Sandi
Lih wainhka kati 27
1. JISASRA MINARA BATAKAIA KIUKA MANKAN
a. Jisas tempelra smalkikan pyuara, parisi an aiulbra nani diadaukan? Jan 8:2–3.
"Jisas wark daukikanbara minit yaban takaskan. Parisi an aiulbra daknikum Jisasra balan traika kaikaia dukiara. Mairin kumra raski bribalan dusakuhbikan naha mairka marit laka krikan wisi."— The Desire of Ages, p. 460.
b. Dawan Lâ kara uba kulkanka yabisa puli, dia makabiwalanka parisi nani mita Jisasra walan? Jan 8:4–6.
"Kaikras kaka parisi nani mita Jisasra kulkanka yabi bakukan sakuna yukwanra plikikan nahki witinra sauhkaia. Jisas dia aisabiaba wal witinra pat mihtara kahbaikan. Bankra mairkara patdinkras kaka wiaiakan Lâ Matawalsipra kulkanka yabras. Apia mairkara patkira wibiasa kaka Roman nani mihtara mankaikan, kan Roman nani baman karnika brikan upla laka daukaia.". —Ibid., pp. 460, 461.
Mundi
Lih wainhka kati 28
2. RAITBA PARAMRA SAKAN
a. Jisas mita parisi nani kuninkara dia ansika yaban? Jan 8:6.
"Jisas minitkum diara takinara kaikan: mairkaba tatatwikan aiswira kira, parisika nani mawanba karnakan, umpira kaikanka laka kumisin apu. Jisas, witin sunu an holi baku aimawanra bawan. Pain nukan parisi nani lukan painwal balraskanba tanka. Jisas lika uplika dusakakuhbra nani kumi bani raiaka tanka pain nukan. Naha parisika nani mita mairka umpirara brihwan saurkara, witin nani wantkanba Jisasra traika kaikaia dukiara. Jisas, witin parisi nani aisiba walras baku ailal maku tasbara ulbikan."— The Desire of Ages, p. 461.
b. Jisas dia daukan dusa kakuhbra nani palisin patkira kanba marikaia? Jan 8:7–9.
"Dusakakuhbra nani mayara kahwan. Nanara uba kasakkira puli banhwikata aidarawalan, Jisas mawanra airaiaka sutba yukwanra apuba dukiara, saurakira aidara wali banhwan kan diara yukwanra daukan naniba sut param Jisas sakanba mita; kum kum ailal makupi bin kumisin daukras plapi banhwan kata. Mairka yakan takaskan.". —The Desire of Ages, p. 461.
c. Jisas mita dusa kakuhbra nanira aisanbawina yawan dia lantakisa? Luk 6:42.
"Upla ailal barasa witin nani wantsa diara manas watawi kaikiba wapnira mankaia. An bansin lukisa mistik takan uplikaba warkkawina sakaiasa an witin nani bahara aimakaia. Warktatakra nani aitilakat saurka dukiara aisisa warksip pain daukras wisi. Naha sat uplika nani lukisa witin kau wark pain daukaia sipsa pawanka ailal bribalaia. Bahasat uplika naniba Dawan Spiritka Holikira mita tabriras, yakan traikaikisa an setan mita kunin munisa bara uba sipkira pulisa, sakuna witin nani pali kau siapiaba lika aidarawalras." —Testimonies for the Church, vol. 7, p. 279.
Tiusdi
Lih wainhka kati 29
3. DAUKANKAKUM BILAKAIKRAS
a. Dusa kakuhbra nani mahka swisisiwan ninkara dia Jisas mita mairkara makabiwalan, nahki naha taka mairka chenstakan? Jan 8:10, 11.
"Mairka Jisas mawanra buikan, ailal makupikan sibrinkira. Jisas naku aisan: ‘Man nani tilamra ya saurka apusa kaka walpa pas lulks’, kaikras kaka pruaia patkara kahbi bakukan. Mairka ailal buki Jisasra kaikraskan, bilakaikikan walpa aiwinara prukbiaba baman. Ta iwan dusa kakuhbra nani mahka tawiwan kaikanra; bara sturi painkira kum aikiamara walan: ‘Yangsin patra maikinkras; was an kau saura yapara’. Aikupia tatatwan, bara Jisas minara kahwan, inikira ai saurka dahra param sakan.
"Mairka aidarawalan nanara witin airaiaka raiakum takrikisa, klin, kasak an Dawan yabalkara. Naha daukankawal Jisas mita mairkara bukan an tukin tara daukan winatara sikniska an spiritka sikniska sinsut rakan. Baha ninkara mairkana Jisas nina blablikra painkira kum takan kata. Mairka witin uba tingki lukan Jisas latwanka laka an padinka witinra yabanba dukiara. Tasba uplika nani mita mairkara lawaska kiki an mayara kulkikan sakuna Jisas mita witinra alki kli bukan. Parisi nani mawan wal mairkara dusakuhbikan pyuara Jisas mita wisata: ‘Was an kli saura daukpara’ ". The Ministry of Healing, p. 89.
