Domingo
, Marso 16
1. KAPANTAY SA DIOS
a. Gawas pa sa pag-ayo sa paralitiko diha sa Igpapahulay, sa unsang lain pang katarungan nga ang mga Judeo nagdumot kang Jesus? Juan 5:17, 18.
“Si Jesus nag-angkon ug pantay nga katungod uban sa Dios. . . .
“Ang tibook nasud sa mga Judeo nagtawag sa Dios nga ilang Amahan, busa dili unta sila sa hilabihan masuko kon si Cristo nagrepresentar sa Iyang kaugalingon ingon nga magbarug diha sa sama nga relasyon ngadto sa Dios. Apan sila nag-akusar Kaniya sa pagpasipala, nagpakita nga ilang nasabtan Siya ingon nga naghimo niini nga pag-angkon diha sa pinakataas nga pagpanabot.”- The Desire of Ages, pp. 207, 208.
b. Giunsa ni Cristo pagpabarug ang pagbulot-an sa kasugoan sa Dios ibabaw sa tawhanon nga mga tradisyon? Mateo 15:1-9, 13.
“Kining mga kaaway ni Cristo walay mga argumento sa pagtagbo sa mga kamatuoran nga Iyang gidala ngadto sa ilang mga konsensya. Sila igo lamang makahisgut sa ilang mga kustombre ug mga tradisyon, ug kini daw huyang ug walay lami kon itandi sa argumento ni Jesus nga gikuha gikan sa pulong sa Dios ug sa walay hunong nga liyok sa kinaiyahan.”- Ibid., p. 208.
Lunes
, Marso 17
2. PAKIGHIUSA UBAN SA AMAHAN
a. Giunsa ni Jesus pagsaysay ang Iyang relasyon uban sa Amahan? Juan 5:19, 20.
b. Unsang pagbulot-an ug gahum kalabut sa Amahan ang gipahayag ni Cristo nga Iya usab nga nabatonan? Juan 5:21-23.
“Ang mga sacerdote ug mga magmamando nagbutang sa ilang kaugalingon ingon nga mga maghuhukom aron sa pagkondenar sa buhat ni Cristo, apan Iyang gipahayag ang Iyang kaugalingon nga ilang maghuhukom, ug ang maghuhukom sa tibook nga yuta. Ang kalibutan gitugyan ngadto kang Cristo, ug pinaagi Kaniya miabut ang matag panalangin gikan sa Dios ngadto sa nahulog nga kaliwat. Siya mao ang Manunubos kaniadto maingon man sa human sa Iyang pagpakatawo. Sa diha nga adunay sala, adunay usa ka Manluluwas. Siya naghatag ug kahayag ug kinabuhi sa tanan, ug sumala sa sukod sa kahayag nga gihatag, ang matag usa pagahukman. Ug Siya nga naghatag sa kahayag, Siya nga nagsunod sa kalag uban sa labing malumo nga pangamuyo, nagtinguha sa pagdaug niini gikan sa sala ngadto sa pagkabalaan, anaa sa usa ang iyang manlalaban ug maghuhukom.”— The Desire of Ages, p. 210.
c. Ihulagway ang kausaban sa kinaiya nga mahitabo samtang kita makaamgo nga si Cristo mao ang atong maghuhukom. Roma 2:1–3; Mateo 7:1.
“Siya nga nagpatuyang sa usa ka masawayon nga espiritu sad-an sa mas daku nga sala kay sa usa nga iyang gipasanginlan, tungod kay dili lamang siya makahimo sa samang sala, kondili nagdugang pa niini sa pagkamapahitas-on ug pagkamasawayon.
