Domingo
, Abril 13
1. ANG KINABUHI NI JESUS SA PULOY-ANAN
a. Unsang seryoso nga hagit ang giatubang ni Jesus diha sa Iyang kaugalingong puloy-anan? Juan 7:5.
“Sa sayo kaayo nga edad, si Jesus nagsugod sa pagbuhat alang sa Iyang kaugalingon diha sa pagporma sa Iyang kinaiya, ug bisan ang pagtahud ug gugma alang sa Iyang mga ginikanan dili makapaliso Kaniya gikan sa pagsunod sa pulong sa Dios. ‘Kini nahisulat’ maoy Iyang rason sa matag buhat nga lahi gikan sa kostumbre sa pamilya. Apan ang inpluwensya sa mga rabbi naghimo sa Iyang kinabuhi nga usa ka mapait. Bisan diha sa Iyang pagkabatan-on kinahanglan Siya nga makakat-on sa lisud nga leksyon sa kahilom ug mapailubon nga paglahutay.
“Ang iyang mga igsoon, ingon sa pagtawag nga mga anak ni Jose, midapig sa mga rabbi. Sila mipugos nga ang mga tradisyon kinahanglan nga pagatumanon, nga daw ingon nga kini ang mga kinahanglanon sa Dios. Ilang gitamod pa gani ang mga kalagdaan sa mga tawo ingon nga labaw pa kay sa pulong sa Dios, ug sila sa hilabihan nasamok gayud sa tin-aw nga pagpanabot ni Jesus sa pag-ila tali sa bakak ug sa tinuod. Ang iyang strikto nga pagsunod sa kasugoan sa Dios ilang gikondena ingon nga kagahi sa ulo. Sila natingala sa kahibalo ug sa kaalam nga Iyang gipakita diha sa pagtubag sa mga rabbi. Sila nahibalo nga Siya wala nakadawat ug instruksiyon gikan sa maalamon nga mga tawo, apan ila gayud nga nakita nga Siya mao ang magtutudlo kanila. Ilang nakita nga ang Iyang edukasyon maoy usa ka mas taas nga matang kay sa ilang kaugalingon. Apan wala nila makita nga siya adunay agianan ngadto sa kahoy sa kinabuhi, ang tinubdan sa kahibalo diin sila walay alamag.”— The Desire of Ages, p. 86.
Lunes
, Abril 14
2. ANG MGA ANAK NI JOSE
a. Unsa nga sugyot ang gihimo sa mga igsoon ni Cristo ngadto Kaniya sa pagpaabut sa tinuig nga Fiesta sa Mga Tabernakulo? Juan 7:3, 4.
“[Ang kang Cristo] nga mga igsoon naghunahuna nga usa ka sayop alang Kaniya ang pagpahilayo sa bantugan ug edukado nga mga tawo sa nasud. Gibati nila nga kini nga mga tawo anaa gayud sa husto, ug nga si Jesus anaa gayud sa sayop sa pagbutang sa Iyang kaugalingon sa pagpakigbatok kanila. Apan ilang nasaksihan ang Iyang walay ikasaway nga kinabuhi, ug bisan nga sila wala mahanay sa ilang kaugalingon uban sa Iyang mga tinun-an, sila napasantop pag-ayo sa Iyang mga buhat. Ang iyang pagkainila sa Galilea nakapatagbaw sa ilang ambisyon; sila naglaum sa gihapon nga Siya mohatag usa ka ebidensya sa Iyang gahum nga mogiya sa mga Pariseo sa pagtan-aw nga Siya mao kon unsa ang Iyang giangkon. Unsa kaha kon Siya mao ang Mesias, ang Prinsipe sa Israel! Ilang gipangga kini nga hunahuna uban ang mapahitas-on nga katagbawan.
