Domingo
, Enero 19
1. ANG TEMPLO NAHUGAWAN
a. Ihubit ang kahimtang nga nangibabaw didto sa templo sa Jerusalem diha sa sinugdanan sa publiko nga pag ministeryo ni Cristo. Juan 2:13, 14.
“Ang matag Judeo kinahanglang mobayad kada tuig ug tunga sa siklo ingon nga ‘usa ka lukat alang sa iyang kalag.’. . . Gawas pa niini, daku nga kantidad ang gidala isip mga halad nga kinabubut-on, nga ideposito diha sa panudlanan sa templo. Ug gikinahanglan nga ang tanan nga langyaw nga sensilyo kinahanglan nga ilisan alang sa usa ka sensilyo nga gitawag nga siklo sa templo, nga maoy gidawat alang sa pag-alagad sa sanctuaryo. Ang pag-ilis sa kuwarta naghatag ug kahigayonan sa pagpanglimbong ug pagpangilkil, ug kini nahimong makauulaw nga pamatigayon, nga maoy tinubdan sa kita sa mga sacerdote.
“Ang mga nagbaligya nagpangayo ug subra kaayo nga presyo sa mga hayop nga gibaligya, ug sila nakigbahin sa ilang ganansya sa mga sacerdote ug mga punoan, nga sa ingon nagpadato sa ilang kaugalingon sa gasto sa mga tawo.”— The Desire of Ages, p. 155.
b. Sa unsang paagi nga kini nakaapekto sa mga serbisyo sa templo? Ezekiel 22:26 (katapusang bahin).
“Daghang mga halad ang gihalad sa panahon sa pasko, ug ang mga halin sa templo daku kaayo. Ang misangpot nga kaguliyang nagpaila sa usa ka saba nga merkado sa baka kay sa sagrado nga templo sa Dios. Adunay madungog nga grabe nga paghinangyoay, ang pag-inga sa mga baka, ang pag-ungol sa mga carnero, ang huni sa mga salampati, nga sinagolan sa kinagilkil sa sensilyo ug masuk-anon nga panaglalis. Hilabihan ka daku kaayo ang kaguliyang nga ang mga magsisimba nasamok, ug ang mga pulong nga gitumong ngadto sa Labing Hataas natabonan sa kaguliyang nga misulong sa templo.”— Ibid.
Lunes
, Enero 20
2. PAGTAHOD DIHA SA BALAY SA DIOS
a. Giunsa pagtagad sa Dios ang dapit diin Iyang igapakita ang Iyang presensya - ug unsa ang Iyang una nga mando didto sa Bukid Sinai? Exodus 3:1-5; 19:12, 13.
“Sa dihang ang Ginoo mikanaug diha sa Bukid sa Sinai, ang dapit nakonsekrar pinaagi sa Iyang presensya. . . .Sa ingon gitudlo ang leksyon nga kon asa gani ang Dios magapakita sa Iyang presensya, ang maong dapit balaan.”- The Desire of Ages, pp. 155, 156.
b. Giunsa ni Cristo pagtagad ngadto sa pagpasipala sa templo? Juan 2:15, 16.
“Samtang si Jesus misulod sa templo, Iyang nakita ang tibook talan-awon. Nakita Niya ang dili patas nga mga transaksyon. Iyang nakita ang kagul-anan sa mga kabus, kinsa naghunahuna nga kon walay pagpaagas sa dugo walay kapasayloan sa ilang mga sala. Nakita niya ang gawas nga sawang sa Iyang templo nahimo nga usa ka dapit sa dili balaan nga patigayon. Ang sagradong lawak nahimong usa ka daku nga pagbinayloay.”— Ibid., p. 157.