“Si Cristo mao lamang ang tinuod nga sumbanan sa kinaiya, ug siya nga nagpahimutang sa iyang kaugalingon ingon nga sumbanan alang sa uban nagbutang sa iyang kaugalingon sa dapit ni Cristo. Ug tungod kay ang Amahan ‘nagtugyan sa tanang paghukom ngadto sa Anak’ (Juan 5:22), bisan kinsa nga maghunahuna sa paghukom sa mga motibo sa uban nag-ilog na usab sa katungod sa Anak sa Dios. Kini nga mga maghuhukom ug mga kritiko mao ang nagbutang sa ilang kaugalingon sa kiliran sa anticristo, ‘nga mosupak ug mobayaw sa iyang kaugalingon labaw sa tanan nga gitawag ug Dios, o kanang ginasimba; aron nga siya ingon nga Dios nagalingkod sa templo sa Dios, nagpakita sa iyang kaugalingon nga siya Dios.’ 2 Tessalonika 2:4.”—Thoughts From the Mount of Blessing, pp. 125, 126.
“Dili nato mabasa ang kasingkasing. Ang atong mga kaugalingon masalaypon, dili kita kuwalipikado nga molingkod sa paghukom sa uban. Ang may kinutoban nga mga tawo makahukom lamang gikan sa panggawas nga panagway. Kaniya lamang nga nahibalo sa tinago nga mga tuburan sa buhat, ug kinsa nakiglabot nga malumo ug maloloy-on, gihatag ang paghukom sa kaso sa matag kalag.”—Ibid., p. 124.
Martes
, Marso 18
3. ANG BILILHON NGA KASIGUROHAN
a. Unsang kasigurohan ang gihatag ngadto sa matag matinud-anon nga tumotuo diha kang Cristo? Juan 5:24.
“Diha sa matag mando ug diha sa matag saad sa pulong sa Dios anaa ang gahum, ang kinabuhi sa Dios, diin ang sugo matuman ug ang saad matuman. Siya nga pinaagi sa pagtoo midawat sa pulong makadawat sa kinabuhi ug kinaiya sa Dios.”— Christ’s Object Lessons, p. 38.
“Ang dakung buhat nga nahimo alang sa makasasala nga namansahan ug nabulingan sa dautan mao ang buhat sa pagkamatarung. Pinaagi Kaniya nga nagsulti sa kamatuoran siya gipahayag nga matarung. Ang Ginoo nagbilang ngadto sa magtutuo sa pagkamatarung ni Cristo ug nagpahayag kaniya nga matarung atubangan sa uniberso. Iyang gibalhin ang iyang mga sala ngadto kang Jesus, ang representante sa makasasala, kahalili, ug piyansa. Diha kang Cristo Iyang gibutang ang kasal-anan sa matag kalag nga nagatoo. ‘Siya naghimo kaniya nga sala alang kanato, nga wala makaila sa sala; aron kita mahimo ang pagkamatarung sa Dios diha kaniya’ (2 Corinto 5:21) . . . .
“Bisan tuod ingon nga mga makasasala kita nailalum sa pagkahinukman sa kasugoan, apan si Cristo pinaagi sa Iyang pagkamatinumanon mihatag ngadto sa kasugoan, sa mga gipangayo alang sa mahinulsulon nga kalag sa merito sa Iyang kaugalingong pagkamatarung. Aron maangkon ang pagkamatarung ni Cristo, gikinahanglan nga ang makasasala makahibalo unsa kana nga paghinulsol nga nagabuhat sa usa ka radikal nga pagbag-o sa hunahuna ug sa espiritu ug sa paglihok. Ang buhat sa pagbag-o kinahanglan nga magsugod diha sa kasingkasing, ug magpakita ug gahum niini pinaagi sa matag galamhan sa pagkatawo; apan ang tawo dili makahimo sa pagmugna ug paghinulsol nga sama niini, ug makasinati lamang niini pinaagi kang Cristo, nga misaka sa kahitas-an, nagdala ug panon sa mga bihag, ug ngadto sa mga tawo naghatag ug mga gasa.”— Selected Messages, bk. 1, pp. 392, 393.
b. Unsang balaanong mga katungod ang gipadayag ni Cristo nga Iyang nabatonan? Juan 5:25–29.
