1. LUSE LUTAMBE LUA NZAMBI Dia kumudilu 19/07

a. N’tshinyi tshitudi ne bua kuenza patudi batuishibue bua bubi ? Nsumuinu 28 :13 ; Yakobo 5 :16 « Malu adi kukumbaja bua Nzambi kufila luse luandi lutambe, malu â adi mapepele, makane ne adi a menji. Mukelenge kena utulomba malu a lutatu ne adi akengesha bua kufuidibua luse ku mibi yetu nansha. Kabiena bia mushinga bua kuenza ngendu mile ya kudikengesha nansha, anyi kudinyanga, kudikuma, kuditapa mputa bua kupeta dinanga dia kudi Nzambi wa mu Diulu nansha, anyi bua kumbusha dibanza dia bubi, tshibawu tshia kushipa kuetu kua mikenji:Udi utonda ne ulekela mibi yandi udi ufuidibua luse lutambe lua kudi Nzambi. » - Vers Jésus, p. 37 b. Ngikadilu kayi utudi mua kuikala nandi bua bualu ebu ? Nsumuinu 15 :33 ; 19 :23 ; Misambu 34 :18 « Aba badi kabayi badipuekeshe kumpala kua Nzambi, mu kujadika kua mibi yabo, kabena banji kukumbaja bualu bua kumudilu bua kunvuangana. Bituikala katuena tupeta dibungama edi didi kadiyi mua kuenza bua kunyingalala bua bubi, bituikala katuena tutonda mibi yetu ne mutshima udi unvua kanyinganyinga ne udi mûle tente ne bowa ne ditshina mu menji dia mibi yetu, apu katuena banji kukeba mu bushuwa difuidibua luse. Ne bu bituikala katuyi banji kuenza nunku, katuena banji kupeta ditalala ne Nzambi. Kabingila kamue katudi katuyi bafuidibue luse bua mibi yetu mienza, m’bua katuena basue kudipuekesha ne kuenza malu bilondeshile mudi Diyi dia bulelela. Malu adi kukumbaja m’matupesha bualu ebu. Kutonda mibi, nansha koku kua patoke anyi kua muntu pa nkayandi, kudi ne tshia kuikala kua bushuwa ne kua moyo mujima. » - Ibid, p. 37-38

