Domingo
, Marso 30
1. AMBISYOSO NGA KAINITON
a. Human sa milagro sa mga tinapay, unsang konbiksyon ang nabatonan sa daghan nga katawhan? Juan 6:14. Unsa man ang ilang gitinguha nga buhaton? Juan 6:15 (unang bahin).
“Sa tibuok adlaw ang konbiksyon milig-on. Kanang pinakalabaw nga buhat mao ang pasalig nga ang dugay nang gipaabot nga Manluluwas anaa na sa ilang taliwala. Ang paglaum sa katawhan misaka nga taas ug mas taas pa. Kini Siya mao ang maghimo sa Judea nga usa ka yutan-ong paraiso, usa ka yuta nga magpaagay sa gatas ug dugos. Siya makatagbaw sa matag tinguha. Siya makahimo sa pagbungkag sa gahum sa gidumtan nga mga Romano. Siya makaluwas sa Juda ug Jerusalem. Siya makaayo sa mga sundalo nga nasamdan sa gubat. Makahimo Siya sa paghatag ug pagkaon sa tibuok kasundalohan. Iyang madaug ang mga nasud, ug ihatag sa Israel ang dugay na nga gipangita nga dominyo.
“Sa ilang kahinam ang katawhan andam dayon sa pagkorona Kaniya ingon nga hari. Ilang nakita nga Siya wala maningkamot sa pagdani sa pagtagad o pagsiguro sa kadungganan ngadto sa Iyang kaugalingon. Dinhi niini Siya lahi ra kaayo ngadto sa mga sacerdote ug mga punoan, ug sila nahadlok nga dili gayud Niya ipugos ang Iyang pag-angkon sa trono ni David. Nagtinabangay sila, sila nagkasabut sa pagkuha Kaniya pinaagi sa pagpugos, ug imantala Siya nga hari sa Israel. Ang mga tinun-an nakighiusa sa panon sa katawhan sa pagpahayag sa trono ni David nga may katungod nga kabilin sa ilang Agalon. Ang kaligdong ni Cristo, miingon sila, maoy hinungdan Kaniya sa pagdumili sa maong dungog. Ipabayaw sa katawhan ang ilang Manluluwas. Pasagdi ang arogante nga mga sacerdote ug mga magmamando mapugos sa pagpasidungog Kaniya nga mianhi nga sinul-oban sa kagahum sa Dios.”— The Desire of Ages, pp. 377, 378.
Lunes
, Marso 31
2. NAGPAKALMA SA WALA MAGIYAHI NGA KADASIG
a. Unsay gihimo ni Jesus aron sa pagpugong sa panon ug sa mga tinun-an sa pagtuman sa ilang mga plano sa pagpahalona Kaniya diha sa usa ka yutan-an nga trono? Juan 6:15.
“[Ang mga tinun-an ug ang panon] mainiton nga naghan-ay sa pagtuman sa ilang katuyoan; apan si Jesus nakakita unsa ang nagalakaw, ug nakasabut, ingon nga sila dili, unsa ang mahimong resulta sa maong kalihokan. Bisan karon ang mga sacerdote ug mga punoan nagatinguha sa Iyang kinabuhi. Ilang gipasanginlan Siya nga nagpahilayo sa mga tawo gikan kanila. Ang kabangis ug insureksyon mosunod sa paningkamot sa pagbutang Kaniya sa trono, ug ang buhat sa espirituhanon nga gingharian mababagan. Sa walay paglangan kinahanglan ang kalihokan masugpo. Nagtawag sa Iyang mga tinun-an, si Jesus misugo kanila sa pagkuha sa sakayan ug mobalik dayon ngadto sa Capernaum, nga mobiya Kaniya aron papaulion ang mga tawo.