“Tungod kay Siya nakatilaw sa mga lawog sa tawhanong kasakit ug tentasyon, ug nakasabut sa mga kahuyang ug sa mga sala sa mga tawo; tungod kay alang kanato Siya nagmadaugon sa pagsukol sa mga tentasyon ni Satanas, ug magtagad nga makiangayon ug mapuanguron sa mga kalag nga giulaan sa Iyang kaugalingong dugo aron maluwas—tungod niini, ang Anak sa tawo gitudlo sa pahamtang sa paghukom.”—The Desire of Ages, p. 210.
“Si Cristo gitagaan ug gahum sa paghatag ug kinabuhi ngadto sa tanang linalang.”— Selected Messages, bk. 1, p. 249.
Mierkules
, Marso 19
4. SI JESUS, ANG SENTRO NGA TEMA SA KASULATAN
a. Giunsa ni Jesus pagsaysay ang hinungdan sa pagkawalay pagtoo sa mga Judeo? Juan 5:37, 38.
“Imbis nga mangayo ug pasaylo sa buhat nga ilang gireklamo, o magsaysay sa Iyang katuyoan sa pagbuhat niini, si Jesus miatubang sa mga punoan, ug ang akusado nahimong magsusumbong. Iyang gibadlong sila tungod sa kagahi sa ilang mga kasingkasing, ug ang ilang pagkawalay alamag sa mga Kasulatan. Siya mipahayag nga sila misalikway sa pulong sa Dios, maingon nga sila nagsalikway Kaniya nga gipadala sa Dios.”— The Desire of Ages, p. 211.
b. Ngano man nga ang mga Judeo napakyas sa pagsabut sa mga Kasulatan? Juan 5:39, 40.
“Diha sa matag pahina, diha man sa kasaysayan, o lagda, o tagna, ang Daang Tugon nga mga Kasulatan gisidlakan uban sa himaya sa Anak sa Dios. Hangtud nga kadtong diosnon nga institusyon, ang tibook sistema sa Judaismo maoy usa ka kompleto nga tagna sa ebanghelyo. Kang Cristo ‘nagsaksi ang tanang mga propeta.’ Buhat 10:43. Gikan sa saad nga gihatag kang Adan, hangtud sa nagsunosunod nga mga patriarka ug ang legal nga ekonomiya, ang mahimayaong kahayag sa langit nagpatin-aw sa mga lakang sa Manunubos. Ang mga manalagna nakakita sa Bitoon sa Bethlehem, ang Shilo nga moabot, samtang ang umaabot nga mga butang gibanlas sa ilang atubangan sa misteryosong prosesyon. Sa matag sakripisyo sa kamatayon ni Cristo gipakita. Sa matag panganod sa insenso ang Iyang pagkamatarung misaka. Sa matag trumpeta sa tinghugyaw ang Iyang ngalan gipatingog. Diha sa makalilisang nga misteryo sa balaan sa mga balaan ang Iyang himaya nagpuyo.
“Ang mga Judeo adunay mga Kasulatan nga anaa kanila, ug nagdahum nga sa ilang panggawas nga kahibalo sa pulong aduna silay kinabuhing dayon. Apan si Jesus miingon, ‘nga ang Iyang pulong wala magapabilin diha kaninyo.’ Nagsalikway kang Cristo diha sa Iyang pulong, ilang gisalikway Siya diha sa personal. ‘Dili kamo moduol Kanako,’ Siya miingon, ‘aron nga kamo makabaton ug kinabuhi.’
“Ang Judeo nga mga pangulo nagtuon sa mga pagtulun-an sa mga propeta mahitungod sa gingharian sa Mesias; apan sila mibuhat niini, dili uban sa sala sa tinguha nga mahibalo sa kamatuoran, apan uban sa katuyoan sa pagpangita ug ebidensya sa pagpadayon sa ilang ambisyoso nga mga paglaum. Sa diha nga si Cristo mianhi sa paagi nga sukwahi sa ilang gipaabut, sila dili modawat Kaniya; ug aron sa pagpakamatarung sa ilang kaugalingon, sila naninguha sa pagproyba Kaniya nga usa ka maglilimbong. Sa diha nga sila nakabutang sa ilang mga tiil niini nga dalan, masayon alang kang Satanas sa paglig-on sa ilang pagsupak kang Cristo. Ang mga pulong nga angay unta nga dawaton ingon nga ebidensya sa Iyang pagkadios gihubad batok Kaniya. Sa ingon niana ilang giliso ang kamatuoran sa Dios ngadto sa bakak.”— Ibid., pp. 211, 212.