---

2. DITONDA NE DIFUIDIBUA LUSE Dibidi 20/07

a. Patudi benzela muntu bibi, nganyi utudi benzela bibi kabidi ? Misambu 51 :4 (6) « ‘Nutondelangana mibi yenu, ne nulombelangana Nzambi, bua nuenu nukoleshibua’, m’mudi mupostolo wamba (Yakobo 5 :16). Nutondela Nzambi mapanga enu, bualu bua n’yeye nkayandi ngudi mumanye mua kunufua luse, ne nutondelangana bilema bienu. Biwikala wakuenzela mulunda webe bibi anyi mukuenu, buwudi nabo m’bua wewe kumanya ne udi muenze nunku, ne bua bualu ebu nudi nufuilangana luse. Ne pashishe nudi ne tshia kukeba difuidibua luse dia kudi Nzambi, bualu bua muanu uwakutapa mputa ne kuenzela bibi udi muikale tshintu tshia Nzambi nkayandi ; mu kumuenzela bibi, wakuenzela Mufuki ne Mupikudi wandi bibi. » - Vers Jésus, p. 37 b. Bua tshinyi tudi ne bua kufuila bantu bakuabo luse ? Matayo 6 :14-15 ; Efeso 4 :32 « Udi kayi yeye ufua luse, udi udipangisha mushindu umue udiye ne bua kupeta luse lunene lua Nzambi. Katuedianganyi menji ne, bikala badi batuenzela bibi, kabena batonda bubi buabo, katuena ne tshia kubafuila luse nansha. Kakuyi mpata, budibo nabo m’bua bobo kudipuekesha ne mitshima yabo mu kunyingalala ne kutonda kua bubi ; kadi tuetu tudi ne tshia kuleja luse lua lutambe aba badi batuenzela bibi nansha bikalabo bobo kabayi bajadika se m’ba tuenzela nunku. Ne kabidi nansha bobo bikaabo bakasua kutushipa, katuena mua kushala ne tshinji ne kanyinganyinga nansha bua bualu ebu – anyi pashi kudiunvuila luse bua bualu bubi buakatuenzelabo, kadi tudi ne bua kufua luse aba bakutuenzela bibi bu mutudi batekemena bua kufuidibua luse kudi Nzambi bua malu mabi mamuenzela. » - Heureux Ceux Qui, p. 106-107 c. N’tshinyi tshiakadi ne bua kutuyisha bua tshitudi ne bua kuenzela bukua bantu ? 1Petelo 4 :8 ; Lomo 13 :8 « Yezu udi ‘Moyo’ wa Nzambi asombe munda muenu ne nunku dinanga dia mu Diulu dilejibue patoke, ne ditalala dia mu Diulu kudi mutshima udi mupungile. Bua tuetu kusemena pepi ne Nzambi, bidi bikengela bua tuikala ne dipangadika dia kuleja bantu netu ngasa utuakapeta bietu. » - Ibid, p.107-108« Mutshima mubi wa muntu kudi bakuandi m’bualu budiye wenza butambe bubi. Badiku babungi badi batshinka badileja buakane bua Nzambi ne bikale kule bua kuleja patoke dinanga diandi ditambe. Misangu mivule bitu biya kumueneka bua se aba batubu baya kuleja tshikisu batu badisangana kumpala kua mateyi. Nsatana udi uluangana ne misuka eyi, ne meyi makole ne mabi adi abatekesha mu mikolo tô ne mua kubavuija tshia kudia tshipepele tshia mutetshi. » - Le Ministère de la Guerison, p. 136-137

---

3. PA BUALU MENE NE BUSHUWA Disatu 21/07

a. M’mibi kayi idi kutonda munkatshi mua bantu ne mikuabo idi anu kutondela Nzambi nkayandi ? Misambu 32 :5 ; Matayo 5 :23-24 « Kutonda kulelela kua mibi n’kua kuamba bualu mene mudibo ne kujikula meyi mu kuamba mibi anu mudiyo. Imue mibi idi mikale ikuatshisha bundu ne idi anu ya kutondela Nzambi nkayandi ; mikuabo n’ya kutonda munkatshi mua bantu patoke ne idi ilomba kutonda kua patoke. Kadi kutonda konso kua bubi kudi ne tshia kuikala kutokesha, buludi, ne kutela bubi mu dina diabo bûdi mene muenze. » - Vers Jésus, p. 38« Bubi budi buenza kudi muntu pa nkayandi budi bua kutondela Kilisto, N’Nyeye nkayandi udi mutuangaji pankatshi pa Nzambi ne muntu …Bubi bonso budi buikale tshipendu ne kupepeja kua Nzambi ne budi bua kutonda patoke ne munkatshi mua bantu. » - Ministère Evangélique, p. 211 b. N’tshipatshila kayi tshia kutonda kulelela kua bubi ? 1Samuele 12 :19 « Mu matuku a Samuele, bana ba Isalele bakaya kule ne Nzambi, kujimija ditabuja mu menji andi akulombola kua tshisamba, ne mu bukole buandi bua kuimanyina bualu buandi. Kumbuka kudi Mukelenge Munene wa Diulu ne Buloba, bakaleja dijinga dia bobo kuikala balombola bu bantu ba bisamba biakadi bibanyunguluke. Dipanga kusakidila diabo diakanemenena pa misuka yabo ne kubatapulula ne Nzambi. Diambedi ne bobo kupeta ditalala, bakatonda patoke bua bualu buakenzabo ne:‘tuetu tuakavudija bualu ebu bubi bua kudilombela mukelenge pa mutu pa mibi yonso ituakuenza’ ». – 1Samuele 12 :19. Biakadi bikengela kudibo bua kutonda bubi buakadibo benze » - Vers Jésus, p. 38-39 c. N’tshienzedi kayi tshiakadi ne bua kulonda kutonda kua mibi ? Yeshaya 1 :16-17 ; Yehezekele 33 :15 « Nzambi kena mua kuitabuja kutonda kua bubi, bikalaku kakuena ne dinyingalala dia bushuwa ne dienzulula. Bikengela kuikala dishintuluka dinene mu moyo ne bionso bidi kabiyi bisankisha Nzambi bitekibue ku luseke. Ne bikala nunku, tshipeta tshia bisama bilelela bua bubi » - Ibid, p. 39« Muntu yonso udi muakidile Kilisto mu mutshima, nealeje patoke kukudimuna kuandi kua mutshima, bu Zekaya, mu kupidia kua bilele bionso bia kuiba biakadiye nabi. Bu Mfumu wa bafut549-550

