Si Jesus ug si Juan Bautista SAG-ULOHON NGA BERSEKULO: “Siya kinahanglan motubo, apan ako kinahanglan magakubos” (Juan 3:30).
Gisugyot nga Basahon:
Testimonies for the Church, vol. 5, pp. 721–729.
“Si Juan Bautista gipahayag sa atong Manluluwas nga pinakadaku sa mga propeta. Apan unsa ka lahi ang sinultihan niining tawo sa Dios ug sa kadaghanan nga nagaangkon nga mga ministro sa krus. Sa dihang gipangutana kon siya si Cristo, si Juan mipahayag sa iyang kaugalingon nga dili takus bisan sa pagtangtang sa sandalyas sa iyang Agalon.”- Testimonies for the Church, vol. 5, p. 224.
1. USA KA PROBLEMA TALIWALA SA MGA TINON-AN Domingo, Pebrero 9
a. Unsang pangutana ang mitungha taliwala sa mga tinon-an ni Juan ug sa mga Judeo? Juan 3:25.“Ang mga tinon-an ni Juan nagatan-aw uban sa pangabugho diha sa nagtubo nga pagkainila ni Jesus. Sila mibarug nga andam sa pagsaway sa Iyang buhat, ug sa wala madugay sila nakakaplag ug higayon. Mitungha ang usa ka pangutana tali kanila ug sa mga Judeo kon ang bautismo ba nakabenepisyo sa paghinlo sa kalag gikan sa sala; sila nag-ingon nga ang bautismo ni Jesus lahi kaayo kay nianang sa kang Juan. Sa wala madugay sila nakiglalis sa mga tinon-an ni Cristo bahin sa porma sa mga pulong nga angay gamiton diha sa pagbautismo, ug sa katapusan bahin sa katungod sa naulahi sa pagbautismo sa tanan.”— The Desire of Ages, p. 178.b. Giunsa pagpahayag sa mga tinon-an ni Juan ang ilang kasina sa buhat ni Cristo — ug unsa nga halangdon nga tubag ang iyang gihatag? Juan 3:26, 27.“Si Juan sa kinaiya adunay mga kasaypanan ug mga kahuyang nga komon sa tawo, apan ang paghikap sa diosnong gugma nakapausab kaniya. Nagpuyo siya sa usa ka palibut nga wala mahugawi sa kahakog ug ambisyon, ug ibabaw sa tanang inalisngaw sa pangabugho. Wala siya magpakitag simpatiya sa pagkadiskontento sa iyang mga tinon-an, apan gipakita kon unsa ka tin-aw nga nasabtan niya ang iyang relasyon ngadto sa Mesias, ug unsa ka malipayon nga iyang pag-abiabi sa Usa nga alang kaniya iyang giandam ang dalan.”- Ibid., p. 179.
2. ANG MISYON NI JUAN Lunes, Pebrero 10
a. Giunsa ni Juan pagpakita nga iyang nasabtan ang iyang misyon? Juan 3:28, 29.“Si Juan nagrepresentar sa iyang kaugalingon ingon nga higala nga nagabuhat ingon nga usa ka mensahero tali sa kaslonon nga mga panig, nag-andam sa dalan alang sa kasal. Sa dihang ang pamanhonon nakadawat na sa iyang pangasaw-onon, ang misyon sa higala nahimo na. Siya magmaya diha sa kalipay niadtong kinsang panaghiusa iyang gipatunhay. Mao man si Juan gitawag aron sa paggiya sa mga tawo ngadto kang Jesus, ug maoy iyang kalipay ang pagsaksi sa kalampusan sa bulohaton sa Manluluwas.”- The Desire of Ages, p. 179.b. Ihulagway ang bulohaton ni Juan - ug ang ato. Juan 1:23, 29.“Nagtan-aw diha sa pagtoo ngadto sa Manunubos, si Juan misaka ngadto sa gihabugon sa pagsalikway sa kaugalingon. Wala siya magtinguha sa pagdani sa mga tawo ngadto sa iyang kaugalingon, kondili sa pagtuboy sa ilang mga hunahuna nga mas taas ug mas taas pa, hangtud nga sila makapahulay diha sa Cordero sa Dios. Siya sa iyang kaugalingon usa lamang ka tingog, usa ka singgit sa kamingawan. Karon uban sa kalipay iyang gidawat ang kahilom ug ang kangiub, aron ang mga mata sa tanan maliso ngadto sa Kahayag sa kinabuhi.