1. DIFUA LUSE NE DITALALA Dia kumudilu 02/08

a. M’mulayi kayi mutambe buimpe ne wa dikema udi wa kufua luse ne wa ditalala udi Nzambi mutuenzele ? Yone 1:9. “Nudi bamone mushindu kayi wakadi moyo we mûjibue ntente ne buiminyi ne bubi. Nudi nuenda nupumuna bua kufuidibua luse ne budikadidi. Kuikala ne moyo bilondeshile tshidi Nzambi musue, n’kuikala bafuanangane nandi:n’tshinyi tshidi kuenza bua kuikala bafuanangane nandi ?Tshidi tshikengela kunudi, n’ditalala, n’difuidibua luse kudi diulu, n’dinanga dia Nzambi mu musuka wenu. Ditalala edi, mfualanga kayena mimanye mua kudisumba, lungenyi kaluena lumanye mua kulombola malu â, menji kaena mamanye mua kufika koku ; kanuena mua kubipeta kashidi ku kudienzeja kuenu. Kadi Nzambi udi unupeshabi bu dipa ‘kanuyi ne argent, kanuyi ne mushinga’ (Yeshaya 55:1). Bidi bienu, binuikala nua kuitabuja bua kolola tshianza bua nuenu kubiangata.” – Vers Jésus, p.49. b. M’mulayi kayi mukuabo ewu udi ne mushinga udi uya kushintulula muntu mujima bua kulua muntu mupia mupia mu diunvuangana ne Nzambi ? Yehezekele 36:26. “Nuakutonda mibi yenu, ne nua kuyilekela ne mutshima wenu onso, nuakuangata dipangadika dia nuenu kudilekelela kudi Nzambi. Katataka, yayi kudiye ne numulombe bua yeye kôwesha mibi neanupesha mutshima mupia mupia, ne pashishe, nuitabuje bua se udi wenza nunku bualu bua yeye wakalaya. N’tshidi Yezu mutulongesha pakadiye panshi aba pa buloba. Dipa didi Nzambi mutulaya, bidi anu bikengela kuitabuja ne tukadi bamane kudiangata, ne didi dietu.” – Ibid., p.49–50.