"Jisas naha mairkara padin munanba an tabaikan raiaka klin lakara iwaia, Jisas daukanka kasakba wan marikisa. Ao, saurkaba sirpi lupia baku lika kulkraskan an pat apu bakusin apia, sakuna patra kahbaia lukanka apukan, sakuna wantkan swaki sakaia. Upla nani mita mayara kulkikan mairkanara an lawaska kikikan. Sakuna Jisas mita bilakaikanka yaban."— The Desire of Ages, p. 462.
b. Dawan tingkika laka upla swaki sakiba dukiara aisas. Luk 7:37–40, 47, 48.
"Upla kumi bani trabilka Jisas kakairasa, saurka karbanka wihra pali twilkiba nitpalisa swaki Sasakra kum briaia. Dusprignira warktara daukanbawal Jisas brin daukisa upla sut witinra kasak luki swaki sakan laka bribia." —The Ministry of Healing, pp. 89, 90.
Wensdi
Lih wainhka kati 30
4. MAIHSANIHKRA BILA UPLASUT WALAN
a. Wan daukankaba nahki kaiasa wan walkawal, nahki baman naha sipkabia? 2 Korint 1:3–5.
"Trabil nani wanpurara baliba bahara yawan kaiki ban drinh swapaia apiasa. Spirit Holikira mita wan tabrisa kaka wan daukanka, naniba wapnira kabia. Dawan kupia lakakat wapi waiknika an aiuplika mapara diara apuba witin umpira kapras. Misbara, brukwan laka aikupiara apusa, nahkisat trabilkabiasin witin Dawan mawanra iwisa".— Testimonies for the Church, vol. 5, p. 488.
"Jisas, witin panistarak luanba taka sipsa wan tanka briaia an wan maihsa nihkaia. Upla wantrabilka naniba sut witin painpali nusa kan bakluanba mita an sipsa aihelpka wankaia witin puraluan baku yawansin puralubia dukiara. Aiseya 63:9; Hibru nani 2:18. Jisas nina blablikra kumi bani bahak luwankaiasa."— Thoughts From the Mount of Blessing, p. 13.
b. Jisas minataibankara wapi naniba dia bilakaikanka brisa? 2 Korint 1:6, 7.
"Kasak lukrasmaki Jisas panisbrinba baku yawansin briaiaba; baha nani tihmiara ban tauki naniba dukiara wihrika kum damra walras maki? Baha nanira helpmunaia dukiara lahlikam, karnikam an taimkam mankaiaba wilinsmaki? Baku apiasa kaka heven kingka lakara pliskam apukabia. Hevenra waia uplika kumi bani naha tasbara swapraskira warktakaia nitsa." —Testimonies for the Church, vol. 9, pp. 103, 104.
c. Dia daukanka kau nitsa ensal yumhpa smalkankara kasak luki naniba? 1 Korint 13:13, 4–8.
"Dawan Lâ ka kakulkra kumi bani nitsa wihka bilakaikanka lantakaia, bapi ban buikaia, latwan an prilaka paliba wantilara ban barakaiasa".— Ibid., vol. 6, p. 398.
Tausdi
Lih mairin kati 1
5. KAHWANBAWINA KLI BUKAIA
a. Kristian kasak naniba dia daukbia aiwalka saurkara kauhbia pyuara? Galisan 6:1–3; Roman 15:1–3.
"Setan mita traika kaiki batakan naniba yawan helpmunaia kli bubia dukiaara. Sakuna prautlaka an karna muniwal lika apia, sakuna bawan lakawal. Dusakuhbaia warkkaba Dawan Spiritka wina apia, sakuna kahwan wina klibukaiaba lika; yawan kumi banisin wandara walikaiasa sin tnatkara setan mita wantraika kaikbiara sia. Wan muihni an lakrika nani kahwanba kli alki bukaia Dawan Spiritka karnikawal, sakuna saitra lika swiaia apiasa: ‘Man uba saura daukram yangra swiri paskras, sip help maimunamna apia. Wantilara upla kumisin parisi nani baku uba kasakkira pulaia apiasa an aimuihni walara taski kulkaia sin apiasa. Baha spiritkaba setan wina wankupiara bribalisa bara wan nakra blain baku takisa sip wan swapnika naniba tanka briras.".— Testimonies for the Church, vol. 6, pp. 398, 399.
"Kristian kasakkumba witin aimuihni kahwanbara lulki swiras, traikaikisa nahki muni kli witinra bukaia. Dusakakuhbra nani raiaba lika witin nani kau saurasa Dawan mawanra aiwalka naniwal. Tasba uplika nani mita saura dadaukra nanira misbara kaikisa sakuna saurkara lika latwan kaikisa. Jisas lika saura dadaukrara latwan kaikisa an saurkara misbara kaikisa.". — The Desire of Ages, p. 462.
Praidi
Lih mairin kati 2
MAKABANKA LUAN NANI BA LAKI KAIKS
1. Parisi nani mita Jisasra kahwaia kiuka mankanba dukiara aisas
2. Jû nani mawanwalba dia makabiwalan Lâ dukiara?
3. Mairinra dusa kuhbikan nani dia selp aiwinakat aitanka brin?
4. Nahki Jisas mita mairkara bilakaikanka an padin laka yaban?
5. Nahki yang Jisas baku walki kahwanbawina bukaia sna?