1. USA KA LAANG ALANG KANG JESUS Domingo , Abril 27

a. Samtang si Jesus nagpanudlo didto sa templo, unsa may gihimo sa mga escriba ug mga Pariseo? Juan 8:2-3. “[Si Cristo] sa wala madugay nabalda. Usa ka grupo sa mga Pariseo ug mga escriba ang miduol Kaniya, nga nagguyod uban kanila ug usa ka babaye nga sa hilabihan nahadlok, kang kinsa uban sa isug, matinguhaon nga mga tingog ilang giakusar nga nakalapas sa ikapitong sugo.”— The Desire of Ages, p. 460. b. Nagpakitag dakong pagtahod sa balaod, unsang pangutana ang gipangutana sa mga Pariseo kang Cristo — ug unsa ang ilang tinuod nga tuyo? Juan 8:4–6 (unang bahin). “Ang ilang nagpakaaron-ingnon nga pagtahod nagtabon sa usa ka lawom nga laraw alang sa Iyang kalaglagan. Ilang gisakmit kini nga kahigayonan sa pagsiguro sa Iyang pagkahinukman sa silot, nga naghunahuna nga bisan unsa nga desisyon nga Iyang mahimo, sila makakitag higayon sa pagsumbong Kaniya. Kon Iyang buhian ang babaye, Siya mahimong akusahan sa pagtamay sa balaod ni Moises. Kung Iyang gipahayag nga siya takus sa kamatayon, Siya mahimong ikasumbong ngadto sa mga Romano ingon nga usa nga nagbaton ug kagahum nga ila lamang.”— Ibid., pp. 460, 461.

---

2. ANG TINUOD NGA HULAGWAY NADAYAG Lunes , Abril 28

a. Giunsa pagtubag ni Jesus ang kabakakan sa mga Pariseo? Juan 8:6 (katapusang bahin). “Si Jesus mitan-aw sa makadiyot sa talan-awon — ang nagkurog nga biktima diha sa iyang kaulaw, ang bagag nawong nga mga talahuron, walay bisan tawhanon nga kalooy. Ang iyang walay dagta nga kaputli mikunhod gikan sa talan-awon. Nasayud kaayo Siya kon sa unsa nga katuyoan kini nga kaso gidala ngadto Kaniya. Iyang nabasa ang kasingkasing, ug nahibalo sa kinaiya ug kasaysayan sa kinabuhi sa matag usa diha sa Iyang presensya. Kini nga mga mahimong magbalantay sa hustisya sa ilang kaugalingon nagdala sa ilang biktima ngadto sa sala, aron sila makabutang ug lit-ag alang kang Jesus. Wala magpakita ug timailhan nga Siya nakadungog sa ilang pangutana, Siya miduko, ug nagtutok sa Iyang mga mata sa yuta, misugod sa pagsulat diha sa abog.”— The Desire of Ages, p. 461. b. Giunsa ni Jesus pagpakita nga ang mga magsusumbong sa ilang kaugalingon mga sad-an —ug unsa ang ilang gibuhat? Juan 8:7–9. “Napildi na ang mga magsusumbong. Karon, ang ilang kupo sa nagpakaaron-ingnon nga pagkabalaan gigisi gikan kanila, sila mibarug, sad-an ug gihukman, sa presensya sa Walay Kinutuban nga Kaputli. Nangurog sila kay tingali unyag madayag ang tinago nga kasal-anan sa ilang mga kinabuhi ngadto sa panon sa katawhan; ug sa tagsa-tagsa, uban sa nagduko nga mga ulo ug mga mata nga naloyloy, sila miikyas, nagbiya sa ilang biktima uban sa maloloy-on nga Manluluwas.”— Ibid. c. Sa kinatibuk-an, unsay angay natong kat-onon gikan sa mga pulong ni Jesus ngadto sa mga magsusumbong? Lucas 6:42. “Anaa kadtong mga dili pa hingkod sa ilang tinguha sa pagreporma sa mga butang nga alang kanila makita nga dili husto. Nagtuo sila nga sila ang pilion nga mopuli niadtong nakahimo ug mga sayop. Sila nakaminus kon unsa ang nahimo niini nga mga magbubuhat samtang nga ang uban nagtan-aw ug nagapanaway. Pinaagi sa ilang mga aksyon sila nag-ingon: ‘Makahimo ko ug dagkong mga butang. Akong madala ang buluhaton sa unahan nga malampuson.’ Ngadto niadtong kinsa naghunahuna nga sila nahibalo kaayo kon unsaon paglikay sa mga sayop, ako gisugo sa pag-ingon: ‘Ayaw kamo paghukom, aron kamo dili pagahukman.’ Mateo 7:1. Mahimo tingali kamo makalikay sa mga sayop sa pipila ka mga punto, apan sa ubang mga butang ikaw adunay tulubagon sa paghimo sa grabe nga mga sayop, nga malisod kaayo tambalan ug nga magdala ug kalibog sa buhat. Kini nga mga sayop mahimong mas makadaut kay sa gihimo sa imong mga kaigsoonan.”— Testimonies for the Church, vol. 7, p. 279.

