1. NZAMBI UDI DINANGA Dia kumudilu 28/06

a. N’tshimanyinu kayi tshia dinanga dia Nzambi tshidi tshipesha bantu ? Ekesode 34 :6-7 ; Yona 4 :2b ; Yelemiya 31 :3 « Mifundi idi ileja patoke ngikadilu wandi. Nzambi yeye nkayandi udi utuleja mu mifundu tshidi luse luandi ne dinanga daindi bidi kabiyi nshikidilu. Tshikondo tshiakamulomba Mose ne:« Ndi nkusengelela ne, undeje butumbi buebe !’, Yehowa kumuandamuna ne:‘Nengendeshe buimpe buanyi bonso ku mesu kuebe (Ekesode 33 :18-19), ne mu kupita kumpala kua Mose, yeye kuela lubila ne:« Yehowa, Yehowa, Nzambi wa luse ne dinanga, kena ukuata tshinji lubilu, udi mûle tente ne luse lujalame ne bushuwa, udi uleja binunu bia bantu luse lujalame, udi ubuikidila bantu mapanga abo ne kushipa kuabo kua mikenji ne malu mabi abo ! (Ekesode 34 :6-7). Yeye udi ‘Nzambi wa luse, mûle tente ne dinanga, kayi ukuatshika tshinji lubilu, udi uleja bantu luse lujalame’ (Yone 4 :2), ‘bualu bua udi usanka bua kuleja bantu luse lujalame’ (Mika 7 :18) » - Vers Jésus, p. 10 b. M’bua tshipatshila kayi bua katuma Nzambi, Muana wandi ? Matayo 11 :27 ; Yone 14 :8-9 « Nsatana kuvuija Tatu wetu wa mu Diulu bu muena kulumbulula kukole, mulumbuluishi wa tshikisu, mufidi wa mabanza wa bualu bukole, kayi mua kulekelela. Nsatana nguzola Mufuki anu bumudibo batangila bantu ne disu dia udi ukebulula bua kujandula bilema biabo, bua yeye kubalumbuluisha ne kubakosela tshibawu. M’bu kumbusha tshilulu etshi tshikudika tshia midima mu kuleja patoke dinanga didi kadiyi nshikidilu dia Nzambi, ke tshiakaluila Yezu Kilisto bua kuikala ne moyo munkatshi mua bantu. » - Ibid, p. 10-11