---

4. NJIWU YA BUAKANE BUA MUNTU NKAYANDI Dinayi 22/07

a. Tshikondo tshiakela Mukelenge Adama ne Eva lukonko bua bubi buabo, m’mushindu kayi wakandamunabo, kabiyi mu bushuwa tshilema tshiabo ? Genese 3 :12-13 « Adama kakadi mua kuvila bubi buandi nansha, wakadi anu kulomba dilekelela. Pa mutu pa yeye kuleja kanyinganyinga bua bubi ebu, yeye kuela mukaji wandi tshilema, ne kutshiela Nzambi muine:‘Mukanji uwakumpa bua kuikala n’anyi wa kûmpa dimuma dia mutshi, nakudia » - Patriarches et Prophètes, p. 35« Kunyima kua bamane kudia dimuma dia mutshi mukandika, Adama ne Eva bakunvua bundu ne kupapuka. Menji a kumpala akabaluila akadi a kusokoka tshilema tshiabo ne kunyema tshibawu tshia lufu. Pakamanya Nzambi bua bubi buabo, Adama kujinga kuela Nzambi tshitupa tshia tshilema, ne tshitupa tshikuabo kuela mukaji wandi. ‘Mukaji uwakumpa bua kuikala n’anyi wakûmpa dimuma dia mutshi mukandika, nakudia.’ Mukaji, biandi, kuela nyoka tshilumbu, mu kuamba meyi â:‘Nyoka wakundinga, nakudia’ (Genese 3 :12-13). Bua tshinyi wakufuka Nyoka ? Bua tshinyi wakumulekela bua yeye kubuela mu Edene ? Nkonko eyi, yakadi mu kulombma kuandi dilekelela, yakadi anu iya ku diela dia Nzambi tshilumbu tshia dikuluka diabo » - Vers Jésus, p. 40 b. Bua tshinyi kudibingisha kudi kuvuija kutonda kua mibi kakuyi ne bukole ? Yobo 9 :20 ; Luka 16 :15 « Menji a kudibingisha akaluila kudi tatu wa dishima ne adi amueneshibua patoke kudi bana bonso balume ne bakaji ba Adama. Kutonda kua mushindu eu kua bubi kakuena kufumina ku buenzeji bua Nyuma wa Nzambi nansha, ne Nzambi kena ukuanyisha nansha. Kunyingalala kulelela kua bubi kudi kutuala muntu mubi bua yeye kuambula nkayandi kushipa kuandi kua mikenji ne kumanya tshilema tshiandi kakuyi lubombo » - Ibid, p. 40« Katuena mua kukeba bua kukepesha dipila dietu mu kudibingisha ku bubi buetu nansha. Tudi ne tshia kuitaba mudi Nzambi ubala bubi, ne budi bunene. Anu Golgotha n’ngudi mumanye mua kutubuluila patoke bunene bua bubi. Bu tuetu mua kutuala bujitu bua mapanga etu, tuakadi kuikala baboza. Kadi Muntu udi bubi kuangata muaba wetu, kamanyi bualu, kuambula bujitu bua malu mabi etu. ‘Bituatonda mubi yetu’, Nzambi udi wa kueyemenyibua ne udi ne buakane bua kubuikidila mibi yetu, ne kutulengeja ku malu mabi onso’ (1Yone 1 :9).M’bualu bulelela kayi bua butumbi ! Udi ushala muakane kumpala kua mikenji yandi, mukubingisha bonso badi bitabuje mu Yezu. ‘Nganyi udi Nzambi bu wewe, udi ubajimijila bubi, udi ulekelela difuka dia bupianyi buandi bubi bua ditomboka diabo ? Yeye kena ushala ne tshinji tshiendelele, bualu bua udi usanka bua kuleja bantu luse lujalame’ (Mika 7 :18) » - Heureux Ceux Qui, p. 108–109