---

3. ANG WALA DAMHA NGA AKSYON Martes , Abril 29

a. Unsang pangutana ang gipangutana ni Jesus sa babaye human ang iyang mga magsusumbong mibiya - ug sa unsa nga ang Iyang paagi sa pagtagad sa sitwasyon nag-apekto sa iyang kinabuhi? Juan 8:10, 11. “Ang babaye mibarog sa atubangan ni Jesus, nga nagkurog sa kahadlok. Ang Iyang mga pulong, ‘Siya nga walay sala diha kaninyo, siya ang unang molabay ug bato,’ midangat ngadto kaniya ingon sa usa ka sentensya sa kamatayon. Wala siya mangahas sa pagyahat sa iyang mga mata ngadto sa nawong sa Manluluwas, apan sa hilom naghulat sa iyang kalaglagan. Sa katingala iyang nakita ang iyang mga magsusumbong nga nanglakaw nga wala makasulti ug nangalibog; unya kadtong mga pulong sa paglaum nahulog sa iyang igdulongog, ‘Dili usab ako mohukom kanimo: lakaw, ug ayaw na pagpakasala.’ Ang iyang kasingkasing natunaw, ug, mihapa sa iyang kaugalingon diha sa tiilan ni Jesus, siya midangoyngoy sa iyang mapasalamaton nga gugma ug uban sa mapait nga mga luha misugid sa iyang mga sala.“Kini alang kaniya mao ang sinugdanan sa usa ka bag-ong kinabuhi, usa ka kinabuhi sa kaputli ug kalinaw, gididikar ngadto sa Dios. Diha sa pag-isa niining nahulog nga kalag, si Jesus mihimo ug mas dako nga milagro kay sa pag-ayo sa labing grabe nga balatian sa lawas; Iyang giayo ang espirituhanong sakit nga mosangko sa dayon nga kamatayon. Kining mahinolsulon nga babaye nahimong usa sa Iyang labing malig-on nga mga sumosunod. Uban sa masakripisyohon sa kaugalingon nga gugma ug debosyon iyang gipakita ang iyang pagpasalamat tungod sa Iyang mapasayloon nga kalooy. Alang niining masalaypon nga babaye ang kalibutan aduna lamang pagtamay ug pagyubit, apan ang Ang Usa nga Walay Sala nalooy sa iyang kahuyang ug mitunol kaniya sa matabangon nga kamot. Samtang nga ang salingkapaw nga mga Pariseo nagsaway, si Jesus misugo kaniya, ‘Lakaw, ug ayaw na pagpakasala.’”— The Ministry of Healing, p. 89.“Sa Iyang buhat sa pagpasaylo niini nga babaye ug nagdasig kaniya sa pagkinabuhi nga mas maayo nga kinabuhi, ang kinaiya ni Jesus misidlak diha sa katahum sa hingpit nga pagkamatarung. Samtang Siya wala magpakunhod sa sala, ni gipagamay ang pagbati sa pagkasad-an, wala Niya tinguhaa ang pagkondenar, kon dili ang pagluwas. Ang kalibutan alang niining nasayop nga babaye mao ang pagtamay ug pagyubit; apan si Jesus nagsulti ug mga pulong sa paghumpay ug paglaum.”— The Desire of Ages, p. 462. b. Ihulagway ang epekto sa makaluwas nga grasya ni Cristo. Lucas 7:37–40, 47, 48. “Si Jesus nahibalo sa mga sirkumstansya sa matag kalag. Sa labi ka dako ang sala sa makasasala, sa labi nga nagkinahanglan siya sa Manluluwas. Ang Iyang kasingkasing sa diosnong gugma ug kalooy nagdani ug labaw sa tanan alang sa usa nga labing walay paglaum nga nagapos sa mga lit-ag sa kaaway. Uban sa Iyang kaugalingong dugo Iyang gipirmahan ang mga papeles sa kagawasan sa rasa o katawhan.”— The Ministry of Healing, pp. 89, 90.