---

2. MUDIMU WA YEZU Dibidi 29/06

a. M’mushindu kayi wakunvuija Yezu mudimu wandi pa Buloba ? Luka 4 :16-18 « [Luka 4 :18] Eu ke wakadi mudimu wa Yezu. Wakadi uya eku ne kuaka wenza malu mempe ne wondapa bonso bakadi mu bukokeshi bua diabolo. Kuakadi kusanganyibua misoko muakadibo kabayi mua kunvua kabidi kudila ne kupumuna bua masama nansha ; wakadi mupitshilamu ne kondopa basame bonso. Tshienzedi tshiandi tshiakadi tshijadika Bu-Nzambi buandi. Dinanga, luse lujalame, biakadi bilejibue patoke bienzedi biandi bionso ; mutshima wandi wakadi mûjibue tente ne dinanga dia bulunda bua bana ba bantu. Wakadi muluatshibue ne ngikadilu wabo bua yeye kuandamuna ku majinga abo. Bantu ba bupele bua bungi ne bena bupuekele kabakadi batshina bua kusemena pa buipi nandi. Bana bakese mene bakadi badiunvua bakokibue kudiye. Bakadi banange kubanda pa binu biandi, ne kumutangila ku tshinfuanyi tshiandi tshiakadi ne kuelangana kua menji tshiakadi tshileja dinanga didi kadiyi ndekelu » - Vers Jésus, p. 11-12« Yezu wakadi umona mu muntu yonso musuka mubikidibue ku bukelenge buandi. Wakadi ulenga mitshima mu kubuela munkatshi mua musumba wa bantu bu muenji wa bimpe. [Wakadi wenda ubakeba mu njila, mu nzubu, mu matu, mu nsunagoge, ku muelelu kua dijiba dia mayi ne mu masanka a dibanji dia dibaka]Wakadi usemena pepi nabu, apu m’pakadibo benza midimu yabo ya bianza yak u dituku ne ku dituku ne yeye wakadi utuma ntema yandi ku midimu yabo eyi. Wakadi ubuela mu nzubu bua kuyisha ne wakadi uteka meku abo ku buenzeji bua dikalanganaku diandi dia Bu-Nzambi. Dinanga diandi nkayandi diakadiye mumanye bua kuleja mene mene kufikisha bua yeye kupeta mitshima ya bantu. Pakadibio mua kumufikila bua yeye kumbuka ne kuya ku mukuna bua kuya kutendelela pa nkayandii, biakadi anu bua kudilongolola bua midimu ya kuenza munkatshi mua bantu. Kunyima kua bikondo ebi wakadi upatuka bua kuya kondapa basame, kuyisha bakadi kabayi ne dimanya, kukosa nkanu ya Nsatana yakadiye mubasuike mu bupika » - Jésus Christ, p. 135 ne Desire of Ages, p. 151 b. Nansha mudiye mûle tente ne dinanga ne luse, n’tshilejelu kayi tshia lulamatu tshia Kilisto tshitudi mua kuamba, padiye utandisha bubi ? Yone 9 :39-41 ; Matayo 21 :12-13 « Yezu kakadi mumbusha bualu nansha bumue ku bulelela, kadi wakadi anu wamba ne dinanga. Malanda andi bantu akadi ne mbabi ne menji mapuangane, ne a mpatshi. Kakuyi diyi disaluke, diyi dikole kadiyi mua kupatuka kakuyi bualu buadi ; kakadi mua kutatshisha kashidi musuka udi ulengibua ku meyi. Mateketa a muntu kakadi wadiwula ne ujana. Pakadiye wamba bulelela, wakadi anu ubuamba ne dinanga. Wakadi wela patoke lubombo, dipapisha dia mutshima, bubi, kadi wakadi wenza nunku ne binsonji mu muakula …Musuka onso wakadi ne mushinga ku mesu kuandi. Kayi mua kumbuka mu njila wa buneme buandi bua Bu-Nzambi, wakadi udipuekesha ne kanemu ka dinanga kumpala kua muntu yonso wa mu diku dia Nzambi. Mu muntu yonso, wakadi umumona musuka mukuluke wakadiye ne bua kusungila » - Vers Jésus, p. 12

---

3. MOYO WA DIDILEKELA Disatu 30/06

a. M’bujitu kayi bukole buakatuala Musungidi wetu mu moyo wandi ? Yeshaya 53:5-7; Luka 2 :48-49 « Yezu wakadi muambula bujitu bukole bua lupandu lua bantu. Wakadi mumanye bua se anu koku kuikala dishintuluka dinene mu mukenji ne mu majinga bia bantu, tshianana bionso biakadi ne bua kujimina. Kakuakadi muntu ne bua kumanya mushindu kayi wakadi bujitu ebu bushemenena mutshima wandi. Moyo wandi wakadi anu nkayandi. (Biabi biakadi Diulu diakadi bua kuikala nandi pepi nandi !) ku dituku ne dituku, wakadi kumpala kua mateta ne mateyi ; ku dituku ne dituku, wakadi usambakena ne bubi ne wakadi ujadika bukole pa bakadiye ukeba bua kusankisha ne kusungila. Kadi nansha nanku kakatekeshibua mu mikolo.Mu malu onso, Yezu kuenza bua majinga andi ikale mu diunvuangana ne tshipatshila tshia mudimu wandi. Moyo wandi wakadi wa kuanyisha bualu kakenza bualu buakadi kabuyi mu diunvuangana ne disu dia Tatu wandi. Pakadiye utshidi nsonga wa tshitenda, mamu wandi, kumusangana mu Kalasa ka bayishi ba bena Yuda, yeye kumuambila ne:‘Muan’anyi, bua tshinyi wakutuenzela nunku ? Yeye kuandamuna ne diandamuna diandi n’diyi mene dinene dia mudimu wa moyo wandi:‘Bua tshinyi nuakadi nunkeba ? Kanuena bamanye bua se bûndi nabu m’bua kukuata mudimu wa Tatu wanyi anyi ?Moyo wandi wakadi anu wa kudipidia. Wakadi misangu yonso anu mu luendu, kakadi ne muaba nansha umue wa kusomba mu Buloba ebu, wakadi upeta muaba wa kusomba, ne kuikisha wa kudi balunda bakadi bamusuminyina bua yeye kuya kudibo. Bua kutusungila, wakadivuija mupele munkatshi mua bapele, kuikala ne moyo munkatshi mua bena makenga ne mua babedi ; biabi aba bakenzelaye malu mempe a bungi kabakamumanya ne bobo kumupepeja » - Ministètère Evangélique, p. 38 b. Dinanga dia Nzambi didi dituyisha tshinyi bua Tatu wetu wa mu Diulu ? Yone 3 :16 ; 1Yone 4 :9-10 « Kadi mulambu ewu kawakadi mua kujula mu mutshima wa Tatu menji a dinanga bua bantu bakuluke, ne bua kûlongolola bua kusungila bantu. To, to. ‘Nzambi wakatamba kusua ba pa Buloba, Yeye wakabapa Muan’andi umuepele mulela’ (Yone 3 :16). Ke m’bualu bua mulambu bua bubi mufila kudi Muan’andi budi Tatu mutunange, kadi m’bualu bua mutunange, ke yeye kudianjila kulongolola mulambu bua bubi. Yezu Kilisto udi tshilamba padi Tatu muitshikija dinanga diandi didi kadiyi ndekelu pa Buloba bukuluke. ‘Nzambi munda mua Kilisto wakadi ulengeja ba pa Buloba kudiye’ (2Kolinto 5 :19). Wakakenga ne Muan’andi. Mu kanyinganyinga mu Getesemane, ne mu lufu ku Golgotha, m’mutshima wa Dinanga didi kadiyi nshikidilu wakafuta mushinga wa bupikudi buetu. » - Vers Jésus, p. 13

