Domingo
, Marso 2
1. MAGAKUHA UG ATENSYON
a. Human sa paggamit ug duha ka mga adlaw uban sa mga Samariahanon, diin man si Jesus miadto - ug kinsa ang nadani pinaagi niini nga balita? Juan 4:43–46.
“Ang balita sa pagbalik ni Cristo ngadto sa Cana sa wala madugay mikuyanap sa tibook Galilea, nga nagdala ug paglaum ngadto sa nanag-antus ug gisakit. Didto sa Capernaum ang mga balita nakadani sa atensyon sa usa ka Judeo nga halangdon nga tawo nga usa ka opisyal diha sa serbisyo sa hari.” – The Desire of Ages, p. 196.
b. Ngano nga ang opisyal miadto sa pagpakigta kang Jesus? Juan 4:47.
“Usa ka anak sa opisyal nag-antus gikan sa gituohan nga wala nay kaayohan nga sakit. Mga mananambal misurender na kaniya aron mamatay; apan sa dihang ang amahan nakadungog kang Jesus, siya determinado sa pagpangitag tabang gikan Kaniya.” - Ibid., p. 197.
Lunes
, Marso 3
2. USA KA TIMAILHAN SA PAGDUHADUHA
a. Ihulagway giunsa ni Cristo pagpadayag ang sulodnon nga pag-agulo sa kasingkasing diha sa halangdon nga tawo nga naghangyo Kaniya sa pag-ayo sa iyang anak nga lalake didto sa Capernaum. Juan 4:48.
“Ang bata hilabihan na ka luya, ug, gikahadlokan, nga dili na buhi hangtud sa iyang pagbalik; apan ang tawo nga halangdon nagabati nga kinahanglan nga sa personal iyang isulti ang iyang kahimtang. Siya naglaum nga ang pangalyupo sa usa ka amahan makapukaw sa kalooy sa Dakung Mananambal.
“Sa iyang pag-abut sa Cana iyang nakaplagan nga usa ka duot sa katawhan nagpalibut kang Jesus. Uban ang matinguhaon nga kasingkasing siya midutdot ngadto sa presensya sa Manluluwas. Ang iyang pagtoo naluya sa dihang iyang nakita lamang ang usa ka yano ug pamisti nga tawo, abugon ug gisul-ob sa pagbiyahe. Nagduhaduha siya nga kining Tawhana makahimo sa butang nga maoy iyang pangayoon Kaniya; apan nakahuha siya ug pagpakighinabi kang Jesus, nagtug-an sa iyang katuyoan, ug naghangyo sa Manluluwas sa pagkuyog kaniya ngadto sa iyang puloy-anan. Apan ang iyang kasub-anan nahibaloan ni Jesus. Sa wala pa mohawa ang opisyal sa iyang puloy-anan, ang Manluluwas nakakita na sa iyang kasakitan.
“Apan Siya nasayud usab nga ang amahan, diha sa iyang kaugalingon nga hunahuna, naghimo ug mga kondisyon mahitungod sa iyang pagtoo diha kang Jesus. Gawas nga ang iyang hangyo ihatag, siya dili modawat Kaniya ingon nga Mesias. . . .
“Bisan pa sa tanan nga ebedensya nga si Jesus mao ang Cristo, ang nangamuyo determinado sa paghimo sa iyang pagtoo diha Kaniya nga kondisyonal diha sa paghatag sa iyang kaugalingon nga hangyo.”- The Desire of Ages, pp. 197, 198.
b. Sa dihang matintal sa pagpangayo ug mga ilhanan, unsay angay natong hinumdoman? Mateo 12:38, 39.
“Si Cristo nasakitan nga ang Iyang kaugalingon nga katawhan, kang kinsa ang Sagrado nga mga Oraculo gitugyan, mapakyas sa pagpaminaw sa tingog sa Dios nagpakigsulti ngadto kanila diha sa Iyang Anak.”- Ibid., p. 198.
“Ang katawhan gusto ug ilhanan, maingon sa kaadlawan ni Cristo. Unya ang Ginoo misulti kanila nga walay ilhanan nga igahatag kanila. Ang ilhanan nga igapakita karon ug sa kanunay mao ang pagbuhat sa Balaang Espiritu diha sa hunahuna sa magtutudlo, sa paghimo sa Pulong nga impresibo kon mahimo. Ang Pulong sa Dios dili usa ka patay, uga nga teoriya, kon dili espiritu ug kinabuhi. Si Satanas walay laing gusto kay sa pagdala sa mga hunahuna palayo gikan sa Pulong sa Dios, sa pagpangita ug pagdahum sa mga butang nga wala diha sa Pulong nga maoy ilang bation.”- Selected Messages, bk. 2, p. 95.
Martes
, Marso 4
3. MAGKALAHI NGA MGA KAGAWIAN
a. Isaysay ang kalainan tali sa mga Judeo ug Samariahanon mahitungod sa ilang pagtoo ni Jesus. Marcos 6:2-6; Juan 4:40-42.