“Nabalaka kaayo sila mahitungod niini mao nga ilang giawhag si Cristo sa pag-adto sa Jerusalem. ‘Pahawa dinhi,’ sila miingon, ‘ug adto sa Judea, aron nga ang Imong mga tinun-an makakita usab sa mga buhat nga Imong ginahimo. Tungod kay walay tawo nga nagabuhat sa bisan unsa sa tago, ug siya sa iyang kaugalingon nagtinguha nga maila sa dayag. Kon Imong gibuhat kining mga butanga, ipakita ang imong kaugalingon ngadto sa kalibutan.’ Ang pulong ‘kon’ nagpahayag ug pagduhaduha ug pagkawalay pagtuo. Kini sila nagbutang ug katalawan ug kahuyang ngadto Kaniya. Kon Siya nahibalo nga Siya mao ang Mesias, ngano nga kining katingad-an gireserba ug wala himoa? Kon Siya nakabaton gayud sa ingon nga gahum, ngano nga dili moadto sa Jerusalem nga maisugon, ug ipahayag ang Iyang mga pag-angkon? Nganong dili magpasundayag sa Jerusalem sa kahibulongan nga mga buhat nga gibalita mahitungod Kaniya didto sa Galilea? Ayaw pagtago sa hilit nga mga probinsya, miingon sila, ug magbuhat sa imong gamhanang mga buhat alang sa kaayohan sa mga ignorante nga mga mag-uuma ug mangingisda. Ipakita ang imong kaugalingon didto sa kaulohan, daniha ang suporta sa mga sacerdote ug mga pangulo, ug hiusahon ang nasud sa pagtukod sa bag-ong gingharian.”— The Desire of Ages, p. 450.
b. Ihulagway ang problema nga kanunay nga giatubang sa mga maaghop. Salmo 86:14.
“Kining mga igsoon ni Jesus nangatarungan gikan sa hakog nga motibo nga sagad makaplagan diha sa mga kasingkasing niadtong mga ambisyoso sa pagpasundayag. Kini nga espiritu mao ang nagharing espiritu sa kalibutan. Sila napandol tungod kay, imbes mangita ug temporaryo nga trono, Si Cristo nagpahayag sa Iyang kaugalingon nga mao ang tinapay sa kinabuhi. Sila sa hilabihan nabalo sa dihang daghan sa Iyang mga tinun-an ang mibiya Kaniya. Sila mismo sa ilang kaugalingon miliso gikan Kaniya aron sa pag-ikyas sa krus sa pag-ila kon unsa ang gipadayag sa Iyang mga buhat — nga Siya mao ang Pinadala sa Dios.”— Ibid., p. 451.
Martes
, Abril 15
3. PANAGBANGI MAHITUNGOD KANG JESUS
a. Unsang nagkasumpaki nga mga opinyon ang mitungha mahitungod kang Jesus? Juan 7:11, 12.
“Gikan sa Jerusalem ang taho sa mga milagro ni Cristo mikaylap bisan asa ang mga Judeo nagtibulaag; ug bisan nga sa daghang mga bulan Siya wala gikan sa mga fiesta, ang interes diha Kaniya wala mawala. Daghan gikan sa tanang bahin sa kalibutan mitungha ngadto sa Fiesta sa mga Tabernakulo sa paglaum nga makita Siya. Diha sa sinugdanan sa fiesta daghang mga pangutana ang gihimo alang Kaniya. Ang mga Pariseo ug ang mga punoan nagpaabut Kaniya nga motungha, nga nagdahom nga makabaton ug kahigayonan sa paghukom Kaniya. Sila matinguhaon nga nangutana, ‘Hain man Siya?’ apan walay nahibalo. Ang hunahuna mahitungod Kaniya mao ang nangibabaw diha sa tanan nga mga hunahuna. Pinaagi sa kahadlok sa mga sacerdote ug mga punoan, walay usa nga nangahas sa pag-ila Kaniya ingon nga Mesias, apan bisan diin adunay hilom apan mainiton nga panaghisgot mahitungod Kaniya. Daghan ang nanalipod Kaniya ingon nga usa nga gipadala gikan sa Dios, samtang ang uban nagsaway Kaniya ingon nga usa ka maglilimbong sa katawhan.”— The Desire of Ages, pp. 451, 452.
b. Giunsa ni Jesus pagpahilom ang nagkasumpaki nga mga opinyon mahitungod sa Iyang kaugalingon? Juan 7:14-18; Lucas 4:32.
