Domingo
, Pebrero 23
1. BAG-ONG KINABUHI, BAG-ONG PRAYORIDAD
a. Sa pag-ila kang Jesus ingon nga Mesias, unsay diha-diha nga gibuhat sa Samariahanon nga babaye? Juan 4:28, 29.
“Ang babaye napuno sa kalipay samtang naminaw siya sa mga pulong ni Cristo. Ang talagsaon nga pagpadayag hilabihang gamhanan. Mibiya sa iyang tadyaw sa tubig, mibalik siya sa ciudad, aron sa pagdala sa mensahe ngadto sa uban. Nasayod si Jesus nganong nilakaw siya. Ang pagbiya sa iyang banga sa tubig nagsulti nga dili masayop bahin sa epekto sa Iyang mga pulong. Kini mao ang mainiton nga tinguha sa iyang kalag sa pagkuha sa buhi nga tubig; ug nakalimtan niya ang iyang katuyoan didto sa atabay, nakalimtan niya ang kauhaw sa Manluluwas, nga iyang gitinguha nga hatagan. Uban sa kasingkasing nga nag-awas sa kalipay, siya midali sa iyang dalan, aron sa paghatag ngadto sa uban sa bililhon nga kahayag nga iyang nadawat.”— The Desire of Ages, p. 191.
b. Unsa ang gibuhat sa mga lumolupyo sa Sicar sa pagkadungog nila sa pagpamatuod sa ilang katagilungsod? Juan 4:30.
“Ang mga pulong [sa babaye] nakatandog sa ilang mga kasingkasing. Adunay bag-ong pagpadayag sa iyang nawong, usa ka kausaban sa tibook niyang panagway. Interesado sila nga makita si Jesus.”— Ibid.
Lunes
, Pebrero 24
2. ANG ALANIHON UG ANG MGA MANGANGANI
a. Sa dihang nakita ni Jesus ang mga molupyo sa Sicar nga nanagpangabut, unsa may Iyang gisulti ngadto sa Iyang mga tinon-an? Juan 4:35-38.
“‘Siya nga nagaani,’ Siya miingon, ‘nagadawat ug suhol, ug magahipos ug mga bunga ngadto sa dayong kinabuhi: nga pareho siya nga nagapugas ug siya nga nagaani magkalipay sa tingub. Ug dinhi ang maong pinulongan matuod. Ang usa nagpugas, ug ang usa nag-ani.’ Dinhi gitumong ni Cristo ang Sagrado nga serbisyo nga angay himoon ngadto sa Dios pinaagi niadtong nakadawat sa ebanghelyo. Kinahanglan nga sila mao ang Iyang buhi nga mga ahensya. Iyang gipangayo ang ilang indibiduwal nga serbisyo. Ug kon kita man nagpugas o nag-ani, kita nagabuhat alang sa Dios. Ang usa nagasabulak sa binhi; ang lain nagahipos sa inani; ug pareho ang nagapugas ug ang nagaani magdawat sa suhol. Sila kauban magkalipay diha sa balus sa ilang pagtrabaho.”- The Desire of Ages, pp. 191, 192.
b. Unsa man ang epekto sa pagpamatuod sa babaye mahitungod kang Cristo - ug unsa may atong makat-onan gikan sa kabug-aton nga nabatonan niini? Juan 4:39.
“Kon kita nahiusa kang Cristo, anaa kanato ang hunahuna ni Cristo. Kaputli ug gugma mosidlak diha sa kinaiya, ang kaaghup ug kamatuoran nagkontrolar sa kinabuhi. Ang ekspresyon mismo sa panagway mausab. Si Cristo nga magpabilin sa kalag adunay gahum sa pagbag-o, ug ang panggawas nga aspeto nagpamatuod sa kalinaw ug kalipay nga naghari sa sulod. Magainom kita diha sa gugma ni Cristo, ingon sa sanga nga nagakuha ug sustansya gikan sa punoan. Kon kita gisumpay diha kang Cristo, kon lanot sa lanot kita nahiusa uban sa Buhi nga Paras, kita mohatag ug ebidensiya sa kamatuoran pinaagi sa pagpamunga ug daghang pungpong sa buhing bunga. Kon kita konektado sa Kahayag, kita mahimong mga agianan sa kahayag, ug diha sa atong mga pulong ug mga buhat atong ipasibaw ang kahayag ngadto sa kalibutan. . . .
