Domingo
, Mayo 11
1. ANG KAHAYAG GITAGNA
a. Giunsa sa Balaang Espiritu paghisgut kang Jesus pinaagi kang Isaias? Isaias 49:6.
b. Giunsa ni Simeon pag-ila kang Jesus sa dihang Siya gidala ngadto sa templo alang sa dedikasyon - ug sa unsa nga kini makahimo kanato sa pagkonsiderar? Lucas 2:32.
“Ang tigulang nga si Simeon, didto sa templo diin si Cristo karon nagpanudlo, mihisgut Kaniya ingon ‘nga usa ka kahayag aron magdan-ag sa mga Gentil, ug sa himaya sa Imong katawhang Israel.’ Lucas 2:32. Niini nga mga pulong iyang gipadapat ngadto Kaniya ang usa ka tagna nga hinasa sa tibuok Israel. Pinaagi ni propeta Isaias, ang Balaang Espiritu mipahayag, ‘Magaan ra kaayo nga butanga nga Ikaw mahimo nga Akong alagad aron sa pagbangon sa mga banay ni Jacob, ug sa pagpabalik sa salin sa Israel: ako usab ikaw ihatag nga usa ka suga alang sa mga Gentil, aron ikaw mamahimong Akong kaluwasan hangtud sa kinatumyan sa yuta.’ Isaias 49:6, R.V. Kini nga tagna sa kinatibuk-an gisabot ingon nga naghisgut sa Mesias, ug kanus-a si Jesus miingon, ‘Ako mao ang kahayag sa kalibutan,’ ang mga tawo dili mapakyas sa pag-ila Ang Iyang pag-angkon nga mao ang Usa nga Gisaad.”— The Desire of Ages, p. 465.
“Oh, unsa nga leksyon kining talagsaon nga istorya sa Bethlehem! Giunsa kini pagbadlong sa atong
kawalay pagtuo, atong garbo ug pagka-makaugalingon. Sa unsa nga paagi nga kini nagpasidaan kanato sa pagbantay, kay tingali pinaagi sa atong kriminal nga pagkawalay pagtagad mapakyas usab kita sa pag-ila sa mga timailhan sa kapanahonan, ug busa wala mahibalo sa adlaw sa atong pagduaw.”— The Great Controversy, p. 315.
Lunes
, May 12
2. ANG KAHAYAG GISALIKWAY
a. Giunsa sa pangulo nga mga Judeo pagtagad ang misyon ni Cristo? Juan 1:11; 8:13.
“Ang tibuok nga kinabuhi ug mga pagtudlo ni Cristo maoy makanunayon nga mga leksyon sa pagpaubos, kaayo, katarung, ug pagdumili sa kaugalingon. Kini maoy usa ka makanunayon nga pagbadlong sa nagpakamatarung sa kaugalingon, pinikito nga espiritu nga gipakita sa mga Judeo. Si Satanas nagdala kanila hangtud nga sila daw nagbaton ug usa ka kasuko bisan diha sa paghisgut sa kahibulongan nga mga buhat ni Cristo, nga nagadani sa pagtagad sa katawhan gikan kanila. Sila sa kadugay na naghimo sa ilang mga kaugalingon sa pagtuo nga siya usa ka impostor, ug bisan unsang paagi nga ilang mahimong mamugna aron sa pagpahawa Kaniya mahimong usa ka ikaayo nila.” - Spiritual Gifts, vol. 4a, p. 117.
b. Unsang tin-aw nga pagpasabut ang gihatag ni Jesus ngadto sa walay pagtuo nga mga Pariseo - apan unsa man ang ilang tubag? Juan 8:14-18.
