Domingo
, Pebrero 2
1. AGHAT NGA PANGUTANA
a. Unsang pangutana ni Nicodemo nagpakita nga ang iyang kasingkasing napahumok na? Juan 3:9.
“Si Jesus sa pagkatinuod miingon kang Nicodemo: Dili kontrobersya ang makatabang sa imong kahimtang: dili ang mga argumento ang magdala ug kahayag sa kalag. Kinahanglan ka magbaton ug usa ka bag-ong kasingkasing, o dili ka makaila sa gingharian sa langit. Dili ang mas daku nga ebidensya ang magdala kanimo sa husto nga posisyon, apan bag-ong katuyoan, bag-ong mga tuburan sa paglihok. Kinahanglan nga matawo ka pag-usab. Hangtud nga kini nga kausaban mahitabo, nga maghimo sa tanan nga mga butang nga bag-o, ang labing lig-on nga ebidensya nga mahimo nga ikapresentar mahimong walay kapuslanan. Ang panginahanglan anaa sa imong kaugalingong kasingkasing; ang tanan kinahanglan nga usbon, o dili ka makakita sa gingharian sa Dios.
“Kini usa ka makapaubos kaayo nga pahayag ngadto kang Nicodemo. . . . Siya dili kaayo espirituhanon ug hunahuna aron sa pag-ila sa kahulogan sa mga pulong ni Cristo. Apan ang Manluluwas wala magtagbo sa argumento uban sa argumento. . . .
“Ang pipila ka silaw sa kamatuoran mituhop sa hunahuna sa magmamando. Ang mga pulong ni Cristo mipuno kaniya sa kahingangha, ug midala ngadto sa pangutana, ‘Unsaon pagkahimo niining mga butanga?’ Uban sa lawom nga kasibot si Jesus mitubag, ‘Ikaw ba usa ka pangulo sa Israel, ug wala ka mahibalo niining mga butanga?’ Ang iyang mga pulong nagpahayag ngadto kang Nicodemo sa leksyon nga, imbes mobatig kalagot sa yano nga mga pulong sa kamatuoran, ug magpatuyang sa pagpakaaron-ingnon, siya aduna untay usa ka labi ka mapaubsanon nga opinyon sa iyang kaugalingon, tungod sa iyang espirituhanong pagkawalay alamag. Apan ang mga pulong ni Cristo gisulti uban sa ingon ka solemne nga dignidad, ug diha sa hitsura ug tono nagpahayag sa ingon ka mainiton nga gugma ngadto kaniya, nga siya wala makapahiubos sa dihang nasabtan ang iyang makauulaw nga posisyon.”- Testimonies to Ministers, pp. 368, 369.
Lunes
, Pebrero 3
2. MAGAUSAB SA TIPIKAL NGA BATASAN
a. Diha sa unsa nga ang mga Fariseo nagpagarbo sa ilang mga kaugalingon? Lucas 18:9-12.
“Ang mga Judeo mao ang una nga gitawagan ngadto sa ubasan sa Ginoo, ug tungod niini sila mapahitas-on ug nagpakamatarung sa kaugalingon. Ang ilang taas nga mga katuigan sa pagserbisyo ilang gitagad ingon nga naghatag kanila sa katungod sa pagdawat ug daku nga balus kay sa uban. Wala nay mas makapalagut kanila kay sa usa ka pagpahibalo nga ang mga Gentil pagadawaton ngadto sa managsama nga mga pribilehiyo uban sa ilang mga kaugalingon diha sa mga butang sa Dios.”— Christ’s Object Lessons, p. 400.
b. Giunsa ni Jesus paghulagway ang buhat sa Balaang Espiritu diha sa kasingkasing? Juan 3:8.