---

4. KAHUMPAYAN MIKUYANAP SA HALAYO Mierkules , Abril 30

a. Unsa may magbatasan sa atong gawi, ilabina sa kadugtongan ngadto sa uban - sa unsa lamang nga kini posibli? 2 Corinto 1:3-5. “Ang mga sirkumstansya walay kalabotan sa mga kasinatian sa kalag. Kini mao ang espiritu nga gipangga nga naghatag kolor sa tanan natong mga lihok. Ang usa ka tawo nga anaa sa pakigdait uban sa Dios ug sa iyang isigkatawo dili mahimong miserable. Ang kasina wala diha sa iyang kasingkasing; ang dautan nga katahap dili makakaplag ug luna didto; ang pagdumot dili motungha. Ang kasingkasing nga nahiuyon sa Dios ibayaw ibabaw sa mga kasamok ug mga pagsulay niining kinabuhia.”— Testimonies for the Church, vol. 5, p. 488.“Pinaagi sa pag-antus nga nabatonan ni Jesus ang ministeryo sa paghumpay. Diha sa tanan nga kasakitan sa katawhan Siya gisakit; ug ‘nga Siya sa Iyang kaugalingon nag-antus nga gitintal, Siya makahimo sa pagtabang kanila nga gitintal.’ Isaias 63:9; Hebreohanon 2:18. Niini nga ministeryo ang matag kalag nga misulod sa panag-uban sa Iyang mga pag-antus nahatagan ug pribilehiyo nga makaambit.”— Thoughts From the Mount of Blessing, p. 13. b. Ihulagway ang talagsaong paglaum ug pribilehiyo nga atong nabatonan sa pagsunod sa mga lakang ni Cristo. 2 Corinto 1:6, 7. “Kon wala nimo batia nga maoy usa ka kadungganan nga mahimong umalambit sa mga pag-antus ni Cristo; kon wala kay gibati nga palas-anon alang sa kalag niadtong andam na nga mamatay; kon ikaw dili gusto nga magsakripisyo aron makatipig ug salapi alang sa buhat nga kinahanglan nga pagahimoon, walay lugar alang kanimo sa gingharian sa Dios. Kinahanglan nga kita mga umalambit uban kang Cristo sa Iyang mga pag-antus ug pagdumili sa kaugalingon diha sa matag lakang.”— Testimonies for the Church, vol. 9, pp. 103, 104. c. Ihulagway ang kalidad nga labing gikinahanglan taliwala sa mga magtutuo sa mensahe sa tulo ka manulonda. 1 Corinto 13:13, 4–8. “Ang mga kinaiya nga labing gikinahanglan nga manggaron sa katawhan nga nagabantay sa sugo sa Dios mao ang pailub ug pagkamainantuson, kalinaw ug gugma. Kon ang gugma kulang, ang dili mabawi nga pagkalugi mabatonan.”— Ibid., vol. 6, p. 398.