“Wala pa masukad adunay usa ka sugo gikan ni Cristo nga daw imposible nga matuman. Ang mga tinun-an dugay na nga naglaum alang sa usa ka inila nga kalihokan sa pagbutang kang Jesus diha sa trono; dili nila maagwanta ang hunahuna nga kinahanglan kining tanan nga kasibot mahimong mapakyas. Ang mga panon sa katawohan nga nanagtigum sa pagsaulog sa pasko masibuton kaayo nga makita ang bag-ong propeta. Ngadto sa Iyang mga sumosunod kini daw bulawanon nga kahigayonan sa pagtukod sa ilang hinigugma nga Agalon diha sa trono sa Israel. Diha sa kahayag niining bag-ong ambisyon lisud alang kanila nga mobiya nga sila ra, ug magbiya kang Jesus nga mag-inusara nianang awaaw nga baybayon. Sila nagprotesta batok sa maong han-ay; apan si Jesus karon misulti uban sa usa ka awtoridad nga wala pa gayud Niya sukad mahatag ngadto kanila. Nahibalo sila nga ang dugang nga pagsupak sa ilang bahin mahitabo mahimong walay kapuslanan, ug diha sa kahilum sila mipaingon sa dagat.”— The Desire of Ages, p. 378.
b. Sa adlaw human ang milagro, unsa ang gibuhat sa panon? Juan 6:22–25.
“Ang milagro sa mga tinapay nabalita bisan diin, ug sayo kaayo sunod nga buntag ang mga tawo midugok sa Betsaida aron sa pagtan-aw kang Jesus. Sila nangabot diha sa dakong gidaghanon, diha sa yuta ug dagat. Kadtong mibiya Kaniya sa miaging gabii mibalik, nga nagdahom sa pagkaplag Kaniya didto; tungod kay walay sakayan nga magdala Kaniya ngadto sa pikas nga daplin. Apan ang ilang pagpangita napakyas, ug daghan ang mipadulong ngadto sa Capernaum, nga nangita gihapon Kaniya.
“Sa kasamtangan Siya miabot sa Genesaret, human sa usa ka adlaw nga Siya wala didto. Sa dihang nahibaloan nga Siya midunggo, ang mga tawo ‘nagdagan latas niana sa tibuok rehiyon sa palibot, ug misugod sa pagdala sa mga higdaanan niadtong mga masakiton, diin sila nakadungog nga Siya atua didto.’ Marcos 6:55.”— Ibid., pp. 383, 384.
Martes
, Abril 1
3. MAS MAAYO NGA MGA KATUYOAN, DIOSNONG TABANG
a. Unsang pranka apan mahunahunaon nga mensahe ang gihatag ni Jesus ngadto sa mga panon? Juan 6:26, 27.
“Wala gitagbaw ni Jesus ang ilang pagkamausisahon. Siya sa kasubo miingon, ‘Kamo nangita Kanako, dili tungod kay kamo nakakita sa mga milagro, apan tungod kay kamo nakakaon sa mga tinapay, ug nangabusog.’ Sila wala nangita Kaniya dili gumikan sa bisan unsa nga takus nga motibo; kon dili ingon nga sila nakakaon sa mga tinapay, sila naglaum nga makadawat gihapon ug temporaryo nga kaayohan pinaagi sa pagdugtong sa ilang kaugalingon ngadto Kaniya. Ang Manluluwas misugo kanila, ‘Ayaw paghago alang sa kalan-on nga madunot ra, kondili alang nianang kalan-on nga molungtad hangtud sa kinabuhing dayon.’ Ayaw pagpangita nianang materyal lamang nga kaayohan. Himoa nga dili kini ang panguna nga paningkamot sa pagtagana alang sa kinabuhi nga karon, apan pangitaa ang espirituhanon nga pagkaon, bisan kanang kaalam nga molungtad ngadto sa walay katapusang kinabuhi.”— The Desire of Ages, p. 384.
b. Unsang pangutana ang gipangutana sa mga Judeo mahitungod sa mga buhat sa Dios? Juan 6:28. Isaysay ang tubag nga gihatag sa Ginoo. Juan 6:29.
“Sa makadiyut ang interes sa mga tigpaminaw napukaw. Sila mipahayag, ‘Unsa may among buhaton, aron kami makabuhat sa mga buhat sa Dios?’ Sila naghimo ug daghan ug mabug-at nga mga buhat aron sa pagrekomendar sa ilang kaugalingon ngadto sa Dios; ug sila andam sa pagpaminaw sa bisan unsa nga bag-ong pagsaulog diin sila makahimo sa pagbaton ug mas dako nga merito. Ang ilang pangutana nagpasabut, Unsa ang among buhaton aron kami mahimo nga takus sa langit? Unsa ang bili nga gikinahanglan natong ibayad aron mabatonan ang umaabot nga kinabuhi?
