1. BATUADI BA MUNYA DIA KUMUDILU 20/09

a. Bilondeshile Yezu, m’bujitu kayi budi nabu bayidi bandi mu buloba ebu ? Matayo 5:13–16 “Bena Kilisto badi bu mudi minda minene idi miteka mu njila wa mu diulu. Badi ne bua kutemena buloba munya udibo bangata kudi Yezu Kilisto. Moyo wabo ne ngikadilu bidi ne tshia kuenza bua se bantu bakuabo baya kuangata kudibo m’muenenu wa Musungidi ne wa mudimu wandi.” – Vers Jésus, p.115–116. b. Bena kuitabuja badi ne bua kuikala bantu ba mushindu kayi kudi bantu bonso ? Yone 17 :18, 23; 2Kolinto 5 :20 “Mu muana wandi yonso, mudi muikale mukanda mufunda udi Yezu utumina buloba. Biwikala udi muyidi wandi, udi nunku mukanda mufunda udiye utumina diku didi wewe musombela, musoko, musesu, muaba udi wewe mushikame. Kupitshila mu nuenu, Yezu udi musue kuakula ne mutshima wa aba badi kabayi bamumanye. Imue misangu kabena babala Mukanda wa Nzambi, kabena bunvua diyi didi diakula kudibo mu mabeji adi mafunda ne kabena bamone dinanga dia Nzambi mu bienzedi biandi nansha. Kadi binuikala mu bushuwa baleji mpala ba Yezu, bidi bipepele bua kupitshila kunudi bua baya kufika ku diunvuaku nansha kakese buimpe buandi, bamunange ne bamukuatshila mudimu.” – Ibid., p.115. c. M’mushindu kayi umuepele udi kukumbaja kua mudimu ewu ? 2Kolinto 3:2–5

---

2. BUIMPE BUA NZAMBI DIBIDI 21/09

a. N’tshimanyinu kayi tshitambe bunene tshia dinanga dia Nzambi kudi bana bandi ? Yone 3 :16; Lomo 5:6–10 “Padibi biya kumueneka bua se kudi diela mpata bua dinanga dia Nzambi ne dipanga ditekemena mu milayi yandi, apu kudi dipanga kumupesha buneme ne n’kunyingalaja kua Nyuma Muimpe. Mamu udi mua kunvua munyi, yeye udi bana bandi batamba kudiabila bua bualu buandi, apu m’padiye musue bua bimpe biabo ne tshipatshila tshinene tshia moyo wandi n’tshia kuikala ne tshitabela bua bimpe biabo ne kutuishibua bua disanka diabo ? Bu bobo bakikala ne mpata bua dinanga diandi, biakadi bikumbane nunku bua kusunsula mutshima wandi. Baledi bakadi kuya kuela menji munyi bu bikala bana babo badi babenzela nunku ? Kadi Tatu wetu wa mu diulu udi mua kuela menji munyi, patudi katuyi tuitabuja dinanga didiye muleja mu Muana wandi Umuepele mu yeye mutudi bikale ne moyo ? Mupostolo udi ufunda nunku ne:‘Yeyey kakimina Muana wandi mene, kadi wakamufila bua bonso buetu, munyi muapidieye kutupa n’andi kabidi bintu bionso patupu ?’ (Lomo 8:32). Ne biabi, badi bikale ba bungi badi kupitshila ku bienzedi biabo, anyi nansha mene ku meyi abo badi bamba ne :’Ki bua bualu buanyi budi Mukelenge wakula nunku nansha. M’munange kampanda ne kansanga, kena munange meme nansha !’” – Vers Jésus, p.118. b. N’tshinyi tshidi tshileja ne Nzambi udi musue kupesha bana bandi bionso ? Lomo 8:32 “Nansha menji wowo bunene munyi, a dipanga dienu dia buakane, kanuelakanyi bua nuenu kufila bualu buenu mu bianza bia Nzambi. Pakadifilaye nkayandi mu Kilisto bua bubi bua buloba, yeye kuambula bupikudi bua misuka yonso ya bukua bantu. ‘Yeye kakimina Muana wandi mene, kadi wakamufila bua bonso buetu, munyi muapidieye kutupa n’andi kabidi bintu bionso patupu ?’ (Lomo 8:32). Kena uya kukumbaja milayi yandi ya luse lunene idiye mutushila bua kutukolesha mu mikolo ne kutukankamika anyi ?Dijinga dinene dia Kilisto, didi dia kudiapula bumpianyi buandi mu bukokeshi bua Nsatana.” – Les Paraboles, p.145–146. c. M’mushindu kayi udi dinanga edi dilejibue mu tuetu ? 1Yone 4:9–12 “Bena mudimu ba Nzambi, badi basue kuenza mudimu wabo bimpe ne kututa dikasa dimpe, bdi ne bua kumanya dinanga dia Kilisto. Mu diulu badi benda batshinka, bapima ntalenta, menji ne lungenyi bia kuenza nabi bidi biabo bilondeshile bukole buabo bua kunanga Kilisto bu mua kanangaye, ne kuenza mudimu bu muakenzaye.‘Katunangi anu ne menji a mukana nkayawu, kadi mu bienzedi ne bulelela’. Bupuangane bua ngikadilu budi bukumbane padi muena Kilisto unvua dijinga dikole dia yeye kukuatshisha bakuabo ne yeye kuenza mudimu bimpe. M’buenzeji bua dinanga edi didi diûle ntente mu musuka wandi didi dimupesha ‘dipembu dia moyo didi difila moyo’, ne didi dienza bua Nzambi aya kusankisha mudimu wandi.” – Conquérants pacifiques, p.491.