“Kadtong mga matinud-anon sa ilang pagtawag ingon nga mga mensahero sa Dios dili mangita ug dungog alang sa ilang kaugalingon. Ang gugma sa kaugalingon lamyon diha sa gugma alang kang Cristo. Walay panag-indigay nga makadaut sa hamili nga kawsa sa ebanghelyo. Sila makasabut nga maoy ilang buluhaton ang pagmantala, sama sa gibuhat ni Juan Bautista, ‘Tan-awa ang Cordero sa Dios, nga nagakuha sa sala sa kalibutan.’ Juan 1:29. Ilang ituboy si Jesus, ug uban Kaniya ang tawo matuboy. ‘Mao kini ang giingon sa hataas ug Usa nga halangdon nga nagapuyo sa walay katapusan, kansang ngalan mao ang Balaan; nagapuyo ako sa hataas ug balaan nga dapit, uban usab kaniya nga mahinulsulon ug mapaubsanon sa espiritu, aron sa pagpabuhi sa espiritu sa mapaubsanon, ug sa pagpabuhi sa kasingkasing sa mahinulsolon.’ Isaias 57:15.”—Ibid., pp. 179, 180.“Ayaw pangitaa ang imong kaugalingong kalipayan ug kasayon, kon dili tinguhaa nga mahibalo ug pagbuhat sa kabubut-on sa Dios. Himoa ang matag usa mangutana, Dili ba ako makatudlo ug pipila ka mga kalag ngadto sa Cordero sa Dios, nga nagakuha sa sala sa kalibutan? Dili ba ako makapahumpay ug pipila nga naguol? Dili ba ako mahimong paagi sa pagluwas sa pipila ka kalag sa gingharian sa Dios? Gusto namo ang lawom nga paglihok sa Espiritu sa Dios sa atong mga kasingkasing, aron dili lamang kita makasiguro sa atong kaugalingon sa puti nga bisti, apan aron kita makainpluwensya sa uban nga ang ilang mga ngalan mahimong masulod sa basahon sa kinabuhi, nga dili na mapapas.”— Historical Sketch, p. 140.
3. ANG GASA SA ESPIRITU Martes, Pebrero 11
a. Giunsa sa kadaghanan sa katawhan pagsumbalik ngadto sa mensahe ni Cristo? Juan 3:32.“Ang mga tinon-an ni Juan nagpahayag nga ang tanan nga mga tawo nanagpanuol ngadto kang Cristo; apan uban sa mas matin-aw nga panan-aw, si Juan miingon, ‘Walay tawo nga midawat sa Iyang pagpamatuod;’ mao nga dyutay ang andam sa pagdawat Kaniya ingon nga Manluluwas gikan sa sala. Apan ‘siya nga magadawat sa Iyang panghimatuod magabutang sa iyang timaan niini, nga ang Dios matinuoron.’ Juan 3:33, R.V.”- The Desire of Ages, p. 181.b. Diha kang kinsa gihatag ang gasa sa Balaang Espiritu? Juan 3:34.“Kita makadawat sa gasa sa langit lamang sa dihang kita andam sa pagbasiyo sa kaugalingon. Dili kita makaila sa kinaiya sa Dios, o magadawat kang Cristo pinaagi sa pagtoo, gawas nga kita mouyon sa pagdala sa pagpasakop sa matag hunahuna ngadto sa pagsunod kang Cristo. Ngadto sa tanan nga nagahimo niini ang Balaang Espiritu igahatag sa walay sukod. Diha kang Cristo ‘nagapuyo sa pagkalawas ang bug-os nga kinatibuk-an sa pagka-Dios.’ Colosas 2:9, 10. R.V.” – Ibid.c. Sa unsang paagi ang yawi sa pagdawat sa mas daku nga sukod sa Balaang Espiritu sa dugang napadayag diha sa Kasulatan? Juan 14:15-17; Buhat 5:32.