“Sa hinayhinay mikanaog sa mga ang-ang, ug miisa sa panglatos nga mga pisi nga natipon sa pagsulod sa kural, Siya mimando sa negosyante nga pundok sa paghawa gikan sa presinto sa templo. Uban sa kadasig ug kabangis nga wala pa sukad Niya mapakita, Iyang gipanglintuwad ang mga lamesa sa mga tigbaylo ug salapi. Ang mga sensilyo nangahulog, kusog nga nagtagingting sa marmol nga salog. Walay usa nga nangahas sa pagkwestyon sa Iyang katungod. Walay nangahas sa pagpahunong aron sa paghipos sa ilang ginansya nga nakuha sa dili maayo nga paagi. Si Jesus wala maghampak kanila sa latigo nga pisi, apan diha sa Iyang kamot kanang yano nga latos daw makalilisang ingon sa usa ka nagdilaab nga espada. Ang mga opisyal sa templo, ang mga nagtan-aw nga mga sacerdote, mga tigbaligya ug mga baka, uban sa ilang mga carnero ug mga baka, midalagan gikan sa dapit, uban sa usa ka hunahuna sa pag-ikyas gikan sa pagkondenar sa Iyang presensya.”— Ibid., p. 158.
c. Unsa may kahulogan sa buhat ni Cristo sa pagputli sa templo? Malaquias 3:1–3.
“Ang mga sawang sa templo sa Jerusalem, napuno sa kasamok sa dili balaang patigayon, nagrepresentar sa tanan usab sa tinuod nga templo sa kasingkasing, nga nahugawan sa maulagon nga pagbati ug dili balaan nga mga hunahuna. Sa paglimpyo sa templo gikan sa mga pumapalit ug mga tigbaligya sa kalibutan, gipahibalo ni Jesus ang Iyang misyon sa paglimpyo sa kasingkasing gikan sa kahugawan sa sala—gikan sa yutan-ong mga tinguha, sa hakog nga mga pangibog, ang dautang mga pagginawi, nga nagadunot sa kalag.”— Ibid., p. 161.
Martes
, Enero 21
3. ANG PRESENSYA SA DIOS
a. Unsa man ang orihinal nga katuyoan sa Dios diha sa pagtukod sa Iyang sanctuaryo taliwala sa Iyang katawhan? Exodus 25:8.
“Kana nga templo, nga gitukod alang sa puloy-anan sa diosnong Presensya, gidisenyo nga mahimong usa ka tumong nga leksyon alang sa Israel ug alang sa kalibutan. Gikan sa walay katapusan nga mga katuigan maoy katuyoan sa Dios nga ang matag binuhat, gikan sa masanag ug balaan nga serapenis nganhi sa tawo, kinahanglan nga mahimong usa ka templo alang sa puloy-anan sa Maglalalang.”— The Desire of Ages, p. 161.
b. Ngano nga ang mga magtutuo gitawag ingon nga templo sa Dios—ug unsaon nato sa kinasingkasing pagmentinar ang pagkabalaan niini nga templo? 1 Corinto 3:16, 17; Isaias 57:15.
“Tungod sa sala, ang tawo nahunong sa pagkahimong templo sa Dios. Nangitngitan ug nahugawan sa kadautan, ang kasingkasing sa tawo wala na magpadayag sa himaya sa Diosnong Usa. Apan pinaagi sa pagpakatawo sa Anak sa Dios, ang katuyoan sa Langit natuman. Ang Dios mopuyo diha sa tawo, ug pinaagi sa makaluwas nga grasya ang kasingkasing sa tawo nahimo na usab nga Iyang templo.”—Ibid.
“Kon kita nagtoo nga ang katapusan sa tanan nga mga butang haduol na, ‘pagkakinahanglanon gayud diay nga magkinabuhi kamo sa pagkabalaan ug pagkadiosnon?’