---

3. MAKENGA A KILISTO DISATU 22/09

a. N’tshinyi tshiakadi mu moyo wa Kilisto mu mudimu wandi bua lupandu lua bantu ? Yeshaya 53:10,7 “Moyo wa Kilisto wakadi moyo anu wa kudipidia ne kudilekelela. Wakadi anu mu luendu, kakadi ne muaba wa kusomba mu buloba ebu, wakadi anu mu nzubu ya balunda bakadi anu ba mulomba bikole bua yeye kubuela mu nzubu yabo. Bua Yeye kutusungila, wakadivuija mupele munkatshi mua bapele, kusomba munkatshi mua bantu bena dikenga, bakengedi ba bintu ne mua basame ; biabi bakenzelaye malu a bungi kaba kamumanya ne bakamupetula.” – Ministère évangélique, p.38.“Yezu kakadila bua bualu buende nansha muakadiye mumanye bimpe mene mene muakadi ne bua kuikala ndekelu wa mudimu wandi. Wakadi umona kumpala kuandi Getesemeni, muaba wa dikenga ne lufu biakadi bimuindile ; kule kuaka kuakadi tshibi tshia mikoko, kuakadi munkatshi mua bidimu nkama, bungi bia mikoko yakadi ishipibua, ne n’tshiotshi tshibi tshiakadi ne bua kunzuluka bua yeye kubuela, yeye ‘muana wa mukoko udibo baya nawu ku tshishipelu’. Anu pa buipi kakese, Golgota kumueneka, muaba udibo bapopela bantu ku mutshi mutshiamakane. Mu njila wa kufika ku muaba wa tshishipelu bua kuleja bubi wakadi Yezu ne bua kutua makasa, tshilamba tshia kukuta bitalu tshifike tshidi tshikuatshisha bowa tshiakadi tshimuindile. Biabi ki n’tshikena kumona etshi tshifike tshiakadi tshimunyingalaja mu diba edi dia disanka dia buloba bujima. Menji makuatakaja kâakajuka bua kufila dibunga, didi pa mutu pa bukua bantu, kaena malue kubuikila ne muidima pa menji adi kâyi ne buiminyi. Yezu udi udila bua tshiakadi tshindila Yelushalema katshiyi luse ; udi udila bua bufofo ne dipapisha dia mutshima dia aba badiye muluile bua kusungila.” – La Tragédie des siècles, p.18. b. Mu makenga andi ne mateta, n’tshinyi tshiakapesha Yezu dikima dia yeye kuenza mudimu wandi ? Yeshaya 53:11; Ebelu 12:2 “Nvita pankatshi pa Musungidi ne bukole bua midima kufika ku disanka dia basungula ne ku butumbi bua Nzambi mu tshiendelele. Mushinga wa musuka wa muntu udi mutambe bua Tatu kusanka bua mushinga wakafilaye. Bua Muana wa Nzambi, mamuma a mulambu wandi munene neikale mimpe matambe, yeye biandi neatambe kusanka.” – Ibid., p.707.“Misangu ya bungi tudi tunvua ne:Yezu wakadila, kadi katuena bamanye diba kayi dia kasekaye. Musungidi wetu wakadi nunku muntu muena bisama ne musombela mu lutatu, bualu bua wakakangula mutshima wandi ku makenga onso a bukua bantu. Nansha muakadi moyo wandi muikale wa kudipidia, wa lutatu ne wa tunyinganyinga, Nyuma wandi kakadi mupungila nansha. Mpala wandi kakadi uleja dibungama, kadi wakadi ne dikima, kayi upampakana. Mutshima wandi wakadi mushimi wa moyo, ne muaba onso wakadiye uya, wakadi utuala lutulu, ditalala ne disanka.” – Vers Jésus, p.120.

