Domingo
, Hunyo 1
1. GIBAG-O NGA PAGPANGUTANA
a. Diha sa pagpatawag sa ikaduha nga higayon ang batan-on nga lalaki kinsang panan-aw giayo ni Jesus, unsa may gitinguha sa mga Pariseo sa pagpugos kaniya sa pagbuhat? Juan 9:24.
“Ang mga Pariseo nakakita nga sila nagmantala sa buhat nga gihimo ni Jesus. Dili nila malimod ang milagro. Ang buta nga tawo napuno sa kalipay ug pagpasalamat; siya nakakita sa kahibulongang mga butang sa kinaiyahan, ug napuno sa kalipay sa katahum sa yuta ug langit. Libre niyang giasoy ang iyang kasinatian, ug usab sila misulay sa pagpahilom kaniya, nga nag-ingon, ‘Ihatag ang pagdayeg sa Dios: kami nahibalo nga kini nga Tawo usa ka makasasala.’ Sa ato pa, Ayawg isulti pag-usab nga kini nga Tawo naghatag kanimog panan-aw; ang Dios ang naghimo niini.”— The Desire of Ages, p. 473.
b. Unsang dili malalis nga argumento ang gipresentar sa batan-ong lalaki? Juan 9:25.
Lunes
, Hunyo 2
2. GIBAG-O NGA PAGPANGUTANA (padayon)
a. Unsa ang gipangutana sa mga Pariseo pag-usab sa batan-on nga lalaki kinsang panan-aw gipasig-uli - ug unsa man ang ilang aktuwal nga katuyoan? Juan 9:26.
“[Ang mga Pariseo] nangutana pag-usab, ‘Unsa may Iyang gibuhat kanimo? giunsa Niya pagbuka ang imong mga mata?’ Uban sa daghang mga pulong sila misulay sa paglibog kaniya, aron nga siya maghunahuna sa iyang kaugalingon nga nalimbongan. Si Satanas ug ang iyang dautang mga manulonda anaa sa kilid sa mga Pariseo, ug gihiusa ang ilang mga kusog ug maliputon uban sa pangatarungan sa tawo aron masumpo ang inpluwensya ni Cristo. Sila nagpugong sa mga pagtuo nga nagkalalom sa daghang mga hunahuna.”— The Desire of Ages, p. 473.
b. Giunsa pagtubag sila sa batan-ong lalaki — ug kinsa ang mibarog sa iyang kiliran aron sa ingon makapadasig kaniya? Juan 9:27.
“Ang mga manulonda sa Dios didto usab sa natad aron sa paglig-on sa tawo nga kansang panan-aw naulian.
“Ang mga Pariseo wala makaamgo nga sila kinahanglan nga makiglabut sa uban gawas sa dili edukado nga tawo nga gipanganak nga buta; wala sila makaila Kaniya nga kang kinsa anaa sila sa pakipaglantugi. Ang balaang kahayag misidlak ngadto sa mga lawak sa kalag sa tawo nga buta. Samtang kining mga salingkapaw naninguha sa paghimo kaniya nga dili motuo, ang Dios mitabang kaniya sa pagpakita, pinaagi sa kakusganon ug idlot sa iyang mga tubag, nga siya dili malit-agan.”— Ibid., pp. 473, 474.
c. Sa unsang paagi nga kita nakasiguro niining samang tabang karon? Lucas 12:11, 12.
“Karon, uban sa inyong mga Biblia gusto ninyong moadto sa atubangan sa Dios, ablihi sila atubangan sa Dios, ug mangamuyo sa Dios. Gusto nimo nga ang imong panabut mapadali; gusto nimo mahibalo nga kamo nasayud sa tinuod nga mga baruganan sa kamatuoran, ug unya sa diha nga kamo magkita uban sa mga kaatbang dili nimo kinahanglan nga atubangon sila sa imong kaugalingon nga kusog. Ang mga manulonda sa Dios mobarug diha sa imong kiliran aron sa pagtabang kanimo sa pagtubag sa matag pangutana nga mahimong ipangutana kanimo. Apan diha sa samang higayon si Satanas mobarog sa kiliran sa imong mga kaatbang sa pagpalihok kanila sa pagsulti sa mga butang nga malisud alang kanimo sa pagdala, aron paghagit kanimo sa pagsulti nga dili maayo; apan himoa nga ang inyong panagsultihanay ingon niana nga si Satanas dili makapahimulos sa inyong mga pulong.”— The Review and Herald, Mayo 3, 1887.
Martes
, Hunyo 3
3. KAISUG ATUBANGAN SA TINUYO NGA PAGKABUTA
a. Wala makahimo sa paglimbong sa naulian nga batan-ong lalaki, giunsa sa mga Pariseo pagtamay kaniya - ug sa unsang paagi nga ang ingon nga pagka-ignoranti nagpakita sa tibuok kasaysayan? Juan 9:28, 29; 1 Corinto 1:18, 19, 26-28.