“[Ang mga Pariseo] ignorante sa balaanong kinaiya ug misyon [ni Cristo] tungod kay wala sila makasusi sa mga propesiya mahitungod sa Mesias, ingon nga maoy ilang pribilehiyo ug katungdanan nga buhaton. Sila walay koneksyon sa Dios ug sa Langit, ug busa wala makasabut sa buhat sa Manluluwas sa kalibutan, ug, bisan pa nakadawat sila sa labing makapakombinsi nga ebidensya nga si Jesus mao ang Manluluwas, apan nagdumili sila sa pag-abli sa ilang mga hunahuna aron makasabut. Sa sinugdan ilang gipahaluna ang ilang mga kasingkasing batok Kaniya, ug nagdumili sa pagtuo sa labing lig-on nga proyba sa Iyang pagka-dios, ug, ingon nga gisangputan, ang ilang mga kasingkasing mitubo nga mas gahi hangtud nga sila determinado nga dili motuo o modawat Kaniya.”— The Spirit of Prophecy, vol. 2, pp. 354, 355.
c. Unsang dakong kalainan ang giingon ni Jesus nga makita tali sa Iyang kaugalingon ug sa dili matinuohon nga mga Pariseo? Juan 8:19–23.
d. Unsa ang mahimong makamatay nga sangputanan sa pagsalikway sa Judeong mga magmamando kang Cristo? Juan 8:24; Mateo 23:38.
Martes
, Mayo 13
3. DUHA KA SARI SA MGA TIGPAMINAW
a. Human nga gipasidan-an nga mahimong mamatay sila diha sa ilang mga sala, unsa may gipangayo sa mga Pariseo kang Jesus - ug ngano? Juan 8:25 (unang bahin).
“Daw nagbaliwala sa Iyang mga pulong, sila nangutana, ‘Kinsa ba Ikaw?’ Sila desidido sa pagpugos Kaniya sa pagpahayag sa Iyang kaugalingon nga mao ang Cristo. Ang Iyang panagway ug Iyang buhat hilabihan ka sukwahi sa gidahum sa katawhan, nga, ingon sa gitoohan sa Iyang malinglahon nga mga kaaway, ang derekta nga pagpahibalo sa Iyang kaugalingon ingon nga mao ang Mesias naghimo kaniya nga isalikway ingon nga usa ka impostor.”- The Desire of Ages, p. 465.
b. Giunsa sa Manluluwas sa pagtubag kanila - nagpadayag sa Iyang dili ordinaryo nga koneksyon uban sa Amahan? Juan 8:25 (katapusang bahin). 26-29.
“Wala gayud si Cristo motipas gikan sa pagkamaunongon ngadto sa mga prinsipyo sa balaod sa Dios. Wala gayud Siya nakahimo ug bisan unsa nga supak sa kabubut-on sa Iyang Amahan. Sa atubangan sa mga manulonda, mga tawo, ug mga demonyo Siya makasulti sa mga pulong nga kon gikan sa ubang lain nga mga ngabil pagpasipala: ‘Ginabuhat ko kanunay kadtong makapahimuot Kaniya.’ Juan 8:29. Adlaw-adlaw sulod sa tulo ka tuig ang Iyang mga kaaway nagsunod Kaniya, naningkamot sa pagpangitag buling diha sa Iyang kinaiya. Si Satanas, uban sa tanan niyang kaabin sa dautan, naninguha sa pagbuntog Kaniya; apan wala silay nakaplagan diha Kaniya nga pinaagi niini makabaton sila ug bintaha. Bisan ang mga yawa napugos sa pagsugid: ‘Ikaw ang Balaan sa Dios.’ ”— Testimonies for the Church, vol. 8, p. 208.
c. Ihulagway ang adlaw-adlaw nga pagkinabuhi ni Cristo uban sa Iyang Amahan — ug unsaon nato sa pagpakita kana nga kasinatian. Juan 15:10; Efeso 2:4–6.
“Maingon nga si Jesus diha sa tawhanong kinaiya, mao usab ang Dios nagpasabut nga ang Iyang mga sumusunod mahimong ingon. Diha sa Iyang kusog kita magkinabuhi sa kinabuhi nga putli ug kahalangdon nga gikinabuhi sa Manluluwas.”— Ibid., p. 289.
