PASIUNA
Karong tuiga, tun-an nato ang upat ka mga leksyon Ang Ebanghelyo Sumala kang Juan. Tungod sa kaligdong, ang tagsulat sa ikaupat nga ebanghelyo wala magpaila sa iyang kaugalingon, ni maghisgot sa iyang kaugalingon nga usa sa duha ka tinon-an nga una nga misunod kang Jesus (Juan 1:37). Hinonoa, siya nagtumong ngadto sa “laing tinon-an,” “kanang tinon-an,” “ang tinon-an . . . nga iyang gihigugma,” “ang tinon-an nga gihigugma ni Jesus,” ug “ang tinon-an nga nagpamatuod niining mga butanga” (Juan 18:15; 19:26;21:20, 23, 24). Ang kamatuoran nga ang ubang inila mga tinon-an gihisgotan sa ngalan samtang ang ngalan ni Juan wala iapil, daw nagpaila nga siya mao gayud ang nagsulat niana nga ebanghelyo.
Sumala sa Espiritu sa Tagna, ang tagsulat sa ikaupat nga ebanghelyo mao si Juan, “ang tinon-an nga gihigugma ni Jesus.” Usa siya sa tulo ka tinon-an nga nakasaksi sa himaya ni Cristo didto sa bukid sa pagkausab sa dagway ug sa Iyang pag-antus sa tanaman diha-diha dayon sa wala pa Siya dakpa. Ang iyang kinabuhi maoy talagsaong ehemplo nga nagpakita kon sa unsang paagi ang gahum sa Dios bug-os nga makapausab sa usa ka “anak sa dalugdog” ngadto sa usa ka tawo nga mahigugmaong disposisyon ug lawom nga espirituhanong pagsabot.
“Si Juan midutdot kang Cristo sama sa paras nga mikapot sa halangdong haligi. Tungod sa iyang Agalon iyang gisagubang ang mga katalagman sa hukmanan ug nagpabilin duol sa krus, ug sa mga balita nga si Cristo nabanhaw, siya midali ngadto sa lubnganan, diha sa iyang kadasig iyang giunahan bisan ang madasigon nga si Pedro.
“Ang masaligon nga gugma ug dili hakog nga debosyon nga gipakita sa kinabuhi ug kinaiya ni Juan nagpresentar ug mga leksyon nga dili matukib nga bili ngadto sa Cristohanong iglesia. Si Juan wala sa natural makabaton sa mahigugmaon nga kinaiya nga napadayag diha sa iyang ulahi nga kasinatian. Sa kinaiya aduna siyay seryoso nga mga depekto. Siya dili lamang mapahitas-on, presentado sa kaugalingon, ug ambisyoso alang sa kadungganan, kon dili mainiton, ug masuk-anon ubos sa kadaut. Siya ug ang iyang igsoong lalaki gitawag ug ‘mga anak sa dalugdog.’ Dautan ug taras, ang tinguha alang sa pagpanimalos, ang espiritu sa pagpanaway, ang tanan anaa sa hinigugma nga tinon-an. Apan ilalum niining tanan ang diosnong Magtutudlo nakamatikod sa mainiton, sinsero, mahigugmaong kasing-kasing. Gibadlong ni Jesus kining pagpangita sa kaugalingon, nagpakyas sa iyang mga ambisyon, nagsulay sa iyang pagtoo. Apan Siya nagpadayag ngadto kaniya nianang gipangandoy sa iyang kalag—ang katahum sa pagkabalaan, ang makapabag-o nga gahum sa gugma.” — The Acts of the Apostles, pp. 539, 540.
Ang tanang karaang pagbulot-an nag-ingon nga ang ebanghelyo ni Juan gisulat sa Efeso sa A. D. 90 o mas sayo pa. Ang tinon-an gisulod sa usa ka kawa nga nagbukal nga lana ug nakalingkawas sa kamatayon sa usa ka milagrosong paagi, ug pagkahuman gilabug ngadto sa isla sa Patmos (Bugna 1:9). Didto iyang gisulat ang Pinadayag. Ang pagsaka ni Nerva ngadto sa trono (A. D. 96) naghimo nga posible alang kaniya sa pagbalik ngadto sa Efeso, diin gituohan nga siya nagpadayon sa pagpuyo hangtud sa iyang kamatayon sa panahon sa paghari ni Trajan (A. D. 98–117).
Hinaut nga ang Espiritu ni Cristo magagiya sa atong mga pagtuon niini nga tremestre, ug magtandog sa atong mga kasingkasing sa pagtubag sa Iyang gugma!
Ang Departamento sa Skwela Sabatika sa Konperencia Heneral