“Alang sa Iyang iglesia diha sa matag henerasyon ang Dios adunay pinasahi nga kamatuoran ug pinasahi nga buhat. Ang kamatuoran nga natago gikan sa kalibutanon nga maalamon ug makinaadmanon gipadayag ngadto sa sama sa bata nga mapaubsanon. Nagkinahanglan kini ug pagsakripisyo sa kaugalingon. Kini adunay mga gubat nga pagaawayon ug mga kadaugan nga kab-uton. Sa sinugdan dyutay ra ang mga dumadapig niini. Pinaagi sa mga bantugang mga tawo sa kalibutan ug pinaagi sa usa ka mapahiuyonon sa kalibutan nga iglesia, sila gisupak ug gitamay. . . .
“Ang bantugang mga pangulo sa relihiyosong panghunahuna niini nga kaliwatan nagpalanog sa mga pagdayeg ug nagatukod sa mga monumento niadtong nagtanom sa binhi sa kamatuoran sa mga siglo nga minglabay. Dili ba daghan ang motalikod gikan niini nga buhat aron sa pagyatak sa pagtubo nga misibul gikan sa samang liso karon? Ang karaang singgit gisubli, ‘Kita nahibalo nga ang Dios misulti ngadto kang Moises; mahitungod niining tawhana [si Cristo sa mensahero nga Iyang gipadala], wala kami mahibalo kon asa siya gikan.’ Juan 9:29. Sama sa unang mga katuigan, ang pinasahi nga mga kamatuoran alang niining panahona makaplagan, dili sa eklesiastikanhong mga awtoridad, kondili sa mga lalaki ug mga babaye nga dili kaayo edukado o dili kaayo maalamon aron nga motuo sa pulong sa Dios.”— Christ’s Object Lessons, pp. 78, 79.
b. Unsa nga ehemplo ang atong makat-onan gikan sa sincero nga pagpamatuod sa batan-ong lalaki, kauban sa ubang matinud-anon nga mga magtutuo ni Cristo? Juan 9:30–33; Buhat 4:19, 20.
“Diha sa tanang kaligdong, diha sa espiritu sa grasya, ug diha sa gugma sa Dios atong itudlo ang mga tawo ngadto sa kamatuoran nga ang Ginoong Dios mao ang Maglalalang sa mga langit ug sa yuta, ug nga ang ikapitong adlaw mao ang Igpapahulay sa Ginoo.
“Diha sa ngalan sa Ginoo kita mopadayon, magbukhad sa Iyang bandila, magadapig sa Iyang pulong. Sa diha nga ang mga awtoridad magasugo kanato sa dili pagbuhat niini nga buhat, sa diha nga sila magdili kanato sa pagmantala sa mga sugo sa Dios ug sa pagtuo ni Jesus, unya kinahanglan nga kita moingon sama sa gihimo sa mga apostoles: ‘Kon matarung sa atubangan sa Dios kamo na hinoon mao ang patalinghugan inay ang Dios, kamo lay mag-igo niini. Kay alang kanamo dili kami makapugong sa pagsulti sa mga butang nga among nakita ug nadungog.’ Buhat 4:19, 20.”— Testimonies for the Church, vol. 6, p. 395.
Mierkules
, Hunyo 4
4. MANGITNGIT NGA MGA GAWI, MANGITNGIT NGA MGA BUHAT
a. Ingon nga ang naglagut nga mga Pariseo dili buot modawat sa ebidensya, unsay ilang gibuhat sa batan-on nga lalaki nga nagpamatuod sa iyang pagkaayo? Juan 9:34.
“Ang tawo mitagbo sa iyang mga tigpang-usisa diha sa ilang kaugalingon nga nataran. Ang iyang mga pangatarungan dili matubag. Ang mga Pariseo natingala, ug sila nangahilom - nalumayan atubangan sa iyang maidlot, determinado nga mga pulong. Sulod sa pipila ka mga gutlo dihay kahilom. Unya ang nagmug-ot nga mga sacerdote ug mga rabbi nagtigom palibut kanila sa ilang mga bisti, nga daw sila nahadlok nga matakdan tungod sa pagpakigdugtong kaniya; ilang gipagpag ang abug sa ilang mga tiil, ug milabay ug mga pag-akusa batok kaniya - ‘Ikaw natawo gayud sa tumang mga kasal-anan, ug unya mangahas ikaw sa pagpanudlo kanamo?’ Ug siya ilang gipalagpot sa gawas.” – The Desire of Ages, p. 474.
b. Diha sa kalainan, giunsa ni Jesus pagtrato ang batan-on nga lalaki? Juan 9:35-38.
