KUDIUNDA MU YEZU KILISTO “Bua kusamba badi badila mu Siona, bua kubapa nkata mulengele bua kubueja ku mutu mu muaba wa butue, mafuta a disanka mu muamba wa madilu, tshivualu tshia butumbi mu muaba wa mutshima muneme bujitu ; bua babikidibue ne, mitshi ya Telebinta ya buakane, ditentula dia Yehowa, bua yeye atumbishibue.” (Yeshaya 61:3).
Bia kubala:
Vers Jésus, shapita 8, p.67–75.
“Bua kuikala ne moyo wa tshijila, nudi ne bua kueyemena mene mene dYezu Kilisto bu mudi ditamba dikuata ku mutshi munene bua kudiunda ne kukuama mamuma.” – Vers Jésus, p.69.
1. NSAPI YA KUDIUNDA DIA KUMUDILU 16/08
a. M’mushindu kayi udi Mufundu ufila mufuanu wa kudiunda kua moyo wa muena Kilisto ? Yeshaya 61:3; 1Petelo 2:2; Efeso 4:14–15; Mâko 4 :26–27.“Lungenyi lonso ne dimanya dia muntu kabiena ne bukole bua kufuka moyo nansha. Anu moyo wa ku moyo n’kayawu kudi Mufuki ubapesha, ke kudi bikunyibua ne nyama bikalaku. Bidi bia momumue kabidi, bua se anu ku Nyuma wa Nzambi nkayandi n’kudi moyo mupia – mupia uledibua mu mutshima wa bantu.” – Vers Jésus, p.67.b. M’mushindu kayi udi kuleja dieyemena dietu kudi Kilisto bua kudiunda kuetu kudi kua buena Kilisto ? Hoshea 14 :5–7; 1Kolinto 3:6–7“Ku dipa didi kadiyi kuamba dia Muana wandi, Nzambi munyungulula buloba bujima ne kapepa ka ngasa kadi ka bulelela bu mudi lupepela ludi lunyunguluka ku dibulunga dieut dia buloba. Bonso badi basue kupuyakana ne kapepa aka ka moyo ne bikale ne moyo ne nediunde tô ne ku tshipidi tshia balume ne bakaji mu Yezu Kilisto.Bia momumue ne tshilongo tshidi tshitangila ku diba, didi nsesa yadi mikale ijadika bua diakanangane ne bupuangane. Tudi ne tshia tuetu kabidi kutangila ku Diba dia buakane didi munya wa mu diulu udi uya kutema kutudi ne kushintulula ngikadilu yetu ifuanangane ne ngikadilu wa Yezu Kilisto.” – Ibid., p.68.
2. DIPANGA DIETU BUKOLE DIBIDI 17/08
a. M’bualu kayi budi Mukelenge wetu muambila bayidi bandi bua mushinga diambedi ne yeye kujikija mudimu wandi pa buloba ? Yone 15 :4–7“Bantu ba bungi badi baya kuela bua menji bua se bakukumbaja tshiabo tshitupa tshia mudimu ewu. Bakadi ne ditekemena ne kueyemena mu Yezu Kilisto bua difuidibua dia luse bua mibi yabo ; kadi pashishe, badi basue kuenza bimpe ku makole adi abo nkayabo. Kuenza konso kua buena eku kudi kufikisha ku dipanga kukumbaja. Yezu udi wamba ne :’Kanuyi nanyi kanuena mua kuenza bualu’. Diunda dietu mu ngasa, disanka dietu, dikalanganaku dietu ne mushinga, bionso bidi bienzeka anu mu bobumue buetu ne Musungidi. M’mu kuikala nandi mun bobumue ku dituku ne dituku ne ku diba dionso, m’mu kuikala munda muandi ke mutudi mua kudiunda mu ngasa. Ke anu udi ujula ditabuja dietu, kadi udi udifikisha ku bupuangane. Yezu udi wa Kumpala ne Wa ndekelu, udi anu nunku, mu bionso ne muaba onso. Udi ne bua kuikala netu, ke anu ku mbangilu ne ku ndekelu kua luendu luetu nansha, kadi ku tshidia tshionso mu njila.” – Vers Jésus, p.69.