Huebes
, Marso 20
5. ANG HIMAYA SA DIOS
a. Unsay nagdala sa mga Judeo sa pagsalikway kang Jesus ug sa pagpangita sa bakakon nga mga magtutudlo? Juan 5:41-44.
“Si Jesus miingon, ‘Wala ako makadawat ug dungog gikan sa mga tawo.’ Dili ang inpluwensya sa Sanhedrin, dili ang ilang pag-uyon ang Iyang gitinguha. Dili siya makadawat ug dungog gikan sa ilang pag-uyon. Siya gitagaan uban sa dungog ug pagbulot-an sa Langit. Kon kini pa ang iyang gitinguha, ang mga manolonda moanhi unta aron sa Pagsimba kaniya; ang Amahan makapamatuod pag-usab sa Iyang pagka-dios. Apan alang sa ilang kaugalingon, alang sa nasud kansang mga pangulo mao sila, Iyang gitinguha ang Judeo nga mga magmamando sa pag-ila sa Iyang kinaiya, ug makadawat sa mga panalangin Siya mianhi aron sa pagdala kanila.
“‘Ako mianhi sa ngalan sa Akong Amahan, ug kamo wala modawat Kanako: kon adunay moanhi diha sa iyang kaugalingong ngalan, siya inyong dawaton.’ Si Jesus mianhi pinaagi sa pagbulot-an sa Dios, nga nagdala sa Iyang dagway, nagtuman sa Iyang pulong, ug nagatinguha sa Iyang himaya; apan wala Siya dawata sa mga pangulo sa Israel; apan kon adunay moabut, nga magabaton sa kinaiya ni Cristo, apan gipalihok pinaagi sa ilang kaugalingong kabubut-on ug nagatinguha sa iyang kaugalingon nga himaya, sila pagadawaton. Ug ngano? Tungod kay siya nga nagatinguha sa iyang kaugalingon nga himaya nagapangamuyo sa tinguha sa pagbayaw sa kaugalingon diha sa uban. Ngadto sa maong hangyo ang mga Judeo makatubag. Sila modawat sa mini nga magtutudlo tungod kay siya maga-ulog-ulog sa ilang garbo pinaagi sa pagtugot sa ilang gipangga nga mga opinyon ug tradisyon. Apan ang pagtulon-an ni Cristo wala mosibo sa ilang mga ideya. Kini espirituwal, ug nagkinahanglan sa pagsakripisyo sa kaugalingon; busa dili sila modawat niini. Wala sila mahinasa sa Dios, ug ngadto kanila ang Iyang tingog pinaagi kang Cristo mao ang tingog sa usa ka dumoluong.
“Dili ba ang samang butang nasubli sa atong panahon? Dili ba daghan, bisan sa relihiyoso nga mga pangulo, nga nagpatig-a sa ilang mga kasingkasing batok sa Balaang Espiritu, nga naghimo niini nga imposible alang kanila sa pag-ila sa tingog sa Dios? Wala ba sila magsalikway sa pulong sa Dios, aron nga ilang tumanon ang ilang kaugalingong mga tradisyon?”— The Desire of Ages, pp. 212, 213.
Biernes
, Marso 21
PERSONAL SUBLI NGA MGA PANGUTANA
1. Unsang pagbulot-an ug katungod ang giangkon ni Cristo?
2. Unsang relasyon ang kanunayng naglungtad tali kang Jesus ug sa Amahan?
3. Unsang makahatag ug kinabuhi nga gahum ang nabatonan ni Cristo?
4. Isaysay ang Juan 5:39.
5. Ihulagway ang resulta sa pagsalikway sa Judeong nasud kang Jesus ingon nga Mesias.