Domingo
, Marso 9
1. ANG MAKAAYO NGA MGA TUBIG
a. Alang sa unsang tuyo nga ang daghang mga tawo nga bakol nangadto sa Jerusalem? Juan 5:2, 3.
b. Unsang pagtoo ang nabatonan sa mga tawo palibut sa linaw sa Betsaida? Juan 5:4.
“Sa piho nga mga panahon ang mga tubig niini nga linaw ginakutaw, ug kini kasagaran nga gituohan nga kini mao ang resulta sa labaw sa kinaiyahan nga gahum, ug nga bisan kinsa nga unang nakatunob ngadto sa tubig human sa pagkutaw sa linaw, mamaayo siya sa bisan unsang sakit nga anaa kaniya. Gatusan sa mga nag-antus ang mibisita sa maong dapit; apan hilabihan ka daghan sa mga tawo sa diha nga ang tubig gikutaw nga sila nag-inilugay sa unahan, nga nagyatak sa mga lalake, mga babaye, ug mga bata, nga mas mahuyang kay sa ilang kaugalingon. Daghan ang dili makaduol sa linaw. Daghan kinsa milampos sa pagkab-ot niini namatay sa ngilit niini. Ang mga puy-anan kaniadto gipatindog libot sa dapit, aron ang mga masakiton mapanalipdan gikan sa kainit sa adlaw ug sa katugnaw sa kagabhion. Adunay pipila nga migamit sa gabii niini nga mga portiko, nga nagakamang sa daplin sa linaw adlaw-adlaw, diha sa kawang nga paglaum sa kaayohan.”—The Desire of Ages, p. 201.
c. Sa unsang paagi ang interaksyon tali ni Jesus ug sa usa ka tawo sa danawan magsugod? Juan 5:5–7.
Lunes
, Marso 10
2. NAGKALAIN-LAING MATANG SA MGA PARALITIKO
a. Unsang imposible sa tawo nga tahas ang gimando ni Jesus nga buhaton sa paralitiko – ug uban sa unsang mga resulta? Juan 5:8, 9 (unang bahin).
“Si Jesus wala maghangyo niini nga nag-antus sa pagpakita ug pagtoo diha Kaniya. Siya yano nga nag-ingon, ‘Bangon, pas-ana ang imong higdaanan, ug lakaw.’ Apan ang pagtoo sa tawo mikupot nianang pulong. Ang matag ugat ug maskulo naghinamhinam uban sa bag-ong kinabuhi, ug ang mahimsog nga aksyon miabut sa iyang bakol nga mga bukton. Sa walay pagduhaduha iyang gipahalona ang iyang kabubut-on sa pagsunod sa mando ni Cristo, ug ang tanan niyang kaunoran mitubag sa iyang kabubut-on. Midagayday ngadto sa iyang mga tiil, nakita niya ang iyang kaugalingon nga usa ka aktibo nga tawo.
“Si Jesus wala maghatag kaniya ug kasiguroan sa diosnong tabang. Ang tawo mahimong mohunong diha sa pagduhaduha, ug mawad-an sa iyang usa ka higayon sa pagkaayo. Apan siya mitoo sa pulong ni Cristo, ug diha sa paghimo niini siya nakadawat ug kusog.”— The Desire of Ages, pp. 202, 203.
b. Sa unsang espirituhanong kahimtang nga ang mga tawo nga nahimulag gikan kang Cristo makakaplag sa ilang kaugalingon? Isaias 1:5, 6; Roma 7:24.
“Pinaagi sa sala kita nahimulag gikan sa kinabuhi sa Dios. Ang atong mga kalag nahimong naparalisar. Sa atong mga kaugalingon dili na makahimo sa pagkinabuhi sa usa ka balaan nga kinabuhi kay sa usa ka bakol nga tawo nga makahimo sa paglakaw. Adunay daghan nga nakaamgo sa ilang pagka-walay mahimo, ug kinsa nangandoy nianang espirituhanong kinabuhi nga modala kanila ngadto sa pagpakig-harmoniya sa Dios; sila sa kawang naningkamot sa pagbaton niini.”—Ibid., p. 203.
c. Unsa ang bugtong tambal alang sa ingon ana nga kahimtang? Buhat 9:34.
