Domingo
, Enero 5
1. ANG PAMATUOD NI JUAN BAUTISTA
a. Unsay gipahayag ni Juan Bautista mahitungod kang Jesus? Juan 1:15-18.
b. Giunsa ni Juan pagpaila ang iyang kaugalingon ngadto sa relihiyoso nga mga lider? Juan 1:19-23. Unsang tagna ang iyang gituman - ug unsaon nato ang pagdugtong ngadto niini? Isaias 40:3-5.
“Sa matag yugto sa kasaysayan sa yuta ang Dios adunay Iyang mga ahensya aron sa pagduso sa Iyang buhat, nga kinahanglan buhaton diha sa Iyang natudlo nga paagi. Si Juan Bautista adunay usa ka pinasahi nga bulohaton, nga alang niini siya natawo ug nga niini siya gitudlo—ang buhat sa pag-andam sa dalan sa Ginoo. . . .
“[Ang iyang ministeryo sa kamingawan] maoy usa ka labing tukma, literal nga katumanan sa tagna.”— The Southern Watchman, Marso 21, 1905.
“Ang Ginoo mihatag [kang Juan Bautista] sa iyang mensahe. Miadto ba siya sa mga sacerdote ug mga pangulo ug nangutana kon mahimo ba niyang imantala kini nga mensahe? — Wala, ang Dios nagbutang kaniya bulag gikan kanila aron dili siya mainpluwensyahan sa ilang espiritu ug pagtudlo. Siya mao ang tingog sa usa nga nagsinggit didto sa kamingawan, [Isaias 40:3–5 gikutlo]. Mao kini ang mensahe nga kinahanglan ihatag ngadto sa atong katawhan; kita haduol na sa katapusan sa panahon, ug ang mensahe mao, Hawani ang dalan sa Hari; kuhaa ang mga bato; ipataas ang usa ka sumbanan alang sa katawhan. Ang katawhan kinahanglan nga pukawon. Dili na karon ang panahon sa pagsinggit ug pakigdait ug kasigurohan.”— Selected Messages, bk. 1, p. 410.
Lunes
, Enero 6
2. USA KA BULOHATON SA SAKRIPISYO
a. Sa dihang si Jesus miduol ngadto kang Juan aron magpabautismo, giunsa ni Juan pag-ila Siya ug pagpamatuod sa Iyang misyon ngadto sa publiko? Juan 1:29, 34. Unsang tagna ang natuman niini? Isaias 53:4-7.
“Si Cristo mao ang Manunubos sa tawo sa sinugdanan sa kalibutan ingon sa karon. Sa wala pa Niya gibistihan ang Iyang pagka-Dios uban sa pagkatawhanon ug mianhi sa atong kalibutan, ang mensahe sa ebanghelyo gihatag ni Adan, ni Seth, ni Enoch, ni Methuselah, ug ni Noe. Si Abraham sa Canaan ug si Lot didto sa Sodoma nagdala sa mensahe, ug gikan sa kaliwatan ngadto sa kaliwatan ang matinumanong mga mensahero nagmantala sa Usa nga moabutay. Ang mga seremonyas sa ekonomiya sa mga Judeo gimugna ni Cristo mismo sa Iyang kaugalingon. Siya ang pundasyon sa ilang sistema sa mga halad nga sakripisyo, ang dakung anti-tepo sa tanan nilang relihiyosong serbisyo. Ang dugo nga giula samtang ang mga halad nga gihalad nagtudlo ngadto sa sakripisyo sa Cordero sa Dios. Ang tanan nga tipikal nga mga halad natuman diha Kaniya.”—Christ’s Object Lessons, p. 126.
b. Giunsa ni Juan pagpaila si Jesus ngadto sa iyang mga tinon-an? Juan 1:35, 36. Unsay epekto sa iyang mga pulong diha kanila—ug unsay sunod nga nahitabo sa iyang kaugalingong kinabuhi? Juan 1:37.