---

2. KUIKALA NE MOYO MU KILISTO DIBIDI 03/08

a. Yezu udi wambila muntu wakadi ne disama dia mateketa ku Beteseda tshinyi ne n’tshinyi tshitudi mua kuyila ku bualu ebu bupitshisha ? Yone 5:1–9. “Tutanyila bualu bua muntu ewu wakadi ne disama dia mateketa wa ku Beteseda. Mubedi ewu wa lutatu wakadi mulema ; bidimu makumi asatu ne muanda mukulu wakadi anu panshi kayi mua kuenda. Kadi, Yezu kumuambila ne :’Bika, ambula bulalu buebue, endaku’ (Yone 5:1–9). Musame wakadi kuamba ne:‘Mukelenge, bu wewe mua kusua ngondape, ne nentumikile diyi diebe’. Kadi kena muenze nunku nansha, yeye kuitabuja didyi dia Yezu ; kuitabuja bua se wakadi mumane kondapibua ne anu musangu umue ne bualu bukadi buenjibue ; wakdi musue kuenda ne wakenda. Kutumikila Yezu ne Nzambi wakamupesha bukole bua yeye kuenda. Yeye wakondapibua.” – Vers Jésus, p.50.“Yezu kakadi mumulaya dikuatshisha dia ku diulu nansha. Muntu ewu wakadi kuela mpata, ne bu yeye muenze nunku kakadi kondapibua nansha. Kadi yeye kutekemena ne kueyemena diyi dia Kilisto ne yeye kukoleshibua, biabi m’bualu buakadi bumueneka ne m’bukole.“Ditabuja dia momumue didi ditujadikila bua londapu lua mu nyuma. Bubi kututapulula ne moyo wa kudi Nzambi. Misuka yetu idi mitekeshibue ne tuneka. Bidi bia bushuwa bua se muntu ewu mulema, biakadi bualu bukole kudiye bua yey kuenda, bidi bikole kutudi, bua tuetu nkayetu kuikala ne moyo wa tshijila. Badi ba bungi badi badiunvua kabayi bukole ne badi badila bua moyo wa mu nyuma udi upingaja malanda abo ne Nzambi ; badi badienzeja patupu bua bobo kufika ku tshipatshila etshi. Dipanga ditekemena, kubelesha lubila ne :’Ka meme muena majia ! Wansulula ku mubidi wa lufu elu, nganyi ?’ (Lomo 7:24). Misuka eyi idi iluangana mu ditekeshibua dia mu mikolo, idi ne tshia kutangila mu mûlu. Musungidi udi muimane, mutangila bifukibua ebi biakafutshilaye tshieya tshia bupikudi ku mashi andi ne udi ubambila ne dinanga ne luse ludi kaluyi kunvuija ne:‘Udi musue kupeta kabidi bukole bua mubidi anyi ?’ Udi ubatumina diyi bua bobo kujuka ne bukole bua mudibi ne ditalala.” – Jésus Christ, p.184–185. b. N’tshinyi tshidi tshilaya muntu mubi mu Kilisto ? 2 Kulondolola 7:14 ; Hoshea 14:4. “Nudi bantu babi, kanuena bamanye mua kudilengeja ku mibi yenu mienza mu bikondo bipite ; kanuena bamanye mua kushintulula mutshima ne kûvuija wa tshijila. Kadi Nzambi udi ulaya bua kuenza bionso ebi bua bualu buenu mu Yezu Kilisto. Nudi nuitabuja mulayi ewu. Nudi nutonda mibi yenu ne nudi nudifila kudi Nzambi. Nudi basue kumukuatshila mudimu. Panudi nuenza nunku bushuwa, Nzambi udi uya kukumbaja diyi diandi kunudi. Binuitabuje mulayi wandi ne mibi yenu kufuidibua luse ne nuenu kulengejibua, Nzambi udi ushintulula ditabuja dienu dilua bualu bulelela. Nudi bondapibua anu bu mua kondapibua muntu wakadi ne tuneke, wakapeshibua bukole kudi Yezu bua yeye kuenda anu tshikondo tshiakitabujeye ne wakondapibua. Bualu budi buenzeka, anu panudi nuitabuja.Kanuindidi bua kunvua ne nukadi bondopibua anyi, kadi ambayi ne:‘Ndi muitabuje bua se bualu bukadi buenzeke, ke m’bua ne n’di munvue bidi nanku, kadi m’bualu bua se Nzambi n’gudi muambe’.” – Vers Jésus, p.50–51.

---

3. MUITABUJIBUE MU DINANGA DIA NZAMBI DISATU 04/08

a. Padi muntu witabuja Yezu bu Musungidi, n’tshinyi tshidi tshienzeka ne mibi yandi mienza ya mu bikondo bishale ? Lomo 3 :24–25 ; 5 :1,9–10. “Tshionso tshinualomba Nzambi mu kutendelela, ne nutshiangate, binuikala bitabuje ne, tuakumana kutshiangata (Mâko 11:24). Kadi bualu bua kukumbaja budi bulamakaja ku mulayi ewu:kulomba kuetu kudi ne tshia kuikala bilondeshile mudi disua dia Nzambi. Biabi, n’disua dia Nzambi bua yeye kutulengeja ku bubi bonso, ne yeye kutuvuija bana bandi, ne bua yeye kuenza bua tuikala ne moyo wa tshijila. Tudi mua kulomba nunku ngansa wandi, kuitabuja bua se tukadi bamuangate ne kusakidila Nzambi bua se yeye wakutupeshayi. Udi anu musue bua tuetu kuya kudi Yezu ne tuetu tulengejibue ne bua tuetu kuimana kumpala kua mikenji yandi kakuyi tshibuejakaji anyi kanyinganyinga.” – Vers Jésus, p.51. b. M’muaba kayi udi wa muena kuitabuja kumpala kua Nzambi ? Lomo 8 :1 “Nansha mudi moyo wa muena kuitabuja mua kuikala wa kudipuekesha, kadi kawena mua kuikala wa kanyinganyinga ne wa kuseka, ne kujana nansha. Muntu yonso udi ne mushindu wa kuikala ne moyo udi muanyisha ne musankisha kudi Nzambi. Ke n’disua dia Tatu wetu bua tuetu kuikala anu ne bujitu bua dipishibua dia midima. Mu kuikala anu ne mutu ne menji bitangija anu ku bumeme ke tshimanyinu tshia kudipuekesha nansha. Tudi ne tshia kuya kudi Yezu ne kuikala balengejibue kudiye ; ne apu tudi mua kudileja kumpala kua mikenji yandi katuyi ne bundu nansha dibungama.” – La Tragédie des siècles, p.518.“Bituikale tua kudifila kudi Nzambi mene mene, ne ditabuja dionso, mashi a Kilisto adi atulengeja ku bubi bonso. Kondo ka moyo kadi ne budishikaminyi. Muntu yonso udi mua kuvuijibua mupuangane mu Yezu Kilisto, ku ditabuja mu mashi andi… Katuena ne bualu bua kudiebeja ne n’tshinyi tshidi Nzambi anyi Kilisto bela menji bua bualu buetu, kadi bua tshinyi tshidi Nzambi wela menji bua Kilisto, yeye udi Muangatshi wa muaba wetu. Nudi bitabujibue mu dinanga dia Nzambi.” – Messages choisis, vol.2, p.37. c. N’dishintuluka kayi didi ne bua kuikala nadi bonso badi batue tshipungu ne Nzambi ? 1Petelo 1 :18–19; 1Kolinto 6 :19–20 ; Galatia 3 :26. “Anu tshikondo mene atshi tshidi ndondo mutue, kanuena benu kabidi ; nuakapikudibua ku mushinga munene. [1Petelo 1:18–19] Anu ku tshienzedi etshi tshipepele tshia ditabuja, Nyuma Muimpe wa kunulela mu moyo mupia mupia. Nudi katataka bena mu diku dia Nzambi, ne Nzambi m’mununange bumudiye munange Muana wandi.” – Vers Jésus, p.51.

