Dijandula dia mudimu wa tshiprofete wa Danyele ne wa Yone
<< >>
Nsabatu wa 23/05/2026Dilesona 8
MUPROFETE WA MU PATEMOS « Muyidi mukuabo, wakadi Yezu musue, wakadi n’andi ku mesa, mumueyene mu tshiadi. » ¬- Yone 13:23
Bia kubala :
- Conquérants Pacifiques, Shapita, 53 et 54
« Kunyima kua Kilisto mubande mu Diulu, Yone wakadileja muena mudimu mudifile ne wa lulamatu ku bualu bua Mukelenge » - Conquérants Pacifiques, p. 487
1. MUYIDI WAKADI YEZU MUNANGE Dia kumudilu 17/05
a. M’bilejelu kayi bidi bileja malanda makole adi pankatshi pa muyidi Yone ne Yezu ? Matayo 17:1 ; Mako 14:33 ; Luka 8:51« Yone kumuenekabi nunku muikale ne muaba wa kumudilu mu dinanga dia kudi Kilisto, ne kupeta majadika a bungi a ditekemena diandi. Udi munkatshi mua bayidi basatu bakadi ne diese dia kubandila ditumbishibua dia Kilisto ku mukuna wa dikudimuka diandi dia mpala ne dia dikenga diandi ne lufu mu budimi bua Getesemani.N’nyeye mene wakapeshabo mamu’andi wa Musungidi, mu meba andi a ndekelu a dikenga diandi ku Mutshi Mutshiamakane » - Conquérants Pacifiques, p. 481b. M’mushindu kayi wakadi Yone wa pa buandi munkatshi mua bayidi ? Yone 13:23 ; 21:20a, 24« Yone ne Yakobo, Andele ne Petelo, nansha ne Filipo, Natanaele ne Matayo, bakadi balamatangana nandi kupita bakuabo bayidi, ne m’bobo mene bakamona bishima biandi bivule. Petelo, Yakobo ne Yone bakadi mene mene pa buipi nandi, benda bamona bienzedi biandi ne bunvua meyi andi, bakadi mene mene mushindu wa pa buawu balamate kudiye. Yone wakadi mu bushuwa muena dia Yezu bikole, yeye kufunkunyibua munu ne m’muyidi wakadi Yezu mutamba kunanga. Musungidi wakadi mubanange bonso buabo, kadi Yone wakadi ne mutshima udi wakidila kutambe. Nsonga mene mene, wakunzulula mutshima wandi wa buana kudi Yezu kutamba bakuabo bonso. Nunku malanda a bulunda mene mene akadi pankatshi pandi ne Kilisto, ne n’nyeye wakapeshibua mayisha a ndondo mule a Musungidi. » - Jésus Christ, p. 280
2. NGIKADILU MUSHINTULUKE Dibidi 18/05
a. N’diunvuija kayi dia dina dipesha Yone ne muam’abo Yakobo kudi Yezu ? Mâko 3:17« Mupostolo Yone kakadi ne ngikadilu muakane eu wa kuanyisha ku tshifukilu tshiandi, wakalejaye ku nshikidilu kua mudimu wandi nansha. Wakadi ne bilema binene, kakadi anu muena budisu, ne kulumba kua malu, kadi wakadi muena malu a mulu mulu ne a kudisombuela. Kumupeshabo yeye ne muan’abo dina dikuabo ne ‘Bana ba mukungulu wa mvula’. Wakadi ne dibungama bua ngikadilu wa kukuata kua tshinji ne wa kudisombuela ne bijanu. Kadi, mu mapanga andi, Mukelenge wa mu Diulu kujandula mutshima wa disanka, wa kapia kakole, wa bushuwa ne wa dinanga. Yeye kutekesha buiminyi ne kulumba kua malu bia muyidi wandi, ne yeye kuteta ditabuja diandi. Yeye kumusokoluela bua se mutshima wandi wakadi anu wenda ukeba bikole : buimpe bua tshijila ne bukole budi bushintulula bua dinanga » - Conquérants Pacifiques, p. 482b. M’mushindu kayi wakayila Yone ngikadilu mupia mupia wa kusomba ne bakuabo ? Yone 13:34 ; 1Yone 4:7-8« Malesona a Yezu akadi amba bua lutulu, kudipuekesha ne dinanga bu bintu bidi bikengedibua bua kudiunda mu ngasa ne kuikala bakumbane bua kuenza mudimu wandi, biakadi bia mushinga mutambe kudi Yone. Wakadi wangata ne mushinga bua buimpe buandi dilesona dionso ne kudienzeja bua kuikala ne moyo wakadi anu mu diunvuangana ne moyo udi kuidikija wa Nzambi. Kamana kamana yeye kuanyisha, ki ne mu diela dia mbila ne bukole bia pa Buloba, kadi ‘butumbi bua muana umuepele udi mulela kudi Tatu wandi’ (Yone 1:14). – Ibid, p. 485c. Unvuija bipeta, mamuma bia mutshima udi mûle tente ne dinanga dia mukuetu. 