddaan cadagiti cararua a mauppapay, malmaldaangan, agladladingit ken agsennaay; kayatna a maaramid dagiti casta laeng nga impresion no maipapan iti epekto ti pammatitayo. Ngem gakat ti Dios a ti isip saanna nga alaenna ti nababa a tucad. TarigagayanNa nga agballigi ti tunggal cararua iti pannacabalin a mangtaginayon iti Mannubbot.”—Testimonies, vol. 6, pp. 365, 366.
b. Apay a palubosan ti Dios dagiti suot nga umay cadatayo? Santiago 1:3; Roma 5:3.
“No mapagballigiantayo dagiti suottayo ket magun-odtayo ti balligi cadagiti sulisog ni Satanas,iti casta maandurantayo ti pannuboc ti pammatitayo, a napatpateg ngem iti balitoc, ken napigpigsa ken nasaysayaat ti panagsaganatayo a mangsango iti sumaruno. Ngem no lumnedtayo ket umanamong iti dalan dagiti sulisog ni Satanas, kumapkapoytayo ken awan ti magun-odtayo a gunggona iti pannuboc ken saantayo a maisagana a naimbag para iti sumaruno. Iti castoy a wagas kumapuytayo a kamapuy, agingga maiturongtayo a cautibo ni Satanas iti pagayatanna. Masapul nga addaantayo iti sibubukel a cabal ti Dios ken nakasagana iti aniaman a canito para iti pannakisupiat cadagiti pannacabalin ti sipnget.”—Early Writings, p. 46.
Lunes
Octobre 14
2. NAIM-IMBAG A RESULTA NGEM ITI NAPANUNOTTAYO
a. Ilawlawag dagiti beneficio ti panangiwatwat iti kinaanus. Santiago 1:4; Lucas 21:19.
“Ti Dios ket masirib ken naimbag unay a mangsungbat a canayon cadagiti cararagtayo iti umno a tiempo ken iti umiso a wagas a tarigagayantayo. Ad-adu ken nasaysayaat ti aramidenNa cadatayo ngem ti panangtungpalNa iti amin a tarigagaytayo. Ket gapu ta pagtalkantayo ti sirib ken ayatNa, saantayo coma a kiddawen Kencuana nga umanamong iti pagayatantayo, no di ket rumbeng a sapulentayo ti sumrec ken ipatungpal ti panggepNa. Rumbeng a mapukaw dagiti tarigagay ken interestayo iti pagayatanNa. Dagitoy a kapadasan a mangsuot iti pammatitayo ket para iti beneficiotayo. Babaen cadacuada maipanayag no ti pammatitayo ket napudno wenno sincero, agsadag iti sao ti Dios laeng, wenno agsanggir cadagiti pasamac, saan a sigurado ken agbaliwbaliw. Ti pammati mapabileg babaen iti panangipacat. Palubosantyo ti kinaanus a maaddaan iti perpectro nga aramid, a laglagipen nga adda dagiti napateg a karkari iti Nasantoan a Surat para cadagidiay agur-uray iti Apo.”—The Ministry of Healing, p. 231.
b. Kasano ken apay nga ipakita cadatayo ni Santiago ti dacdackel a ladawan ngem ti saan a mataginayon a buya ti pannacabalin ken kinarang-ay iti daytoy rinuker a lubong? Santiago 1:9–11.
“Iti daytoy a tiempo, sacbay ti dackel a kaudian a krisis, cas idi sacbay ti umuna a pannakadadael ti lubong, naigamer dagiti tattao cadagiti ragragsac ken pananggun-od iti sentido. Gapu ta naigamerda cadagiti makita ken apagbiit, napukaw iti imatangda ti di makita ken agnanayon. Para cadagiti banag a madadael iti pannakausar, isacrificioda dagiti di agrupsa a kinabacnang. Ti panunotda kasapulan a maitag-ay, dagiti kapanunotanda iti biag mapalawa coma. Masapul a mariingda manipud iti pannakailibay iti nailubongan a panagtagtagainep.
“Manipud iti panagpangato ken pannakatnag dagiti nacion cas nailawlawag cadagiti panid ti Nasantoan a Surat, kasapulan nga adalenda no kasano kaawan serserbina ti akinruar laeng ken nailubongan a dayag. Ti Babilonia, cadagti amin a bileg ken kinatan-ocna, a ti kaaspingna ket saan pay a pulos a nakita ti lubongtayo —pannacabalin ken kinatan-oc a cadagiti tattao iti dayta nga aldaw casla natalged ken manayon unay —anian a naan-anay a pimmusay! Cas ‘sabong ti ruot’ a nadadael. Kasta met a madadael ti amin nga awanan iti Dios cas pundasionda. Dagiydiay laeng naisinggalut iti panggepNa ken mangiyebkas iti kababalinNa ti makaandor. Dagiti prinsipioNa ti kakaisuna a natibker nga ammo ti lubongtayo..”—Education, p. 183.