“Sa misunod nga adlaw [human sa bautismo ni Cristo], samtang duha ka mga tinon-an nagtindog sa duol, si Juan nakakita na usab kang Jesus taliwala sa mga tawo. Ang nawong sa propeta nadan-agan pag-usab sa himaya gikan sa Dili Makita, samtang siya misinggit, ‘Tan-awa ang Cordero sa Dios!’ Ang mga pulong nakapaukyab sa mga kasingkasing sa mga tinon-an. Wala nila sa hingpit masabti sila. Unsay kahulogan sa ngalan nga gihatag ni Juan ngadto Kaniya— ‘ang Cordero sa Dios’? Si Juan mismo wala magsaysay niini. Gibiyaan nila si Juan, miadto sila sa pagpangita kang Jesus.”— The Desire of Ages, p. 138.
“Gipahibalo ni Juan ang iyang mga tinon-an nga si Jesus mao ang gisaad nga Mesias, ang Manluluwas sa kalibutan. Samtang naghinapos ang iyang buluhaton, iyang gitudloan ang iyang mga tinon-an sa pagtan-aw kang Jesus, ug magsunod Kaniya ingon nga Dakong Magtutudlo. Ang kinabuhi ni Juan masulub-on ug madumilion sa kaugalingon. Iyang gipahibalo ang unang pag-anhi ni Cristo, apan wala tugoti nga makasaksi sa Iyang mga milagro, ug pagpahimulos sa gahum nga gipakita Niya. Sa diha nga si Jesus kinahanglan nga magtukod sa Iyang kaugalingon ingon nga usa ka magtutudlo, si Juan nahibalo nga siya sa iyang kaugalingon kinahanglang mamatay. Ang iyang tingog panagsa ra madungog, gawas didto sa kamingawan. Ang iyang kinabuhi nag-inusara. Wala siya moipon sa pamilya sa iyang amahan, sa pagpahimulos sa ilang katilingban, apan gibiyaan sila aron matuman ang iyang misyon.”— Early Writings, p. 154.
Martes
, Enero 7
3. UNANG MGA TINON-AN NI JESUS
a. Kinsa ang pipila sa unang mga tinon-an ni Jesus? Mateo 4:18, 21. Unsang interes diha kang Cristo ang ilang gipakita ug unsa ka dugay ang ilang unang pakigtagbo uban Kaniya? Juan 1:38, 39.
“Usa sa duha [nga misunod kang Jesus] mao si Andres, ang igsoon ni Simon; ang usa mao si Juan nga ebanghelista. Kini ang unang mga tinon-an ni Cristo. Gitandog sa dili-mapugngang kadasig, sila misunod kang Jesus—matinguhaon sa pagsulti uban Kaniya, apan nahingangha ug mahilom, nawala sa hilabihan nga kamahinungdanon sa hunahuna, ‘Kini ba ang Mesias?’
“Si Jesus nahibalo nga ang mga tinon-an nagsunod Kaniya. Sila ang una nga mga bunga sa Iyang ministeryo, ug dihay kalipay sa kasingkasing sa diosnong Magtutudlo samtang kini nga mga kalag misanong sa Iyang gracia. Apan milingi, Siya nangutana lamang, ‘Unsa may inyong gipangita?’ Iya silang gipasagdan nga gawasnon sa pagbalik o sa pagsulti sa ilang tinguha.
“Usa ra ka katuyoan ang ilang naamgohan. Usa ka presensya mipuno sa ilang panghunahuna. Sila mipahayag, ‘Rabbi, . . . asa Ka nagpuyo?’ Diha sa mubo nga pakighinabi sa daplin sa dalan dili nila madawat kanang ilang gitinguha. Nangandoy nga makig-uban kang Jesus nga sila ra, nga molingkod diha sa Iyang tiilan, ug maminaw sa Iyang mga pulong. . . .