“Dili lamang kita moingon, ‘ako nagatoo,’ kon dili pagkinabuhi sa kamatuoran. Pinaagi sa pagpahiuyon ngadto sa kabubut-on sa Dios diha sa atong mga pulong, atong panglihok, atong kinaiya, nga atong proybahan ang atong koneksyon ngadto Kaniya. Sa dihang ang usa mobiya sa sala, nga mao ang paglapas sa kasugoan, ang iyang kinabuhi madala ngadto sa pagpakigharmoniya ngadto sa kasugoan, ngadto sa hingpit nga pagsunod. Mao kini ang buhat sa Balaang Espiritu. Ang kahayag sa pulong sa maminatngonon gitun-an, ang tingog sa konsensya, ang pagpakigbisug sa Espiritu, maghatag diha sa kasingkasing ug tinuod nga gugma alang kang Cristo, nga mihatag sa Iyang kaugalingon usa ka bug-os nga sakripisyo aron sa pagtubos sa tibook nga pagkatawo, lawas, kalag, ug espiritu. Ug ang gugma maipakita diha sa pagsunod. Ang linya sa kalainan mahimong matin-aw ug klaro tali niadtong nagahigugma sa Dios ug nagabantay sa Iyang mga kasugoan, ug kadtong wala magahigugma Kaniya ug nagasalikway sa Iyang mga kalagdaan.”- Testimonies for the Church, vol. 6, p. 92.
4. ANG BILI SA BAUTISMO Mierkules, Pebrero 12
a. Ngano nga mahinungdanon ang pagsabut sa lakang nga atong kuhaon alang kang Cristo sa dihang modesisyon nga magpabautismo? Juan 3:36.“Gawas kang Cristo, ang bautismo, sama sa uban nga serbisyo, maoy walay-pulos nga porma.”—The Desire of Ages, p. 181.“Dili na kinahanglan ang panaglalis kon ang bautismo ni Cristo o ang kang Juan ang makaputli gikan sa sala. Ang grasya ni Cristo mao ang naghatag ug kinabuhi sa kalag.”—Ibid.“Pinaagi lamang ni Cristo maangkon ang pagkadili mamalatyon. Si Jesus miingon: ‘Siya nga nagatoo sa Anak may kinabuhi nga walay katapusan: ug siya dili nga motoo sa Anak dili makakitag kinabuhi.’ Juan 3:36. Ang matag tawo mahimong mapanag-iya niining bililhon nga panalangin kon siya motuman sa mga kondisyon. Ang tanan ‘nga pinaagi sa pagpailub magapadayon diha sa maayong pagbuhat mangita sa himaya ug sa kadungganan ug sa pagkadili mamatay,’ makadawat ug ‘kinabuhing dayon.’ Roma 2:7.”— The Great Controversy, p. 533.“Ang bautismo maoy usa ka labing solemne nga pagsalikway sa kalibutan. Kadtong mga nabautismohan diha sa tulo ka pilo nga ngalan sa Amahan, sa Anak, ug sa Espiritu Santo, diha sa pagsugod sa ilang Cristohanong kinabuhi nagpahayag sa publiko nga sila mibiya sa pag-alagad kang Satanas ug nahimong mga sakop sa harianong pamilya, mga anak sa langitnong Hari.”—Testimonies for the Church, vol. 6, p. 91.b. Ipasabut ang makapakurat nga mga pulong ni Juan Bautista nga nagpadayag sa giladmon sa tinuod nga kinabuhing pagsalig nga gipaila pinaagi sa bautismo? Lucas 3:7, 8.“Gibutang ni Juan ang atsa sa gamut sa kahoy. Iyang gibadlong ang sala, walay kahadlok sa mga sangputanan, ug nag-andam sa dalan alang sa Cordero sa Dios.“Naapektuhan si Herodes samtang naminaw siya sa gamhanan, prangka nga mga pagpamatuod ni Juan, ug uban sa lawom nga interes siya nangutana kon unsa ang kinahanglan niyang buhaton aron mahimong iyang tinon-an. Si Juan nasayud sa kamatuoran nga hapit na niya pakaslan ang asawa sa iyang igsoon, samtang buhi pa ang iyang bana, ug matinud-anon misulti kang Herodes nga kini dili uyon sa balaod.”— Early Writings, p. 154.“Si Juan Bautista mitagbo sa sala uban sa dayag nga pagbadlong diha sa mga tawo nga mapaubsanong trabaho ug sa mga tawo nga tag-as ug hut-ong. Gipahayag niya ang kamatuoran ngadto sa mga hari ug mga halangdon, sila man maminaw o mosalikway niini. Siya misulti sa personal ug prangka.”— Selected Messages, bk. 2, p. 149.
