Domingo
, Hunyo 8
1. ANG KAWATAN UG ANG MAGBALANTAY
a. Giunsa ni Jesus pag-ila tali sa kawatan ug sa magbalantay, ug unsang espirituwal nga leksyon ang iyang gi-ilustrar? Juan 10:1, 2.
“Gigamit ni Cristo kini nga mga tagna [nagtumong sa pastoral nga bulohaton sa Mesias, ingon nga makita sa Isaias 40:9–11; Salmo 23:1, ug Ezequiel 34:23, 16, 25, 28] ngadto sa Iyang kaugalingon, ug Iyang gipakita ang kalainan tali sa Iyang kaugalingong kinaiya ug nianang sa mga pangulo sa Israel. Ang mga Pariseo bag-o pa lang nag-abog ug usa gikan sa toril, tungod kay siya nangahas sa pagsaksi sa gahum ni Cristo. Ilang giputol ang usa ka kalag kinsa ang gidani sa matuod nga magbalantay ngadto sa Iyang kaugalingon. Dinhi niini ilang gipakita ang ilang mga kaugalingon ingon nga ignorante sa buhat nga gisalig ngadto kanila, ug dili takus sa ilang pagsalig ingon nga magbalantay sa mga panon sa carnero. Gibutang karon ni Jesus sa ilang atubangan ang kalainan tali kanila ug sa Maayong Magbalantay, ug Siya nagtudlo sa Iyang kaugalingon ingon nga mao ang matuod nga magbalantay sa panon sa Ginoo.”— The Desire of Ages, p. 477.
“Si Cristo nagahigugma kanato tungod kay kita walay mahimo ug nagsalig.”— Sermons and Talks, vol. 1, p. 248.
b. Unsang relasyon ang makita tali sa carnero ug sa ilang magbalantay? Juan 10:3, 4. Unsa may buhaton sa mga carnero atubangan sa usa ka estranghero? Juan 10:5.
Lunes
, Hunyo 9
2. ANG GANGHAAN SA TORIL
a. Giunsa ni Jesus pagpakita ang Iyang kaugalingon nga kalainan ngadto sa mga Pariseo? Juan 10:7-10.
“Si Cristo mao ang pultahan sa panon sa Dios. Pinaagi niini nga pultahan ang tanan Niyang mga anak, gikan sa pinakaunang mga panahon, nakakaplag ug agianan. Diha kang Jesus, ingon nga gipakita sa mga tipo, ingon nga gianinohan sa mga simbolo, ingon nga gipakita sa pagpadayag sa mga propeta, ingon nga gipadayag diha sa mga leksyon nga gihatag ngadto sa Iyang mga tinun-an, ug sa mga milagro nga nahimo alang sa mga anak sa mga tawo, ilang nakita ang ‘Cordero sa Dios, nga mikuha sa sala sa kalibutan’ (Juan 1:29), ug pinaagi Kaniya sila madala sa sulod sa toril sa Iyang grasya. Daghan ang mianhi nga nagpresentar sa ubang mga butang alang sa pagtuo sa kalibutan; ang mga seremonyas ug mga sistema gimugna diin ang mga tawo naglaum nga makadawat sa pagkamatarung ug pakigdait uban sa Dios, ug sa ingon makakaplag ug agianan ngadto sa Iyang panon. Apan ang pultahan lamang mao si Cristo, ug ang tanan nga nagpataliwala sa usa ka butang aron makuha ang lugar ni Cristo, ang tanan nga misulay sa pagsulod sa toril sa laing paagi, mga kawatan ug mga tulisan.
“Ang mga Pariseo wala makasulod sa pultahan. Nisaka sila sa toril sa laing paagi kay sa kang Cristo, ug wala nila matuman ang buhat sa tinuod nga magbalantay sa carnero. Ang mga sacerdote ug ang mga punoan, ang mga escriba ug ang mga Pariseo, miguba sa buhi nga mga sibsibanan, ug naghugaw sa mga atabay sa tubig sa kinabuhi. Tinuod gayud ang mga pulong sa inspirasyon naghulagway niadtong mini nga mga magbalantay: ‘Ang mga masakiton wala Ninyo lig-ona, ni inyong giayo ang masakiton, ni inyong gibugkosan kadtong nadugmok, ni ibalik ninyo kadtong gipapahawa; . . . apan uban ang puwersa ug uban ang kabangis gimandoan ninyo sila.’ Ezequiel 34:4.”— The Desire of Ages, pp. 477, 478.
b. Sa unsang paagi lahi ang tinuod nga magbalantay gikan sa sinuholan? Juan 10:11–13.