---

4. KUSANKA MUNKATSHI MUA MATETA DINAYI 23/09

a. Tshikondo tshidi muena kuitabuja kumpala kua mateyi, udi ne tshinyi bua yeye kutshimuna mu nvita eyi ya nyuma ? Efeso 6:11–18 “Diteta dionso dia kupitshila, tunyinganyinga tukole, mateyi makole bidi bia kupita bukole. Kamuambidi bantu badi bafua aba, ntatu yenu, kuambila bantu nenu, kadi yelayi ku makasa a Yezu. Nuikale ne bualu ebu bua kulonda ne diyi nansha dimue kadiena kuela mpata anyi kuteketa mu mikolo. Mu kuleja ditekemena dienu ne dieyemena, nudi mua kulengeja moyo wa bakuenu ne kutua mpanda ku kudienzeja kuabo.” – Vers Jésus, p.119. b. Bua tshinyi bantu ba bungi badi bikala bakaja mantanta pankatshi pa ditabuja ne mpata tshikondo tshidibo bateyibue ne bateta ? Matayo 14:28–31 ; Yakobo 1:2 “Misuka ya bungi ya dikima, idi mikale mitshintshimika kudi mateyi, tô ne pepi bua yoyo kukuluka mu nvita ya kuluangana ne ‘bumeme’ ne kuluangana ne bukole bua midima. Kabiena bimpe kuyitekesha mu mikolo mu nvita eyi mikole. M’bimpe kuyikankamika ne meyi a ditekemena. Apu munya wa Yezu Kilisto udi uya kutemena kunudi. ‘Nansha umue wa kutudi kena muikala ne moyo buende yeye nkayandi nansha’ (Lomo 14:7). Ku buenzeji buetu budi kabuyi buelela menji, muntu mukuabo udi mua kukoleshibua mu mikolo ne kupeta bukole anyi kuteketa mu mikolo ne kuya kule ne Musungidi ne bulelela buandi.Bantu ba bungi badi bikale ne mayisha ne mamanya bidi bia mashimi pa bidi bitangila moyo ne ngikadilu bia Yezu. Badi bamuitabuja bu muenyi mu kumuakidila kua disanka ; badi bamumone bu muena meyi makole, udi kayi tuseku, kayi disanka. Mu malu a bungi, menji â adi kâyi majalame adi anyanga bualu bupitshisha bua ntendelelu mujima.” – Ibid., p.119–120. c. M’mushindu kayi udi njila wa muntu muakane muikale ukenka tô ne mene munkatshi mua diteta ? Nsumuinu 4:18 ; Filipoi 4:4 “Njila udi mua kumueneka mukole, muikale ne bina bile bile ku dia balume ne ku dia bakaji, ne bua kubanda bikale bualu bukole. Tudi bapungile, tukeba dikisha, imue misangu bazengela muishi mua bujitu bua dipungi. Kadi, tuetu ne Yezu tudi tutungunuka ne kuluangana nvita ; yeye ne enzulula kabidi dikima dietu, neatulombole, neatufikishe bushuwa ku tshipatshila. Yeye muine wa kendela mu njila ewu kumpala kuetu ne yeye kutulandajila binkandi bionso.Mene, munkatshi mua kubanda eku mu bimpokono kudi kufikisha ne ku moyo wa tshiendelele kudi kuikala mishimi ya disanka idi ipesha bena luendu bapungile tshiashima.” – Heureux ceux qui, p.130.