“‘Si Jesus mitubag ug miingon ngadto kanila, Kini mao ang buhat sa Dios, nga kamo motuo kaniya nga Iyang gipadala.’ Ang bili sa langit mao si Jesus. Ang dalan paingon sa langit pinaagi sa pagtuo sa ‘Cordero sa Dios, nga nagakuha sa sala sa kalibutan.’ Juan 1:29.”— Ibid., p. 385.
“Ang paghinulsol mao ang pagtalikod gikan sa kaugalingon ngadto kang Cristo; ug sa dihang gidawat nato si Cristo aron nga pinaagi sa pagtuo Siya makapuyo sa Iyang kinabuhi dinhi kanato, ang maayong mga buhat makita.”— Thoughts From the Mount of Blessing, p. 87.
“Hinaut nga ang Ginoo motabang sa Iyang katawhan nga makaamgo nga adunay mainiton nga buluhaton nga pagabuhaton. . . . Diha sa puloy-anan, sa simbahan, ug sa kalibutan sila magbuhat sa mga buhat ni Cristo. Dili sila pasagdan nga mag-inusara sa pagbuhat. Ang mga manulonda mao ang ilang mga katabang. Ug si Cristo mao ang ilang magtatabang.”— Testimonies for the Church, vol. 8, p. 18.
Mierkules
, Abril 2
4. ANG TINAPAY SA LANGIT
a. Unsang ilhanan ang gitinguha sa mga Judeo ug unsang kamatuoran sa kasaysayan ang ilang gihisgutan? Juan 6:30, 31. Unsa ang gisulti ni Jesus sa tinapay gikan sa langit? Juan 6:32, 33.
“Gipasidunggan sa mga Judeo si Moises ingon nga tighatag sa manna, nga naghatag ug pagdayeg ngadto sa instrumento, ug nawad-an sa panan-aw Kaniya nga pinaagi kang kinsa ang buhat natuman. Ang ilang mga amahan nagbagulbol batok kang Moises, ug nagduhaduha ug milimod sa iyang balaang misyon. Karon sa samang espiritu gisalikway sa mga anak ang Usa nga nagdala sa mensahe sa Dios sa ilang kaugalingon. ‘Unya si Jesus miingon kanila, Sa pagkatinuod, sa pagkatinuod, magaingon ako kaninyo, si Moises wala maghatag kaninyo nianang tinapay gikan sa langit.’ Ang tighatag sa mana nagtindog sa ilang taliwala. Si Cristo mismo ang nanguna ang mga Hebreohanon latas sa kamingawan, ug sa adlaw-adlaw nagpakaon kanila sa tinapay gikan sa langit. Kadto nga pagkaon maoy usa ka tipo sa tinuod nga tinapay gikan sa langit. Ang maghahatag sa kinabuhi nga Espiritu, nga nagadagayday gikan sa walay kinutuban nga kahupnganan sa Dios, mao ang tinuod nga mana.”— The Desire of Ages, pp. 385, 386.
b. Nga nagtumong sa ilang mga hunahuna lamang diha sa natural, pisikal nga tinapay, unsang hangyo ang ilang gihimo - ug unsa ang gisaysay sa Ginoo? Juan 6:34-36.
“Ang hulagway nga gigamit ni Cristo sinati kaayo sa mga Judeo. Si Moises, pinaagi sa inspirasyon sa Balaang Espiritu, miingon, ‘Ang tawo dili mabuhi sa tinapay lamang, kondili pinaagi sa matag pulong nga nagagula sa baba sa Ginoo.’ Ug ang propeta nga si Jeremias nagsulat, ‘Ang imong mga pulong nakaplagan, ug gikaon ko sila; ug ang Imong pulong alang kanako maoy kalipay ug pagmaya sa akong kasingkasing.’ Deuteronomio 8:3; Jeremias 15:16. Ang mga rabbi sa ilang kaugalingon adunay panultihon, nga ang pagkaon sa tinapay, diha sa espirituhanong kahulogan niini, mao ang pagtuon sa balaod ug ang pagbuhat sa maayo nga mga buhat; ug kini kanunay nga giingon sa pag-abut sa Mesias ang tanan nga Israel mapakaon. Ang pagtulon-an sa mga propeta nagpatin-aw sa lawom nga espirituhanong leksyon diha sa milagro sa mga tinapay. Kini nga leksyon gipaninguha ni Cristo nga ablihan sa Iyang mga tigpaminaw diha sa sinagoga. Kon nakasabot pa sila sa mga Kasulatan, ila untang masabtan ang Iyang mga pulong sa dihang Siya miingon, ‘Ako mao ang tinapay sa kinabuhi.’ Sa miaging adlaw lamang, ang dakong panon, sa dihang gikapoyan ug gikapoy, gipakaon pinaagi sa tinapay nga Iyang gihatag. Ingon nga gikan niana nga tinapay nakadawat sila ug pisikal nga kusog ug kahayahay, mao nga gikan kang Cristo sila makadawat ug espirituhanong kusog ngadto sa dayon nga kinabuhi.”— Ibid., p. 386.