---

4. MUPINGANYI WETU NE TSHIEYA TSHIETU Dinayi 01/07

a. M’pa tshinyi padi lupandu lua misuka yetu ? 1Kolinto 1 :30 ; Bienzedi 16 :31 « Ô, nyota kayi ne dijinga kayi dikole biakadi nabi Kilisto bua kusungila tshiakadi tshijimine ! Mubidi mupopela pa Mutshi Mutshiamakane kawena mumbusha tshintu nansha tshimue Bu-Nzambi buandi, ku bukole buandi bua Bu-Nzambi bua kusungila, ku mulambu wa bantu, bonso badi ne bua kuya kuitabuja buakane buandi. Mu kufua ku Mutshi Mutshiamakane, kutuala dipila dia muntu mushipi wa mikenji mu Muangatshi wa muaba wandi wa mu Diulu, ku ditabuja mu yeye bu Mupikudi wandi nkayandi. Mibi ya Buloba bupile, idi milejibue mu tshinfuanyi tshia ‘mibi mikunze kûnzû’, yakalamatshibua kudi tshieya tshia mu Diulu » - This Days With God, p. 236 b. N’tshinyi tshiakenza Kilisto bua bupikudi buetu tshidi tshitambe kudienzeja konso kua bantu anyi menji onso a bantu ? Yone 10 :17 ; Lomo 5 :6-8 « Dinanga dia Tatu wanyi kunudi didi dinene kutamba, m’mudiye mutambe kunanga bualu bua nakitabuja bua kufila mulambu wa moyo bua kunupikula. Nakulua ne mushinga mutambe kudiye bualu bua nakadivuija tshieya tshienu mu kuteka panshi moyo wanyi ne kuangata mabanza enu kuluawu anyi ne kushipa kuenu kua mikenji, bualu bua ku mulambu wanyi, Nzambi bu mudiye anu mujalame, muakane udi mua kubingisha yonso udi ungitabuja.’Anu Muana wa Nzambi nkayandi nguakadi ne bukokeshi bua kutupikula ; anu yeye nguakadi munda mua Tatu nguakadi mua kumumanyisha ; Anu tshifukibua tshidi tshimanye bule ne ndondo wa dinanga dia Nzambi ngwakadi mua kubibulula patoke. Biakadi anu bikengela mulambu udi kawuyi ndekelu ufidibua kudi Yezu Kilisto bua bualu bua muntu mujimine bua kuleja dinanga dia Tatu kudi bukua bantu bakuluke. » - Vers Jésus, p. 13-14 c. N’tshinyi tshiakamba Yone pa bidi bitangila muakuidi wetu kumpala kua nkuasa wa butumbi wa Nzambi ? 1Yone 1 :1-3 « Kudi bantu bakese batu babala bunene bua bubi ne batu bamona bunene bua dibutuka didi dikeba ku dishipa dia mikenji ya Nzambi. Mu kutangulula kua Tshifufu tshia dikema tshia bupikudi, tshidi tshikeba bua kupingaja muntu mubi ku tshinfuanyi tshimpe tshia Nzambi, tudi tumona ne mushindu umuepele wa bupikudi bua muntu buakadi bukumbana anu mu mulambu wandi, ne ku buimpe ne dinanga bidi kabiyi kufuanyija bia Muana wa Nzambi. Yeye nkayandi nguakadi ne bukole bua kuluangana nvita ne mufuilakanyi munene ne Nzambi ne muntu, ne bu mupinganyi wetu ne tshieya tshietu, yeye kufila bukokeshi ne bukole kudi aba badi balamate kudiye ku ditabuja bua kulua batshimunyi mu dina diandi ne ku malu andi mempe » - Christian Education, p.112