“Adunay gipangita, dili lamang mga tawo nga makahimo sa pagwali, kondili kadtong adunay usa ka eksperimento nga kahibalo sa misteryo sa pagkadiosnon, ug kinsa makatagbo sa dinalian nga mga panginahanglan sa katawhan — kadtong nakaamgo sa kamahinungdanon sa ilang posisyon isip mga alagad ni Jesus, ug malipayong magpas-an sa krus nga anaa Kaniya mitudlo kanila unsaon sa pagpas-an.
“Mahinungdanon kaayo nga ang usa ka pastor makig-uban pag-ayo sa iyang katawhan, ug sa ingon mahimong masinati ang lain-laing mga hugna sa kinaiya sa tawo. Siya kinahanglan mokat-on sa mga buhat sa hunahuna, aron iyang ipahiangay ang iyang mga pagtulon-an ngadto sa salabutan sa iyang mga tigpaminaw. Sa ingon siya makakat-on nianang dakong gugma nga maangkon lamang niadtong nagtuon pag-ayo sa kinaiyahan ug mga panginahanglan sa mga tawo.”— Gospel Workers, p. 191.
Martes
, Hunyo 10
3. ANG TIPIKAL NGA MAAYONG MAGBALANTAY
a. Unsa pang uban nga kinaiyahan sa maayong magbalantay ang gipakita ni Jesus? Juan 10:14, 15.
“Ingon nga ang usa ka yutan-on nga magbalantay nakaila sa iyang mga carnero, mao usab ang balaan nga Magbalantay nahibalo sa iyang panon nga nagkatibulaag sa tibuok kalibutan. ‘Kamo Akong panon, ang panon sa Akong sibsibanan, mga tawo, ug ako mao ang inyong Dios, nag-ingon ang Ginoong Dios.’ Si Jesus miingon, ‘Ako nagtawag kanimo pinaagi sa imong ngalan; ikaw Akoa.’ ‘Gikulit ko ikaw sa mga palad sa Akong mga kamot.’ Ezequiel 34:31; Isaias 43:1; 49:16.
“Si Jesus nakaila kanato sa tinagsatagsa, ug natandog sa pagbati sa atong mga kaluyahon. Siya nakaila kanatong tanan pinaagi sa ngalan. Nasayud siya sa balay diin kita nagpuyo, ang pangalan sa matag nagpuyo. Siya usahay mihatag ug mga direksyon ngadto sa Iyang mga sulugoon sa pag-adto ngadto sa usa ka kalye sa usa ka ciudad, ngadto nianang balay, aron sa pagpangita sa usa sa Iyang mga carnero.
“Ang matag kalag nailhan kaayo ni Jesus nga daw ingon nga siya lamang ang usa nga gipakamatyan sa Manluluwas. Ang kasakit sa matag usa nakatandog sa Iyang kasingkasing. Ang tiyabaw alang sa panabang makaabut sa Iyang igdulongog. Siya mianhi aron sa pagdani sa tanang mga tawo ngadto sa Iyang kaugalingon. Siya nagmando kanila, ‘Sunod Kanako,’ ug ang Iyang Espiritu magalihok diha sa ilang mga kasingkasing sa pagdani kanila sa pagduol ngadto Kaniya. Daghan ang nagadumili nga madani. Si Jesus nahibalo kon kinsa sila. Nahibal-an usab niya kon kinsa ang malipayon nga maminaw sa Iyang pagtawag, ug andam sa pagpailalum sa Iyang maamomahon nga pag-atiman. Siya miingon, ‘Ang akong mga carnero mamati sa Akong tingog, ug ako nakaila kanila, ug sila magsunod Kanako.’ Siya nag-atiman sa matag usa ingon nga daw wala nay lain pa dinhi sa ibabaw sa yuta.”— The Desire of Ages, pp. 479, 480.
b. Alang sa unsang uban pa nga mga carnero si Jesus nagpakitag pagtagad? Juan 10:16.