1Yone 3:10-11 ; Yone 13:35« Ndondo ne tshisumi bia dinanga dia Yone bua Mukelenge wandi kabiakadi nunku tshikebi tshia bualu kadi m’bualu budi bua dinanga dia Kilisto kudi muyidi wandi. Yone wakadi ne dijinga dia kufuana Yezu ; ne ku buenzeji budi bushintulula bua dinanga edi dia Musungidi, yeye kulua muena kudipeukesha ne lutulu. ‘Bumeme’ buandi kujimina mu Yezu. Kupita balunda bandi bonso, mupostolo wakadilekelela kudi ‘bukole’ bua moyo eu udi kuanyisha …Yone wakadi mumanye Musungidi ku bualu bupitshisha. Malesona akapetaye kudiye akalomibua bikole mu mutshima wandi, ne pakadiye ufila bumanyishi bua ngasa wa lupandu, ngakuilu wandi wakadi mutambe kuikala mupepele wakalua wa ludimi lutue, bualu wakadi ufumina ku dinanga dia bu-muntu buandi bujima » - Ibid, p. 485-486
3. MUIPATA KUYA KUSOMBA MU PATEMOS Disatu 19/05
a. Kunyima kua benza monso mua kuenza bua kushipa Yone bapangile, m’muaba kayi wakamutumabo ? Buakabuluibua 1:9« Yoen kuenzejibua bua yeye kuya ku Lomo, bua kuya kulumbuluishibua bua ditabja diandi. Mu tshimenga etshi, mayisha a mupostolo akadi munvuija bibi kudi bamfumu. Ba ntemu ba mashimi bakadi bamufunda ne yeye udi uyisha meyisha a kusesuisha bantu, ne kubafila mu ditomboka. Bena lukuna bandi bakadi batekemena bua se kumufunda eku, kuakadi ne bua kufikisha muena mudimu wa Nzambi ku lufu. Yone kudilumbuluila bimpe mene mene mu mushind wakadi utuisha, ne didipuekesha dionso ne bushuwa, ki biobi kuenza bua se meyi andi aya kupeta buenzeji bukole kudi bakadi muaba au. Bamuteleji bandi kushala batobola mukana ; balengibue kudi menji andi ne kuakula kuandi kua ludimi lupepele. Kadi pakadi meyi andi enda akoka ntema, apu mene m’pakadi tshinji tshikole tshia bena lukuna bandi kuluatshi lukinu … Kuelabo mu tshifuadi tshia tshiamua tshikunze tshikala ne mafuta asaba pa kapia, kadi Mukelenge kulama moyo wa muena mudimu wandi wa lulamatu, bu muakenzaye ne nsongalume isatu ya bena Ebelu mu tshikutu tshia kapia kakole. Pakadibo bamba meyi â : ‘Nunku ke muakafua bonso bakadi bitabuja muena mashiya eu, Yezu Kilisto wa ku Nazaleta’, Yone kuamba ne : ‘Mukelenge wanyi kukokela ne lutulu ku bionso biakadi Nsatana ne banjelo bandi mua kuelela menji bua kumupuekesha milongo ne bua kumuenzela tshinyangu. Wakafila moyo wandi bua kusungila Buloba. Ndi mupeshibue buneme bua meme kukenga bualu bua dinanga dianyi kudiye …Meyi kufila tshimuenekelu tshia ndondo, ne bobo kusabula Yone kayi mupeta bualu mu tshifuadi tshia tshiamua tshikunze tshiakadi ne mafuta asaba kudi bantu mene bakadi bamuela mu luesu elu …Ku mukenji muela wa Mfumu, bobo kumutuma mu muaba wa nkayandi mu tshisanga tshia Patemos ...Bena lukuna bandi kuela menji ne apu kuakujika