Domingo
, Abril 20
1. ANG INTERES SA KATAWHAN DIHA KANG JESUS
a. Diha sa pagkadungog ug pagkakita nga si Jesus nagwali sa dayag, unsa may gipangutana sa pipila sa mga Judeo? Juan 7:25, 26.
“Daghan sa taliwala sa mga tigpaminaw ni Cristo nga nagpuyo diha sa Jerusalem, ug kinsa dili ignorante sa mga laraw sa mga pangulo batok Kaniya, nagabati sa ilang mga kaugalingon nga nadala ngadto Kaniya pinaagi sa dili masupak nga gahum. Ang konbiksyon nagtandog diha kanila nga Siya Anak sa Dios.”- The Desire of Ages, p. 457.
b. Giunsa ni Satanas pagbuhat diha sa mga pangulo aron sa pagpaukyab sa pagduhaduha? Juan 7:27.
“Si Satanas andam sa pagsugyot ug pagduhaduha; ug alang niini ang dalan naandam pinaagi sa ilang kaugalingong sayop nga mga ideya sa Mesias ug sa Iyang pag-abot. Gituohan sa kadaghanan nga si Cristo matawo sa Betlehem, apan human sa usa ka panahon Siya mawala, ug sa Iyang ikaduhang pagpadayag walay makahibalo kon diin Siya gikan. Daghan ang nagtuo nga ang Mesias walay natural nga relasyon sa katawhan. Ug tungod kay ang inila nga pagsamkon sa himaya sa Mesias wala makita diha kang Jesus nga Nazaretnon, daghan ang namati sa sugyot, ‘Apan nahibaloan nato kining Tawhana kon diin Siya gikan: apan sa dihang moabot si Cristo, walay tawo nahibalo kon diin Siya gikan.’ ”— Ibid.
Lunes
, Abril 21
2. MALISYOSO NGA MGA PLANO NAPUGNGAN
a. Diha sa pagbasa sa mga hunahuna sa Iyang maduhaduhaon nga mga tigpaminaw, unsa may gisulti ni Jesus ngadto kanila? Juan 7:28.
“Samtang sila nagduhaduha tali sa pagduhaduha ug pagtuo, si Jesus midawat sa ilang mga hunahuna ug mitubag kanila: Kamo nakaila Kanako, ug kamo nahibalo diin Ako gikan: ug Ako wala moanhi sa Akong Kaugalingon, kondili Siya nga nagpadala Kanako tinuod, nga wala ninyo hiilhi.’ Nag-angkon sila ug kahibalo kon unsa ang gigikanan ni Cristo, apan sila anaa sa hingpit nga pagkawalay alamag niini. Kon sila nagkinabuhi sumala sa kabubut-on sa Dios, nakaila unta sila sa Iyang Anak sa dihang Siya nagpakita kanila.”— The Desire of Ages, p. 457.
b. Kulang sa mga argumento aron sa pagsupak kang Jesus, sa unsa nga paagi ang mga pangulo sa Judeo naningkamot sa pagpahilom Kaniya? Juan 7:30 (unang bahin). Sa tinud-anay lang, nganong dili man sila makadakop Kaniya? Juan 7:30 (katapusan nga bahin).
“Ang mga tigpaminaw dili makasabot sa mga pulong ni Cristo. Sa kaklaro sila usa ka pagsubli sa pag-angkon nga Iyang gihimo sa atubangan sa Sanhedrin daghang mga bulan nga minglabay, sa dihang Iyang gipahayag ang Iyang kaugalingon nga Anak sa Dios. Ingon sa mga magmamando kaniadto misulay sa paglikos sa Iyang kamatayon, busa karon naninguha sila sa pagdakop Kaniya; apan sila gipugngan sa usa ka dili makita nga gahum, nga nagbutang ug limitasyon sa ilang kasuko, nga nag-ingon kanila, kutob ra kamo dinhi, ug dili na sa unahan.”— Ibid.
c. Giunsa sa kadaghanan pagpahayag ang ilang pagtuo kang Jesus — ug unsay plano sa mga pangulo sa higayon nga ilang naamgohan ang simpatiya sa mga tawo alang Kaniya? Juan 7:31, 32.