Huebes
, Abril 3
5. PAGKABANHAW UG ANG DAYON NGA KINABUHI
a. Unsang duha ka magkadugtong nga mga saad ang gihatag ngadto niadtong nagpaila sa ilang mga kaugalingon uban kang Cristo - ug sa unsa nga kini nga paglaum ngadto sa matag makasasala? Juan 6:37- 40.
“Ang tanan nga midawat Kaniya diha sa pagtuo, [si Jesus] miingon, makabaton ug dayon nga kinabuhi. Walay usa nga mawala.”- The Desire of Ages, p. 387.
“Ayaw paminawa ang sugyot sa kaaway nga magpahilayo kang Cristo hangtud nga ikaw makahimo sa imong kaugalingon nga mas maayo; hangtud nga ikaw maayo na nga moduol sa Dios. Kon ikaw maghulat hangtud niana, ikaw dili gayud moduol. Sa diha nga si Satanas motudlo sa imong mahugaw nga mga saput, sublia ang saad ni Jesus, ‘Siya nga moanhi Kanako dili ko gayud isalikway.’ Juan 6:37. Sultihi ang kaaway nga ang dugo ni Jesu-Cristo nagahinlo gikan sa tanang sala. Himoa ang pag-ampo ni David nga imong kaugalingon, ‘Hinloi ako sa hisopo, ug ako mamahinlo; hugasi ako, ug ako mahimong mas puti pa kay sa niyebe.’ Salmo 51:7.
“Tindog ug umadto ka sa imong Amahan. Siya makigtagbo kanimo. Kung motikang ka bisan usa ka lakang padulong Kaniya diha sa paghinulsol, Siya magdali sa pagkupot kanimo sa Iyang mga bukton sa walay katapusang gugma. Ang iyang igdulungog abli sa pagtuaw sa mga mahinulsulon nga kalag. Ang pinakauna nga tinguha sa kasingkasing sa pagsunod sa Dios Iyang nahibaloan. Walay usa ka pag-ampo nga gihalad, bisan unsa pa kaluya, walay luha nga gipaagas, bisan unsa nga tinago, walay sincero nga tinguha sa pagsunod sa Dios gipangga, bisan unsa ka huyang, apan ang Espiritu sa Dios nagalakaw sa pagtagbo niini. Bisan sa wala pa ang pag-ampo gilitok o ang pangandoy sa kasingkasing napahibalo, ang grasya gikan kang Cristo mogula aron sa pagtagbo sa grasya nga nagabuhat diha sa tawhanong kalag.”— Christ’s Object Lessons, pp. 205, 206.
b. Unsa ang gibagulbol sa dili matinoohon nga mga Judeo ug unsa ang saad ang gisubli ni Jesus niadtong nagatuo diha Kaniya? Juan 6:41- 51.
Biernes
, Abril 4
PERSONAL SUBLI NGA MGA PANGUTANA
1. Human sa milagro sa mga tinapay, unsay giplano sa mga sumosunod ni Cristo nga buhaton?
2. Ihubit ang dakong interes sa panon sa katawhan nga nagasunod kang Jesus.
3. Isaysay ang mga pulong ni Jesus diha sa Juan 6:29.
4. Unsang ilustrasyon ang gigamit ni Cristo aron sa paghulagway sa tinubdan sa espirituhanon nga kinabuhi?
5. Giunsa sa mga pangulong Judeo pagpakita sa ilang pag-ayad batok kang Cristo?