“Ang Manluluwas miduko ibabaw sa pinalit sa Iyang dugo, nag-ingon uban sa dayag nga kalumo ug kalooy, ‘Buot ka ba nga mamaayo?’ Siya mimando kanimo sa pagbangon diha sa kahimsog ug kalinaw. Ayaw paghulat nga mobati nga ikaw nahimo nga maayo na. Tuohi ang Iyang pulong, ug kini matuman. Ibutang ang imong kabubut-on diha sa kiliran ni Cristo. Kabubut-on sa pag-alagad Kaniya, ug diha sa pagbuhat sa Iyang pulong ikaw makadawat kusog. Bisan unsa pa ang dautan nga buhat, ang nagahari nga pagbati nga pinaagi sa taas nga pagpatuyang nagbugkos sa kalag ug lawas, si Cristo makahimo ug nagtinguha sa pagluwas. Iyang hatagan ug kinabuhi ang kalag nga ‘patay diha sa mga kalapasan.’Efeso 2:1. Iyang buhian ang binihag nga gipugngan pinaagi sa kaluyahon ug kaalautan ug mga kadena sa sala.”—Ibid.
Martes
, Marso 11
3. MAGALAKAW DIHA SA KABAG-O SA KINABUHI
a. Sa unsang paagi nga si Cristo magatabang kanato sa pagdaug? Efeso 2:1-6.
“Ang tawo natural gayud nga inklinado sa pagsunod sa mga sugyot ni Satanas, ug dili siya magmalampuson sa pagsukol sa hilabihan ka teribli nga kaaway gawas nga si Cristo, ang gamhanan nga Mananaug, magapuyo diha kaniya, magagiya sa iyang mga handum, ug magahatag kaniya ug kusog. . . . Si Satanas mas nasayud kay sa katawhan sa Dios sa gahum nga ilang mabatonan ibabaw kaniya sa dihang ang ilang kusog anaa diha kang Cristo. Sa dihang sila sa mapaubsanon magahangyo sa gamhanan nga Mananaug alang sa panabang, ang pinakahuyang nga tumotuo diha sa kamatuoran, nga magasalig nga malig-on diha kang Cristo, malampuson nga magapakgang kang Satanas ug sa tanan niyang mga panon.”- Testimonies for the Church, vol. 1, p. 341.
“Kinahanglan nga mokat-on kita kang Cristo. Kinahanglan mahibalo kita kon unsa Siya alang niadtong Iyang gilukat. Kinahanglan nga atong masabtan nga pinaagi sa pagtoo diha Kaniya maoy atong pribilehiyo ang pag-ambit sa diosnong kinaiya, ug sa ingon makaikyas sa kadunotan nga anaa sa kalibutan pinaagi sa pangibog. Unya kita mahinloan gikan sa tanang sala, tanang depekto sa kinaiya. Dili kita angay nga magbaton ug usa ka dautang kahiligan. . . .
“Sa dihang kita makaambit sa diosnong kinaiya, ang napanunod ug naugmad nga kahiligan ngadto sa sayop maputol gikan sa kinaiya, ug kita mahimong usa ka buhi nga gahum alang sa maayo. Kanunay nagakat-on sa diosnong Magtutudlo, sa matag adlaw magaambit sa Iyang kinaiya, kita nakigtimbayayong sa Dios diha sa pagdaug sa mga tentasyon ni Satanas. Ang Dios magabuhat, ug ang tawo magabuhat, aron nga ang tawo mahiusa uban kang Cristo maingon nga si Cristo usa uban sa Dios. Unya kita molingkod kauban kang Cristo diha sa langitnong mga dapit. Ang hunahuna nakapahulay uban sa kalinaw ug kasigurohan diha kang Jesus.”- The Review and Herald, Abril 24, 1900.
b. Hubita amg kalinaw nga mitungha pinaagi sa kusog gikan kang Cristo. Roma 8:3-6.