“Ang mga pangulo sa mga Pariseo, nga matinguhaon nga nagbantay sa dagan sa mga panghitabo, nakuha ang mga pagpahayag sa simpatiya taliwala sa panon. Nagdali ngadto sa pangulo nga sacerdote, sila nagplano sa pagdakop Kaniya. Bisan pa niana sila nagpahalona, sa pagkuha Kaniya sa diha nga Siya nag-inusara; kay wala sila mangahas sa pagdakop Kaniya diha sa presensya sa katawhan.”— Ibid., pp. 457, 458.
Martes
, Abril 22
3. ANG INBITASYON
a. Diha sa katapusang adlaw sa fiesta, unsang matahom nga ilustrasyon ang gigamit ni Jesus aron sa pagtanyag ug kahumpayan ngadto sa mga kalag nga gikapuyan sa sala? Juan 7:37, 38.
“Ang kasingkasing nga modawat sa pulong sa Dios dili sama sa linaw nga moalisngaw, dili sama sa busloton nga sudlanan nga nawad-an sa iyang bahandi. Kini sama sa sapa sa bukid, gipakaon pinaagi sa dili mapakyas nga mga tuboran, kansang bugnaw, naggilakgilak nga mga tubig nagaambak gikan sa bato ngadto sa bato, nga nagapapresko sa gikapoy, giuhaw, nabug-atan. Kini sama sa suba nga kanunay nagdagayday ug, samtang kini nagaabanti, nahimong mas lawom ug mas lapad, hangtud nga ang iyang nagahatag ug kinabuhi nga katubigan mokaylap sa tibuok yuta. Ang sapa nga nagaawit sa iyang agianan nagbilin sa iyang gasa sa pagkalunhaw ug mas presko nga lunhaw, ang mga kahoy adunay mas daghang kabulakan, ang mga bulak mas daghan. Sa diha nga ang yuta naghay-ad nga hubo ug kayumanggi ilawom sa makapaso nga kainit, ang usa ka linya sa kadahonan ang nagtimaan sa agianan sa suba.
“Mao man usab kini sa tinuod nga anak sa Dios. Ang relihiyon ni Cristo nagpadayag sa iyang kaugalingon ingon nga usa ka makapalagsik, makapatuhop nga prinsipyo, usa ka buhi, nagabuhat, espirituhanong kusog. Sa dihang ang kasingkasing naablihan ngadto sa langitnong inpluwensya sa kamatuoran ug gugma, kini nga mga prinsipyo modagayday pag-usab sama sa mga sapa sa disyerto, nga mopakita sa pagkamabungahon diin karon ang pagkawalay bunga ug pagkagutom.”— Prophets and Kings, pp. 233, 234.
“‘Kon adunay si bisan kinsa giuhaw’ alang sa masaligon nga paglaum, alang sa kaluwasan gikan sa dautan nga mga kahiligan, si Cristo nag-ingon, ‘umari siya Kanako, ug paimna.’ Juan 7:37.”— The Ministry of Healing, p. 179.
b. Unsaon nga kini nga inbitasyon sa dugang pa masabtan? Juan 7:39.
“Gipresentar ni Cristo ang mga prinsipyo sa kamatuoran diha sa ebanghelyo. Sa Iyang pagtudlo makahimo kita sa pag-inom sa putli nga mga sapa nga nagdagayday gikan sa trono sa Dios.”—Testimonies for the Church, vol. 8, p. 309.