“Pinaagi sa pagtan-aw kita mahimong mausab; ug samtang kita mamalandong sa pagkahingpit sa diosnon nga Sulondan, kita magtinguha nga mahimong bug-os nga mausab, ug mabag-o diha sa dagway sa Iyang kaputli. Pinaagi sa pagtoo diha sa Anak sa Dios nga ang pagbag-o mahitabo diha sa kinaiya, ug ang anak sa kasuko mahimong anak sa Dios. Siya milabay gikan sa kamatayon ngadto sa kinabuhi; siya mahimong espirituhanon ug makaila sa espirituhanong mga butang. Ang kaalam sa Dios magpadan-ag sa iyang hunahuna, ug siya makakita sa mga katingalahang mga butang gikan sa Iyang balaod. Samtang ang tawo makabig pinaagi sa kamatuoran, ang buhat sa pagbag-o sa kinaiya magapadayon.”— Selected Messages, bk. 1, pp. 337, 338.
Martes
, Pebrero 25
3. ANG PRESENSYA NI JESUS DIDTO SA SAMARIA
a. Unsang hangyo ang gihimo sa mga Samariahanon ngadto kang Jesus - ug ngano? Juan 4:40.
b. Ihulagway ang resulta sa panahon ni Cristo didto sa Samaria. Juan 4:41.
“Diha sa mga pulong nga gisulti ngadto sa babaye didto sa atabay, maayong binhi ang napugas, ug daw unsa ka dali nadawat ang ani. Miabot ang mga Samariahanon ug nakadungog kang Jesus, ug mitoo diha Kaniya. Midugok libot Kaniya didto sa atabay, sila misukitsukit Kaniya uban ang mga pangutana, ug sa kamahinamon nakadawat sa Iyang mga pagpasabut sa daghang mga butang nga dili klaro ngadto kanila. Samtang sila naminaw, ang ilang kalibog nagsugod sa pagwagtang. Sama sila sa usa ka katawhan sa dakong kangitngit nga nagsubay sa kalit nga silaw sa kahayag hangtud nga ilang nakaplagan ang adlaw. Apan sila wala matagbaw niining mubo nga pakigtagbo. Matinguhaon sila nga makadungog pa ug dugang, ug aron ang ilang mga higala makapaminaw usab niining kahibulongan nga magtutudlo. Ilang gidapit Siya ngadto sa ilang ciudad, ug nagpakilooy Kaniya nga magpabilin uban kanila. Sulod sa duha ka mga adlaw Siya mipabilin sa Samaria, ug daghan pa ang mitoo Kaniya.”— The Desire of Ages, p. 192.
“Gipadayag ni Cristo ang Dios ngadto sa Iyang mga tinon-an sa paagi nga naghimo diha sa ilang mga kasingkasing sa usa ka pinasahi nga buhat, sama sa dugay na Niyang pag-awhag kanato sa pagtugot Kaniya sa pagbuhat diha sa atong mga kasingkasing. Adunay daghan nga, diha sa pagpabilin sa hilabihan diha sa teoriya, nawad-an sa panan-aw sa buhi nga gahum sa panig-ingnan sa Manluluwas. Sila nawad-an sa pagtan-aw Kaniya ingon nga mapainubsanon, magdumili sa kaugalingon nga magbubuhat. Unsa ang ilang gikinahanglan mao ang pagtan-aw kang Jesus. Adlaw-adlaw gikinahanglan nato ang bag-ong pagpadayag sa Iyang presensya.”— Reflecting Christ, p. 302.
c. Unsa ang gipahayag sa daghang mga Samariahanon human sa ilang pagdawat kang Jesus ingon nga mao ang Mesias? Juan 4:42.
