Domingo
, Enero 26
1. USA KA INILA NGA TAWO NANGITA KANG JESUS
a. Kinsa man si Nicodemo, ug giunsa siya pagtagad diha sa panan-aw sa mga tawo? Juan 3:1, 10.
“Si Nicodemo nagkupot ug usa ka taas nga posisyon sa pagsalig diha sa nasud nga Judeo. Siya edukado kaayo, ug nakabaton ug mga talento nga dili ordinaryo, ug siya usa ka pinasidunggan nga membro sa nasudnon nga konseho. . . . Bisan pa nga datu, makinaadmanon, ug pinasidunggan, siya sa hilabihan nadani sa mapaubsanon nga Nazareno.”- The Desire of Ages, p. 167.
“Siya usa ka strikto nga Fariseo, ug nagpagarbo sa iyang kaugalingon diha sa iyang maayong mga buhat. Siya sa hilabihan giila tungod sa iyang kaayo ug sa iyang pagkamahinatagon diha sa pagsustento sa serbisyo sa templo, ug siya nagabati nga sigurado sa kalooy sa Dios.”- Ibid., p. 171.
b. Diha sa unsang oras nga si Nicodemo miadto aron sa pagpakigkita kang Jesus? Juan 3:2 (unang bahin).
“Nasayud pinaagi sa pinasahi nga pagpangutana sa dapit pahulayan sa Manluluwas didto sa Bukid sa Olivo, siya naghulat hangtud nga ang ciudad hilom na diha sa pagkatulog, ug unya nangita Kaniya.”- Ibid., p. 168.
Lunes
, Enero 27
2. ANG PRIBADO NGA PAKIGHINABI
a. Unsay nagpakita sa matang sa pagpanabut ni Jesus diha sa pagdawat sa Iyang bisita diha sa ingon ka lawom na nga takna sa kagabhion? Salmo 31:20, 21.
“[Si Nicodemo] sa hilabihan nagtinguha gayud ug pagpakighinabi kang Jesus, apan naglikay sa pagpangita Kaniya sa dayag. Maoy usa ka makapaubos kaayo alang sa usa ka pangulo sa mga Judeo ang pagdawat sa iyang kaugalingon nga makigsimpatiya sa usa ka magtutudlo nga dili inila. Ug kon ang Iyang pagbisita mahibaloan sa Sanhedrin, mahimo siyang ilang tamayon ug yubiton. Siya midesisyon sa usa ka sekreto nga pakighinabi, nagpangulipas niini diha sa katarungan nga kon siya moadto sa dayag, ang uban mahimong mosunod sa iyang panig-ingnan.”- The Desire of Ages, p. 168.
b. Ihulagway kon giunsa ni Nicodemo pagsugod ang iyang pakighinabi uban kang Jesus. Juan 3:2.
“Sa presensya ni Cristo, si Nicodemo mibati ug usa ka talagsaon nga pagkamaulawon, nga iyang gitinguha nga itago ilalum sa usa ka hangin sa pagka-kalmado ug dignidad. ‘Rabbi,’ siya miingon, ‘kami nahibalo nga Ikaw usa ka magtutudlo nga gikan sa Dios: tungod kay walay tawo ang makahimo niining mga milagro nga Imong gibuhat, gawas kon ang Dios uban kaniya.’ Pinaagi sa paghisgot sa talagsaong mga gasa ni Cristo isip magtutudlo, ug usab sa Iyang kahibulongang gahum sa paghimo ug mga milagro, siya naglaum sa paghimo ug dalan alang sa iyang pagpakighinabi. Ang iyang mga pulong gidisenyo sa pagpahayag ug pagdapit sa pagsalig; apan sila nagpahayag gayud ug pagkawalay pagtoo. Wala niya ilha nga si Jesus mao ang Mesias, kondili usa lamang ka magtutudlo nga gipadala gikan sa Dios.”— Ibid.
c. Uban sa unsa nga konsepto nga si Cristo sa kalit nagsurprisa kang Nicodemo? Juan 3:3.