“Ang matag kalag nga tinuod nga nagtoo sa kamatuoran adunay katugbang nga mga buhat. Ang tanan mahimong matinguhaon ug solemne, ug dili kapuyon sa ilang mga paningkamot sa pagdaug ug mga kalag ngadto kang Cristo. Kon ang kamatuoran una natanom nga lawom sa ilang kaugalingon nga mga kalag, unya sila maninguha sa pagtanom niini diha sa mga kasingkasing sa uban. Ang kamatuoran gitipigan sa kinatibuk-an diha sa gawas nga sawang. Dad-a kini ngadto sa sulod nga templo sa kalag, ibutang kini sa trono sa kasingkasing, ug tugoti kini nga magdumala sa kinabuhi. Ang pulong sa Dios kinahanglan nga tun-an ug tumanon, unya ang kasingkasing makakaplag ug pahulay ug kalinaw ug kalipay, ug ang mga pangandoy mopadulong sa langit; apan kon ang kamatuoran wala tipigi diha sa kinabuhi, diha sa gawas nga sawang, ang kasingkasing dili mapainit sa nagdilaab nga kalayo sa pagkamaayo sa Dios.
“Ang relihiyon ni Jesus, sa kadaghanan, gitagana alang sa piho nga mga adlaw, o piho nga mga okasyon, ug sa ubang mga panahon gipadaplin ug gipasagdan. Ang nagapabilin nga prinsipyo sa kamatuoran dili lamang sa pipila ka oras sa Igpapahulay, o alang sa pipila ka mga buhat sa gugma, apan kini dad-on ngadto sa kasingkasing, magaputli ug magabalaan sa kinaiya.”— Testimonies for the Church, vol. 5, p. 547.
Mierkules
, Enero 22
4. ANG PAGPUTLI SA BUHI NGA TEMPLO
a. Unsa may dapat natong masabtan mahitungod sa atong walay mahimo nga kahimtang diha sa pagtinguha sa pagputli sa templo? Jeremias 2:22; Job 14:4.
“Walay tawo nga sa iyang kaugalingon makapagawas sa dautan nga panon nga nagpuyo sa kasingkasing.”- The Desire of Ages, p. 161.
b. Unsa may sekreto aron makahimo sa pagbarug atubangan sa usa ka balaan nga Dios uban sa nahinloan nga kasingkasing? Ezekiel 36:25-27; Zacarias 3:3-5.
“Si Jacob nakasala sa usa ka daku nga sala sa iyang paggawi ngadto kang Esau; apan siya naghinulsol. Ang iyang kalapasan gipasaylo, ug ang iyang sala nahinloan; busa siya nakalahutay sa pagpadayag sa presensya sa Dios. Apan bisan asa ang mga tawo moduol sa atubangan sa Dios samtang tinuyo nga nahigugma sa dautan, sila malaglag. Sa ikaduhang pag-anhi ni Cristo ang mga dautan pagaut-uton ‘uban sa Espiritu sa Iyang baba,’ ug gilaglag ‘uban sa kahayag sa Iyang pag-abot.’ 2 Tesalonica 2:8 . Ang kahayag sa himaya sa Dios, nga nagbahin sa kinabuhi sa mga matarung, mopatay sa mga dautan.
“Sa panahon ni Juan Bautista, si Cristo hapit na magpakita ingon nga tigpadayag sa kinaiya sa Dios. Ang iyang presensya mismo mopadayag ngadto sa mga tawo sa ilang sala. Sa diha lamang nga sila andam nga mahinloan gikan sa sala nga mahimo sila makasulod ngadto sa pakig-ambitay uban Kaniya. Ang putli ug kasingkasing lamang ang makapabilin diha sa Iyang presensya.”—Ibid., p. 108.