“Ang mga Fariseo nagtamay sa kayano ni Jesus. Ilang gibaliwala ang Iyang mga milagro, ug nangayo ug ilhanan nga Siya mao ang Anak sa Dios. Apan ang mga Samariahanon wala mangayo ug ilhanan, ug si Jesus wala magbuhat ug mga milagro taliwala kanila, gawas sa pagbutyag sa mga sekreto sa iyang kinabuhi ngadto sa babaye sa atabay. Bisan pa niana daghan ang midawat Kaniya. Diha sa ilang bag-ong kalipay sila miingon ngadto sa babaye, ‘Karon mitoo na kami, dili tungod sa imong pulong: tungod kay kami mismo nakadungog kaniya, ug nahibalo nga kini mao gayud ang Cristo, ang Manluluwas sa kalibutan.’ ”— The Desire of Ages, pp. 192, 193.
Mierkules
, Pebrero 26
4. ANG GAHUM SA TAGNA
a. Diha sa unsang tagna nga ang mga Samariahanon nagapasukad sa ilang pagtoo diha sa gisaad nga Mesias? Genesis 49:10.
“Ang mga Samariahanon mitoo nga ang Mesias moabut ingon nga Manunubos, dili lamang sa mga Judeo, kondili sa kalibutan. Ang Balaang Espiritu pinaagi kang Moises nagtagna Kaniya ingon nga propeta nga gipadala gikan sa Dios. Pinaagi kang Jacob kini gipahayag na ngadto Kaniya ang pagtigom sa mga katawhan; ug pinaagi kang Abraham, nga diha Kaniya ang tanang mga nasud sa yuta mapanalanginan. Dinhi niini nga mga kasulatan ang katawhan sa Samaria nagbasi sa ilang pagtoo diha sa Mesias. Ang kamatuoran nga ang mga Judeo nasayop sa pagsabut sa ulahi nga mga propeta, naglambigit ngadto sa unang pag-anhi ang himaya sa ikaduhang pag-anhi ni Cristo, nagdala sa mga Samariahanon sa pagsalikway sa tanang sagradong mga sinulat gawas niadtong gihatag pinaagi kang Moises. Apan samtang giwagtang sa Manluluwas kining sayop nga mga pagpanabut, daghan ang midawat sa ulahi nga mga tagna ug sa mga pulong ni Cristo mismo mahitungod sa gingharian sa Dios.”—The Desire of Ages, p. 193.
b. Unsay atong makat-onan karon gikan sa kamatuoran nga ang mga Samariahanon katingalahan kaayo nga abli ngadto sa kamatuoran? Ecclesiastes 11:4, 5.
“Sa tibook kalibutan ang mga lalake ug mga babaye nagtan-aw nga mahinamon ngadto sa langit. Mga pag-ampo ug mga luha ug mga pangutana misaka gikan sa mga kalag nga nangandoy sa kahayag, alang sa gracia, alang sa Espiritu Santo. Daghan ang anaa sa ngilit sa gingharian, naghulat lamang nga pagatigumon.”— The Acts of the Apostles, p. 109.
c. Unsa ang mahitabo sa mga indibiduwal kon sila tinuoray nga modawat kang Cristo? Paghatag ug mga panig-ingnan. Marcos 5:18–20; 7:31–37.
“Ang Espiritu [ni Cristo] mopalambo diha sa tawo sa tanan nga makapatuboy sa kinaiya ug magpahalangdon sa kinaiya. Kini magtukod sa tawo alang sa kahimayaan sa Dios diha sa lawas ug kalag ug espiritu. . . . Ug ang mga kalag nga gipaubos ngadto sa mga instrumento ni Satanas pinaagi gihapon sa gahum ni Cristo nga giusab ngadto sa mga mensahero sa pagkamatarung, ug gipadala sa Anak sa Dios aron sa pagsulti unsa nga ‘dagkong mga butang ang nahimo sa Ginoo alang kanimo, ug nalooy kanimo.’ ”— The Desire of Ages, p. 341.
