1. MOYO NE MUNYA DIA KUMUDILU 23/08

a. N’tshinyi tshidi ùutshima udi wa mubidi kawuyi mumanye ne bipeta bidi munyi ? Yone 1 :4–5. “Nzambi udi mushimi wa moyo, bumudiye muikale kabidi munya ne disanka dia bufuki bonso. Bidi bia momumue bua se nsesa ya munya idi ifuma ku diba ne kasulu kadi kapueka ku mushimi wa mayi a moyo, mûdi malu mimpe adi apatukila kudiye ne apueka, atangalaka pa bifukibua biandi bionso. Ne muaba onso udi moyo wa Nzambi unyungisha mutshima wa bantu, udi uya kumueneshibua patoke mu bienzedi bia dinanga ne luse.” – Vers Jésus, p.77. b. N’tshinyi tshidi tshiya kumueshibua patoke mu moyo padi dinanga dia Kilisto dikale mu mutshima ? 2Kolinto 2:14–15 ;5:14. “Padi dinanga dia Musungidi dikale dijame mu mutshima, bu mudi mene dipembu disheme, kadiena mua kushala disokoma nansha. Nyuma wa Kilisto munda mua mutshima, didi bu mudi mushimi wa mayi udi usopoka mu tshipela ; udi difila tshiashima kudi bonso badi basemena pepi nawu, ne udi ufila kudi badi pepi ne kunvua dijinga dikole dia kunua mayi ku mushimi wa mayi a moyo.” – Ibid., p.77.“Tulejayi buloba bua se katuena ne buiminyi bua kutangila anu malu adi etu nansha, bua se tudi basue kuabanyangana ne bakuabo masanka etu ne diese dietu. Bamone bua se ntendelelu wetu kena mutuvuija bantu bena tshikisu ne disu dikole nansha. Bonso badi bajadika bua se bakuoeta Kilisto badi mua kuenza mudimu mu mushindu wa kuikala bantu badi ne dikuatshisha bua bakuabo.” – Jésus – Christ, p.136.

---

2. BABANYANGANYI BA NGASA DIBIDI 24/08

a. N’dijinga kayi didi diûle ntente ne pa mishiku patudi bitabuje Yezu bu Musungidi wetu ? Yone 1 :12–13; 1Kolinto 1:4–5; Lomo 5 :1–2 “Badi babanyanganyi ba ngasa ne ba dipa dia mu diulu ne bikale pa buipi bobo biabu bua kudifila konso. Ne benze muabo mua kuenza bua kushiya buloba butambe, kabiyi mushindu wa kupetabo nansha. Menji â adi tshipeta tshidi katshiyi kuepuka tshia kukudimuna kua mutshima wa bushuwa. Anu padiku menji a kuyila bua kumanya tshidi Yezu kudi dijinga dikole dia kuambila bakuabo bua Mulunda wa mushinga mukole ûwakupeta. Bulelela budi busungila ne buvuija tshijila kabuena mua kushala busuika ne bulama mu mutshima nansha. Bituikala baluatshishibua ne buakana bua Yezu Kilisto ne bûjibue ntente ne disanka dia Nyuma wandi, bidi bualu bukole kutudi bua tuetu kupuwa, bua kupanga kuakula. Bituikale balabula ne Mukelenge udi muimpe ne tuikale ne bumue bualu bua kuamba. Bu Filipo, anu patudi tuya kupeta Kilisto, tudi tuya kubikila bantu bakuabo bua balue kudiye.” – Vers Jésus, p.78. b. M’mubelu kayi udibo batubela nawu kudi mupostolo Paulo, tshikondo tshitudi ne bua kupeta ntatu ne bilumbu ? Ebelu 4:16 “Yezu udi mumanye majinga a bana bandi, ne udi ne disanka dia kuteleja milombo yabu. Baye kule ne buloba ne bionso bidi mua kukoka menji abo kule ne Nzambi, bapeta menji bua se badi bikale nkayabo ne Nzambi, ne mesu andi atangila mu ndondo mule wa mitshima ne udi ubala menji adi masuka wela, ne badi mua kuyukila Nandi.” – Le Foyer chrétien, p.287. c. N’tshinyi tshitudi mua kupesha bakuabo, patudi tulua bana ba Nzambi ? Lomo 1:14–15 “M’mu tshinyi muakadi Paulo muena dibanza kudi bena Yuda ne bena Gelika ? Wakadi mupeta mudimu, anu mudiwo mufidibue kudi muyidi yonso wa Kilisto ne:‘Yayi bienu, nuvuije ba bisamba bionso bayidi, nubabatize mu dina dia Tatu, ne mu dia Muana ne mu dia Nyuma Muimpe ; nubayishe mua kuenza malu onso anakunuambila ; ne monayi, ndi n’enu matuku onso tô ne kunshikidilu kua tshikondo etshi.’ Mu kuitabuja Kilisto, Paulo wakitabuja midimu ewu. Kunvua bua se wakadi ne bualu bua kuenza mudimu bua bantu ba bipidi bionso – bua bena Yuda ne bua bantu ba bisamba bia bende, badi balonga mikanda, ne bua badi kabayi bamanyi ba mikanda, bua bakadi ne mianzu ya pa mûlu ne bua bakadi bantu bapuekele.” – The SDA Bible Commentary, vol.6, p.1067.