“Ang kinabuhi sa Manluluwas dinhi sa yuta, bisan tuod nagpuyo taliwala sa panagbangi, maoy usa ka kinabuhi sa kalinaw. Samtang ang nasuko nga mga kaaway kanunay nga naggukod Kaniya, Siya miingon, ‘Siya nga nagpadala Kanako ania uban Kanako: ang Amahan wala magbiya kanako nga mag-inusara; tungod kay ginabuhat Ko kanunay ang mga butang nga makapahimuot Kaniya.’ Juan 8:29. Walay bagyo sa tawhanon o satanasnon nga kasuko ang makahimo sa pagtugaw sa kalinaw nianang hingpit nga pakig-uban sa Dios.”— Thoughts From the Mount of Blessing, pp. 15, 16.
Mierkules
, Mayo 14
4. ANG KAHAYAG GIPADAN-AG
a. Samtang si Cristo nagsulti ug mahait nga mga kamatuoran ngadto sa mga Pariseo, sa unsa nga ang Iyang mga pulong nakaapekto sa sincero nga mga nagpatalinghug - ug ngano nga kini magadasig kanato karon? Juan 8:30.
“Si Cristo nakasabut unsaon sa paglihok diha sa kalmado, manggialamon nga paagi, ug sa pagdala ngadto sa pagpakyas sa ilang mga plano sa pagdala Kaniya ngadto sa pagkahinukman sa silot. Ang mga pulong sa Ginoo sama sa mahait nga mga udyong nga miigo sa marka, ug nagsamad sa mga kasingkasing sa Iyang mga magsusumbong. Sa matag higayon nga si Cristo nakigpulong sa katawhan, bisan ang Iyang mamiminaw daghan o dyutay, ang Iyang mga pulong adunay makaluwas nga epekto diha sa mga kalag sa pipila sa Iyang mga tigpaminaw. Walay mensahe nga nahulog gikan sa mga ngabil ni Cristo ang mawala. Matag pulong nga Iyang gisulti nagbutang ug bag-ong responsibilidad niadtong nakadungog niini. Ang mga ministro nga naghatag sa katapusan nga mensahe sa kalooy ngadto sa kalibutan, nga nagpresentar sa kamatuoran diha sa pagkasincero, nga nagsalig sa Dios alang sa kusog, dili angay nga mahadlok nga ang ilang mga paningkamot makawang. Walay usa nga makaingon nga ang pana sa kamatuoran wala moigo sa marka, ug mitusok sa mga kalag niadtong naminaw. Bisan tuod walay mata sa tawo nga makakita sa paglupad sa pana sa kamatuoran, bisan walay tawhanon nga igdulongog ang nakadungog sa singgit sa nasamaran nga kalag, apan ang kamatuoran sa hilom nag-abli sa dalan sa kasingkasing.
Ang Dios nakigsulti ngadto sa kalag, ug sa adlaw sa katapusang paghusay ang ministro sa Dios mobarug uban sa mga tropeyo sa matubosong grasya aron sa paghatag ug pasidungog ngadto kang Cristo, kang kinsa angay ang kadungganan. Ang Dios, nga nakakita sa tago, sa dayag magabalos niadtong nagpahayag sa kamatuoran diha sa Iyang ngalan.”— The Signs of the Times, Pebrero 6, 1896.
b. Gawas sa mga ministro, kinsa pa ang mabulahan pinaagi sa pagpasanag sa kahayag gikan sa langit? Salmo 27:1; 147:15; Isaias 55:10, 11.
“Ang mga tawo nga wala tawaga ngadto sa ministeryo kinahanglang dasigon sa pagpangabudlay alang sa Agalon sumala sa ilang daghang abilidad. Gatusan ka mga lalaki ug babaye karon ang walay trabaho ang makahimo ug hinangpon nga serbisyo. Pinaagi sa pagdala sa kamatuoran ngadto sa mga balay sa ilang mga higala ug mga silingan, makahimo sila ug dakong buhat alang sa Agalon. Ang Dios walay pinalabi sa mga tawo. Siya mogamit sa mapainubuson, debotado nga mga Cristiano, bisan pa nga wala sila makadawat ug bug-os nga edukasyon sama sa nabatonan sa uban. Himoa nga moapil sila sa pag-alagad alang Kaniya pinaagi sa pagbuhat sa balay-balay nga buluhaton. Maglingkod tupad sa daub, sila makahimo — kon mapaubsanon, maalamon, ug diosnon — makabuhat ug labaw pa aron sa pagtagbo sa tinuod nga mga panginahanglan sa mga pamilya kay sa usa ka ordinadong ministro.”— Testimonies for the Church, vol. 7, p. 21.
