1. DAWAN TAURA MANKAIA Sandi Lih mairin kati, 21

a. Wan rayakara Dawanba dia pliskara mankaia? Wan uplika wala naniba anira kabia? (Matyu 22:37–39). "Dawan Spiritka yawanra iwisa pyuara plikisa nahki wan walkara help munaia ai trabilka naniba pura luwaia. Naiwa yuara tasba aiskara upla umpira kau ailalsa tila manas barasa titan pata piaia sin apu. Rau piarka, kahwa, upla almuk ailal barasa witin nitpalisa wanmihta sakbi help sirpikum pan yabia. Nahara yawan marikaia nitsa wan kristianka lakaba smalkanka kum baman apia sakuna praktis munaia dia Dawan lanwandaukiba."— 4TI 119. b. Dia pramiska wankansa diara sut taura Dawan pas mankisa pyuara? (Matyu 19:29; Hibru nani 13:5). "Dawan bila kasakka dukiara aisikam yaptikam muihkam an lamkra nani mai kulkras wibiasin man sari takpara kan hevenra waia riditaki naniba sutba man famalikam takaia wilinsa."—Testimonies, vol. 1, pág. 510.

---

2. WAN FAMALI AN WAN WALKARA HELP MUNAIA Mundi Lih mairin kati, 22

a. Anira Dawan warkkaba yawan takrikan kaiasa? (Sins laka 22:6; Aiseya 8:18). "Kristian kasak kumba witin yu bani Dawan kupialaka daukisa aiwatla bilawina takrikisa ai luhpia naniwal, titanra manin prias daukisa Dawan bila stadi takisa, bakanu aikuki aipura sunisa baha ninkara aiwarkka walara tawisa."— A Fin de Conocerle, pág. 22."Aisa warkkaba utla bilara pasinkum baku ailuhpia nani asla dauki Dawan bila smalkaia, karnika purawina makabaia yu banira ingnika wankbia dukiara wantanka briaia diara kasak, wapni, an holiba daukaia. ani aisika aiwatla bilara kasak brihwakiba prias watlara sin witin sipsa ai wedniska painkira aisan kaia. Yapti warkkaba sirpi lika apia yu aiska bilara tuktan nanira landaukan kaiasa, wark sirpi nani daukaia, klin lakara iwaia, adarkat utla bilara diara naniba brikaia ban ban."— Sons and Daughters of God, p. 223.. b. Jisas yawanra iwisa kaka wanwalkara nahki aisabia? (Aiseya 50:4.8). "Kristian kum bilawina watawan sturka aisabia apia, praut, brukwan, upla nina aisanka, tara pulanka sin apia. Sakuna witin isi, bawan laka wal, sturi wapni an kasakba aisikaiasa." —My Life Today, p. 196. c. Jisas dia lanwandaukisa wan famalikat baman lukaia apia? (Luk 19:10). "Kristian kumisin yakan aimayunra plikbia apia, aiwina katdukiara baman sin lukikabia apia, sakuna aiwalka helpkara plikbia diadaukaia sa sapa. Wark tarakum wankanba lika wanwalkara nitka nanira help munaia sin yawan nitkan baku. Baha wal wiras man diara uba ailal brisma bara umpira nanira yabisma lika apia, sakuna man pali piaikam wina drusbi piskum walkamra yabaia wilinkaiasma."— Mente Carácter y Personalidad, pág. 482.

---

3. WAN BAPANKABA SWIKA KAHWAIA APIA Tiusdi Lih mairin kati, 23

a. Dia muni wanwina tara yamnikara kulkanka yabaiasa? (1 Korint 6:19, 20; 10:31; 2 Timuti 1:7; Aiseya 7:15) Wan panika aikukisa pyuara dia muni witin nani nina sip blikras? "Wanpata piraba aman pali kaikaiasa Dawanra mayunra yabisa sapa, kan anipyuara yawan plun ban tanis pisa kaka wanwinara sikbis bribalisa an baku wansinskaba sip painwark takras, Dawanra mayunra kum aitani yabras. Bansa kaka kristian bani lantakan kaiasa aipata piraba main kaikaia. Dawan Spiritka ingnika makabaia wantka wantanka briaia naha lainkara." — Counsels on Diet and Foods, pp. 35, 36. b. Kristian rayakaba nahki iwaiasa? (1 Jan 3:18; Matyu 5:16; 1 Tesalonika 2:12) Dia trabilkara yawan brisa wan panika nani daukanka nina blikisa pyuara? "Kristian ailal barasa ai famali idan nani wal prawisa pyuara witin nani daukanka tnatka nina blikisa, banlukisa tawa tawa sipkabia baha nanira yaka nutakaia kasakka yabalka tanka, sakuna raitkaba witinra aubi brihwisa tnatka saura naniba nina blikaia. Baha mita kristian kum kasakkaia lukisa kaka amanpali aidara walikaiasa idan naniwal prawaia apia."— My Life Today, p. 196 c. Prias watla wina saitrasa pyuara Dawan nahki wantsa wan ingnika marikbia? (1 Timuti 4:12; 2 Korint 6:17, 18; Taitus 2:14.) "Kristian ailal sip aifamali nanira smalkras Dawan bila kasakka tanka, kan idanka nani tnatkaba, kwalka dimraba, pata piraba sin baku kristianba daukisa bara dia difrantka kum kaikbia kristian ai nina briba wihki idanba wal."— Fundamentals of Christian Education, p. 289."Yu banira bisniskam nani daukisma pyuara, famalikan nani aikuki aisisma pyuara Jisas malkankaba purara buki kaiasma, daukankam, aisankam baku sin iwankam palira sin."—Testimonies, vol. 5, p. 341.