---

3. DIMUMA DIA KUKUDIMUNA KUA MUTSHIMA DISATU 25/08

a. Bu bikala Nyuma udi munda mua mitshima yetu, n’tshinyi tshikala tshienzedi tshietu tshia kumpala mu bienzedi bia kumudilu ? Yone 1:41–42 “Ne tudienzeje bua kuleja bantu bakuabo milowo ya dilobesha ya Musungidi ne malu malelela adi kâyi amueneka a buloba bulualua. Dijinga dia kulonda njila wa kalonda Yezu ne dikale dinene ne dikole, dijinga dia kutuala badi batunyunguluka bua bobo kubandila ‘Muana wa Mukoko wa Nzambi, udi umusha bubi bua ba pa buloba’ (Yone 1:29).Kudienzeja konso bua bantu netu nekukuluke pa tuetu bu dime dia masanka. Ki bua tshinyi Nzambi m’mutupesha mudimu wa kuenza mu tshifufu tshia lupandu. Kupesha muntu diese dia kuabanyangana ngikadilu wa bunzambi ne yeye biende aye kuleja bantu nende bua bualu ebu. Etshi ke buneme butambe bunene, disanka ditambe bupuangane, bidi Nzambi utupesha. Badi baditua biabo bua kuenza mudimu ewu wa dinanga badi benda basemena mene mene pa buipi ne Mufuki wabo.Nzambi wakadi kupesha banjelo bandi lubila lua kuamba Lumu Luimpe ne mudimu wa kuenza wa dinanga. Wakadi kuangata mishindu mikuabo bua kuenza nayi mudimu bua kukumbaja dipangadika dia bulongolodi buandi bua malu. Kadi, mu dinanga diandi didi kadiyi ndekelu, wakasua bua tuetu kuikala bakuatshishanganyi nandi yeye, ba Yezu Kilisto ne ba banjelo, bua tuikale ne muaba ku mabenesha, disanka ne ku didiunda bia mu Nyuma bidi bifumina ku mudimu ewu wa didilekelela.M’mu kuabanyangana nandi makenga andi kudiye mutupesha mushindu wa tuetu ku munvua, yeye mene Yezu. Tshienzedi tshionso tshia kudipidia bua kuenzela muntu mukuabo bimpe tshidi tshikolesha mu tuetu menji a luse ne tshidi tshitusemeja mene mene pa buipi ne Mupikudi wa buloba, ne bua bualu buetu, ‘Yeye kudienza mupele, yeye wakadi mubanji, bua ku bupele buandi, tuetu tulue babanji’ (2Kolinto 8:9). Ne anu mu mushindu utudi tuandamuna ku tshipatshila tshidi Nzambi muteka mu kutufuka bua moyo ulue kutudi dipa dia kalolo.” – Vers Jésus, p.78. b. N’tshilejelu kayi tshia Kilisto tshidi ne bua kutulombola mu malanda etu ne bena mutumba betu ne bana betu ? Galatia 6:9–10; Yone 9:4. “Binuikala basue kuenza mudimu mu mushindu udi Yezu muindile bua bayidi bawenze ; binuikale basue kukoka misuka kudiye, nenupete dijinga dia kuikala ne bualu bupitshisha budi bua ndondo mule ne bua dimanya dinene dia malu a Nzambi. Nenuikale ne nzala ne nyota ya buakane ; ne nuele lubila kudi Nzambi ; ditabuja dienu ne dikoleshibue ne musuka wenu neuye kunua musangu mule ku mushimi wa lupandu. N’kanana ne mateta binuaya kupeta bua kubitamba ne binusake ku kubala kua Mukanda wa Nzambi ne kutendelela. Ne nudiunde mu ngasa ne mu dimanya dia Yezu Kilito, ne nenupete bualu bupitshisha buimpe butambe.” – Ibid., p.79–80.