Huebes
, Mayo 15
5. KAULIPNAN VERSUS KAGAWASAN
a. Unsa may gisulti ni Jesus ngadto sa mga Judeo nga midawat Kaniya? Juan 8:31, 32. Sa katugbang, giunsa sa mga walay pagtuo pagkapakyas sa pagkakita sa bugtong nga kondisyon nga maghimo kanato nga mahigawas gikan sa sala? Juan 8:33-36.
“[Ang mga Pariseo] nahimutang sa labing grabi nga matang sa pagkaulipon - nga gigamhan sa espiritu sa dautan.
“Ang matag kalag nga nagadumili sa paghatag sa iyang kaugalingon ngadto sa Dios anaa nailalum sa lain nga gahum. Siya dili na iya sa iyang kaugalingon. Mahimong siya mohisgut ug kagawasan, apan anaa siya sa labing alaut nga pagka-ulipon. Dili siya tugotan sa pagtan-aw sa katahom sa kamatuoran, tungod kay ang iyang hunahuna anaa nailalum sa pagkontrolar ni Satanas. Samtang siya nagaulo-ulo sa iyang kaugalingon nga siya nagasunod sa dikta sa iyang kaugalingon nga paghukom, siya nagasunod sa kabubut-on sa prinsipe sa kangitngit. Si Cristo mianhi aron sa pagbugto sa mga talikala sa pagkaulipon sa sala gikan sa kalag. . . .
“Diha sa buhat sa pagtubos walay pinugsanay. Walay pwersa sa gawas ang gigamit. Ilalum sa inpluwensya sa Espiritu sa Dios, ang tawo gipasagdan sa pagpili kinsa ang iyang alagaron. Diha sa kausaban nga mahitabo sa dihang ang kalag mosurendir ngadto kang Cristo, adunay pinakataas nga pag-ila sa kagawasan. Ang paghingilin sa sala maoy buhat sa kalag mismo. Tinuod, wala kitay gahum sa pagpahigawas sa atong mga kaugalingon gikan sa pagkontrolar ni Satanas; apan kon kita magatinguha nga mapahigawas gikan sa sala, ug diha sa atong dako nga pagkinahanglan motiyabaw alang sa gahum nga wala sa atong mga kaugalingon, ang mga gahum sa kalag hatagan ug langitnong kusog sa Balaang Espiritu, ug sila motuman sa dikta sa kabubut-on diha sa pagtuman sa kabubut-on sa Dios.
“Ang bugtong kondisyon diin ang kagawasan sa tawo mahimong posibli mao kanang pagkahimong usa uban kang Cristo. ‘Ang kamatuoran magahatag kanimo ug kagawasan;’ ug si Cristo mao ang kamatuoran. Ang sala modaug lamang pinaagi sa pagpaluya sa hunahuna, ug magadaut sa kagawasan sa kalag. Ang pagpasakop ngadto sa Dios maoy pagpahiuli sa usa ka kaugalingon - ngadto sa matuod nga himaya ug dignidad sa tawo. Ang balaanon nga balaod, diin kita dalhon ngadto sa pagpasakop, mao ‘ang kasugoan sa kagawasan.’ Santiago 2:12.” – The Desire of Ages, p. 466.
Biernes
, Mayo 16
PERSONAL SUBLI NGA MGA PANGUTANA
1. Isaysay ang kahulogan sa mga pulong ni Simeon mahitungod kang Jesus.
2. Ihulagway ang pagtrato o pagtagad sa mga escriba ug mga Pariseo kang Cristo.
3. Unsa may nahitabo sa ilang nasud tungod sa pagsalikway kang Jesus?
4. Unsaon sa sincero nga mga kalag ang pagtubag kang Cristo - kaniadto ug karon?
5. Isaysay ang konsepto sa “kagawasan” diha sa kahayag sa kamatuoran sa ebanghelyo.