“Sa tungatunga sa fiesta, sa diha nga ang kahinam mahitungod Kaniya diha na sa gitas-on, Siya misulod sa sawang sa templo sa atubangan sa panon sa katawhan. Tungod sa Iyang pagkawala sa fiesta, kini ginapugos nga dili Siya mangahas sa pagbutang sa Iyang kaugalingon diha sa gahum sa mga sacerdote ug mga punoan. Ang tanan nahibulong sa Iyang presensya. Ang matag tingog nahilom. Ang tanan natingala sa dignidad ug kaisog sa Iyang paglihok sa taliwala sa gamhanang mga kaaway nga giuhaw alang sa Iyang kinabuhi.
“Sa ingon nga pagbarog, ang sentro sa atraksyon nianang dakong panon, si Jesus namulong kanila sa paagi nga wala pay tawo nga nakahimo sa ingon. Ang iyang mga pulong nagpakita ug kahibalo sa mga balaod ug mga institusyon sa Israel, sa sakripisyo nga serbisyo ug sa mga pagtulon-an sa mga manalagna, nga labaw pa kay nianang sa mga sacerdote ug mga rabbi. Iyang gibungkag ang mga babag sa pormalismo ug tradisyon. Ang mga talan-awon sa umalabut nga kinabuhi daw giladlad diha sa Iyang atubangan. Isip usa nga nakakita sa dili Makita, Siya naghisgut sa yutan-on ug sa langitnon, ang tawhanon ug ang diosnon, uban sa positibo nga awtoridad. Ang Iyang mga pulong maoy labing klaro ug makapakonbinsir; ug usab, ingon didto sa Capernaum, ang mga tawo natingala diha sa Iyang pagpanudlo; ‘tungod kay ang Iyang pulong adunay gahum.’ Lucas 4:32 . . . . Ang tanan natingala sa Iyang kahibalo sa balaod ug sa mga tagna.”— Ibid., pp. 452, 453.
Mierkules
, Abril 16
4. PAGDUMOT BATOK SA USA NGA BALAAN
a. Unsa may namatikdan ni Jesus diha sa mga rabbi ug unsang pangutana ang Iyang gibutang ngadto kanila? Juan 7:19.
“Si Jesus mihatag sa mga rabbi ug ebidensya sa Iyang pagkadios pinaagi sa pagpakita nga Siya makabasa sa ilang mga kasingkasing. Sukad sa pag-ayo didto sa Betsaida sila naglaraw sa Iyang kamatayon. Sa ingon sila mismo nagalapas sa balaod nga ilang giangkon nga gidepensahan. ‘Wala ba si Moises maghatag kaninyo ug kasugoan,’ Siya miingon, ngani wala kaninyoy nagatuman sa kasugoan? Nganong nagtinguha man kamo sa pagpatay Kanako?’”- The Desire of Ages, p. 456.
b. Diha sa ilang tubag kang Cristo, sa unsang butang ang mga rabbi nag-akusar Kaniya - ug giunsa man Niya pagtubag? Juan 7:20-23.
“Ngadto niini nga sugyot [nga ang Iyang katingalahang mga buhat giaghat sa usa ka dautang espiritu] Si Cristo wala magtagad. Siya mipadayon sa pagpakita nga ang Iyang buhat sa pagpang-ayo sa Betsaida nahiuyon sa balaod sa Igpapahulay, ug nga kini gipakamatarung pinaagi sa interpretasyon nga ang mga Judeo mismo nagbutang diha sa balaod. Siya miingon, ‘Busa si Moises naghatag kaninyo sa sirkunsisyon; . . . ug sa adlaw nga igpapahulay kamo nagsirkunsidar sa usa ka tawo.’ Sumala sa balaod, ang matag bata kinahanglan nga tulion sa ikawalo nga adlaw. Kon ang tinudlong panahon matunong sa Igpapahulay, nan ang seremonyas kinahanglan nga pagahimoon. Unsa pa ka labaw nga kini nahiuyon sa espiritu sa balaod sa pag-ayo sa tibuok lawas sa usa ka tawo ‘sa adlaw nga Igpapahulay.’ ”— Ibid., pp. 456, 457.
c. Isaysay ang halapad nga kahulogan sa sunod nga pasidaan ni Cristo. Juan 7:24.