“Matag anak mabuhi pinaagi sa kinabuhi sa iyang amahan. Kon kamo mga anak sa Dios, gipanganak kamo pinaagi sa Iyang Espiritu, kamo magkinabuhi pinaagi sa kinabuhi sa Dios. . . . [Ug] ang kinabuhi ni Jesus mahimong maipakita ‘diha sa atong mamalatyon nga unod’ (2 Corinto 4:11). Kana nga kinabuhi diha kaninyo mohatag ug sama nga kinaiya ug magpakita ug sama nga mga buhat maingon sa nahimo diha Kaniya. Sa ingon kamo mahimong maharmoniya uban sa matag kalagdaan sa Iyang kasugoan; tungod kay ‘ang kasugoan sa Dios hingpit, nagapabag-o sa kalag.’ Salmo 19:7, margin. Pinaagi sa gugma ‘ang pagkamatarung sa kasugoan’ mahimong ‘matuman dinhi kanato, nga wala magkinabuhi diha sa unod, kon dili sa Espiritu.’ Roma 8:4.”- Thoughts From the Mount of Blessing, p. 78.
Mierkules
, Marso 12
4. ANG KASUKO SA MGA FARISEO
a. Wala motagad sa panalangin nga gihatag diha sa paralitiko, ngano man nga ang mga Fariseo nangasuko? Juan 5:9 (katapusang bahin), 10.
“Samtang [ang naayo nga paralitiko] nagdali sa iyang paglakaw uban ang lig-on, gawasnong lakang, nagdayeg sa Dios ug nagmaya sa iyang bag-ong nakaplagan nga kusog, iyang nahimamat ang pipila sa mga Fariseo, ug diha-diha gisultihan sila sa iyang pagkaayo. Natingala siya sa kabugnaw sa ilang pagpaminaw sa iyang estorya.
“Uban sa nagkisdong nga kilay ilang gibalda siya, nangutana ngano nga siya nagdala sa iyang higdaanan sa adlaw nga Igpapahulay. Sila hugot nga nagpahinumdom kaniya nga kini dili uyon sa balaod ang pagpas-an sa mga palas-anon sa adlaw sa Ginoo. Sa iyang kalipay ang lalake nakalimot nga kadto Adlaw nga Igpapahulay; apan wala siya mibati ug kondinasyon tungod sa pagsunod sa sugo sa Usa nga adunay ingon nga gahum gikan sa Dios. Nitubag siya nga maisugon, ‘Siya nga nag-ayo kanako, siya miingon kanako, pas-ana ang imong higdaanan, ug lakaw.’ Nangutana sila kon kinsa ang nagbuhat niini, apan wala siya makahimo sa pagsulti. Kini nga mga pangulo nahibalo kaayo nga Usa lamang ang nagpakita sa Iyang kaugalingon nga makahimo sa pagbuhat niini nga milagro; apan nangandoy sila ug direktang pamatuod nga si Jesus kadto, aron ilang mahukman Siya ingon nga usa ka malapason sa Igpapahulay. Sa ilang hukom wala lamang niya gilapas ang balaod sa pag-ayo sa masakiton sa Igpapahulay, kon dili nakahimo ug pagpasipala sa pagsugo kaniya nga dad-on ang iyang higdaanan.”—The Desire of Ages, pp. 203, 204.
b. Unsa ang gibuhat sa mga Judeo sa Adlaw nga Igpapahulay? Mateo 23:4.
“Ang mga Judeo mituis pag-ayo sa balaod nga ilang gihimo kini nga usa ka yugo sa pagkaulipon. Ang ilang walay kahulogan nga mga kinahanglanon nahimong usa ka pagya taliwala sa ubang mga nasud. Ilabi na ang Adlaw nga Igpapahulay gilibutan sa tanang matang sa hinungdan nga mga pagdili. Kini dili usa ka kalipay alang kanila, ang balaan alang kang Jehova, ug dungganon. Ang mga eskriba ug mga Fariseo naghimo sa pagsaulog niini nga usa ka dili maagwanta nga palas-anon. Ang usa ka Judeo wala tugoti sa paghaling ug kalayo bisan sa pagdagkot ug kandila sa Adlawng Igpapahulay. Ingon nga usa ka gisangputan ang katawhan nagsalig sa mga Gentil alang sa daghang mga serbisyo nga gidili sa ilang mga kalagdaan nga pagabuhaton nila. Wala sila makahunahuna nga kon kini nga mga buhat sayop, kadtong nagpatrabaho sa uban aron sa pagbuhat kanila mga sadan sama ra nga sila ang nagtrabaho niini mismo. Naghunahuna sila nga ang kaluwasan limitado lamang sa mga Judeo, ug nga ang kahimtang sa tanan nga uban, nga wala nay paglaum, mahimong dili grabe. Apan ang Dios wala maghatag ug mga sugo nga dili mahimo nga tumanon sa tanan. Ang Iyang mga balaod wala magtugot ug dili makatarunganon o hakog nga mga pagdili.”— Ibid., p. 204.