5. USA KA MAALAMON NGA METODO Huebes, Pebrero 13
a. Diha sa pagkamatikod nga ang mga Fariseo naninguha sa paghimo ug krisis tali kang Juan ug sa Iyang kaugalingon, unsa may gihimo ni Jesus? Juan 4:1-3.“Si Jesus nahibalo nga [ang mga Fariseo] dili mopugong sa pagpaningkamot aron sa paghimo ug panagbahin tali sa Iyang kaugalingong mga tinon-an ug nianang kang Juan. Nasayod siya nga ang bagyo nagsingabot nga mobanlas sa usa sa labing daku sa mga propeta nga gihatag nganhi sa kalibutan. Nagtinguha sa paglikay sa tanang higayon sa dili pagsinabtanay o panagsumpaki, Siya sa hilom mihunong sa Iyang mga pagbuhat, ug mipahawa ngadto sa Galilea. Kita usab, samtang maunongon sa kamatuoran, kinahanglan nga maningkamot sa paglikay sa tanan nga mahimong modala ngadto sa panagsumpaki ug sayop nga pagsabot. Tungod kay sa dihang kini motungha, sila moresulta sa pagkawala sa mga kalag. Sa dihang ang mga sirkumstansya mahitabo nga maghulga sa paghimo ug pagkabahinbahin, kinahanglan atong sundon ang panig-ingnan ni Jesus ug ni Juan Bautista.”— The Desire of Ages, p. 181.b. Unsay angay natong makat-onan gikan sa gawi ni Juan aron sa paghupay sa krisis? Juan 3:30.“Sama sa mga tinon-an ni Juan, daghan ang nagabati nga ang kalampusan sa buhat nagdepende sa unang mga mamumuo. Ang pagtagad gitumong diha sa tawhanon imbes diha sa diosnon, ang pangabugho motungha, ug ang buhat sa Dios madaut. Ang usa nga dili angay nga pagapasidunggan matintal sa pagmanggad sa pagsalig sa kaugalingon. Dili siya makaamgo sa iyang pagsalig diha sa Dios. Ang mga tawo natudloan sa pagsalig diha sa tawo alang sa paggiya, ug sa ingon sila mahulog ngadto sa sayop, ug madala palayo sa Dios.“Ang buhat sa Dios dili magdala sa dagway ug superskripsiyon sa tawo. Matag karon ug unya ang Ginoo magdala ug lain-laing mga ahensya, nga pinaagi kang kinsa ang Iyang katuyoan sa labing maayo mamatuman. Malipayon sila nga andam sa pagpaubos sa kaugalingon, nga magaingon uban kang Juan Bautista, ‘Siya kinahanglan magatubo, apan ako kinahanglan magakunhod.’ ”—Ibid., p. 182.
PERSONAL SUBLI NGA MGA PANGUTANA Biernes, Pebrero 14
1. Nganong nasina ang mga tinon-an ni Juan sa buhat ni Cristo?2. Unsa may gipahayag ni Juan ngadto sa iya mga tinon-an?3. Alang sa unsa nga katuyoan nga ang gasa sa Espiritu Santo gihatag?4. Sa unsa nga ang bautismo makatuman sa matuod nga katuyoan niini?5. Unsay gibuhat ni Jesus ug ni Juan sa dihang ilang nakita ang katalagman sa usa ka krisis tali sa ilang mga tinon-an?