kena kabidi ne buenzeji nansha, ne neaye kayi ditekenena, kayi tshintu » - Conquérants Pacifiques, p. 508-509b. N’diese kayi dia mushinga wa bungi diakafila dipata edi ? Buakabuluibua 1:1-3, 10-11« Patemos, n’tshidila tshia mabue ne tshipela, tshidi mu mayi manene a Egée, bukelenge bua Bena Lomo kusungula muaba eu, bua kuikala kutuma benji ba malu mabi matambe. Kadi kudi muena mudimu wa Nzambi, muaba eu wakadi bu nzubu wa lukanu, udi kauyi muimpe kusomba, muaba wakalua tshibi tshia Diulu. Kuaka, wakadi mumbusha pepi ne tshiyumbakenu tshia malu a mu moyo, malu menza a bidimu bimane kupita, wakadi uyukila ne Nzambi, uyukila ne Kilisto ne banjelo, ne m’muaba eu wakapetaye meyi ne mayisha bia kulonda bua Ekelezia wa bikondo biakadi bilua kumpala. Malu akadi ne bua kumueneka ku nshikidilu kua Buloba bakamulejau, ne wakamba bikena kumoan biakamonaye bua bualu bua muanda wa tshikondo tshia ku nshikidilu » - Ibid, p. 509
4. KUSAMBAKENA NE KILISTO Dinayi 20/05
a. M’mushindu kayi wakamuenekela Kilisto, Yone mu tshidila tshia Patamos ? Buakabuluibua 1:12-16« Muyidi eu mutambe kunangibua wakamona lutatu ne kanyinganyinga bia Yezu, ne kumona muakadiye upungila ne lufu mu budimi bua Getesemane, pakadiye ukupula bisululu mu mamata a mashi. Wakamona ‘Mpala wandi wakadi munyanguke ne dinyanguka dipite dia muntu’ (Yeshaya 52:14). Wakamumona muakadibo bamukuma kudi masalayi a bena Lomo, muluatshishibue bia tuseku ne tshilulu tshikunze, muasa tshifulu tshia meba, ne mupopela pa Mutshi Mutshiamakane. Ne musangu eu kabidi Yone kubandila Mukelenge wandi. Kadi wakadi mushintuluke ! Kakadi kabidi muntu eu wa bishima, mupetula ne mulekela kudi bantu. Wakadi muluatshishibue tshilulu tshia bukenke, tshibalakana … Patemos kubalakana ne bukenke bua butumbi bua Musungidi mubike ku bafue » - Conquérants Pacifiques, p. 518-519b. Yone wakenza tshinyi ne m’mudimu kayi wakamupesha Yezu ? Buakabuluibua 1:17-19« Bakapesha Yone makole, bua yeye kushala muimane kumpala kua Musungidi wandi mutumbishibue. Diambedi ne yeye kumona tshikena kumona tshiandi tshia mpatshi, matumbi a mu Diulu bobo kumubuluilabo patoke. Kumuanyishilabo bua yeye kukatshila bua nkasa wa butumbi wa Nzambi, ne pa mutu pa mvita ya pa Buloba, yeye kubandila musumba wa bapikudibue baluatshishe ne mayeka matoke. Yeye kunvua musambu wa banjelo ne misambu ya butshimunyi ya aba ‘bakatshimuna anu bua mashi a Muana wa Mukoko ne bua diyi dia bumanyishi buabo’. Mu dibuluibua diakamupeshabo, wakamona malu andi alondangana akadi alenga ku moyo bikole bitambe akadi amba bua muyuki wa kale wa bantu ba Nzambi, ne yeye kupeta tshimuenekelu tshia moyo wa Ekelezia tô ne ku nshikidilu kua bikondo. Ku binfuanyi ne bimueneshelu biena bualu bia mushinga mutambe kulejibua kudiye biena bualu biakadi ne bua kufunda, bua bantu ba Nzambi ba tshikondo etshi ne ba bikondo bidi bilua kumpala, bua bapeta lunvu luakane lua dibutuka ne lua mvita idi ne bua kuluangana » - Ibid, p. 519c. M’mu tshinyi mudi mukanda wa Buakabuluibua utupesha lumu lua pa bualu ? Buakabuluibua 1:4-6 ; 3:22« Dibuluibua edi diakadi ne tshipatshila tshia kulombola ne kukankamika kua Ekelezia mu kuabanya kua malu adi a buena Kilisto. Nunku, badi bayila malu a Nzambi mu tulasa tutumbuke tua bifulu bua mabue badi batshinka ne Buakabuluibua m’mukanda udi muteka tshimanyishilu ne malu masokoka adimu kakuena mushindu wa kûnvuija nansha. Ki bua tshinyi ba bungi m’bumbuke ku diyi dia tshiprofete ne kubenga bua kuya mu ndondo ne malu masokoka. Kadi Nzambi kena musue bantu bandi bamone mukanda wa Buakabuluibua nunku nansha » - Ibid, p. 519