Huebes
, Marso 13
5. ANG IGPAPAHULAY UG ANG KATUYOAN NIINI
a. Giunsa ni Jesus paghisgut ngadto sa kasugoan sa Dios ug ngadto sa Igpapahulay? Isaias 42:21.
“Si Jesus mianhi aron ‘sa pagpadaku sa kasugoan, ug naghimo niini nga dungganon.’ Siya wala magpakunhod sa dignidad niini, kon dili aron sa pagtuboy niini. . . . Siya mianhi aron sa pagpahigawas sa Igpapahulay gikan niining makapahasol nga mga tulomanon nga naghimo niini nga usa ka tunglo imbes nga panalangin.”- The Desire of Ages, p. 206.
b. Unsa ang angay ug dili angay nga buhaton diha sa Igpapahulay? Exodus 20:8-11.
“Sa taliwala sa mga nag-antus didto sa linaw gipili [ni Cristo] ang labing grabi nga kaso kang kinsa gamiton ang Iyang gahum sa pagpangayo, ug mimando sa tawo sa pagdala sa iyang higdaanan sa tibok ciudad aron sa pagmantala sa dakung buhat nga nahimo diha kaniya. Kini magpatunghag pangutana kon unsa ang subay sa balaod nga buhaton sa Igpapahulay, ug mag-abli sa dalan alang Kaniya sa pagsaway sa mga pagdili sa mga Judeo mahitungod sa adlaw sa Ginoo, ug sa pagpahayag sa ilang mga walay pulos nga mga tradisyon.
“Si Jesus mipahayag ngadto kanila nga ang buhat sa paghumpay sa mga sinakit nahiuyon sa kasugoan sa Igpapahulay. Kini nahiuyon sa buhat sa mga buhat sa mga manolonda sa Dios, nga sa kanunay nagakanaog ug nagasaka sa taliwala sa langit ug sa yuta aron mangalagad sa nag-antus nga tawo. . . .
“Ug ang tawo usab adunay buluhaton nga pagabuhaton niining adlawa. Ang mga gikinahanglan sa kinabuhi kinahanglan nga atimanon, ang mga masakiton kinahanglan atimanon, ang mga panginahanglan sa mga nanginahanglan kinahanglan nga mahatagan. Dili siya isipon nga walay sala siya nga nagdumili sa paghumpay sa nag-antus diha sa Igpapahulay. Ang balaang adlaw sa pagpahulay sa Dios gihimo alang sa tawo, ug ang mga buhat sa kalooy hingpit nga nahiuyon sa katuyoan niini. Ang Dios wala magtinguha sa iyang mga binuhat nga mag-antus sa usa ka oras nga kasakit nga mahimong mahumpay diha sa Igpapahulay o bisan unsa nga adlaw.”—Ibid., pp. 206, 207.
Biernes
, Marso 14
PERSONAL SUBLI NGA MGA PANGUTANA
1. Unsang pagtoo ang nikaylap bahin sa linaw sa Betsaida?
2. Unsang pinasahi nga kaso ang nakadani sa pagtagad ni Cristo?
3. Sa unsang paagi mamaayo ang atong espirituwal nga paralisis?
4. Unsay nakapasuko pag-ayo sa mga Judeo bahin sa milagrosong pagpang-ayo?
5. Unsang mga buhat ang nahiuyon sa sugo sa Igpapahulay?