“Ti nailubongan a gameng aglabas. Babaen laeng ken Cristo a magun-odtayo dagiti agnanayon a kinabaknang.”—The Review and Herald, December 10, 1901.
Martes
Octobre 15
3. ITI KINABARA TI GUBAT
a. Iti panangsango iti sulisog, ania ti masapul a sicacararag nga aramidentayo ken apay? Santiago 1:12.
“Ikkatenyo amin a panagpammarang ken panaginkukuna. Agtignayca iti simple, natural a sica. Agbalinca a napudno iti tunggal kapanunotan ken sao ken aramid, ket ‘iti kinapakumbaba ti panunot ti tunggal maysa ipategna coma ti sabali ngem iti bagida.’ Laglagipem latta a ti moral a kinatao ket kasapulan a mapatibker babaen ti kanayon a panagbantay ken cararag. Agingga a kumitaca ken Cristo, natalgedca; ngem iti canito a panunotem dagiti sacrificiom ken paricotmo, ken mangrugica a makipagricna ken mangipangruna ita bagim, mapukawmo ti panagtalecmo iti Dios ket agpeggadca unay.”—Testimonies, vol. 4, p. 522.
“Rumbeng nga umabantetayo a sititibker, a pulos a saan a pukawen ti puso wenno namnama iti naimbag nga aramid, aniaman a pannuboc a mangraut iti dalantayo, aniaman a sipnget moral ti mabalin a mangsallocob cadatayo. Ti anus, pammati, ken panagayat iti pagrebbengan ket leksionda a masapul nga adalentayo. Ti panangparukma iti bagi ken panangkita ken Jesus isu ti inaldaw a trabaho. Pulos a saan a baybay-an ti Apo ti cararua nga agtalec Kencuana ken agsapsapul iti tulongNa. Ti corona ti biag ket maikabil laeng iti muging ti agballigi.”—Ibid., vol. 5, pp. 70, 71.
b. Apay a biddut nga ibaga nga ipatulod ti Dios dagiti suot ken sulisog? Santiago 1:13.
“Saantayo coma a padasen a kissayan ti basoltayo babaen iti panangekskyus iti basol. Masapul nga awatentayo ti panangrucod ti Dios iti basol, a pudno unay a nadagsen. Calvario laeng ti makaipanayag iti nakaam-amac a kinadakes ti basol. . . .
“Ti sulisog ket panggargari tapno agbasol, ket daytoy saan a nagtaud iti Dios, no di ket manipud ken Satanas ken manipud iti kinadakes ti bucodtayo a puso.. ‘Ti Dios saan a mabalin a sulisugen cadagiti banbanag a dakes, ket Isu awan met ti sulisogenNa:’ Santiago1:13.
“Ikagkagumaan ni Satanas nga iyegnatayo iti sulisog, tapno maipalgac ti kinadakes ti kababalintayo iti sangoanan dagiti tattao ken angel, tapno ibagana a cucuanatayo. . . . Ti kabusor iturongnatayo iti basol, kalpasanna akusarannatayo iti sangoanan ti nailangitan nga universo cas saan a maikari iti ayat ti Dios”—Thoughts From the Mount of Blessing, pp. 116, 117.
c. No ti mamabpabasol atakarenna ti natulawan a cababalintayo, kasano a salacnibannatayo ti Apo? Zacarias 3:1–4; 1 Juan 1:9–2:1.
Mierkules
Octobre 16
4. PIGSA TI DIOS ITI KINARASITAYO
a. Ilawlawag ti ragup ti sasao iti cararag ti Apo, “Dinacam iyeg iti pannacasulisog,.” Mateo 6:13 (umuna a paset); Isaias 30:21.
“Palubosannatayo [ti Dios] a maipasango cadagiti tubeng, pannakaidadanes, ken rigat, saan a cas lunod, no di ket cas cadackelan a bendicion iti biagtayo. Tunggal sulisog a masaranget, tunggal pannuboc a situtured a maibturan, mangted cadatayo iti baro a padas ken mangparang-ay cadatayo iti trabaho a mangibangon iti kababalin. Ti cararua a babaen ti nadiosan a pannacabalin ket mangsaranget iti sulisog ipanayagna iti lubong ken iti nailangitan nga universo ti kinabileg ti parabur ni Cristo.
“Ngem nupay saantayo a maupay iti pannuboc, nupay napait dayta, icararagtayo a saan nga ipalubos ti Dios a maiyegtayo iti lugar a maiguyodtayo cadagiti tarigagay dagiti bukodtayo a dakes a puso. Iti panangidaton iti cararag nga inted ni Cristo, isucotayo ti bagitayo iti panangiwanwan ti Dios, a dumawat Kencuana nga iturongnatayo cadagiti natalged a dana. Ditay maidaton daytoy a cararag a sipupudno, ket kaskasdi nga ikeddengtayo ti magna iti aniaman a wagas a bucodtayo a pili. Urayentayo ti imaNa a mangiturong cadatayo. . . .
