1. NZAMBI UDI UDILEJA PATOKE DIA KUMUDILU 30/08

a. N’ku bintu kayi bia mu buloba ebu kudi Yehowa ukeba bua kukoka bantu kudiye ? Misambu 19:1–6 anyi 7; Nsumuinu 2:1–5 “Mishindu idi ya bungi idi Nzambi wenza nayi bua yeye kudileja patoke kutudi ne kutubueja mu bobumue buandi. Bufuki butu anu buakula ne biummvuilu bietu. Mitshima idi ilengibua kudi dinanga ne butumbi bia Nzambi bidi bimueneshibua patoke mu midimu ya bianza biandi. Ditshi didi ne ntema didi diunvua ne diteleja diyi dia Nzambi mu bufuki. Mpata idi ne bisonsa, mitshi minene, mudibu ne bilongo, matutu adi endakana, nvula, kunungana kua misulu ya mayi, bualabala bua diulu, bionso bidi biakula ne mitshima yetu ne bidi bitubikila bua tuetu kumanyangana ne ewu wakafuka bintu bionso.” – Le Meilleur Chemin, p.83. b. N’tshinyi tshiakakuata natshi Yezu mudimu bua kushindamija bulelela mu menji a bamuteleji bandi ? Matayo 13:3, 34 “Musungidi wetu, kutuangaja malongesha andi a mushinga ne bintu bia mu bufuki. Mitshi, nyunyu, bilongo bia mu mpata, mikuna, majiba a mayi, bufikuluke bua diulu, ne kabidi malu adi enzeka a ku dituku ne dituku a mu moyo, Mukelenge kuangata bua yeye kutulongesha bulelela ne kutunvuija mene mene mayisha andi, ne mene munkatshi mua ntatu ya moyo.Nzambi udi musue bua bana bandi banyishe midimu yandi ne bikale ne disanka bua buimpe kumona bua bintu bidibo batangila ne bia lubatshi, bia kusankaye bua kulengeja nabi muaba wetu wa kuikala pa buloba.” – Ibid.,

---

2. BUFUKI BUA NZAMBI DIBIDI 31/08

a. N’dilesona kayi ditudi mua kupeta ku bufuki, bilongo, nyunyu ne mitoto ya mu diulu bu tshilejelu ? Lomo 1 :20; Bienzedi 14 :17 “Kulonga kua mamanya a kujadika, koko kabidi, kudi dibuludibua dia Nzambi. Dimanya dionso dilelela didi anu diunvuija dia mikenji mifunda kudi munu wa Nzambi pa bintu bidi bimueneka ne mesu. Ku dikebulula diandi, dimanya didi anu dipatula majadika mapia mapia a lungenyi ne bukole bia Nzambi. Mukanda wa mu bufuki wowo mûnvua bimpe ne Mifundu ya tshijila bidi bienda popamue bua kutunvuija mikenji ya menji ya buimpe, bidi Nzambi ukuata nabi mudimu.” – Patriarches et prophètes, p.586 (V&S).“Bua anu kukangula kuetu kua mesu, midimu ya Nzambi neiye kutupesha malesona a mushinga a kutumikila ne kueyenema. Kubangila ku mitoto, idi yenda ilonda ku bidimu nkama ne nkama mu tshibuashibuashi tshidi katshiyi ndekelu, njila udi kayi umueneka, tô ne ku kapuishipuishi kadi kakayi kamona na kunvua, bufuki budi butumikila disua dia Mufiki. Ne Nzambi udi mutabalela ne ukuba bionso biakafukaye.” – Le Meilleur Chemin, p.83. b. Patudi tutangila buimpe kumona ne ditalala bia bufuki budi bujima kabuyi bulenga, n’tshinyi tshitudi ne bua kulama mu menji pa bidi bitangila Buloba bupia bupia bulaya ? 1Kolinto 2:9; Buakabuluibua 21:1 “Elanganayi menji bua muaba wa kuikala wa basungudibe ne numanye bua se newikale muaba wa pa mûlu kawuyi ndekelu ku bionso bidi menji enu mua kufuanyikija, muaba udi muimpe be kumona. Bukenke bua bufuki budi anu bukese bua kuleja butumbi bua mua ewu.”- Ibid., p.84.“Ekelezia wakadi bulongolodi bua tshiendelele bua Mutambe bunene wa mu diulu. Wakadi mulongolole munkatshi mua ntatu ya mu buloba ebu butshimunyi bulualua, ne pad invita ijika, bapikudibue ne baya kusomba mu buloba bulaya. Bikena kumona bia butumbi bulualua, bulengeja kudi tshianza tshia Nzambi, bidi ne tshia kuikala bia mushinga kudi Ekelezia wandi lelu.” – Prophètes et rois, p.547.“Mu Mifundu, bupianyi bua basungula budi bubikidibue ne musoko wabu. Mulami wa mikoko wa mu diulu udimu ulombola tshisumbu tshiandi tshia mikoko ku mishimi ya mayi a moyo. Mutshi wa moyo udimu ukuama mamuma awo ku ngondo yonso, ne mabeji a mutshi ewu adi makuata nawu mudimu kudi bisamba. Misulu ya mayi idi kayiyi yuma ya mayi matoke bu mudi ntalatala m’minyungulula mitshi ya mabeji a bungi idi ituma diledi mu njila idi milongoluela bapikudibue ba Yehowa. Bibandabanda binene bidi ne mikuna mijuke kûlu ya Nzambi. M’mu bibandabanda emu bia ditalala ne ku muelelu kua misulu eyi ya mayi a moyo m’mudi bantu ba Nzambi, bakadi musangu mule benyi ne bena luendu baya kupeta nunku muaba wa kushikama, nzubu mene.” – La Tragédie des siècles, p.733.