“Si Jesus naghunahuna sa mga kalag sa tibuok yuta nga gipahisalaag sa mini nga mga magbalantay. Kadto sila nga Iyang gitinguha nga tigumon ingon nga mga carnero sa Iyang sibsibanan nagkatibulaag taliwala sa mga lobo, ug Siya miingon, ‘Ako adunay uban nga mga carnero, nga wala niining torila; kinahanglan usab nga dad-on ko sila, ug sila magapatalinghug sa akong tingog; ug sila mahimong usa ka panon, usa ka magbalantay.’ Juan 10:16, R.V.”— Ibid., p. 483.
“Ang Dios adunay mga mutya sa tanang mga iglesia, ug dili alang kanato ang paghatag ug maharuson nga pagpanaway sa nag-angkon nga relihiyoso nga kalibutan, kon dili diha sa pagpaubos ug gugma, ipakita sa tanan ang kamatuoran ingon nga kini anaa kang Jesus. Himoa nga ang mga tawo makakita ug pagkamaayo ug debosyon, himoa nga sila makakita ug pagkasama kang Cristo nga kinaiya, ug sila madani ngadto sa kamatuoran.”— The SDA Bible Commentary [E. G. White Comments], vol. 4, p. 1184.
Mierkules
, Hunyo 11
4. DIOSNON NGA GAHUM
a. Unsang diosnong gahum ang gipahayag ni Jesus nga Iyang nabatonan? Juan 10:17, 18.
“‘Tungod niini ang Amahan nahagugma kanako, kay Ako nagahatag sa akong kinabuhi, aron pagadawaton ko kini pag-usab.’ Nga mao, ang Akong Amahan nahigugma pag-ayo kaninyo, nga Siya nagahigugma Kanako ug labi tungod sa paghatag sa Akong kinabuhi aron sa pagtubos kaninyo. Sa pagkahimong inyong kahalili ug piyansa, pinaagi sa pagtugyan sa Akong kinabuhi, pinaagi sa pagkuha sa inyong mga tulobagon, inyong mga kalapasan, Ako gihigugma kaayo sa Akong Amahan.
“‘Ako naghatag sa Akong kinabuhi, aron pagadawaton ko kini pag-usab. Walay bisan kinsa nga makakuha niini gikan Kanako, hinonoa ginahalad Ko kini sa kinaugalingon kong pagbuot, ug Ako adunay gahum sa pagkuha niini pag-usab.’ Samtang ingon nga sakop sa tawhanon nga pamilya Siya mamalatyon, ingon nga Dios Siya mao ang tuboran sa kinabuhi alang sa kalibutan. Makahimo Siya sa pagbarug sa mga pagdasdas sa kamatayon, ug modumili sa pagpailalum sa pagbulot-an niini; apan sa kinabubut-on Iyang gitugyan ang Iyang kinabuhi, aron nga Siya makadala ug kinabuhi ug dili mamalatyon ngadto sa kahayag. Iyang gipas-an ang sala sa kalibutan, nag-antus sa tunglo niini, naghatag sa Iyang kinabuhi ingon nga usa ka sakripisyo, aron nga ang mga tawo dili sa dayon mamatay. ‘Sa pagkatinuod Iyang gipas-an ang atong mga kasakitan, ug midala sa atong mga kasub-anan. . . . Siya nasamaran tungod sa atong mga kalapasan, Siya napangus tungod sa atong mga kalapasan: ang silot sa atong pakigdait diha sa ibabaw Niya; ug tungod sa Iyang mga labod kita nangaayo. Kitang tanan sama sa mga carnero nga nanghisalaag; ang tagsatagsa kanato misimang sa iyang kaugalingon nga dalan; ug gibutang ni Jehova diha Kaniya ang kasal-anan nato nga tanan.’ Isaias 53:4-6.”- The Desire of Ages, pp. 483, 484.
b. Unsa may nagdala sa mga tawo sa pagsunod kang Cristo? Juan 10:27; 1 Juan 4:10, 19.
