Nsabatu wa 06/06/2026 bua Nzubu wa kutendelela Mu République Tchèque République Tchèque (anyi Tchèquie) n’Ditunga didi disanganyibua munkatshi mene mene mua Europe, ku mikalu ne Ditunga dia Allemagne, dia Pologne, dia Autriche ne Ditunga dia Slovaquie. Munda mua Ditunga edi mudi musanganyibua Bohème, tshitupa tshia buloba tshia kale ne misoko ya pa mpenga idi isankisha mesu pa kuyitangila, nzubu minene mitumbuke ya lumu lua bungi ne malu manene a mu nsombelu wa bantu ne a diimanya dia malu ne a ngelelu wa menji muaba mene wakabangila Jean Hus (1369 – 1415) kuibakulula kuandi kunene kua ditabuja. Lelu, n’Ditunga didi kadiyi ne tshitendelelu tshidi tshia Mbulamatadi nansha, didi ne bantu batue ku millions 10, 9, bapite ku million 1, 4 badi basombela mu tshimenga tshikulu, Prague. Prague kena anu muikale muaba wa nsangilu wa kale ne wa dimanya dia malu, kadi udi kabidi muaba udi misumba ya bantu mikale ne dijinga dia malu a nyuma, ba bungi ba mu bobo badi bakeba tshidi luidi lua moyo, ditekemena ne ditalala bia mutshima. Munkatshi mua badi bashikame mu Ditunga edi, 47,8 % badi babadibua bu bantu badi kabayi batendelela, 11,7 % badi badiamba ne m’bena Kilisto (mudi muikala 9,3 % badi ba Catholiques ne 2,4 % m’bena bitendelelu bikuabo bia bena Kilisto) ne 10,8 % badi bena bitendelelu bikuabo. Mudimu wa ba Adventiste du 7ème Jour, Mouvement de Réforme mu tshimenga etshi wakatuadija mu tshidimu tshia 2014, anu ne bantu basatu bakadisangisha bua musangu wa kumudilu. Pashishe, mu ngondo wa muanda mukulu 2020, Mpasata ne diku diandi kutumibua muaba eu bua kuamba lubula lua bulelela bua tshikondo, ludi lubila lua lupandu lufidibue kudi misuka mijimine. Lelu, Ekelezia wa Prague udi ne ba membres 30, ne bantu badi balua kutantshila bua kumanya ne badi benda badilongolola bua kupeta dibatiza, bantu m’batue ku 70. Masangisha adi enzeka mu nzubu wa kufutshila, kadi Ekelezia udi utendelela bikole bua mushindu wa kusumba anyi kuibaka Nzubu wandi nkayandi wa kutendelela, muaba udi bantu ba Nzambi mua kudisangisha, kuikala bakankamika mu ditabuja ne kuabanyangana munya wa bulelela ne aba badi babanyunguluke. « Nzubu muaba udibo ne bua kukukuila Nzambi udi ne tshia kuikala anu bumudi ngikadilu wandi ne butumbi buandi » - Testimonies for the Church, vol. 5, p. 268 Bana betu balume ne bakaji lelu tshikondo tshidi kumpala kuetu bua tuetu kuditua ku mudimu eu munene wa Nzambi. Mulambu wenu udi muikale kubutshila kua bintu bua tshiendelele, bua lupandu lua misuka ne bua kukolesha Ekelezia udi mene mu mutshima wa Europe. Nulombe bua Nzambi anulombole, tuayi mudimu eu mpanda ne lejayi dijinga edi munkatshi muenu. Mukelenge abeneshe yonso wa badi baditua ku mudimu eu ne dinanga ! « Tudi tusakidila Nzambi misangu yonso bua bonso buenu tutela mena enu mu milombo yetu » - 1Tesalonike 1:2 Bana benu balume ne bakaji ku Prague.