---

3. BUMANYISHI BUA BULONGOLODI BUA NZAMBI DISATU 01/09

a. M’malesona kayi a mushinga atudi mua kupeta kudi baprofete bua kutukankamika mu bikondo bia kuteketa kua mu mikolo ne bia mateyi ? Yakobo 5:17 ; Lomo 8:28 ; 1Yone 5:14 “Bu bikala mitshima mikangula bua kujandula, netupete mayishi a mushinga mutambe a mu bikondo ne mu mashintuluka bidi biya kumueneka dituku dionso pepi netu… Bankambua ne baprofete bakadi bantu ‘bamomumue netu’ (Yakobo 5:17). Tudi bamone mushindu kayi wakaluanganabo ne ditekeshibua dia mu mikolo bifuanangane netu, mushindu kayi wakakukabo mu mateyi bu tuetu bietu, ne m’mushindu wakapetabo dikima ne kutshimuna ku ngasa wa Nzambi ; ne mu kubatangila, tudi tupeta dikankamibua mu kukeba kuetu kua buakane.” – Vers JésusI, p.87 ne Steps to Christ, p.87. b. Bikala Nzambi udi mumane kulongolola malu bua kuandamuna ku majinga a bufuki, kena mua kulongoluela majinga a bana bandi mandamuna anyi ? Misambu 107:43 ; 145:15–16 “Bufuki ne dibuluibua bidi bijadika bionso bua dinanga dia Nzambi. Tatu wetu wa mu diulu n’yeye udi Muena moyo, Muena lungenyi nr disanka. Bandilayi bia kukema bidi mu bufuki. Monayi mudibio bikumbane bimpe bilondeshile majinga ne kuikala kuimpe, kabiyi anu bua muntu nkayandi, kadi kabidi bua tshifukibua tshionso tshidi ne moyo. Diba ne nvula bidi bisankisha ne bipesha buloba tshiashima ; mikuna, mayi manene, bibandabanda:bionso bidi bituambila bua dinanga dia Mufuki.” – Ibid., p.9. c. M’pa tshinyi padi mulayi wa kukuba wa Nzambi udi ne bua kututuala bua tuetu kuela menji. Matayo 6:30–34 “Patudi tukuata ku bianza bulombodi bua malu adi etu, tutekemena menji etu nkayetu bua tuetu kukuma dikasa dimp, ne kukeba bua kûambula kakuyi dikuatshisha dia kudiye, tudi tudiambuila bujitu buakadi Nzambi kayi mutuambuishe. Tudi tuditeka pa muaba udi wende ne tuangata makokeshi adi mikale ende. Apu ke patudi tuya kumona ne m’bikole mene mene, lutatu ne kujimija ne bilue bushuwa mu malu. Kadi bitukale tudi bitabuje mu bushuwa bua se Nzambi mutunange ne udi musue bua bimpe bietu, katua kuyumbakana bua bidi bitangila matuku atshilualua nansha. Tudi tudilekelela kudiye bu mudi muana udilekelela kudi tatu wandi udi mu munange. Tunyinganyinga tuetu ne makenga ne bijike m’padi majinga etu alue mafuanangane ne disua dia Nzambi neaye kubuelakanangana.” – Heureux ceux qui, p.95.