“Ang tawo mihapa sa iyang kaugalingon diha sa tiilan sa Manluluwas diha sa pagsimba. Dili lamang ang iyang natural nga panan-aw ang naayo, kon dili ang mga mata sa iyang pagpanabut naablihan. Si Cristo napadayag ngadto sa iyang kalag, ug iyang gidawat Siya ingon nga ang Pinadala sa Dios.”- The Desire of Ages, p. 475.
c. Isaysay ang dako nga kalainan tali sa pagpalagpot sa tig-a nga rebelde batok sa gahian nga buta nagsalikway kang Cristo nga nagpalagpot ug mga kalag nga mahigugmaong nagasunod sa Dios. 1 Hari 9:6-9; Mateo 12:31, 32; Salmo 11:3.
“[Naobserbahan ni Wycliffe] walay tawo nga sa tinouray ipalagpot gawas nga siya una nagdala diha sa iyang kaugalingon sa kondinasyon sa Dios.”- The Great Controversy, p. 84.
“Ang pagsupak mao ang bahin sa tanan nga gigamit sa Dios sa pagpresentar sa mga kamatuoran nga sa pinasahe aplikado sa ilang panahon. Dihay presenti nga kamatuoran sa mga adlaw ni Luthero — usa ka kamatuoran nianang panahona sa espesyal nga importansya; adunay presenti nga kamatuoran alang sa iglesia karon. . . . Kadtong nagpresentar sa kamatuoran alang niining panahona dili magdahum nga pagadawaton uban ang labaw nga pabor kay sa naunang mga repormador. Ang dakong kontrobersiya tali sa kamatuoran ug sa kasaypanan, sa taliwala kang Cristo ug kang Satanas, magdugang sa kakusog hangtud sa katapusan sa kasaysayan niining kalibutana.”— Ibid., pp. 143, 144.
Huebes
, Hunyo 5
5. NABULAHAN BATOK SA NAHUKMAN PINAAGI SA KAHAYAG
a. Unsay gisulti ni Jesus mahitungod sa mga resulta sa Iyang buhat? Juan 9:39.
“Usa ka grupo sa mga Pariseo ang nagtigom sa duol, ug ang ilang panan-aw nadala ngadto sa hunahuna ni Jesus ang kalainan nga makita sa epekto diha sa Iyang mga pulong ug mga buhat. . . . Si Cristo mianhi aron sa pagpabuka sa buta nga mga mata, sa paghatag ug kahayag ngadto kanila nga naglingkod diha sa kangitngit. Iyang gipahayag ang Iyang kaugalingon nga mao ang kahayag sa kalibutan, ug ang milagro nga bag-o lang nahimo maoy pagmatuod sa Iyang misyon. Ang mga tawo nga nakakita sa Manluluwas sa Iyang pag-anhi gipaboran sa usa ka bug-os nga pagpadayag sa balaang presensya kay sa natagamtaman sa kalibutan kaniadto. Ang kahibalo sa Dios napadayag nga mas hingpit. Apan niining mao nga pagpadayag, ang paghukom nagaagi diha sa mga tawo. Ang ilang kinaiya gisulayan, ang ilang kapalaran gitino.”— The Desire of Ages, p. 475.
b. Unsay reaksyon sa mga Pariseo ngadto sa mga pulong ni Cristo? Juan 9:40. Ingon sa Iyang gisulti kanila, giunsa ni Jesus pagpadayag ang ilang pagkasad-an tungod sa ilang kaugalingong pagkabuta? Juan 9:41.
“Ang pagpakita sa diosnong gahum nga gihatag ngadto sa buta nga tawo sa natural ug sa espirituwal nga panan-aw nagbiya sa mga Pariseo sa mas lawom nga kangitngit. . . . Kon gihimo sa Dios nga imposibli alang kanimo sa pagkakita sa kamatuoran, ang imong pagkawalay alamag walay sala. ‘Apan karon kamo nagaingon, Kami nakakita.’ Kamo nagtuo sa inyong kaugalingon nga makakita, ug nagasalikway sa pamaagi nga mao lamang ang paagi nga niini ikaw makadawat sa panan-aw. Sa tanan nga nakaamgo sa ilang panginahanglan, si Cristo mianhi uban sa walay kinutuban nga tabang. Apan gusto sa mga Pariseo nga mosugid ug walay pagkinahanglan; sila midumili sa pagduol kang Cristo, ug tungod niini sila gibiyaan diha sa pagkabuta — usa ka pagkabuta diin sila mismo ang sad-an. Si Jesus miingon, ‘Ang inyong sala nagpabilin.’ ”— Ibid.
Biernes
, Hunyo 6
PERSONAL SUBLI NGA MGA PANGUTANA
1. Sa unsa nga ang mga Pariseo misulay sa pagkombinsir sa kanhing buta nga tawo?
2. Kinsa ang naggamit sa dili matinuohon nga mga Pariseo?
3. Kinsa ang mitabang sa batan-ong lalaki sa paghatag ug klaro ug makapakombinsir nga mga tubag?
4. Unsay nahitabo sa dihang siya sa maisogon, sa dayag misugid kang Cristo?
5. Isaysay kon unsa gayud ang pinaka ngil-ad nga porma sa pagkabuta, ug ngano.