---

4. MUDIMU WA DIDILEKELELA DINAYI 26/08

a. Tela njiwu minene idi itufunyina lelu tuetu bu bidimba bia Ekelezia. Malaki 3:8–10 “Lelu ewu, kudi njiwu mitambe bunene idi ba Adventistes, batumikidi ba Nsabatu baya kupeta, idi ya kuvulangana kua mabanji. Bamue badi anu bavudija tunyinganyinga ne midimu yabo ; badi ne menji alubakana ne asama. Bu tshipeta, Nzambi ne majinga a mudimu wandi m’biya kupua moyo mene mene ; bantu aba m’bafue mu Nyuma. M’bilombibue kudibo bua bobo kufila mulambu kudi Nzambi. Biabi, mulambu kawena ne budiwo udiundisha nansha, udi umbusha ne uwosha… Tshitupa tshinene tshia bubanji bua ba membres betu tshidi tshikale tshinyangu bua bonso badi bikale balamateku.” – Conseils à l’économe, p.159. b. M’malu mimpe kayi a buena Kilisto adi abuela mu kudiunda kua bena kuitabuja mu ngasa ne mu dimanya dia Mukelenge Yezu Kilisto ? 1Petelo 4:8–10; Ebelu 13 :2 “Diese dipesha Abalahama ne Lota didi mua kuikala dietu kabidi. Mu kuakidila kua benyi kudi bana ba Nzambi, tuetu kabidi, tudi mua kuakidila banjelo. Lelu ewu kabidi, bifukibua bia mu diulu, bivuala mubidi wa bumuntu, bidi bibuela mu nzubu ya bantu ne badi badia nabu. Bena Kilisto badi bikale ne moyo mu katangila kudi Nzambi ubatuma ku luseke lua kutangila, badi anu bafila kudi banjelo badi kabayi bamueneka, badi mu kumbuka kuabo, bashila baku bakidila mabenesha.” – Témoignages pour l’Eglise, vol.2., p.663–664. c. N’dijinga kayi didi ne bua kuikala kudi bena kuitabuja lelu ? 2Kolinto 10:16 “Bidimba bia ekelezia yetu bidi mua kuenza mudimu udi tô ne katataka batshipatata bua kûbangisha. Kakuena muntu udi mua kusomba mu muaba mupia – mupia anu nanku bua kupetamu bintu bia mu mubidi ewu ; kadi muaba udi umueneka bua kuikala ne moyo, muaba udi meku - dimue anyi abidi – adi mashindame mu bulelela bua kuya kusomba bua kuenza mudimu wa buambi. Tuikale ne dinanga dia misuka, ne tudi mua kudifila bua bualu buayo ne kumona mushindu udibio mua kukumbana mua kubamanyisha bulelela. Kudi mushindu wa kuabanya mikanda mifunda, kuenza bisangilu mu nzubu, ne kubikilamu bena mutumba. Mushindu ewu ke udi kukenkesha kua munya wa biezendi bimpe.” – Témoignages pour l’Eglise, vol.3, p.296.“Musangu mule Nzambi bua Nyuma wa kuenza kua mudimu akuate Ekelezia mujima, ne muntu yonso amone mua kumukuatshila mudimu bilondeshila menji a kuenza bimpe. Tshikondo tshidi bena lulamatu baya kukumbaja mudimu mubapesha, wa pa buipi nansha wa kule, mu diunvuangana ne mudimu wa kuamba kua Lumu Luimpe wakafidibua kudibo, apu buloba bujima ne buikale buambila Lumu Luimpe, ne Mukelenge nealue kabidi pa buloba ne bukole ne butumbi bunene.” – Conquérants pacifiques, p.97.