“Saan a natalged para cadatayo ti agtalinaed a mangut-utob cadagiti pagimbagan a maapit babaen ti isusuco cadagiti singasing ni Satanas. Ti basol ipaawatna ti pannakaibabain ken didigra iti tunggal cararua a mangpalaugod iti dayta; ngem makabulsec ken makaallilaw iti galadna, ket allukoyennatayo babaen cadagiti makaay-ayo a presentasion. No makigasang-gasattayotayo iti lugar ni Satanas awan ti talgedtayo a masalacniban manipud iti pannacabalinna. Agingga nga adda cadatayo, rumbeng nga iserrantayo ti tunggal dalan a mabalin a sumrecan ti manulisog a mangsapul cadatayo.
“Ti cararag, a Dinacam iyeg iti sulisog,' ket maysa a kari.”—Thoughts From the Mount of Blessing, pp. 117, 118.
b. Ania a kiddaw ken pammatalged ti inaaramid ti Dios cadatayo maipapan iti sulisog? Santiago 1:14–16; 1 Corinto 10:13.
“Ania ti sulisog? Isu ti wagas a pakasuotan ken pakasubocan dagidiay mangtontonton nga annac ida ti Dios. Mabasatayo a sinulisog ti Dios ni Abraham, a sinulisogNa dagiti annac ti Israel. Kayatna a saoen daytoy a pinalubosNa dagiti paspasamac a mapasamac tapno masuboc ti pammatida ken mangiturong cadacuada a kumiita Kencuana para iti tulong. Palubosan ti Dios nga umay ti sulisog iti iliNa ita tapno maamirisda nga Isu ti katulonganda. No umasidegda Kencuana no masulisogda, pabilgenNa ida a mangsango iti sulisog.”—In Heavenly Places, p. 251.
Hueves
Octobre 17
5. DAGITI SUOT ITI BALBALAKEN
a. Tapno agtaeng ken Cristo ket iti casta maispaltayo cadagiti sulisog, ania ti masapul a kanayon a pilientayo? Lucas 4:8; Filipos 1:21.
“Pulos a saannatayo a mapilit ti manulisog nga agaramid iti dakes. Saanna a makontrol dagiti isip malacsid no maisucoda iti panangtengngelna. Masapul nga umanamong ti pagayatan, masapul a palubosan ti pammati ti panangtengngelna ken Cristo, sacbay a maipakat ni Satanas ti pannacabalinna cadatayo. Ngem tunggal naimbasolan a tarigagay nga impategtayo ket makaipaay kencuana iti pagsaadan. Tunggal punto a pakapaayantayo a mangragpat iti nadiosan a pagalagadan ket maysa a silulukat a ruangan a mabalinna a sumrecan tapno sulisogen ken dadaelennatayo. Ket tunggal pannakapaay wenno pannakaparmectayo ket mangted iti gundaway kencuana a mangumsi ken Cristo..”—The Desire of Ages, 125.
b. Ania ti mangtignay cadatayo nga agtultuloy nga agturong iti balligi ken Cristo? Filipos 4:13; Apocalipsis 2:10 (maudi a paset); 3:21.
“Isuna a naaagsepa iti iti Espiritu ni Cristo agtaeng ken Cristo. Ti danog a nairanta kencuana ket matnag iti Mangisalacan, a manglikmut kencuana babaen ti presenciaNa. Aniaman nga umay kencuana nagtaud ken Cristo. Saanna a kasapulan a sarangten ti dakes, ta ni Cristo ti depensana. Awan ti makasagid kencuana malacsid iti pammalubos ti Apotayo, ken dagiti amin a banbanag agtitimpuyogda nga agaramid a maipaay iti pagimbagan, dagiti agayat iti Dios.’ Romans 8:28.”—Thoughts From the Mount of Blessing, p. 71.
“Ti korona ti biag ket maikabil laeng iti muging tiagballigi. Adda, para iti tunggal maysa, napasnec solemne a trabaho para iti Dios bayat nga agpaut ti biag.”—Testimonies, vol. 5, p. 71.
Viernes
Octobre 18
PERSONAL A PANGREPASO A SALSALUDSOD
1. Ania ti kasapulac a lagipen iti sumaruno a tiempo ti naricot a suot a sumangbay iti dalanco?
2. Ania ti masapul a maamirisco maipapan iti wagas a sungbatan ti Dios ti cararag?
3. Sadino ti paggapuan dagiti suot ken sulisog ken apay?
4. Ania ti mapasamac cadarato mapagkedkedantayo dagiti sulisog?
5. Kasano nga agtaengac nga ad-adda a naan-anay ken Cristo?