“Binuikala pa buipi bua kuyila lutulu ne kudipuekesha bia mu mutshima mu kalasa ka Kilisto, neanupesha mu bushuwa dikidha ne ditalala. N’nvita mikole ya kubenga disua didi dia muntu nkayandi ne njila idi yandi. Kadi, padi anu dilesona edi diyila nudi nuya kupeta dikisha ne ditalala. Budisu, buiminyi ne dilumba dia malu bidi ne bua kuikala bitantamena ; disua dienu didi ne bua kuikala dimina mu disua dia Kilisto. Moyo onso udi ulua wa kudifila wa dinanga dikole, tshienzedi tshionso tshilejibue patoke, ne didyi dionso didi dimueneshibua dia dinanga. Bu mudi moyo wa monji wa tumuma tua nviyo unyunguluka mu mukolo wa mutshi ne mu kasumbu ka tumuma, ne upueka mu tumponji tudi kuishi ne ufika ne ku dibeji didi kûlu kule, bidi nunku bua ngasa ne dinanga bia Kilisto bidi biya kôsha ne biûla ntente mu musuka, mu kutuma kua malu mimpe mu tshitupa tshionso tshia bumuntu ne kubuela mu mudimu onso wa mubidi ne wa Nyuma.” – The SDA Bible Commentary, vol.5, p.1091–1092.b. M’bualu kayi busokoka bua kudiunda mu Kilisto ? Kolosai 2 :6; Ebelu 10:38“Nuakadifila kudi Nzambi bua nuenu ku mukuatshila mudimu ne nuenu ku mutumikila, nuenu kuangata Yezu bua yeye kuikala Musungidi wenu. Nuakadi nkayenu kulengeja mibi yenu, nansha kushintulula mitshima yenu ; kadi nuenu badifile kudi Nzambi, nuenu kuitabuja bua se wa kenza bionso bua bualu buenu ku dinanga dia Kilisto. N’ku ditabuja kunudi bavuijibue bantu ba Kilisto ; n’ku ditabuja kabidi kunudi ne bua kudiunda mu yeye, mu kufila ne mu kuangata. Nudi ne bua kufila bionso:mutshima wenu, disua dienu, mudimu wenu bua nuenu kutumikila tshionso tshidiye ulomba ; ne nudi ne bua kuangata bionso:Yezu Kilisto, tshiuwidi tshia mansaka onso, bukole buenu, buakane buenu, dikuatshisha dienu dia tshiendelele, bua nuenu kumona mua kutumikila.” – Vers Jésus, p. 69, 70.
3. DIJIDIBUA KU DITUKU NE DITUKU DISATU 18/08
a. M’bualu kayi bua kumpala budi bana ba Nzambi ne bua kuenza ku mbangilu kua dituku dionso ? Misambu 5 :3 anyi 4.“Difilayi kudi Nzambi ne dinda ; etshi tshikale bualu buenu bua kumpala. Mutendelelu wenu udi ne tshia kuikala ne:‘Nzambi ngangata meme bu tshintu tshiebe nkayebe. Malun anyi onso ku makasa ebe. Kuata nanyi midimu lelu, ngikale ku mudimu webe. Ikale munda muanyi, ne bionso bîndi mua kuenza m’bienza mu wewe’. Ebu m’bualu budi bua ku dituku ne ku dituku. Filayi kudiye matshinkila enu onso, yeye udi ukumbaja bilondeshile mushindu udiye uya kunuleja. Mu kudifila kudi Nzambi dituku dionso, moyo wenu ne wikale mutambe kuikala mupeya ne musonga bu mudi moyo wa Yezu Kilisto.” – Vers Jésus, p.70.b. N’dibikila kayi didi Kilisto utubikila nadi dituku dionso ? Matayo 11:28–29“Moyo mu Kilito udi ulejibua mu ditekemena dia ditalala ne didi dishala kashidi. Imue misangu kumbusha dikatshila, moyo ewu udi mûle ntente ne ditalala. Ditekemena dienu kadiena mu nuenu nkayenu nansha, kadi didi mu Yezu Kilisto. Butekete buenu budi busangisha ku bukole buandi, dipanga dienu kumanya didi disangisha ku dimanya ne lungenyi biandi, tshifuafua tshienu ku bukole buandi. Kanu ditangidi nkayenu ; kanutangidi bumuntu buenu bunudi nuikala, kadi tangilayi kudi Musungidi. Menji enu imanyina pa dinanga diandi, pa buimpe buandi ne bupuangana buandi bua ngikadilu wandi. Yezu mu kudipidia kuandi, Yezu mu butoke buandi ne tshijila tshiandi, Yezu mu dinanga diandi didi kadiyi kufuanyikija:Etshi ki tshiena bualu tshidi ne bua kuikala kuelela menji. M’mu kunanga kua Kilisto, mu ku muidikija, mu kumueyemena mene mene ke munudi ne bua kushintuluka ne ku mufuana.” – Ibid., p.70–71.c. Nsapi kayi idi kupeta nayi ditalala ? Yeshaya 26 :3–4 ;30:15“Kukuata Kilisto ku meyi, kumupesha bulami bua musuka wandi, kuteka moyo wandi mu bulongame bua disua diandi, n’kupeta kua ditalala ne kuikala kua ku matshi kutalala. Kakuena tshidi mua kubungamija mu buloba, ewu udi Yezu usanka bua dikalanganaku diandi. Dikokela dipuangane didi dijadika bua dikisha dipuangane…. Mioyo yetu idi mua kufuangana ne muluki wa buanda udi muikale mu bukondakaja ; bituikale tuakufila bumuntu buetu kudi Mukelenge wa mudimu neapatulamu moyo ne ngikadilu bidi tshilejelu bidi bua butumbi buandi…Patudi anu tubuela mu dikisha dia Yezu, diulu didi dibangisha anu pa buloba apa. Udi utubikila:Luayi, nuyila kûndi ; tudi tuandamuna ne, tuyayi kudiye, ne buetu tuetu moyo wa tshiendelele wa kubangisha.” – Jésus – Christ, p.323.