“Ang mga pangulo nahilom; ug daghan sa katawhan ang mipahayag, ‘Dili ba mao ni Siya, nga inyong gitinguha sa pagpatay? Apan, tan-awa, maisugon Siya nga nagasulti, ug wala silay gisulti ngadto Kaniya. Nasayud ba gayud ang mga kadagkoan nga kini mao si Cristo?’” – Ibid., p. 457.
“[Si Cristo] wala magtan-aw diha sa gawasnon nga panagway; Siya dili magahukom ingon sa paghukom sa tawo. Dili Niya ginabilihan ang tawo sumala sa iyang ranko, talento, edukasyon, o posisyon. ‘Niining tawhana motan-aw Ako,’ Siya miingon, ‘bisan pa kaniya nga kabus ug adunay Espiritu nga mahinolsulon, ug nga nagapangurog tungod sa akong pulong.’ “– The Signs of the Times, Oktobre 21, 1897.
Huebes
, Abril 17
5. TAWHANON BATOK DIOSNONG PAGHUKOM
a. Giunsa sa Kasulatan paghulagway ang utoknon nga kahimtang sa katilingban dinhi niini nga kalibutan - sagad sa nakita diha sa karaang mga panahon, apan labina karon? Isaias 59:14, 15.
“Ang mga ahensya sa dautan nagkahiusa sa ilang mga pwersa ug nagpalig-on. Sila nagapalig-on alang sa katapusang dako nga krisis. Dagko nga mga kausaban sa dili madugay magakahitabo dinhi sa atong kalibutan, ug ang katapusang mga kalihokan mahimong paspas. . . .
“Ang kaaway nagmalampuson sa pagbalit-ad sa hustisya ug nagpuno sa mga kasingkasing sa mga tawo uban sa tinguha alang sa hinakog nga ganansya. . . . Ang tiyabaw sa gigutom nga katawhan misaka atubangan sa Dios, samtang pinaagi sa matag paagi sa pagdaugdaug ug panghukhok ang mga tawo nagtapok ug dako nga mga bahandi.”- Testimonies for the Church, vol. 9, pp. 11, 12.
b. Taliwala sa kaguliyang, ngano nga kita makasalig sa mga paagi sa Dios? Isaias 55:8, 9.
“Bisan pa nga ang may kinutoban nga mga hunahuna sa mga tawo dili paigo sa pagsulod ngadto sa mga konseho sa Usa nga Walay Kinutoban, o sa pagsabot sa hingpit sa pagbuhat sa Iyang mga katuyoan, apan kasagaran kini tungod sa pipila ka kasaypanan o pagpasagad sa ilang kaugalingon nga bahin nga sila sa ingon dili kaayo makasabot sa mga mensahe sa Langit. Kanunay nga ang mga hunahuna sa mga tawo, ug bisan sa mga ulipon sa Dios, nabutaan pag-ayo pinaagi sa tawhanon nga mga opinyon, ang mga tradisyon ug bakak nga pagtulon-an sa mga tawo, nga sila makahimo lamang sa bahin nga pagsabot sa dagkong mga butang nga Iyang gipadayag diha sa Iyang pulong.”— The Great Controversy, pp. 344, 345.
“Ang tinguha sa Dios alang sa Iyang mga anak mas taas pa kay sa maabot sa labing taas nga hunahuna sa tawo. Iyang gihatag diha sa Iyang balaang balaod ang kopya sa Iyang kinaiya.”—Testimonies for the Church, vol. 8, p. 63.
Biernes
, Abril 18
PERSONAL SUBLI NGA MGA PANGUTANA
1. Ihulagway ang palibot sa panimalay diin gimatuto si Jesus.
2. Sa unsang paagi ang gawi nga gipakita sa mga igsoon ni Cristo sagad nga ginasubli karon?
3. Unsang magkasumpaki nga mga opinyon ang gipakatag mahitungod kang Jesus?
4. Isaysay ang espiritu nga gipakita sa mga rabbi ngadto kang Jesus.
5. Ihulagway ang dakong kalainan tali sa mga dalan sa tawo ug kadtong iya sa Dios.