Huebes
, Pebrero 27
5. CRISTOHANONG MGA MISYONERO
a. Unsang leksyon ang atong makat-onan gikan sa babaye nga Samariahanon? 1 Juan 1:1-3; 2 Corinto 5:14 (unang bahin).
“Sa diha nga iyang nakaplagan ang Manluluwas ang babayeng Samariahanon nagdala ug uban ngadto Kaniya. Iyang napamatud-an ang iyang kaugalingon nga mas epektibo nga misyonero kay sa Iyang kaugalingon nga mga tinon-an. Ang mga tinon-an walay nakita diha sa Samaria nga timailhan nga kini maoy usa ka makapadasig nga kaumahan. Ang ilang mga hunahuna natumong sa usa ka daku nga buhat nga buhaton sa umaabot. Wala nila makita nga diha mismo sa ilang palibot anaa ang alanihon nga kinahanglan nga hipuson. Apan pinaagi sa babaye nga ilang gitamay, ang tibook ciudad nadala aron sa pagpaminaw sa Manluluwas. Gidala niya ang kahayag diha dayon ngadto sa iyang mga katagilungsod.
“Kini nga babaye nagrepresentar sa buhat sa usa ka praktikal nga pagtoo kang Cristo. Ang matag tinuod nga tinon-an natawo sa gingharian sa Dios isip usa ka misyonero. Siya ang nagainom sa tubig nga buhi nahimong tuburan sa kinabuhi. Ang magdadawat nahimong maghahatag. Ang gracia ni Cristo diha sa kalag mahimong ingon sa usa ka tuburan sa kamingawan, nga nag-agas aron sa pagpalagsik sa tanan, ug maghimo niadtong andam na sa pagkahanaw matinguhaon sa pag-inom sa tubig sa kinabuhi.”— The Desire of Ages, p. 195.
b. Sa unsang paagi kini nga kasinatian makadasig kanato karon? Ecclesiastes 11:6.
“Dili kinahanglan nga moadto kita sa langyaw nga kayutaan aron mahimong mga misyonero sa Dios. Tanan sa atong palibot mao ang mga umahan nga ‘hinog na aron anihon,’ ug bisan kinsa ang mobuot magtigom ug ‘bunga ngadto sa kinabuhing dayon.’ Ang Dios nagtawag sa daghan diha sa Battle Creek kinsa nangamatay sa espirituhanong katapulan sa pag-adto diin ang ilang paghago gikinahanglan diha sa Iyang kawsa. Panggawas kamo sa Battle Creek, bisan pa kon kini nanginahanglan ug sakripisyo sa salapi. Adto sa usa ka dapit aron mahimong panalangin alang sa uban. Lakaw diin ikaw makapalig-on sa pipila ka maluyahon nga iglesia. Gamita ang gahum nga gihatag sa Dios kanimo.”— Testimonies for the Church, vol. 5, p. 187.
Biernes
, Pebrero 28
PERSONAL SUBLI NGA MGA PANGUTANA
1. Unsa ang gibuhat sa babaye sa dihang iyang nakita si Jesus ingon nga bugtong Manluluwas?
2. Isaysay kon unsay gipasabut pinaagi sa kaumahan nga hinog na alang sa pag-ani.
3. Pila ka adlaw nga nagpabilin si Jesus sa mga Samariahanon?
4. Unsang pagpamatuod ang gihatag sa mga Samarianhon mahitungod kang Jesus?
5. Unsa ang mahitabo sa mga tawo sa diha nga sila makadawat ni Jesus sa ilang mga kinabuhi?