---

4. KARNA AIBAPAN KAIASA WAN LUKANKARA Wensdi Lih mairin kati, 24

a. Wan panika ar famali nina blikaia watlikara nahki karna aibapan kaiasa wan lukankara? (1 Korint 11:1; Jemes 1:5; Lawana nani 119:105; Galisan 5:24). "Famalikam an panikam nani aikuki prawisma pyuara witin nani manwina lantakisa ki? Apia kaka man witin nani wina lantakisma ki? Naha makabanka walan na ansamunaiasma man winamkat, Kristian ailal sibrisa aifamali ar aipanika nani mita witinra tnayara swibia bara lukisa uba isti kaia apia, uba kasakkira pulaia apia, tawa tawa yaka aifamali an aipanika naniba aitanka bribia, sakuna witin pain nutakan taim kau isisa witin idan nani nina blikaia.."— Testimonies, vol. 3, pág. 506"Dawan bila kasakkaba man brisma bara minit kumirasin man swiram briaia apia, ar sibriaia sin apia, ao baha taka famalikam ar panikam nani mita saitra maiswibia sin man kasak nubas Dawan manwalba tanka." - Ibid., Vol. 4, pág. 236. b. Aisa an yapti pahpaiara nahki kahbansa ailuhpia nanira landaukaia? (Sins laka 22:6.)Nahki wan panika ar famali mita yaka sipsa wahrara waia? "Luhpiam nanira diara kasak landaukaiaba aisa an yapti pahpaiarasa uplawalara swiaia apia, wan luhpia nanira yabal yamnira mankaia, Dawan sibrinkara yaka wapaiaba aisa an yapti lalrasa, minit kumirasin naha warkka tarana wan famali ar upla wala nanira swiaia apiasa. "— Child Guidance, pág. 288. c. Dia kupia kraukanka yabisa baha nani kristian daukanka kat iuras naniba? (Jemes 1:6, 8.) "Yu banira yawan nitsa Dawan Spiritka Holikira karnika, yakan lika sipapia palisa bila wawalra kasak takaia."— Comentario Biblico ASD (Comentarios de E. G. White), tomo 6, pág. 1109."Uplawal painkaia dukiara Dawan bilaba mayara batakpara. " Spiritual Gifts, vol. 2, pág. 266.

---

5. WARK TARAKUM Tausdi Lih mairin kati, 25

a. Dia warkka barasa tarbaiwan watla bilara iwi naniba dukiara? (1 Korint 7: 12-14, 16) "Waunhtaia mana upla nani yangra aiulbisa bara makabisa witin nanira helpmunamna aiwatla bilatrabil naniba wina puraluwaia dukiara. Wan muihnikum aiulbankan witin aiwatla bila trabilka dukiara naku aisan: Waitla bilara maiwaiknaba Kristian apia bara witin mita luhpi nanira yaban bili walras. Titan priaska daukisna pyuara luhpi nanira paiwisna bubia aikuki asla taki Dawanra mayunra yabaia, sakuna maiwaikna mita tuktan nanira wisa wapara bara yang yakan aima manas prias daukisna. Wihra daira walisna bansin lukisna utlawina pliswalara takiwaia bara manra maiwalisna dia tabaikan sturkakum aiwiaia brisma sapa.Naha lika isiapiasa aniwatla bilara aisa an yaptiwal tarbaiwan lakara iwisa pyuara, kumbaman kristian walaba idan Dawan sibrinka witinra apu. Bansakuna maiwin aidaukisa ban drih swapara yakan kamasin wedniskum dauki marikibas maiam idanra an luhpiam nanira, bilam walrasba dukiara saritakpara man warkkam daukibas Jisas lenstarka kasak kum baku, bara pyuaba balbia bara witin nani iskius kum aisaia apukabia."— My Life Today, pág. 334.

MAKABANKA LUAN NANI BA LAKI KAIKS Fraidi Lih mairin kati, 26

1. Yawan Dawanra latwansa kaka nahki wan walkara aisabia? 2. Wan warkka taraba ya nani paliwal takrikan kaiasa? 3. Wan famali idan naniba nahki yawan sipsa Dawanra bribalaia? 4. Tuktan nanira ya nani mita brih wakaiasa? Dia muni? 5. Dia misaniry warkka daukaiasa Aisakum aimaia wal iuras ba?