“Imbis nga ilhon kini nga pagtimbaya, gipunting ni Jesus ang Iyang mga mata ngadto sa mamumulong, nga daw nagbasa sa iyang kalag. Sa Iyang walay kinutuban nga kaalam nakita Niya sa Iyang atubangan ang usa nga nagpangita sa kamatuoran. Siya nasayud sa katuyoan niini nga pagbisita, ug uban sa tinguha sa pagpalawom sa konbiksyon nga anaa na sa hunahuna sa Iyang tigpaminaw, Siya midiretso na sa punto, nga nag-ingon sa ka solemne, apan mabination, ‘Sa pagkatinuod, sa pagkatinuod, Ako magaingon kanimo, gawas nga ang tawo igapanganak gikan sa itaas, dili siya makakita sa gingharian sa Dios.’ Juan 3:3, margin.
“Si Nicodemo miduol sa Ginoo nga naghunahuna sa pagsulod sa usa ka diskusyon uban Kaniya, apan gipadayag ni Jesus ang patukoranan nga mga prinsipyo sa kamatuoran.”— Ibid., pp. 168–171.
Martes
, Enero 28
3. ANG BAG-O NGA PAGKA-TAWO
a. Giunsa ni Nicodemo pagtubag ang gisulti ni Cristo nga iyang gikinahanglan - ug sama kaniya, ngano nga kitang tanan nagkinahanglan sa bag-o nga pagkatawo nga kasinatian? Juan 3:4-8.
“Ang hulagway sa bag-ong pagkatawo, nga gigamit ni Jesus, dili sa hingpit nga wala mahibaloi ni Nicodemo. Ang mga nakabig gikan sa pagano ngadto sa pagtoo sa Israel sagad gitandi ngadto sa mga bata nga bag-o lang natawo. Busa siya mahimong nakaamgo nga ang mga pulong ni Cristo dili angay sabton sa literal nga pagsabot. Apan tungod sa iyang pagkahimugso isip usa ka Israelita iyang giila ang iyang kaugalingon nga sigurado na sa usa ka dapit sa gingharian sa Dios. Siya nagabati nga wala siya magkinahanglan ug pagbag-o. Busa natingala siya sa mga pulong sa Manluluwas. Nalain siya sa ilang suod nga aplikasyon alang sa iyang kaugalingon. Ang garbo sa Fariseo nakigbisug batok sa matinud-anon nga tinguha sa nangita ug kamatuoran. Siya nahibulong nga si Cristo misulti ngadto kaniya ingon sa Iyang gihimo, nga wala magrespito sa iyang posisyon ingon nga magmamando sa Israel.
“Nahibulong sa iyang kaugalingon nga pagkabutang, siya mitubag kang Cristo diha sa mga pulong nga puno sa kantalita, ‘Unsaon man pagkahimo nga igaanak ang tawo sa tigulang na siya?’ Sama sa daghang uban pa sa dihang ang nagaputol nga kamatuoran dalhon ngadto sa konsensya, iyang ipakita ang kamatuoran nga ang natural nga tawo dili modawat sa mga butang sa Espiritu sa Dios. Wala bisan unsa diha sa sulod niya ang modawat sa espirituhanong mga butang; tungod kay ang espirituhanon nga mga butang pagasabton pinaagi sa espirituhanon.
“Apan ang Manluluwas wala magtagbo sa argumento uban sa argumento. Nag-isa sa Iyang kamot uban sa solemne, hilom nga dignidad, Iyang giduot ang kamatuoran nga mosangko sa mas dako nga kasigurohan, ‘Sa pagkatinuod, sa pagkatinuod, magaingon ako kanimo, gawas nga ang tawo igapanganak sa tubig ug sa Espiritu, dili siya makasulod sa gingharian sa Dios.’ ”— The Desire of Ages, p. 171.
b. Kanus-a ug sa unsang paagi nga ang usa ka indibiduwal matawo pag-usab? Juan 1:12, 13.