“Dili ang kahadlok sa silot, o ang paglaum sa walay katapusang ganti, ang nagdala sa mga tinun-an ni Cristo sa pagsunod Kaniya. Ilang nakita ang hilabihan ka dako nga gugma sa Manluluwas, nga gipadayag sa tibuok Niyang pagpanaw dinhi sa yuta, gikan sa pasungan sa Betlehem ngadto sa krus sa Kalbaryo, ug ang pagtan-aw Kaniya makadani, kini makapahumok ug makabuntog sa kalag. Ang gugma mapukaw diha sa kasingkasing sa mga nagtan-aw. Ilang nadungog ang Iyang tingog, ug sila nagsunod Kaniya.”— Ibid., p. 480.
“Atong tagdon ang Iyang kinabuhi dinhi sa yuta, ang Iyang sakripisyo alang kanato, ang Iyang buhat didto sa langit ingon nga atong manlalaban, ug ang mga puloy-anan nga Iyang giandam alang niadtong nahigugma Kaniya, ug kita igo lamang makatuaw, O kataas ug giladmon sa gugma ni Cristo!”— The Acts of the Apostles, p. 334.
Huebes
, Hunyo 12
5. KASIGUROHAN SA KALUWASAN
a. Unsa nga pasalig ang gihatag ni Jesus ngadto sa Iyang carnero? Juan 10:28, 29.
“Bisan tuod karon Siya mikayab na ngadto sa presensya sa Dios, ug miambit sa trono sa uniberso, si Jesus wala mawad-i sa Iyang maloloy-on nga kinaiya. Karon adlawa ang samang maloloy-on, mabination nga kasingkasing abli ngadto sa tanang kaalautan sa tawo. Karon ang kamot nga nasamaran gituyhad aron sa pagpanalangin sa labi pa gayud ka madagayaon sa Iyang katawhan nga ania sa kalibutan. ‘Ug sila dili na gayud malaglag, ni adunay si bisan kinsa nga tawo nga makakuha kanila gikan sa Akong kamot.’ Ang kalag nga naghatag sa iyang kaugalingon ngadto kang Cristo labaw pa ka bililhon sa Iyang panan-aw kay sa tibuok kalibutan. Ang Manluluwas buot mosinati ug kasakitan sa Kalbaryo aron nga ang usa maluwas sa Iyang gingharian. Dili gayud Niya biyaan ang usa nga Iyang gipakamatyan. Gawas kon ang Iyang mga sumosunod mopili sa pagbiya Kaniya, Siya magakupot kanila.”—The Desire of Ages, pp. 480–483.
b. Diha sa unsa nga ang atong espirituwal nga siguridad ug kasigurohan sa kaluwasan gibasi? Roma 8:31–39.
“Sa mga korte sa itaas, si Cristo nangamuyo alang sa Iyang Iglesia — nangamuyo alang niadtong kinsa Iyang gibayran sa bili sa pagtubos sa Iyang dugo. Mga siglo, mga katuigan, dili gayud makapakunhod sa kaepektibo sa Iyang matuboson nga sakripisyo. Dili kinabuhi o kamatayon, gitas-on o giladmon, ang makapahimulag kanato gikan sa gugma sa Dios nga anaa kang Cristo Jesus; dili tungod kay kita mikupot pag-ayo Kaniya, kondili tungod kay gikuptan ta Niya pag-ayo. Kon ang atong kaluwasan nagdepende sa atong kaugalingong mga paningkamot, dili gyud kita maluwas; apan kini nagdepende sa Usa nga nagpaluyo sa tanan nga mga saad. Ang atong pagkupot Kaniya mahimong daw huyang, apan tungod kay ang Iyang gugma usa man ka gugma sa magulang nga igsoon; samtang atong mintinahon ang atong pagkahiusa Kaniya, walay makaagaw kanato gikan sa Iyang kamot.”— The Acts of the Apostles, pp. 552, 553.
Biernes
, Hunyo 13
PERSONAL SUBLI NGA MGA PANGUTANA
1. Isaysay ang kalainan sa pagginawi tali sa usa ka magbalantay ug sa usa ka kawatan.
2. Pinaagi sa unsa pang lain nga simbolo nga gipaila ni Jesus ang Iyang kaugalingon?
3. Sa unsang paagi ang tinuod nga mga magbalantay naggawi sa ilang mga carnero?
4. Ngano nga ang mga carnero nagsunod sa magbalantay ug dili sa usa ka dumoluong?
5. Isaysay kon sa unsang paagi kita makasigurado sa kaluwasan.