---

4. DIBULUIBUA DIA NZAMBI DINAYI 02/09

a. M’muaba kayi udi Yezu musokolola patoke mene mene bulongolodi bua Nzambi bua lupandu lua bantu ? Yone 5 :39; Yeshaya 34 :16 “Nzambi udi utuakuila mu Diyi diandi. Tudi ne dibuluibua ditoke ne dijadika dia ngikadilu wandi, dia njila yandi kudi muntu ne dia mudimu munene wa bupikudi”. – Vers Jésus, p.87. b. N’tshinyi tshidi bonso badi basue kudiunda mu bukole bua Nzambi, dituku dionso ? Yone 6 :53, 63 ; Kolosai 3:1–2 “Tshiena bualu tshia bupikudi n’yshiotshi tshidi banjelo basue kuikala batangila ; ne netshikale dimanya dia malu ne musambu wa bupikudibue mu tshiendelele. Tshiena bualu etshi katshiena tshikumba bua ku tshiyila ne ntema ya bungi ku bangila ku mpindieu anyi ? Luse lujalame ne dinanga bidi kabiyi nshikidilu bia Yezu Kilisto, m’mulambu mufila udi bua bualu buetu, etshi ke tshidi ne bua kuikal tshiena bualu tshietu tshia kuelela menji bikole mene mene. Bidi bikengela kutamba kuimanyina musangu mule pa ngikadilu wa Mupikudi wetu ne Mutuakuidi, ne kuelele menji pa mudimu wandi udi wa ewu wakalua bua kusungila bantu bandi ku mibi yabo.” – Ibid., p.88–89. c. M’mushindu kayi utudi mua kuakidila diyi dia Nzambi mu mitshima yetu ? Matayo 4:4; 2Timote 2 :15 “Mufundu mukese wa mu Diyi dia Nzambi neuye kujula kudi bonso badi baûbala ne menji malongolola ne adi pepi ; ngelelu wa menji wa kuanyina udi wa dikasa dimpe. Kadi dilongesha didi dia musshinga mutambe kadiena dia kukuata mu kuyila kudi kua tshimpitshimpi anyi kua ku mpuka mpuka nansha, kudi kua ku misangu ne misangu. Nsangilu wa malu malelela a mu Mukanda wa Nzambi, kakuena mushindu wa kuajingulula kudi mubadi udi ubala ne kufinakaja, ne lukasa lukasa anyi muikale ne ntema mikese. Kudi bubanji busokoka bua bungi mu ndondo ne kudi mushindu wa ku bujandula anu koko kuikala dikebulula dia tshisumi ne kudienzeja kua lukunu kunu. Malu â malelela adi enza dibuki dinene, adi akulondakaja ne kuasangisha kaba kalue, ‘tshitupa eku ne tshitupa kuakua’ (Yeshaya 28:10).Apu bidi biya kumueneka bua se, malu âa malelela adi apetangana bimpe mene mene. Lumu Luimpe lonso ludi lukumbaja ngumu mimpe mikuabo, tshiprofete tshionso tshidi tshiunvuija tshikuabo, malu malelela adi adiundamu neafike ku ndekelu. Diunvuija dia tshiena Yuda didiku bua Lumu Luimpe. Mukenji onso udi ne muaba wawu mu Diyi dia Nzambi, ne tshienzedi tshionso tshidi ne luidi luatshi. Ne nsangilu ku bulongolodi bua Nzambi bua malu ne mushinga wabo, udi ujadika bua udi muenawu. Anu Nzambi nkayandi udi kayi ndekelu, ngudi mumanye mua kubufuimba ne kufika nabu ku ndekelu.” – Education, p.139–140.