---

5. BALEJI MPALA BENA LULAMATU DITANU 27/08

a. N’tshinyi tshidi tshindila kudi badi bapeshibue Lumu Luimpe, ne nanga nanga kudi bakuatshi ba mudimu ? 1Kolinto 4 :1–2; Buakabuluibua 2 :10 “Bansentedi badi ku bibumba bia Siyona m’bapesha diese dia kuikala ne moyo udi wa pa buipi mene mene ne Nzambi ne kuikla pepi ne buenzeji bua Nyuma wandi, apu Mukelenge udi mua kuenza bualu kupitshila kudibo ne kupingaja mu njila muakane misuka idi mu njiwu(.). Basungula kudi Nzambi ne batue tshintampi ku mashi a tshipungidi, abdi ne mudimu udi wa kudiabula balume ne bakaji ku dibutuka didi dibafunyina. Bena lulamatu ku mudimu wabo, ne badimuishi ba bantu nabu bua bipeta bibi kabiyi kuepuka bia bubi ne kuakuila mu tshikondo tshiotshi tshimue malu adi a Ekelezia.” – Ministère évangélique, p.11. (.) [Bifunda bua musangu wa kumpala, mudi ne:kudimuisha benji ba malu mabi bua njiwu idi mibalamina ne kubaleja muaba kayi udibo baya kupeta dikubibua]. b. N’tshilejelu kayi tshidi Danyele mupesha bansonga lelu ? Danyele 1:8 “Mukelenge udi musue bua tusunguluja kabidi dilesona dia bualu bupitshisha dia Danyele. Ba bungi badi mua kulua bantu ba bukole, bu bikalabo badi bu nsonga ewu wa bena Ebelu, kueyemena anu Nzambi bua kupeta ngasa wa kuikala batshimunyi, ne kuikala ne bukole ne bakumbane bua kuenza mudimu udi wabo. Danyele wa kaleja kanemu kapuangane bikole ka kunemeka bantu bakole ne bansong. Wakadi bu ntemu, mujadiki wa Nzambi ne wa kadienzeja bua kuikala ne ngikadilu udi kayi wa kukunza kumpala kua diulu diakadi diunvua meyi andi ne kubandila midimu yandi. Tshikondo tshia kenzejabo Danyele bua kudia ku mesa a mukelenge, kakafika munda ne kupeta tshinji, ne kakaleja dipangadika dia kudia ne kunua bu mudi disua diandi nansha. Kayi upatula diyi nansha dimue dia kufuna ne kudiela kayanda, wakambila Nzambi bua bualu ebu. Yeye ne balunda bandi bakakeba lungenyi kudi Mukelenge, ne pakapatukabo mu kutendelelea kuabo kukole kua tshisumi, bakangata dipangadika diabo. Ne dikima dia bushuwa ne kanemu kabuena ka Kilito, Danyele wakalej bualu kudi munene wakadi mupeshibue bujitu buabo, yeye kumulomba bua abapesha bia kudia bipepele. Bansonga aba kunvua bua se mikenji ya ntendelelu yakadi mu njiwu, ne bobo kudilekelela kudi Nzambi, wakadibo banange ne bamukuatshila mudimu.” – Testimonies to Ministers, p.263.

Makonka a kuambulula dilesona DISAMBOMBO 28/08

1. M’bualu kayi bua buloba bua kasaka Nzambi bua kubueja munya mu buloba ? 2. N’dishintuluka kayi dia dikema didi diya kumueneka mu moyo wa bena kuitabuja ? 3. Diandamuna didi ne bua kuikala tshinyi, padi muntu upeta disanka ? 4. Unvuija dishilangana dia kudi yonso wa kutudi mu mushindu udiye mua kukuatshila bakuabo mudimu. 5. M’mushindu kayi udi lulamatu lua Danyele mua kumpesha menji ?