“‘Gihigugma pag-ayo sa Dios ang kalibutan, nga Iyang gihatag ang Iyang bugtong nga Anak,’ aron nga ang tawo mahimong mapasig-uli ngadto sa Dios. Pinaagi sa mga merito ni Cristo siya mahimong mabalik ngadto sa pagpakig-uyon uban sa iyang Magbubuhat. Ang iyang kasingkasing kinahanglan nga mabag-o pinaagi sa balaanon nga gracia; kinahanglan nga siya makabaton ug bag-ong kinabuhi gikan sa itaas. Kini nga kausaban mao ang bag-ong pagkatawo, nga kon wala kini, matud ni Jesus, ‘dili siya makakita sa gingharian sa Dios.’ ”— The Great Controversy, p. 467.
“Pinaagi [sa] yano nga buhat sa pagtoo sa Dios, ang Balaang Espiritu magahatag sa bag-ong kinabuhi sa imong kasingkasing. Ikaw sama sa usa ka bata nga natawo sa pamilya sa Dios, ug Siya nahigugma kanimo sama sa Iyang paghigugma sa Iyang Anak.”— Steps to Christ, p. 52.
Mierkules
, Enero 29
4. PAGHINLO UG PAGBAG-O
a. Unsay nagsimbolo sa paghinlo ug pagbag-o nga motungha uban ang bag-ong pagkatawo? Marcos 16:16 (unang bahin).
“Ang makakabig nga gahum sa Dios makahimo sa pag-usab sa napanunod ug naugmad nga mga kahiligan; tungod kay ang relihiyon ni Jesus nagatuboy. ‘Pagpakatawo pag-usab’ nagkahulogan ug pagka-usab, usa ka bag-ong pagkatawo diha kang Cristo Jesus.”- The Adventist Home, p. 206.
“Gihimo ni Cristo ang bautismo nga timaan sa pagsulod ngadto sa Iyang espirituhanong gingharian. Gihimo Niya kini nga usa ka positibo nga kondisyon nga pagabuhaton sa tanan nga buot pagailhon nga anaa nailalum sa pagbulot-an sa Amahan, sa Anak, ug sa Espiritu Santo. Sa dili pa ang tawo makakaplag ug puloy-anan diha sa iglesia, sa dili pa moagi sa pultahan sa espirituhanon nga gingharian sa Dios, kinahanglan nga siya makadawat sa marka sa balaang ngalan, ‘Ang Ginoo ang atong Pagkamatarung.’ Jeremias 23:6.
“Ang bautismo mao ang labing solemne nga pagsalikway sa kalibutan. Kadtong nabautismohan sa tulo ka pilo nga ngalan sa Amahan, sa Anak, ug sa Balaan Espiritu, diha gayud sa pagsugod sa ilang Cristohanong kinabuhi nagpahayag sa publiko nga ila nang gibiyaan ang pag-alagad kang Satanas ug nahimo na nga mga sakop sa harianong pamilya, mga anak sa langitnong Hari. Sila mituman sa sugo: ‘Gumula kamo sa ilang taliwala, ug magpalain kamo, . . . ug ayaw na paghikap sa mahugaw nga butang.’ Ug ngadto kanila natuman ang saad: ‘Ako modawat kaninyo, ug mahimong Amahan kaninyo, ug kamo mahimong Akong mga anak nga lalake ug babaye, nag-ingon ang Ginoo nga Labing Gamhanan.’ 2 Corinto 6:17, 18.” — Testimonies for the Church, vol. 6, p. 91.
b. Unsa ang gipahayag mahitungod sa kadautan sa atong tawhanong kinaiya ug sa plano sa Dios sa pagbag-o kanato? Juan 3:6; Jeremias 17:9; Efeso 5:26, 27.
“Imposible alang kanato, sa atong kaugalingon, ang pag-ikyas gikan sa gahong sa sala diin kita naunlod. Ang atong mga kasingkasing dautan, ug dili nato kini mausab. . . . Ang edukasyon, kultura, paggamit sa kabubut-on, paningkamot sa tawo, ang tanan adunay ilang angay nga dapit, apan dinhi niini sila walay gahum. Mahimo silang makapakita ug gawasnon nga katarung sa pagginawi, apan dili sila makausab sa kasingkasing; dili sila makaputli sa mga tuburan sa kinabuhi. Kinahanglan nga adunay gahum nga magabuhat gikan sa sulod, usa ka bag-ong kinabuhi gikan sa itaas, sa dili pa ang mga tawo mausab gikan sa sala ngadto sa pagkabalaan. Kana nga gahum mao si Cristo. Ang Iyang grasya lamang ang makapalihok sa walay kinabuhi nga mga galamhan sa kalag, ug magdani niini ngadto sa Dios, ngadto sa pagkabalaan.”— Steps to Christ, p. 18.