“Ang hangin madungog taliwala sa mga sanga sa kakahoyan, nga nagahaguros sa mga dahon ug mga bulak; apan kini dili makita, ug walay tawo nga nasayud diin kini gikan o asa kini paingon. Mao man ang buhat sa Balaang Espiritu diha sa kasingkasing. Dili kini ikapatin-aw sama sa mga lihok sa hangin. Usa ka tawo mahimong dili makasulti sa eksaktong oras o dapit, o sa pagsubay sa tanang mga sirkumstansya sa proseso sa pagkakabig; apan kini wala magproyba nga siya wala makabig. Pinaagi sa usa ka ahensya nga dili makita sama sa hangin, si Cristo kanunay nagabuhat diha sa kasingkasing.”— The Desire of Ages, p. 172.
c. Sa unsang paagi nga ang balaang mga pagpasabot gipahimutang diha sa kasingkasing? Isaias 30:21; Jeremias 42:3; Mateo 16:17.
“Sa hinayhinay, tingali wala mamatikdi sa nagdawat, ang mga pagpasabot nga nahimo nga misangko ngadto sa pagdani sa kalag ngadto kang Cristo. Kini mahimong madawat pinaagi sa pagpamalandong diha Kaniya, pinaagi sa pagbasa sa mga Kasulatan, o pinaagi sa pagpaminaw sa pulong gikan sa buhi nga magwawali. Sa kalit, sa dihang ang Espiritu moabut uban sa mas direkta nga paghangyo, ang kalag sa kamalipayon motugyan sa iyang kaugalingon ngadto kang Jesus. Sa kadaghanan kini gitawag ug kalit nga pagkakabig; apan kini mao ang resulta sa dugay nga pagpangamuyo sa Espiritu sa Dios—usa ka mapailubon, malungtarong proseso.”— Ibid.
“Itugot ang inyong mga kasingkasing nga mapahumok ug magamhan sa Espiritu sa Dios. Himoa nga ang mga kalag nga naputos sa yelo matunaw ilalum sa paglihok sa Balaang Espiritu.”- Letters and Manuscripts, vol. 12, Letter 53, 1897.
Martes
, Pebrero 4
3. EBEDENSYA SA BAG-ONG PAGKATAWO
a. Sa unsa nga ang sulodnon nga mga pagbuhat sa Balaang Espiritu mapadayag sa gawas? Galacia 5:22-25.
“Samtang ang hangin mismo dili makita, kini naghatag ug mga epekto nga makita ug mabati. Mao man ang buhat sa Espiritu diha sa kalag mopadayag sa iyang kaugalingon diha sa matag buhat kaniya nga mibati sa iyang makaluwas nga gahum. Sa diha nga ang Espiritu sa Dios mokuha ug luna sa kasingkasing, kini mobag-o sa kinabuhi. Ang dautan nga mga hunahuna mawagtang, ang dautang mga buhat pagabiyaan; ang gugma, pagpaubos, ug kalinaw mopuli sa kasuko, kasina, ug panag-away. Ang kalipay mopuli sa kasubo, ug ang panagway mopasibaw sa kahayag sa langit.”— The Desire of Ages, p. 173.
b. Kanus-a makadawat ang usa ka tawo sa panalangin sa pagbag-o? Roma 10:9, 10; 1 Juan 1:9.
“Walay makakita sa kamot nga nag-alsa sa lulan, o makakita sa kahayag nga mikunsad gikan sa mga hawanan sa itaas. Ang panalangin moabut sa dihang pinaagi sa pagtoo ang kalag motugyan sa kaugalingon ngadto sa Dios. Unya kana nga gahum nga walay tawhanong mata makakita magmugna ug bag-ong binuhat diha sa dagway sa Dios.”— Ibid.
“Kon anaa kanimo ang Espiritu Santo nga nag-umol ug naghulma sa imong kasingkasing matag adlaw, unya makabaton ka ug balaanong pagpanabut sa pag-ila sa kinaiya sa gingharian sa Dios. Si Nicodemo nakadawat sa leksyon ni Cristo ug nahimong tinuod nga magtutuo.”— Testimonies to Ministers, pp. 369, 370.
c. Giunsa paghulagway ni Cristo kini nga proseso? Mateo 13:33.