5. DIKALANGANAKU DIA KILISTO DIJADIKA Ditanu 21/05
a. Tshikena kumona tshia Kilisto munkatshi mua bitekelu bia minda muanda mutekete bia ngolo, tshidi tshiunvuija tshinyi ? Buakabuluibua 1:20« Kilisto udi mulejibue muikale munkatshi mua bitekelu bia minda muanda mutekete bia ngolo ne malanda andi ne Ekelezia. Nunku, udi wenda uyukila ne bantu bandi. Udi mumanye ngikadilu udi wandi mene mene ; udi mutangila bulongolodi budi bua Ekelezia, buimpe buandi, kudifila kuandi. Nansha mudiye muikale Muakuidi Muenene ne Mutuangaji mu tshitendelelu tshia mu Diulu, Udi mulejibue wenda uya ne upingana pa Buloba munkatshi mua Ekelezia yandi. Ne kusumpakana eku udi anu kakuyi kuteketa, udi ne tshitabela bua kumona ne munya wau mue wa ku bansentedi kawuyi kukepela anyi kuwuyi kujima. Bikale bitekedi bia minda biakadi bilekelela anu bantu bamue bua bobo kubitangila, ludimi lua kapia ludi luya kububakana, luya kuteketa ne luya kufua ; kadi yeye udi muikale nsentedi mulelela wa nzubu wa Nzambi, mulami mulelela wa biendedi bia ntempelo. Dikuba diandi ne tshitabela ne ngasa wandi bidi bia munanunanu, bidi bikale mushimi wa moyo ne munya » - Conquérants Pacifiques, p. 521b. Unvuija tshipatshila tshia ngumu idi Nzambi wambila tshibungi tshia Ekelezia, idi milejibue kudi Ekelezia muanda mutekete idi mu Buakabuluibua Shapita 2 ne 3.« Mena a Ekelezia muanda mutekete adi aleja Ekelezia wa Kilisto mu bikondo bishilangane bia bidimu bia buena Kilisto. Nomba muanda mutekete udi uleja tshiuwidi ne udi uleja kabidi ne ngumu eyi idi iya tô ne ku nshikidilu kua bikondo, nunku binfuanyi bidi biangata, bidi bileja patoke ngikadilu wa Ekelezia mu bikondo bishilangane bia muyuki wa kale wa Buloba » - Ibid« Ekelezia wakadi mu tshilema ; wakadi dijinga ne meyi a kumutandisha bikole. Nzambi kupesha Yone menji bua yeye kutandisha ne kudimuisha aba bakadi bajimije m’muenenu wa mikenji ya ntatu ya Ekelezia, bakadi bateka lupandu luabo mu njiwu. Kadi n’dinanga anu ne milayi ya ditalala bidi Nzambi wakula mu meyi a kudiula adiye umona adi a mushinga » - Ibid, p. 522
Makonka a kuambulula dilesona Disambombo 22/05
1. Nansha muakadi Yezu kayi kansungansunga, bua tshinyi Yone wakadi ubikidibua ne muyidi mutambe kunangibua ?2. N’tshinyi tshiakakeba dishintuluka mu moyo ne ngikadilu bia Yone ?3. M’mushindu kayi wakapangisha Nzambi kulongolola kua malu kua bantu babi bakadi bakeba bua kushipa Yone ?4. Nansha mudi mukanda wa Buakabuluibua ubikidibua misangu yonso ne m’mukanda udi muteka tshimanyinu kabiyi biakane, buetu tuetu mukanda wa Buakabuluibua udi unvuija tshinyi ?5. Unvuija tshipatshila tshia Nzambi mu kutuma kua ngumu ya kufunkuna nayi Ekelezia wandi.