“Kon si Juan ug Andres nakabaton pa sa dili matinuohon nga espiritu sa mga sacerdote ug mga magmamando, dili unta sila makaplagan nga mga magtutuon sa tiilan ni Jesus. Moduol unta sila Kaniya ingon nga mga kritiko, aron sa paghukom sa Iyang mga pulong. Daghan ang sa ingon nagsira sa pultahan sa labing bililhon nga mga kahigayonan. Apan dili ingon niana kining unang mga tinon-an. Sila mitubag sa tawag sa Balaang Espiritu diha sa pagwali ni Juan Bautista. Karon ilang naila ang tingog sa langitnong Magtutudlo. Alang kanila ang mga pulong ni Jesus puno sa ka fresko ug kamatuoran ug katahum. Ang usa ka balaan nga kahayag gipadan-ag diha sa pagtudlo sa mga Kasulatan sa Daang Tugon. Ang daghang bahin sa mga tema sa kamatuoran mibarug diha sa bag-o nga kahayag.”— The Desire of Ages, pp. 138, 139.
b. Unsa ang gibuhat sa unang mga tinon-an sa wala madugay human mahimamat si Jesus? Juan 1:41, 42.
“Si Andres nagtinguha sa paghatag sa kalipay nga mipuno sa iyang kasingkasing. Milakaw aron sa pagpangita sa iyang igsoon nga si Simon, siya misinggit, ‘Among nakaplagan ang Mesias.’ Si Simon wala na magpaabut ug ikaduha nga tawag. Siya usab nakadungog sa pagwali ni Juan Bautista, ug siya midali ngadto sa Manluluwas.”— Ibid., p. 139.
Mierkules
, Enero 8
4. PAGGUBA SA PAGPIHIG
a. Ihubit unsay nahitabo sa dihang si Jesus nag-inbita sa sunod nga tinon-an aron mosunod Kaniya. Juan 1:43-45.
“Si Felipe misunod sa mando, ug dihadiha dayon siya usab nahimong usa ka magbubuhat alang kang Cristo. Si Felipe mitawag kang Natanael.”- The Desire of Ages, p. 139.
b. Unsay atong makat-onan gikan sa paagi nga nakahimo kang Cristo sa pagdaug sa pag-ukon-ukon ni Natanael? Juan 1:46-49.
“Samtang si Natanael mitan-aw kang Jesus, siya nabalo. Kini bang tawhana, nga nagdala sa mga timaan sa kahago ug kakabus, mao ang Mesias? Apan si Natanael dili makadesisyon sa pagsalikway kang Jesus, tungod kay ang mensahe ni Juan nagdala ug konbiksyon sa iyang kasingkasing.
“Sa panahon nga si Felipe nagtawag kaniya, si Natanael miadto sa usa ka hilom nga kakahoyan aron sa pagpamalandong sa pagpahibalo ni Juan ug sa mga tagna mahitungod sa Mesias. Siya nag-ampo nga kon ang gipahibalo ni Juan mao ang manluluwas, kini mahimo nga ipahibalo kaniya, ug ang Espiritu Santo mokonsad diha kaniya uban sa kasigurohan nga ang Dios miduaw sa Iyang katawhan ug nagpatindog ug usa ka sungay sa kaluwasan alang kanila. . . .
“‘Si Jesus mitubag ug miingon ngadto kaniya, Sa wala pa si Felipe magtawag kanimo, sa dihang didto ka sa ilalum sa kahoyng higera, nakita ko na ikaw.’
“Paigo na. Ang balaang Espiritu nga nagpamatuod ngadto kang Natanael diha sa iyang nag-inusarang pag-ampo ilalum sa kahoyng higera karon misulti kaniya diha sa mga pulong ni Jesus. Bisag nagduhaduha, ug mitugyan sa pag-ayad, si Natanael miduol kang Cristo uban sa usa ka matinuoron nga tinguha alang sa kamatuoran, ug karon ang iyang tinguha gitagbo. Ang iyang pagtoo milabaw pa nianang sa usa nga midala kaniya ngadto kang Jesus. Siya mitubag ug miingon, ‘Rabbi, Ikaw mao ang Anak sa Dios; Ikaw mao ang Hari sa Israel.’