“Ang lebadura nga natago diha sa harina molihok nga dili makita aron modala sa tibook minasa ilalum sa nagpatubo nga proseso niini; busa ang lebadura sa kamatuoran nagabuhat nga sekreto, sa kahilom, sa makanunayon, aron sa pagbag-o sa kalag. Ang natural nga mga kahiligan napahumok ug napasakop. Bag-ong mga hunahuna, bag-ong mga pagbati, bag-ong mga motibo, natisok. Usa ka bag-ong sumbanan sa kinaiya ang napahalona—ang kinabuhi ni Cristo. Ang hunahuna nausab; ang mga galamhan gipukaw sa paglihok sa bag-ong mga linya. Ang tawo wala mahatagi ug bag-ong mga galamhan, apan ang mga galamhan nga anaa kaniya gibalaan. Ang konsensya napapukaw. Kita gitugahan sa mga taras sa kinaiya nga makapahimo kanato sa pagpangalagad alang sa Dios.”— Christ’s Object Lessons, pp. 98, 99.
Mierkules
, Pebrero 5
4. USA KA SINATI NGA ILUSTRASYON
a. Giunsa ni Jesus paghulagway ang paglansang kaniya nga hapit na mahitabo? Juan 3:14, 15.
“[Juan 3:14, 15 gikutlo.] Dinhi ang sukaranan diin si Nicodemo hinasa. Ang simbolo sa giisa nga bitin nagpatin-aw ngadto kaniya sa misyon sa Manluluwas. Sa diha nga ang katawhan sa Israel nangamatay tungod sa kahapdos sa malala nga mga bitin, ang Dios nagsugo kang Moises sa paghimo ug usa ka bitin nga tumbaga, ug ibutang kini sa itaas sa katilingban. Unya ang pulong gipalanog sa tibook kampo nga ang tanan nga motan-aw diha sa bitin mabuhi. Ang mga tawo nahibalo pag-ayo nga sa iyang kaugalingon ang bitin walay gahum sa pagtabang kanila. Kadto usa ka simbolo kang Cristo. Samtang ang hulagway nga gihimo sa dagway sa makamatay mga bitin giisa alang sa ilang kaayohan, mao man ang Usa nga gihimo ‘diha sa dagway sa makasasalang unod’ mao ang mahimong ilang Manunubos. Roma 8:3. Daghan sa mga Israelinhon ang nagtagad sa halad nga serbisyo ingon nga aduna kini sa iyang kaugalingong gahum sa pagpahigawas kanila gikan sa sala. Ang Dios nagtinguha sa pagtudlo kanila nga kini walay labaw nga bili kay niadtong bitin nga tumbaga. Kini mao ang magtudlo sa ilang mga hunahuna ngadto sa Manluluwas. Alang man sa pag-ayo sa ilang mga samad o ang kapasayloan sa ilang mga sala, wala silay mahimo alang sa ilang kaugalingon gawas sa pagpakita sa ilang pagtoo diha sa Gasa sa Dios. Kinahanglan nga sila motan-aw ug mabuhi.”— The Desire of Ages, pp. 174, 175.
b. Bisan pa sa tagana, nganong ang uban nangamatay? 1 Corinto 10:9; Hebreohanon 3:12.
“Daghan sa mga Israelitas walay nakita nga tabang diha sa tambal nga gitudlo sa Langit. Ang mga patay ug himalatyon naglibot kanila, ug sila nahibalo nga, kon walay tabang sa Dios, ang ilang kaugalingong kapalaran tino gayud; apan nagpadayon sila sa pagkaguol sa ilang mga samad, sa ilang mga kasakit, sa ilang sigurado nga kamatayon, hangtud nga ang ilang kusog nawala na, ug ang ilang mga mata naglurat, samtang nga sila aduna untay dihadiha nga kaayohan.”— Patriarchs and Prophets, p. 432.
c. Kon kita buot nga maluwas, asa man ta motan-aw? Hebreohanon 6:19, 20.
“Ang makamatay nga mga epekto sa sala matangtang lamang pinaagi sa tagana nga gihimo sa Dios. Ang mga Israelita nagluwas sa ilang mga kinabuhi pinaagi sa pagtan-aw sa giisa nga bitin. Kana nga pagtan-aw nagpasabot ug pagtoo. Sila nabuhi tungod kay sila mitoo sa pulong sa Dios, ug misalig diha sa mga paagi nga gihatag alang sa ilang pagkaayo. Busa ang makasasala motan-aw kang Cristo, ug mabuhi. Siya nakadawat ug pasaylo pinaagi sa pagtoo sa matuboson nga sakripisyo. . . . Si Cristo adunay gahum ug kaayo diha sa Iyang kaugalingon sa pag-ayo sa naghinulsol nga makasasala.”— Ibid., p. 431.