“Ang atong gikinahanglan mao ang usa ka buhi nga relihiyon. Usa ka indibidwal nga gipaluag nga mga pagsabot sa katungdanan, kansang kalag anaa sa pakigdugtong sa Dios ug kinsa puno sa kasibot alang kang Cristo, makahatag ug gamhanang inpluwensya alang sa kaayohan. Siya magainom sa dili mabaw, lapokon, hugaw nga sapa, apan gikan sa putli, lawom nga tubig sa tuboran; ug siya makatunol ug bag-ong espiritu ug gahum ngadto sa iglesya. Sa dihang ang pag-ataki gikan sa gawas magadugang, ang Dios magpabaskog sa Iyang iglesya pinaagi sa sagrado, solemne nga mga kamatuoran nga ilang gitoohan. Ang Balaan nga Espiritu gikan sa langit, nga nagabuhat uban sa mga anak nga lalake ug mga anak nga babaye sa Dios, mobuntog sa mga babag ug mogunit sa bantaaw nga dapit batok sa kaaway. Ang Dios adunay dagkong mga kadaugan nga gitagana alang sa Iyang nagahigugma sa kamatuoran, nagtuman sa kasugoan nga katawhan.”— Ibid., vol. 5, p. 581.
Mierkules
, Abril 23
4. MGA PULONG NGA WALAY SAMA
a. Ingon nga resulta sa paghisgut ni Cristo sa tubig sa kinabuhi, unsa may giingon sa kadaghanan - ug ngano? Juan 7:40 (itandi sa Deuteronomeo 18:15).
b. Samtang nga ang uban nadasig uban sa paglaum tungod sa maong pagdahum, unsa may reaksyon sa uban? Juan 7:41-44.
c. Unsang sugo ang nadawat sa mga opisyal gikan sa ilang mga pangulo? Juan 7:45. Nganong dili nila kaya nga dakpon si Jesus? Juan 7:46.
“Diha sa katapusang adlaw sa fiesta, ang mga sulogoon nga gipadala sa mga sacerdote ug mga punoan aron sa pagdakop kang Jesus, namalik nga wala Siya madala. Sila gisukna uban sa kasuko, ‘Nganong wala Ninyo Siya madala?’ Uban ang solemne nga panagway sila mitubag, ‘Wala pa gayud ing tawo nga nagsulti sa ingon.’
“Napagahi ingon sa ilang mga kasingkasing, sila napahumok sa Iyang mga pulong. Samtang Siya nagasulti diha sa sawang sa templo, sila nagpaduol, sa paglit-ag nga mahimong isumbat batok Kaniya. Apan sa dihang sila namati, ang katuyoan diin sila gipadala nalimtan. Sila nagbarug ingon nga mga tawo nga misulod. Si Cristo nagpadayag sa Iyang kaugalingon ngadto sa ilang mga kalag. Sila nakakita nga diin ang mga sacerdote ug mga pangulo dili makakita – ang pagkatawhanon natugob uban sa himaya sa pagkabalaan.” - The Desire of Ages, p. 459.
“[Si Cristo] migamit sa mga butang sa kinaiyahan diin sila hinasa, aron sa paghulagway sa balaan nga kamatuoran. Ang yuta sa kasingkasing sa ingon naandam sa pagdawat sa maayong binhi. Iyang gipabati sa Iyang mga tigpaminaw nga ang Iyang mga interes nahiusa uban sa ilaha, nga ang iyang kasingkasing nagapitik sa simpatiya kanila diha sa ilang mga kalipay ug kaguol. Diha sa samang panahon ilang nakita diha Kaniya ang pagpadayag sa gahum ug pagkalabaw nga mas labaw kay sa gipanag-iya sa ilang labing gipasidunggan nga mga rabbi. Ang mga pagtulon-an ni Cristo maila uban sa usa ka kayano, dignidad, ug gahum nga wala nila nahibal-an kaniadto, ug ang ilang wala tuyoa nga pahayag mao: ‘Wala gayoy tawo nga nakasulti sama niining Tawhana.’ Ang mga tawo naminaw Kaniya nga malipayon; apan ang mga sacerdote ug ang mga punoan — sa ilang kaugalingon dili matinud-anon sa ilang katungdanan ingon nga mga magbalantay sa kamatuoran — nagdumot kang Cristo tungod sa grasya nga gipadayag, nga nagganoy sa panon sa katawhan palayo gikan kanila aron sa pagsunod sa Kahayag sa kinabuhi. Pinaagi sa ilang inpluwensya ang nasud nga Judeo, napakyas sa pag-ila sa Iyang diosnong kinaiya, misalikway sa Manunubos.”— Testimonies for the Church, vol. 5, p. 747.