---

5. MALOLOY-ON NGA PAGPASIG-ULI Huebes , Mayo 1

a. Unsaon sa matuod nga tumotuo paglihok kon ang usa ka Cristohanon mahulog ngadto sa sala - kasukwahi sa sagad ginahimo sa dili matinud-anon ug kasingkasing nga mga tumotuo? Galacia 6:1-3; Roma 15:1-3. “Hinumdumi nga ang buhat sa pagpasig-uli mao ang atong palas-anon. Kini nga buhat dili pagahimoon diha sa mapahitas-on, mapangahason, hinawod nga paagi. Ayaw pag-ingon, pinaagi sa imong pamaagi, ‘Aduna akoy gahum, ug gamiton ko kini,’ ug ibubo ang mga pag-akusa diha sa nasayop. Himoa ang imong pagpasig-uli ‘diha sa espiritu sa kaaghop; nga magatagad sa imong kaugalingon, basin unya ikaw usab matintal.’ Ang buluhaton nga gibutang sa atong atubangan nga buhaton alang sa atong mga kaigsoonan dili ang pagsalikway kanila, dili sa pagtulak kanila ngadto pagkabigo o pagka-walay paglaum pinaagi sa pag-ingon: ‘Imo ako nga gipakyas, ug dili ako maninguha sa pagtabang kanimo.’ Siya nga nagbutang sa iyang kaugalingon nga puno sa kaalam ug kusog, ug nagpaubos sa usa nga gidaugdaug ug naguol ug nangandoy sa tabang, nagpakita sa espiritu sa Pariseo, ug nagputos sa iyang kaugalingon uban sa kupo sa iyang tinukod sa kaugalingon nga dungog. Diha sa iyang espiritu siya nagpasalamat sa Dios nga siya dili sama sa ubang mga tawo, ug nagdahum nga ang iyang dalan dalaygon ug nga siya kusgan kaayo aron matintal. Apan ‘kon ang usa ka tawo maghunahuna sa iyang kaugalingon nga usa ka butang, sa diha nga siya walay kapuslanan, siya nagalimbong sa iyang kaugalingon.’ Bersekulo 3.” — Testimonies for the Church, vol. 6, pp. 398, 399.“Dili sumosunod ni Cristo nga, uban ang gilikay nga mga mata, motalikod gikan sa masalaypon, nga magabiya kanila nga walay babag sa pagpadayon sa ilang ubos nga dalan. Kadtong dili maugdang sa pag-akusar sa uban, ug madasigon sa pagdala kanila ngadto sa hustisya, sa kasagaran anaa ang ilang kaugalingong kinabuhi nga mas sad-an kay kanila. Ang mga tawo nagadumot sa makasasala, samtang sila nahigugma sa sala. Si Cristo nagdumot sa sala, apan nagahigugma sa makasasala. Kini ang mahimong espiritu sa tanan nga nagasunod Kaniya. Ang Cristohanong gugma mahinay sa pagsaway, alisto sa pag-ila sa paghinulsol, andam sa pagpasaylo, sa pagdasig, sa pagpahimutang sa nahisalaag diha sa dalan sa pagkabalaan, ug sa pagpabilin sa iyang mga tiil didto.”— The Desire of Ages, p. 462.

PERSONAL SUBLI NGA MGA PANGUTANA Biernes , Mayo 2

1. Isaysay ang laang nga giandam sa mga escriba ug mga Pariseo alang kang Jesus. 2. Giunsa sa salingkapaw nga mga Judeo pagpakita ug dayag nga pagtahod sa kasugoan? 3. Unsa may nakapugos nga dawaton sa magsusumbong nga mga Judeo mahitungod sa ilang kaugalingon? 4. Ihulagway ang paglaum nga gihatag sa makasasala nga babaye nga gimaltrato. 5. Sa unsang paagi nga ako molabi pa nga mahisama kang Jesus sa dihang magtagad sa masalaypon nga mga kalag?