---

5. YEZU MUFUTA MUSHINGA Ditanu 02/07

a. N’tshinyi tshiakenza bua se Kilisto afute mushinga wa bupikudi buetu ? 1Petelo 1 :18-19 ; Ebelu 5 :8-9 « Mushinga mufuta bua bupikudi buetu, mulambu udi kawuyi ndekelu wa kudi Tatu wetu wa mu Diulu mu kufila Muan’andi ku lufu bua bualu buetu, udi ne tshia kutupesha menji a pa mûlu a tshitudi ne bua kulua mu Yezu Kilisto. Tshikondo tshiakitabujilabo Yone, mupostolo mupeshibue menji a kudi Nzambi, bua yeye kubandila bule, ndondo ne butshiama bia dinanga dia Tatu kudi bukua bantu budi buenda bufua, wakûjibue tente ne menji a dikukuila ne a kanemu, kayi mushindu wa yeye kunvuija ne kuamba bunene bua edi dinanga, [udi wambila Buloba bua bobo kumubandila]. …M’mushinga kayi wa dinanga edi dipesha muntu ! Ku dishipa dia mikenji, bana ba Adama kuvuijibua bantu ba Nsatana ; ku ditabuja ku mulambu wa kulengeja nawu bubi wa Kilisto ; badi mua kulua bana ba Nzambi. Mu kuluata kua ngikadilu wa Bu-Muntu, Yezu Kilisto m’mubandisha Bu-Muntu kûlu ; m’muteka muntu mukuluke mu mushindu udiye mu kuyukila nandi, udi mua kuvuijibua mu bulelela mukumbane bua kubikidibua ne, m’muana wa Nzambi.’ » - Vers Jésus, p. 14-15 b. M’meyi kayi adi mupostolo wakula bua kuleja bunene bua dinanga dia Nzambi ? 1Yone 3 :1-2 « Bana ba Mukelenge wa mu Diulu ! Mulayi wa mushinga mukole ! Tshiena bualu tshidi katshiyi kujikija tshia kuelangana kua menji ! Dinanga didi kadiyi bubuedi munda muadi dia Nzambi bua Buloba buakadi kabuyi bumunange ! Dinanga dia mushindu eu didi anu tshilejelu tshia kulonda. N’ditambe dinanga dia mamu bua muana wandi mupambuke. Kubandila kua edi dinanga kudi kutekesha ne kukokesha musuka ne kubueja menji mu bupika bua disua dia Nzambi. Bu mutudi tuenda tuyila ngikadilu wa Nzambi ku munya wa ku Mutshi Mutshiamakane, m’mutudi tuenda tujandula luse ne buimpe, tuenda tumona buimpe mene mene luse lunene lua Nzambi ludi lusangisha popamue ne kulumbulula kujalame ne apu mene m’patudi tujadika bimanyinu bia dinanga ne luse bidi kabiyi ndekelu » - Ibid, p. 15

Makonka a kuambulula dilesona Disambombo 03/07

1. Unvuija bimanyinu bia mushinga mutambe bia ngikadilu wa Nzambi 2. M’mushindu kayi wakaleja Yezu ngikadilu wa Nzambi pakadiye pa Buloba ? 3. M’mushindu kayii wakenza mudimu wa Kilisto mu kusungula kuandi ? 4. M’malesona kayi adi Yezu utuyisha mu kulua Tshieya tshietu ? 5. Unvuija dipa dia ndekelu dia Kilisto bua bualu buetu.