---

4. KUENDA NE KILISTO DINAYI 05/08

a. Luendu lua muena kuitabuja ludi mua kuikala lua mushindu kayi ? Kolosai 2 :6 “Katataka ewu undi badifile kudi Yezu, kanupinganyi junyima nansha, kanudiapuki mu diboko diandi nansha. Ku dituku ne dituku nuamba bienu ne:‘Ndi kudi Kilisto, nakadifila kudiye’ ; ne mulombayi Nyuma wandi Muimpe ne ngasa wandi bua yeye kunulama. M’mu kudifila kudi Nzambi ne mu kumuitabuja ke munudi bana bandi ; m’mushindu wa momumue unudi ne bua kuikala ne moyo munda Muandi.Mupostolo udi wamba ne:‘Bu munuakitabuja Kilisto Yezu Mukelenge, nuikale nuende mu Kilisto’ (Kolosai 2:6).Bamue bantu badi bela menji ne bakadi kupitshila mu diteta ne kuleja Mukelenge ne badi bashintuluke diambedi ne bobo kuamba ne badi ne ngasa wandi. Kadi badi mua kuamba bua ngasa ewu anu mu tshikondo atshi. Bidi bikengela bua bikala ne ngasa ewu, bikala ne Nyuma wa Kilisto bua abakuatshishe mu mateketa abo ; patupu kabena mua kukandamana kumpala kua bubi. Yezu udi musue kutumona tulua kudiye mu mushindu utudi tuikala, benji ba malu mabi, katuyi bukole, ne dieyemena dionso kudiye. Tudi mua kuya kudiye ne kudiela ku makasa andi ne mateketa etu, kupambuka kuetu, ne mibi yetu. Udi ufila butumbi buandi kutudi mu kutûja ntente ne dinanga diandi, kutusukula mputa yetu ne kutulengeja ku bukoya bonso.” – Vers Jésus, p.52. b. N’luidi kayi ludi lulongolola bikalaku kudi bilema bienza munkatshi mua kuyila ? 1Yone 2:1–2 “Tekayi ku luseke menji adi kâyi makane adi ne milayi ya Nzambi kayena inutangila. Milayi idi mikale bua muntu yonso muenji wa mibi udi unyingalala bua mibi. Ku mudimu wa banjelo, bukole ne ngasa bidi bia Yezu Kilisto udi ubipesha muena kuitabuja yonso. Kakuena muenji wa mibi ushala kayi upeta bukole, butoke, ne buakane mu ewu wakafua bua bualu buetu. Yezu kena unjinga tshintu anu kutumbusha kua bilamba bietu bidi biatuke ne manyanu a bubi, ne kutuluatshisha mayeka matoke a buakane. Udi utusengelela bua tuetu kuikala ne moyo pa mutu pa tuetu kufua.” – Ibid., p.52–53. c. Unvuija mushindu kayi utudi bakoleshibue munkatshi mua luendu. 1Yone 1 :7 ;Galatia 5:16–17,25 “Nansha mudiku makenga a bungi, badi benda mu nila wa lungenyi badi ne disanka dia bungi, bualu bua udi munange misuka yabo udi pepi nanbu, wenda nanbo kayi umueka ku mesu. Bikala ku luseke kupulumuka, badi baya kujandula bimpe mene mene dikuatshisha dia dikalanganaku diandi. Ku tshidia tshionso tshia kuya kumpala, nsese ya butumbi bua Udi kayi Umueneka idi ilenka bikole mu njila wabo, ne misambu yabo ya kutumbisha idi anu ibanda mûlu bikole bua kubuelakana ne misambu ya banjelo badi bimane kumpal kua nkausa wa butumbi.” – Heureux ceux qui, p.130.

