TÂ BILA

Naiwa yuara utla bila ba trabil ailal pali brisa, unsabanka, maia waikna ba ai maia mairin wal sip pain iuras, baku aisa, yapti wal dakwi takisa, bara latwan ailal wahwisa, kau pali lika tuktan nani ba kau wihrika tara ba twilkisa, baku naiwa wan yabalka bila nanira tuktan aisikas, yaptikas ailal pali wapi taukisa uplara diara makabisa nahki muna pruaia apia dukiara. Naha lika kuntri kumira baman apia, sakuna umpira nesanka an nesan lahlakira sin trabilka brisa bara nanara waikna an mairin ailal ba marit takras walbrisa kan tisku pat dakwi takai bara sibrin brisa. Naku wal utla bila aslika painkira Dawan wantba slinwi tiwi auyasa naha tasbara.

Dawan Jisas sturka yamni smalkanka baman mita sipsa kli famali ba swaki sakaia. Baha dukiara Dawan aibila holikirara pat ulbansa nahki sipsa kupia kriwan nani ba latwan brin an insauhkan nani ba kli rakaia. An paskanka raya waikna raya, mairin raya, utla bila kum raya takaia.

Naha kati yumhpa ra, sabat Baibil lisinka lalka baku mankan sa Kristian Watla Bila , Baibil wina smalkanka ailal lan takan kabia nahki wan famali swaki sakaia Jisas want ba baku. Baku sin kupia kraukanka ailal yawan brinsa wan lakrika Elena G. de White ulbanka nani wina. Bankra man pat marit apia kau yakan sma kaka sin naha lisinka nani na uba pain palisa stadi taki praptis munaia wan watla bilara.

Sabat Baibil lisinka stadi mamunra nani naha kupia kraukan kana wamtla bilara an rayakamra praptis munma kaka rait pali heven lilika kaikma naha tasbara an ridi takram kabia hevenra waia naika pali Jisas balbia pyuara.

Utla bila lâ kat, adarkat kaia, an klin laka utla bilara an latara sin brikaia ba nitpalisa. Sin baku kupia kumi, prilaka, latwan laka an lilia laka, selp wanwina kat kaikras kaia laka nani sutba yaka pawaiasa utla bilara tangni dusa painkira kum baku kia auhnika upla sut laik kaikiba baku.

Naha sut sipsa sakuna pastaura Jisas mawan ingnika, an Spirit Holikira ra yaka wan ta brinkaia sa: titanra an tutnira utla bilara prias dauki Dawan bila wina lantakaia ba sikrit kum tara palisa aisa, yapti bara tuktan nani kupia ba isi daukaia dukiara.

¡Dawan blesingka Sabat Baibil lisinka smasmalkrika, lan tatakra nani sin purara kabia!

Sabat Skul baiki sakanka wina General Konfrence