Huebes
, Enero 30
5. BAG-O NGA KINABUHI UG LAGSIK NGA MGA LIHOK
a. Unsang mensahi ang sa ulahi gisulat sa mga apostoles mahitungod sa pag-usab sa tumong nga motungha uban sa bag-o nga pagkatawo? Galacia 2:20; 1 Juan 2:15-17.
“Ang makakabig nga gahum sa Dios makahimo sa pag-usab sa napanunod ug naugmad nga mga kahiligan; tungod kay ang relihiyon ni Jesus nagatuboy. ‘Pagkatawo pag-usab’ nagpasabut ug usa ka pagka-usab, usa ka bag-ong pagkatawo diha kang Cristo Jesus.” – The Adventist Home, p. 206.
“Si [Pablo] konbinsido nga kon ang mga hunahuna sa mga tawo madala ngadto sa pagsabot sa talagsaong sakripisyo nga gihimo sa Halangdon sa langit, ang tanang pagkahakog mapapahawa gikan sa ilang mga kasingkasing. Iyang gigiyahan una ang hunahuna ngadto sa posisyon nga gihuptan ni Cristo didto sa langit, diha sa sabakan sa Iyang Amahan; iyang gipadayag Siya human niana ingon nga naghukas sa Iyang himaya, boluntaryo nga nagpasakup sa Iyang kaugalingon sa tanan nga makapaubos nga kahimtang sa kinaiyahan sa tawo, nagsagop sa mga responsibilidad sa usa ka sulogoon, ug nahimong masinugtanon hangtud sa kamatayon, ug nga kana nga kamatayon nga labing makauulaw ug ngil-ad, ang labing makauulaw, ang labing nakahingutas – ang kamatayon sa krus. Makapamalandong ba ang mga Cristohanon niining kahibulongan nga pagpasundayag sa gugma sa Dios ngadto sa tawo nga walay mga pagbati sa gugma ug sa usa ka nakaamgo nga pagbati sa kamatuoran nga kita dili na sa atong kaugalingon? Ang ingon niana nga Agalon kinahanglan nga dili alagaran gikan sa pagdumot, kaibug, dalo nga mga motibo.”— Testimonies for the Church, vol. 4, p. 458.
“Ako mamulong kaninyo sama sa gipamulong ni Cristo kang Nicodemo: ‘Kinahanglan nga matawo ka pag-usab.’ Kadtong adunay Cristo nga nagmando sa sulod dili mobatig tinguha sa pagsundog sa pasundayag sa kalibutan. Ilang dad-on bisan asa ang sumbanan sa krus, kanunay nga nagsaksi sa mas hataas nga mga katuyoan ug mas halangdon nga mga tema kay sa niadtong nakapatugob sa mga kalibutanon. Ang atong bisti, atong mga puloy-anan, ang atong panag-istoryahanay, kinahanglan nga magpamatuod sa atong pagtugyan ngadto sa Dios. Unsang gahum ang magauban niadtong nagapadayag nga ilang gibiyaan ang tanan alang kang Cristo.”— Ibid., vol. 5, p. 189.
Biernes
, Enero 31
PERSONAL SUBLI NGA MGA PANGUTANA
1. Tungod sa iyang maayong mga buhat, giunsa pagtan-aw ni Nicodemo ang iyang kaugalingon?
2. Giunsa ni Nicodemo paggawi diha sa presensya ni Cristo?
3. Unsay buot ipasabot sa “pagpakatawo pag-usab”?
4. Sa unsang paagi mahitabo ang bag-ong pagkatawo?
5. Unsang kausaban sa paggawi ang mahitabo ingon nga resulta sa bag-ong pagkatawo, ug ngano?