Huebes
, Pebrero 6
5. ANG ATONG MGA MATA PADAYON SA PAGTUTOK
a. Unsang leksyon ang sa ulahi nasabtan ni Nicodemo nga kinahanglan nga atong kat-onon- ug kanunay nga ibutang sa hunahuna? Efeson2:8; Lucas 13:20, 21.
“Kasagaran motungha ang pangutana, Ngano man, nga adunay daghan kaayo, nga nag-angkon nga nagatoo sa pulong sa Dios, nga diha kanila walay makita nga pagbag-o diha sa mga pulong, diha sa espiritu, ug sa kinaiya? Ngano nga adunay daghan kaayo nga dili makaagwanta sa pagsupak sa ilang mga katuyoan ug mga plano, kinsa magpakita ug dili balaan nga taras, ug kinsang mga pulong mahait, mapahitas-on, ug mainiton? Adunay makita diha sa ilang mga kinabuhi ang mao gihapon nga gugma sa kaugalingon, mao gihapon dinalo nga pagpatuyang, mao ra gihapon ka masuk-anon ug dali nga sinultihan, nga makita sa kinabuhi sa kalibutanon. Adunay mao gihapong sensitibo nga garbo, parehas nga pagtugyan ngadto sa natural nga kahiligan, mao gihapon nga kahiwian sa kinaiya, nga daw ang kamatuoran wala nila sa hingpit mahibaloi. Ang rason mao kay sila wala makabig. Wala nila tagoi ang lebadura sa kamatuoran diha sa kasingkasing. Wala kini kahigayonan sa paghimo sa iyang buluhaton. Ang ilang natural ug naugmad nga mga kahiligan ngadto sa dautan wala itugyan ngadto sa makapausab nga gahum niini. Ang ilang mga kinabuhi nagpadayag sa pagkawala sa gracia ni Cristo, usa ka walay pagtoo diha sa Iyang gahum sa pagbag-o sa kinaiya.
“‘Ang pagtoo moabut pinaagi sa pagpaminaw, ug ang pagpaminaw pinaagi sa pulong sa Dios.’ Roma 10:17. Ang mga Kasulatan mao ang dakong ahensya sa pagbag-o sa kinaiya. Si Cristo nag-ampo, ‘Balaana sila pinaagi sa Imong kamatuoran; Ang imong pulong mao ang kamatuoran.’ Juan 17:17. Kon gitun-an ug gituman, ang pulong sa Dios magabuhat diha sa kasingkasing, nagbuntog sa matag dili balaan nga kinaiya. Ang Balaang Espiritu mianhi aron sa pagkonbikto sa sala, ug ang pagtoo nga migitib dihan sa kasingkasing magabuhat pinaagi sa gugma ngadto kang Cristo, magapahiuyon kanato diha sa lawas, kalag, ug espiritu ngadto sa Iyang kaugalingong dagway. Unya ang Dios makahimo sa paggamit kanato sa pagbuhat sa Iyang kabubut-on. Ang gahum nga gihatag kanato magabuhat gikan sa sulod paingon sa gawas, magdala kanato sa pagtunol ngadto sa uban sa kamatuoran nga gipahayag nganhi kanato.”— Christ’s Object Lessons, pp. 99, 100.
Biernes
, Pebrero 7
PERSONAL SUBLI NGA MGA PANGUTANA
1. Unsa ang nag-una nga kinaiya sa mga Fariseo sa kaadlawan ni Cristo?
2. Ipasabut kon sa unsang paagi nga kita nabag-o ngadto sa pagkasama ni Cristo.
3. Sa unsa nga ang pagbag-o sa kasingkasing mapakita?
4. Isaysay ang simbolo sa giisa nga bitin.
5. Sa unsang paagi ang sambingay sa lebadura nagpadayag ug pagtubo diha sa gracia sa Dios?