“Kon si Natanael misalig pa sa mga rabbi alang sa paggiya, dili gayud niya makaplagan si Jesus. Pinaagi sa pagkakita ug paghukom sa iyang kaugalingon nga siya nahimong tinon-an. Busa sa kahimtang sa daghan karon diin ang pag-ayad nagpugong gikan sa maayo. Daw unsa ka lahi gayud ang resulta kon sila ‘moanhi ug makakita’!
“Samtang sila misalig sa giya sa tawhanong katungod, walay makadangat ngadto sa usa ka makaluwas nga kahibalo sa kamatuoran. Sama kang Natanael, kinahanglan natong tun-an ang pulong sa Dios alang sa atong kaugalingon, ug mag-ampo alang sa paglamdag sa Balaang Espiritu. Siya nga nakakita kang Natanael ilalum sa kahoyng higera makakita kanato diha sa sekreto nga dapit sa pag-ampo. Ang mga manolonda gikan sa kalibutan sa kahayag haduol niadtong kinsa diha sa pagpaubos nangita sa diosnong paggiya.”— Ibid., pp. 139–140.
Huebes
, Enero 9
5. USA KA NAABLIHAN NGA LANGIT
a. Unsay gisaad ni Cristo kang Natanael - ug ngano? Juan 1:50, 51.
“[Juan 1:50, 51 gikutlo.] Dinhi si Cristo sa tinud-anay nag-ingon, Sa tampi sa Jordan ang kalangitan naablihan, ug ang Espiritu mikunsad sa ibabaw kanako sama sa usa ka salampati. Kadto nga talan-awon usa ka timaan nga Ako mao ang Anak sa Dios. Kon ikaw motoo Kanako ingon nga mao, ang imong pagtoo mapabuhi. Imong makita nga ang mga langit naablihan, ug dili na gayud pagasirhan. Akong giablihan sila nganha kanimo. Ang mga manolonda sa Dios nagakayab, nga nagadala sa mga pag-ampo sa mga nanginahanglan ug naguol ngadto sa Amahan sa itaas, ug nagakanaug, nga nagadala ug panalangin ug paglaum, kadasig, tabang, ug kinabuhi, ngadto sa mga anak sa mga tawo.”— The Desire of Ages, pp. 142, 143.
b. Unsay mahitabo kon atong dawaton si Cristo? Juan 4:14; Bugna 22:17.
“Sa dihang ang usa magadawat sa kamatuoran diha sa gugma niini, iyang maipakita kini diha sa pagka-madanihon sa iyang paggawi ug sa tono sa iyang tingog. Siya magapahibalo nianang iyang nadungog, nakita, ug magkupot sa pulong sa kinabuhi, aron ang uban makabaton ug pakig-ambitay uban kaniya pinaagi sa kahibalo ni Cristo. Ang iyang pagpamatuod, gikan sa mga ngabil nga natandog uban sa usa ka buhi nga baga gikan sa halaran, maoy kamatuoran alang ngadto sa madawaton nga kasingkasing, ug magabuhat sa pagbalaan diha sa kinaiya. . . .
“Ang Dios makahimo sa pagkab-ut sa Iyang tumong sa pagluwas sa mga makasasala nga wala ang atong tabang; apan aron kita makaugmad ug kinaiya nga sama kang Cristo, kita kinahanglang makig-ambit sa Iyang buhat. Aron makasulod ngadto sa Iyang kalipay—ang kalipay sa pagkakita sa mga kalag nga natubos pinaagi sa Iyang sakripisyo—kinahanglan nga kita moapil sa Iyang mga bulohaton alang sa ilang katubsanan.”— Ibid., p. 142.
Biernes
, Enero 10
PERSONAL SUBLI NGA MGA PANGUTANA
1. Ngano nga si Juan Bautista gitawag ngadto sa kamingawan?
2. Unsaon nato sa pag-aplikar ang pagkinabuhi ni Juan dinhi sa atong kaugalingon?
3. Unsay atong makat-onan gikan kang Juan ug Andres sa dihang ilang nahimamat si Jesus?
4. Sa unsang paagi nga kita mapadasig pinaagi sa unang pagpahayag ni Natanael?
5. Unsay magpadayag kon tinuod ba o dili ang akong pagtoo diha kang Cristo?