a. N’tshipeta kayi padi menji mikale anu matangija kudi Yezu pa mutu pa kuikala matangija pa bumeme ? 2Kolinto 3 :18“Ne tuikale bakoleshibue mu kuikala anu batangila kudi Yezu ne mesu a ditabuja. Nzambi kufila mabuludibua andi a mushinga mutambe kudi bantu bandi badi ne nzala ne nyota ya bulelela. Kilisto neikale mujadika bu Musungidi wa muntu pa nkayandi. Ewu udi uya kudishibua ne diyi diandi neaye kumona bua se didi Nyuma ne moyo. Diyi didi diya kujimija ngikadilu udi wa mubidi ne didi difila moyo mupia – mupia mu Kilisto Yezu. Nyuma Muimpe udi ulua kukankamija musuka wetu. Ku tshienzedi tshidi tshishintulula tshia ngasa wandi, tshinfuanyi tshia Nzambi tshidi tshimueneshibua mu muyidi wandi, udi ulua tshifukibua tshipia tshipia. Dinanga didi diangata muaba wa lukinu, mutshima udi mupeya nunku bua kufuanangana ne wa Nzambi.” – Jésus – Christ, p.382.“Padi menji enu imanyina pa ‘bumeme’, adi umbuka kudi Yezu, mushimi wa bukole bonso ne wa moyo wonso. Apu mene ke muaba udi kudiznzeja kukole kua Nsatana kuikalapu bua kutshingulula mesu bua wowo kumbuka kudi Musungidi ne kupumbisha nunku kuyukila kuandi ne bobumue. Udi uya kudienzeja bua yeye kunubueja mu lunyengu bua nuenu kutangila masanka a pa buloba, bua nuenu kutangila ntatu ne tunyinganyinga bia moyo, kutangila bilema bia bantu bakuabo, anyi ku bilema mene bidi bienu, ne dipanga bupuangana. Kanu dilekedi bua kukuluka mu mateyi andi. Bantu ba bungi, badi mu bulelela ne dijinga dia kuikala ne moyo bua Nzambi, misangu ya bungi batu balombodibua kudi muena lukuna bua bobo kuimanyina pa bilema biabo ne mateketa ; mu kubatapulula ne Kilisto nunku, udi utekemena bua kutshimuna. Katuikadi ne ‘bumeme’ mu menji etu bu tshintu tshidi ne muaba munene ne kudilekelela bua kuikala ne ditshina bua bidi bitangila lupandu luetu. Bionso ebi bidi bitumbusha ku mushimi wa bukole buetu. Peshayi Nzambi bulami bua musuka wenu ne tekayi ditekemena dienu mu yeye. Ambilayi Yezu ; etshi tshikala tshiena bualu tshia kuelangana kuenu kua menji ; ne bumeme bujimina mu yeye.” – Vers Jésus, p.71.b. N’tshinyi tshitudi mua kuyila bua dishintuluka didi dienzeka mu bayidi kunyima kua bobo bamane kufila Kilisto mu mudimu wandi wa buambi wa ku dituku ne dituku ? Bienzedi 4:13“Mu kubandila anu Yezu, ‘tudi tuandamuka mu tshinfuanyikiji tshiotshimue ku butumbi ne ku butumbi ; bu mudi kudi Mukelenge Nyuma’ (2Kolinto 3:18). Ki mushindu ewu wakafika bayidi ba diambedi ku difuanangana ne Musungidi. Pakunvuabo meyi andi, kupetabo dijinga diandi. Kumukebabo, kumutetabo ne bobo ku mulonda. Bakikala nandi mu nzubu, ku mesa, mu nzbu wa pa nkayabo, mu madimi, bu balongi ne mulongeshi wabo, ku dituku ne dituku bakadi bapeta malu malelela akadi apatuka mukana muandi. Bu bena mudimu, bakadi bindila anu diyi dia bobo kuenza mudimu. Bayidi bakadi bantu ba ‘mutshima muomumue n’etu’ (Yakobo 5:17). Bu tuetu, bakaluanga nvita ne bubi ne bakadi dijinga ne ngasa wa Nzambi bua kulonda njila wa tshijila.” – Ibid., p.72.