Huebes
, Abril 24
5. USA KA SINCERO NGA MAGPAPANGITA NAGKAHINGKOD
a. Giunsa sa pangulo nga mga sacerdote ug mga Pariseo pagbadlong ang mga opisyal? Juan 7:47-49.
b. I-asoy ang panag-storyahay nga misunod uban kang Nicodemo - nga nagpakita sa iyang pagtubo sukad sa iyang gabii nga pagpakighinabi kang Cristo diha sa Juan kapitulo 3. Juan 7:50-52.
“[Si Nicodemo] nagtipig sa kamatuoran diha sa iyang kasingkasing, ug sulod sa tulo ka tuig adunay dyutay lamang makita nga bunga. Apan samtang si Nicodemo wala sa dayag moila kang Cristo, siya diha sa konseho sa Sanhedrin sa makadaghan nagsanta sa mga laraw sa mga sacerdote aron sa paglaglag Kaniya.”— The Acts of the Apostles, p. 104.
“Ang leksyon nga gihatag ni Cristo kang Nicodemo [sa iyang gabii nga pagbisita diha sa Juan kapitulo 3] wala makawang. Ang konbiksyon misantop sa iyang hunahuna, ug diha sa iyang kasingkasing gidawat niya si Jesus. Sukad sa iyang pakighinabi sa Manluluwas, siya sa kamatinguhaon nagsusi sa mga Kasulatan sa Daang Tugon, ug nakakita siya sa kamatuoran nga napahalona diha sa matuod nga han-ay sa ebanghelyo.
“Ang pangutana nga gipangutana niya maalamon, ug makadayeg unta sa iyang kaugalingon ngadto niadtong nagdumala sa konseho kon wala pa sila malingla sa kaaway. Apan sila napuno pag-ayo sa pagpihig nga walay argumento pabor kang Jesus nga Nazaretnon, bisan unsa ka makapakonbinsir, adunay bisan unsa nga gibug-aton uban kanila. Ang tubag nga nadawat ni Nicodemo mao, ‘Taga-Galilea ka ba usab? Susiha, ug tan-awa: kay gikan sa Galilea walay propeta nga motungha.’
“Ang mga sacerdote ug mga magmamando nalimbongan, ingon sa gitinguha ni Satanas kanila, ngadto sa pagtuo nga si Cristo mitungha gikan sa Galilea. Ang pipila nga nasayud nga siya natawo sa Betlehem, nagpakahilom, aron nga ang kabakakan dili maagaw sa gahum niini.”— The SDA Bible Commentary [E. G. White Comments], vol. 5, p. 1136.
Biernes
, Abril 25
PERSONAL SUBLI NGA MGA PANGUTANA
1. Nganong nadani ni Jesus ang pagtagad ug pagtahod sa mga tawo?
2. Giunsa sa Judeo nga mga magmamando pagpadayon sa pagsulay sa pagpahunong kang Jesus?
3. Unsang publikong hangyo ang gihimo ni Jesus sa katapusang adlaw sa fiesta?
4. Isaysay ang dakong kontrobersiya nga misunod ingon nga resulta.
5. Naghunahuna ug mga tawo nga akong nailhan, unsa ang akong mahinumduman mahitungod kang Nicodemo?