“Daw unsa ka matinguhaon ang mga Fariseo sa pagproyba nga si Cristo usa ka maglilimbong! Giunsa nila ang pagbantay sa Iyang matag pulong, naninguha sa sayop nga paghulagway ug sayop nga paghubad sa tanan Niyang mga pulong! Ang garbo ug pagpihig ug kasuko nagsira sa matag agianan sa kalag batok sa pagpamatuod sa Anak sa Dios. Sa diha nga Siya sa katin-aw nagbadlong sa ilang pagkadautan ug mipahayag nga ang ilang mga buhat nagpamatuod kanila ingon nga mga anak ni Satanas, sila sa kasuko misalikway sa akusasyon, nga nag-ingon, ‘dili ba husto kami sa among pag-ingon nga ikaw Samariahanon, ug giyawaan?’ ”— Selected Messages, bk. 1, p. 70.
“Ang Manluluwas nagtandi niining masukitsukiton nga pagkawalay pagtoo uban sa yano nga pagtoo sa mga Samariahanon, nga wala mangayo ug milagro o ilhanan. Ang Iyang pulong, ang kanunay nga ebidensiya sa Iyang pagka-Dios, adunay usa ka makapadani nga gahum nga mosulod sa ilang mga kasingkasing.”—The Desire of Ages, p. 198.
“Bisan tuod [si Jesus] usa ka Judeo, Siya gawasnon nga nakig-uban sa mga Samariahanon, nga nagsalikway sa Fariseo nga mga kostumbre sa mga Judeo mahitungod niining tinamay nga katawhan. Siya natulog ilalum sa ilang mga atop, mikaon diha sa ilang mga lamesa, ug nagpanudlo sa ilang mga kadalanan.”—The Acts of the Apostles, p. 19.
b. Ihulagway ang kasinatian sa daghan nga misulti sa presente nga kamatuoran ngadto sa nag-angkon nga katawhan sa Dios latas sa mga katuigan. Jeremias 20:8–11.
“Ang tanang argumento nga gihimo batok kang Cristo gipasukad diha sa kabakakan. Mao usab sa kaso ni Esteban, ug ni Pablo. Apan ang labing huyang ug labing dili kasaligan nga mga pahayag nga gihimo diha sa sayup nga panig adunay inpluwensya, tungod kay dihay daghan kaayo kinsang mga kasingkasing wala mabalaan, kinsa nagtinguha niadto mga pahayag ingon nga tinuod. Kanang mga ingon kanunay nga matinguhaon sa pagkuha diha sa bisan unsa nga gituohan nga sayop o kasaypanan niadtong nagsulti kanila sa dili magustohan nga kamatuoran.
“Dili nato ikatingala kon ang dautang mga pangagpas sa kahangol gisakmit ingon nga dili kaduhaduha-an nga mga kamatuoran niadtong adunay gana sa kabakakan. Ang mga magsusupak ni Cristo balik-balik nga napalibog ug napahilom sa kaalam sa Iyang mga pulong; apan sila sa gihapon mahinamon nga naminaw sa matag hungihong, ug nakakaplag ug pipila ka pasangil aron sa pagpangutana Kaniya pag-usab uban sa masupakon nga mga pangutana.”— Selected Messages, bk. 1, pp. 70, 71.
Mierkules
, Marso 5
4. USA KA HANGYO DIHA SA PAGPAUBOS
a. Sa dihang ang pagtoo sa halangdon nga tawo mikupot kang Cristo, giunsa niya pagsubli ang iyang hangyo? Juan 4:49.
“Sama sa siga sa kahayag, ang mga pulong sa Manluluwas ngadto sa tawo nga halangdon nagpadayag sa iyang kasingkasing. Iyang nakita nga ang iyang mga motibo diha sa pagpangita kang Jesus usa ka hinakog. Ang iyang paling-paling nga pagtoo nadayag ngadto kaniya diha sa tinuod nga kinaiya niini. Diha sa iyang halawom nga kabalisa iyang naamgohan nga ang iyang pagduhaduha mahimong hinungdan pagkawala sa kinabuhi sa iyang anak. Siya nahibalo nga siya anaa sa atubangan sa Usa nga makahimo sa pagbasa sa mga hunahuna, ug kang kinsa ang tanang butang posible. . . . Ang iyang pagtoo migunit kang Cristo sama sa gihimo ni Jacob, sa dihang, nakigbugno sa Manolonda, siya mituaw, Dili ko Ikaw buhian, gawas nga Imo akong panalanginan.’ Genesis 32:26.”—The Desire of Ages, p. 198.
b. Unsay atong makat-onan gikan sa gibuhat ni Jesus imbes nga moadto sa puloy-anan sa tawo nga halangdon? Juan 4:50.