5. MULAYI UDI WETU DITANU 20/08
a. M’mulayi kayi mutambe buimpe wakashila Yezu bayidi bandi badi kumpala kua kufuna kua buloba budi ne nvita ? Matayo 28:20“Kunyima kua dibanda dia Kilisto mu diulu, bayidi bandi bakadi anu balame mu menji a dikalanganaku diandi. Dikalanganaku diandi dia dinanga divule ne dia munya. Mukelenge wa ditalala wakadi wenda nabu, uyukila ne utendelela nabu, wakadi wakuila mitshima yabo meyi a busambi nea ditekemena, yeye kumbushibua munkatshi muabo bua kuya mu diulu. Pakatshidi lubila luandi lua ditalala mukana muandi ne diyi diandi dikuma ku matshi abo ne:‘Monayi, ndi n’enu matuku onso tô ne, ku nshikidilu kua tshikondo etshi (Matayo 28:20), wakambuibua mu ditutu dia banjelo.” – Vers Jésus, p.73.b. N’dilongesha kayi diakapesha Yezu kudi bayidi bandi bua bobo kumanya tshidi kuenza padiku dinjinga ? Yone 16 :23–24;14:16–18“Pakadibo badisangisha kunyima kua kubanda kuandi mu diulu, bakadi ne ditekemena dia kusasakana bua kuleja majinga abo kudi Tatu mu dina dia Muana… mu kuvudija kua ditabuja, bakadi bela lubila ne:‘Kilisto Yezu mene wakafua, E, bulelela, wakabishibua ku lufu, udi ku tshianza tshikole tshia Nzambi, udi utuakuila kabidi !’ (Lomo 8 :34). Dituku dia Pentekoste, bakapeta Musambi wakadi Yezu mubambile ne:‘neikale nenu’, kukumbaja ne:‘Meme muye mbimpe bienu ; bingikala tshiyi nya, Musambi kena ulua kunudi ; kadi binaya, nenutumineye’ (Yone 14:17 ; 16:7). Mu tshikondo etshi, Yezu wakadi ne bua kusomba bua kashidi mu Nyuma wandi mu mitshima ya bayidi bandi. Bobumue buabo nandi buakadi bua pa moyo kutamba mene tshikondo tshiakadiye munkatshi muabo. Munya, dinanga ne bukole bia Yezu biakadi biya kubashintulula, ne bakadi babamona, bakadi bakema, ne bakadi babamanya bua se ‘bakadi ne Yezu’ (Bienzedi 4:13).” – Ibid., p.74.
Makonka a kuambulula dilesona DISAMBOMBO 21/08
1. Bituikala tudiunda bu mudi bikunyibua, bua tshinyi tudi dijinga ne dikuatshisha dia Diulu ?2. Bu mudi bikunyibua dijinga dia kubinyamina mayi bua biobi kudiunda, tuetu tudi dijinga ne tshinyi bua kudiunda mu Nyuma ?3. Bua tshinyi dijidibua dia ku dituku ne dituku didi ne mushinga bua yonso wa kutudi ?4. Bua tshinyi Nzambi udi musue bua tuetu kuteka ku luseke bumeme ne tuetu kuikala anu tuela menji kudi Yezu ?5. M’mulayi kayi udi ne tshia kuikala bualu bulelela bua ku dituku ne dituku mu moyo wa muena kuitabuja yonso ?