---

5. DITONDA BUBI PATOKE Ditanu 23/07

a. M’mushindu kayi wakajikija Paulo bubi buandi ne didipuekesha ? Bienzedi 26 :10-11 « Bilejelu bia kutonda kua mibi kulelela, bidi Mukanda ufila bidi anu ne diyi dimue dia kudibingisha anyi kukepesha tshilema ne kubingisha kua mushipi wa mikenji. Mupostolo Paulo kakadi ukeba kashidi bua yeye kudiakuila. Wakaleja bubi buandi anu mu mushindu wabo ne mu dina diabo ; kakenza tshiakadi ne bua kutekesha dipila diandi [Bienzedi 26 :10-11] » - Vers Jésus, p. 40 b. Paulo udi wamba tshinyi mu mukanda wandi wa kumudilu mufundila Timote ? 1Timote 1 :15 « Mu tuetu nkayetu, tudi anu tumona butekete, katuena ne tshidi mua kutuakuila kudi Nzambi. Nsatana udi utujadikila bua se bualu buetu m’bukole kakuena mushindu wa kubulongolola ne kakuena buanga, kakuena londapu bua bilema bietu bia mu ngikadilu. Patudi basue kusemena pa buipi ne Nzambi, muena lukuna udi utunungena ku ditshiu dietu ne:‘Bidi ne dikuatshisha kayi bua kutendelela ! Kuena muenza bubi ebu anyi ? Kuena muenzela Nzambi bibi anyi ? Kuena munyanga kondo kebe ka moyo anyi ? Kadi tudi mua kumuipata, mukumuambila ne:‘Mashi a Yezu adi atulengeja ku mibi yonso (1Yone 1 :7). M’padi mene mene, tshikondo tshidi menji a bubi buetu atupumbisha bua tuetu kutendelela, m’patudi tuenza nanku, tuakula nunku. Tudi mua kuikala ne bundu ne kunvua bikala bapuekeshibue bikole, kadi bidi bikengela anu tuetu kutendelela ne kuitabuja. [1Timote 1 :15]. Difuidibua luse ne dilengejibua ne Nzambi bidi bifidibue kutudi anu bu dipa dia patupu dia ku buakane budi kabuyi ditoba bua Kilisto. » - Heureux Ceux Qui, p. 108 c. N’tshinyi tshidi Nzambi mulaye bituikala tuakutonda mibi yetu ? 1Yone 1 :9 « Mutshima mupuekele ne udi unyingalala bua bubi, udi mutekesha ku dinyingalala dilelela, neuya kunvua tô ne mu tshitupa kampanda dinanga dia Nzambi ne mushinga wa Golgotha. Bu mudi Muana udi utonda bubi buandi kudi Tatu muena dinanga, muntu mubi udi unyingalala mu bushuwa bua bubi neaye ne mibi yandi yonso kumpala kua Nzambi. Bualu bakafunda ne:[1Yone 1 :9] » - Vers Jésus, p. 41

Makonka a kuambulula dilesona Disambombo 24/07

1. M’mushindu kayi utudi tumueneka kumpala kua Nzambi patudi tutonda kudiye mibi yetu mu bulelela ? 2. M’mu bikondo kayi mudiku mua kutonda kua mibi kuenzeka kumpala kua bantu ne m’bua tshinyi ? 3. Bua tshinyi bidi bia mushinga bua kutonda kua mibi kuenzeka mu bitupa bionso bisunsula ? 4. Unvuija njiwu ya buakane budi muntu nkayandi ? 5. N’tshipeta kayi tshia kutonda kua mibi kua bupuekele ?