“Si Cristo lamang ang makalimpyo sa templo sa kalag. Apan dili Siya mopugos sa pagsulod. Siya dili mosulod sa kasingkasing ingon sa templo kaniadto; apan Siya miingon, ‘Tan-awa, nagatindog Ako sa pultahan, ug nagatuktok: kon adunay magapatalinghug sa Akong tingog, ug moabli sa pultahan, mosulod ako kaniya.’ Pinadayag 3:20. Moabot siya, dili sa usa ka adlaw lamang; kay Siya nagaingon, ‘Ako magapuyo diha kanila, ug magalakaw diha kanila; . . . ug sila mahimong Akong katawhan.’ ‘Siya magabuntog sa atong mga kasal-anan; ug Imong isalibay ang tanan nilang kasal-anan ngadto sa kahiladman sa dagat.’ 2 Corinto 6:16; Miqueas 7:19. Ang iyang presensya molimpyo ug mobalaan sa kalag, aron nga kini mahimong usa ka balaan nga templo alang sa Ginoo, ug ‘usa ka puloy-anan sa Dios pinaagi sa Espiritu.’ Efeso 2:21, 22.”—Ibid., pp. 161, 162.
“Samtang si Jesus nag-alagad sa sanctuaryo sa itaas, Siya sa gihapon pinaagi sa Iyang Espiritu ang ministro sa iglesia dinhi sa yuta.”—Ibid., p. 166.
Huebes
, Enero 23
5. MAGAPUTLI SA TEMPLO KARON
a. Sa unsang paagi nga ang Dios maghimo sa mga pangulo sa Iyang katawhan nga may tulubagon sa pag-makugihon sa patunhay sa kasagrado sa Iyang balay? Habakuk 2:20; Ezequiel 44:23.
“Ang presinto sa templo sa Dios angay untang tagdon nga sagrado. Apan diha sa panaglalis alang sa ganansya, kining tanan nawala sa panan-aw.
“Ang mga sacerdote ug mga pangulo gitawag aron mahimong mga representante sa Dios ngadto sa nasud; ila untang gisaway ang mga pag-abuso sa sawang sa templo. Sila unta ang naghatag sa mga tawo ug panig-ingnan sa kaligdong ug pagkamabination.”— The Desire of Ages, p. 156.
“Tinuod kaayo nga ang pagtahud sa balay sa Dios nahimong hapit na mawala. Ang sagrado nga mga butang ug mga dapit wala na ilha; ang balaan ug tinuboy wala gitagad. . . . Ang Dios naghatag ug mga lagda sa kahusay, hingpit ug tukma, ngadto sa iyang karaang katawhan. Nausab ba ang Iyang kinaiya? Dili ba Siya ang daku ug gamhanang Dios nga nagmando sa langit sa mga langit? Dili ba maayo alang kanato nga kanunay kita magbasa sa mga direksyon nga gihatag sa Dios sa Iyang kaugalingon ngadto sa mga Hebreohanon, aron nga kita nga adunay kahayag sa mahimayaong kamatuoran nga nagdan-ag kanato mahimong makasundog sa ilang pagtahud sa balay sa Dios?”—Testimonies for the Church, vol. 5, pp. 495, 496.
b. Isaysay ang gikinahanglan nga kadaugan nga pagabatonan diha sa kusog ni Cristo. Mateo 5:8; 1 Juan 3:1–3.
“Ako nanawagan sa matag usa nga nag-angkon nga anak sa Dios nga dili gayud makalimot niining daku nga kamatuoran, nga kita nagkinahanglan sa Espiritu sa Dios sa sulod nato aron makaabut sa langit, ug ang buhat ni Cristo sa gawas nato aron sa paghatag kanato ug usa ka titulo sa walay kamatayon nga panulondon.”— Testimonies to Ministers, p. 442.
Biernes
, Enero 24
PERSONAL SUBLI NGA MGA PANGUTANA
1. Kinsa ang mga pangulo sa dili matarung nga patigayon didto sa templo?
2. Unsa gyud ang angay nga gawi sa kang bisan kinsa nga moduol sa atubangan sa Dios?
3. Isaysay ang mabatonan nga espirituwal nga kahulogan diha sa templo sa Jerusalem.
4. Unsay gipahayag ni Cristo diha sa paghinlo sa templo?
5. Sa unsang paagi lamang mahinloan ang atong masalaypon tawhanon nga kasingkasing?