“Si Jesus adunay mas dakung gasa nga ihatag. Siya nagtinguha, dili lamang sa pag-ayo sa bata, kondili sa paghimo sa opisyal ug sa iyang panimalay nga mga umalambit sa mga panalangin sa kaluwasan, ug sa pagdagkot ug kahayag sa Capernaum, nga sa dili madugay mahimong uma sa Iyang kaugalingong mga kahago. Apan ang halangdon nga tawo kinahanglan makaamgo sa iyang panginahanglan sa dili pa siya magtinguha sa gracia ni Cristo. Kini nga alagad sa palasyo nagrepresentar sa daghan sa iyang nasud. Sila interesado diha kang Jesus tungod sa hakog nga mga motibo. Naglaum sila nga makadawat ug espesyal nga kaayohan pinaagi sa Iyang gahum, ug ilang gipunting ang ilang pagtoo sa paghatag niining temporaryo nga pabor; apan sila ignorante mahitungod sa ilang espirituhanong sakit, ug wala makakita sa ilang panginahanglan sa balaanong gracia. . . .
“Ang Manluluwas dili makapalayo gikan sa kalag nga migunit Kaniya, nangaliyupo sa iyang daku nga panginahanglan. ‘Lakaw sa imong dalan,’ Siya miingon; ‘ang imong anak buhi.’ Ang halangdon nga tawo mibiya sa presensya sa Manluluwas uban ang kalinaw ug kalipay nga wala pa niya mahibaloi kaniadto. Dili lamang siya nagtoo nga ang iyang anak mamaayo, apan uban sa malig-on nga pagsalig siya misalig kang Cristo ingon nga mao ang Manunubos.”— Ibid., pp. 198, 199.
“Kitang tanan nagtinguha sa diha-diha ug direkta nga mga tubag sa atong mga pag-ampo, ug matintal nga mawad-an sa kadasig kon ang tubag malangan o moabut sa usa ka wala makita nga porma. Apan ang Dios maalam ug maayo kaayo nga motubag sa atong mga pag-ampo kanunay sa oras ug sa paagi nga gusto nato. Iyang buhaton ang labaw pa ug mas maayo alang kanato kay sa pagtuman sa tanan natong mga pangandoy. . . . Kini nga mga kasinatian nga nagsulay sa pagtoo para sa atong kaayohan.”— The Ministry of Healing, pp. 230, 231.
Huebes
, Marso 6
5. KAAYOHAN UG KALUWASAN
a. Diha sa unsang paagi nga giayo ni Jesus ang anak sa tawo nga halangdon? Juan 4:51-53. Unsang katinuoran nga kini magtawag sa hunahuna? Efeso 3:20, 21.
“Diha sa maong takna sa dihang ang pagtoo sa amahan nakabaton sa kasiguroan, ‘Ang Imong anak buhi,’ ang diosnong gugma mitandog sa himatyon nga bata.”—The Desire of Ages, p. 199.
“Sa samang takna ang mga nagbantay tupad sa himatyon nga bata sa balay sa Capernaum nakakita ug kalit ug misteryosong kausaban. Ang landong sa kamatayon gikuha gikan sa nawong sa nag-antus. Ang pagkawala sa hilanat maoy naghatag ug lugar sa masanag nga pagbalik sa maayong panglawas. Ang madulom nga mga mata nga gihayagan uban sa salabutan, ug ang kalig-on mibalik ngadto sa nagluya, niwang nga hitsura. Walay mga timailhan sa iyang sakit nga nagpabilin diha sa bata. Ang iyang nagdilaab nga unod nahimong humok ug gisingot, ug nahinanok siya sa hilom nga pagkatulog. Ang hilanat mibiya kaniya diha sa init kaayo nga adlaw. Ang pamilya nahingangha, ug daku kaayo ang pagmaya.”—Ibid.
b. Giunsa pagtubag ni Jesus ang si bisan kinsa nga nangayo ug tabang? Mateo 11:28–30.
“Ang Manluluwas dili makapalayo gikan sa kalag nga motapot Kaniya, nga mangamuyo sa iyang dakung panginahanglan.”— Ibid., p. 198.
“Gibati ba nimo nga tungod kay ikaw usa ka makasasala dili ka makalaum sa pagdawat ug panalangin gikan sa Dios? Hinumdomi nga si Cristo mianhi sa kalibutan aron sa pagluwas sa mga makasasala. Wala kitay unsa man nga makarekomendar kanato ngadto sa Dios; ang pangamuyo nga atong mahimo karon ug sa kanunay mao ang atong walay mahimo nga kahimtang, nga naghimo sa Iyang matuboson nga gahum nga kinahanglanon. Magsalikway sa tanang pagsalig sa kaugalingon, kita mahimong motan-aw ngadto sa krus sa Kalbaryo ug moingon:
“‘Sa akong kamot walay bili nga akong dad-on; Sa Imong krus lamang ako mogunit.’”—The Ministry of Healing, p. 65.
Biernes
, Marso 7
PERSONAL SUBLI NGA MGA PANGUTANA
1. Ngano nga ang mga propeta sa kasagaran dili kaayo gidawat sa ilang kaugalingon nga mga yuta?
2. Unsang mga pulong sa halangdon nga tawo ang nagpadayag sa iyang pagkawalay pagtoo?
3. Unsay reaksyon ni Cristo ngadto sa pagkawalay pagtoo sa mga tawo?
4. Kinsa ang nagpakitag mas dakung pagtoo kang Jesus — ang mga Judeo o ang mga Gentil?
5. Unsa ang gisaad ni Jesus sa tanan nga midawat sa Iyang pagdapit?