---

5. DINANGA DIA BUPIKUDI DIA TATU DITANU 06/08

a. M’malu kayi adi kukumbaja bua kuanyishibua kudi Nzambi ? Yeshaya 55 :7; 44 :22 “Nzambi kena wenza netu bu mushindu utu bantu bafuafua benzelangana kudi bamue ne bakuabo nansha. Menji andi adi menji a luse lujalame, a dinanga ne luse.” – Vers Jésus, p.53.“Musuka onso, udi ujadika ne umanya bilema biandi ne upeta dijinga dia yeye kutonda mapanga andi mu kudipuekesha, bu mua kenza Davidi, mutuishibue bua se imue misangu mu kuenza nunku kudi ditekemena kudi musuka. Muntu onso udi wakidila milayi ya Nzambi ne ditabuja neafuidibue luse. Mukelenge kena wipata kashidi musuka udi unyingalala mu bushuwa bua bubi.” – Patriarches et prophètes, p. 703–704 ne Patriarchs and prophets, p.726. b. Ngikadilu kayi mulelela wa Tatu wetu wa mu diulu bua bonso bakapambuka ? Yehezekele 18 :32 ;Luka 15 :18–20 “Nsatana udi anu musombe mubawula matshi bua kutusokoka milayi eyi ya mushinga mutambe ya Nzambi. Udi musue kutunyenga dinkenka dionso dia ditekemena ne nsesa yonso ya munya. Kadi kabiena bikengela kutuma ne ntema ne kunaya dinaya diende. Ka m’bimpe kuteleja mutetshi nansha. Muambilayi ne:‘Yezu kufua bua kumpesha moyo. M’munange ne kena musue bua meme kufua.’… Lusumuinu ludi lunuambila mushindu kayi wikale muana mujimine ne bua bobo kumuakidila:[Luka 15:18–20].Kadi lusumuinu elu nkayalu, ludi lulenga ku moyo, kaluena tshimue, ekelu tshikumbane tshia luse ludi kaluyi ndekelu lua Tatu wa mu diulu. Nzambi udi wamba meyi â kupitshila mukana mua muprofete wandi ne:‘Nakukunanga ne dinanga dia tshiendelele ; nunku nakunanukila kukuleja luse lujalame’ (Yelemiya 31:3). Nansha mudi muana muye kule ne nzubu wa tatu, muya kunyangakaja bintu biandi mu ditunga dia benyi, mutshima wa Tatu udi anu upumuna bua bualu buandi ; ne dijinga dionso didi dijuka mu musuka wa muena dikenga ne didi dimusaka bua kuya kudi Nzambi didi anu kulumbulula kua ne misengelelu kua Nyuma Muimpe udi muikale anu umulomba, umusengelela, umukoka kudi Tatu.” – Vers Jésus, p.53–54.

Makonka a kuambulula dilesona DISAMBOMBO 07/08

1. N’tshinyi tshidi tshibuela mu musuka udi mibi mifua luse ? 2. Bua tshinyi muena kaneke wa ku Beteseda wakapeta bukole bua kuenda musangu umue ? 3. M’mulayi kayi udi wetu anu tshikondo tshitudi tuitabuja Kilisto bu Musungidi wetu ? 4. M’bualu kayi busokoka bua kuenda luendu lua butshimunyi ne Kilisto ? 5. Unvuija dishilangana didi pankatshi pa mutshima mubi wa Nsatana ne dinanga dia bupikudi dia Tatu.