---

5. DIFUTU DIETU NE DISANKA DIETU DITANU 24/09

a. M’mulayi kayi wakadi Yezu ne bua kutupesha bua tuetu kusanka ne kutumbisha Tatu wetu wa mu diulu ? Yeshaya 41 :10; Luka 12 :32; 1Petelo 4 :13 “Kabiena mu bulongolodi bua Nzambi bua malu, bua bana bandi bikale batatshishibue kudi tunyinganyinga. Kadi, Nzambi kena utudinga nansha. Kena mutuambila ne :’Kanutshinyi nansha, kakuena tshintu mu njila wenu.’ Udi mumanye bua se netupete mateta ne njiwu, ne ngutuambila bualu bulelela. Kena mulongolola bua kumbusha bana bandi mu buloba bua bubi nansha, budi bunyanguka ; kadi udi ubaleja muaba wa kunyemena udiku.” – Vers Jésurs, p.122. b. Tela imue milayi ya dikema idi ya ditalala ne disanka mifila kudi Yezu. Yone 14 :1–3, 27; 15:11; 16 :20. “Tudi mua kuindila ntatu mipia mipia ne tunyinganyinga mu nvita idi yenda idi longolola ; mu kutangila bikondo bishale ne bilualua, tudi tuamba ne :’Yehowa wakatukuatshisha tô ne lelu’. ‘Bukole buebe ne buikale bule bua matuku ebe onso !’ (Dutelenome 33:25). Mateta kâkuya kupita makole ikala matupesha bua tuetu kutantamana. Tukuatayi mudimu muaba udi Mukelenge mututeka ne tuikale ne dikima:Nansha tshionso tshikale ne bua kulua makole neikale bilondeshile bunene bua mateta.Katataka bibi bia mu diulu bidi bikangula kumpala kua bana ba Nzambi, ne Mukelenge wa butumbi udi uya kubakidila ne meyi âa aya kukuma masheme ku matshu abo bu mudi musambu musheme ne :’Luayi, nuenu badi basankishibue kudi Tatu wanyi ; Nupiane bukelenge buakunulongoluebo ku tshibangidilu tshia buloba’ (Matayo 25:34).Bua bumpianyi bua butumbi budi bufidibue kutudi, ‘Muntu udi ne tshintu kayi tshia kushintakaja bua kuangataye moyo wandi kabidi ?’ (Matayo 16:26) …Musuka mupikudibue ne mulengeja ku bubi, m’musuka udi ufila makole andi onso ku mudimu wa Nzambi, udi ne mushinga udi kawuyi kunvuija. Ne kabidi, musangu onso udi pa buloba musuka umue usungidibua, lumu elu ludi lua bulelela mu diulu, kumpala kua dikalanganaku dia Nzambi ne dia banjelo, disanka dia tshijila ne butumbi didi dibudika mu misambu ya butshimunyi.” – Ibid., p.125–126.

Makonka a kuambulula dilesona DISAMBOMBO 25/09

1. M’mushindu kayi udi bulelela buya kuambibua kudi bonso, ne badi mene kabayi bamanye Mukanda wa Nzambi ? 2. M’mushindu kayi udi Mukelenge uleja patoke dinanga diandi didi kadiyi ndekelu kudi bantu ? 3. N’tshinyi tshiakadi mushimi wa ditekemena dia Yezu kumpala kua makenga andi ne lufu luandi ? 4. M’bualu kayi butudi ne bua kulama mu menji patudi kumpala kua mateta ? 5. Mu moyo wa matuku onso, n’tshinyi tshiakadi ne bua kuikala mu menji a muena kuitabuja ?