---

5. KUYILA KUA MUKANDA WA NZAMBI DITANU 03/09

a. N’tshinyi tshiakatuadila Yelemiya dikoleshibua dia ku moyo ne dikuatshisha munkatshi mua tshikondo tshia diyoyo tshiakapitshilaye ? Yelemiya 15:16 “Kakuena tshintu tshitambe bu kukolesha kua menji kudi kua kuyila kua Mifundu. Kakuena mukanda udi mutambe Mukanda wa Nzambi nansha bua kujula kûlu menji ne lungenyi, bukole mene bua ngelelu wa menji kudi musuka. Bu bikala bantu bakalonga Mukanda wa Nzambi bu mudibi bikengela, bakadi kuikala ne menji a bungi, buneme bua ngikadilu ne diyi dimue dia malongolodi a malu, bidi kabiyi bitamba kumueneka mu tshikondo tshietu etshi.” – Le Meilleur Chemin, p.87–88.“Ewu udi uyila ne ntema Mifundu ne menji a kutendelela neapete menji matue ne m’muenenu wa malu udi muimpe ne lunvu luimpe, mu mushindu udi ne kutangila kudi Nzambi kudi kufikisha ku tshipidi tshia pa mûlu tshia menji.” – Pour un bon équilibre mental et spirituel, vol.1, p.97. b. M’mushindu kayi udi kulonga Mifundu ne n’tshinyi tshidi kuenza diambedi ne kubanga kuyila Mukanda wa Nzambi ? Misambu 119:11, 16 “Bulelela bua Nzambi, bu mudi ngolo, kabuena buvulangana anu nanku nansha ; badi bupetshibua anu ku dikebulula dikole ne ku diyila.” – Ministère évangélique, p.72.“Bu mudi kabidi mumbudi wa tubanda, mikuba ne mbongo, mu kumbula buloba uya kupeta nsoka, tshiata tshia tubanda tua mushinga mukole, bidi kabidi nunku bua udi ukeba ne kunanukila mu Diyi dia Nzambi bubanji busokoka, uya kupetamu malu malelela a mushinga mutambe adi bakebuludi balengulula. Meyi a Nzambi malama mu mutshima adi bumudi misulu ya mayi idi ipueka ku mushimi wa moyo.Kabiena bikengela kudifila ku kuyila kua Mukanda wa Nzambi kakuyi kutendelela nansha. Diambedi ne kubulula Mukanda wa Nzambi, bidi bimpe kulomba dikenkeshibua dia Nyuma Muimpe, ne badi batupesha… Banjelo ne bikale pa buipi ne badi bakeba ne kudipuekesha munya wa kudi Nzambi.” – Vers Jésus, p.90–91.

Makonka a kuambulula dilesona DISAMBOMBO 05/09

1. M’mushindu kayi wakadi Musungidi ulongesha bua kulenga mitshima ya bantu ? 2. M’mishindu kayi idi Nzambi muteka bua yeye kudibulula patoke kudi bonso, ne kudi mene aba badi kabayi mua kupeta Diyi diandi ? 3. N’tshinyi tshidi kuyila bua malu adi malongolola adi a Nzambi ? 4. Unvuija ngikadilu utudi tuangata kumpala kua Mukanda wa Nzambi bu dibuluibua dia Nzambi. 5. M’bualu kayi bupitshisha bua Yelemiya bilondeshile Mifundu, budi ne bua kuambuludibua.